Brindes
Gaitan Cresp Legorin (1852-1913)
Brindes
BRINDES
dedicaa a Gaitan Sbodi
organizzador di fest per el
Centenari del Stracchin de Gorgonzœula
celebraa el 8 November 1886
De Milan i raviœu, el panatton;
i bescott de Novara; i grissitt
de Turin, de Trevij i melon;
e de Comm, missolin, scigollitt;
paparell genovês, el sciampett
modenes; i fasœu fiorentin,
de Saronn i famosi amarett;
de Cremona, torron, codeghin,
la mostarda; de Lod el granon,
la lugânega, quella de monscia;
de Pavïa, el buttêr, mascarpon;
de Livorno i oliv con la conscia;
el salamm col fenocc, veronês;
bicciolan savorii de Verzej,
mortadell, cappellett bolognês:
e de Bust salamm crud, pan de mej;
bussolà di Brescian; panpepato
di Roman, el panfort di Sienês;
de Venezia ostregh, trili, bisato,
e quii bon perseghitt de Varês;
macaron, figh de Napoli e infin
i naranz de Palerma, in onor
tò de tì, car el noster stracchin,
hann mandaa sta corona de fior.
Viva donca, su insemma vosee,
ai fradej e sorell... del stracchin;
viva viva, su in gamba e cerchee
de vess semper d'accord e, (se infin
succedess el bisogn) de fà ved
che sii bon patriott, che sii fort,
pien de vita, de fœugh e de fed,
che soffrii nè insolenz nè de intort,
che se vialter sii dolz e mostôs
quand ve goden in mezz a on disnà,
sii de fer al contrari e besiôs
quand intacchen l'onor de la cà.