Božemje Budyšinej

nadpis	Božemje Budyšinej
awtor	Handrij Zejler
lěto
žórło	http://texty.citanka.cz/
licenca	public domain
nota	stary prawopis

    Nětk nastaju so z Budyšina,
    Hdźež mój rjany přebytk bě,
    Mój wosud chce, to njeje hina,
    Sprjewi dać mam styskanje;
    O přećelo, mój Budyš'no,
    Mój zabyć njemóžemoj so.

    Mi złote hodźinki tu kćěchu,
    Lěta zbóžnje zlećachu,
    Nětk wjedźe puć pod druhu třěchu,
    Drohu ćahnu zahórsku;
    O přećelo, mój Budyš'no, Mój zabyć njemóžemoj so.

    Chcu sebi kwětki šćipać druhdźe,
    Wěnašk radosće sej wić,
    Wšak swěće róže kćěja wšudźe,
    Štož tam njej', chcu přimyslić;
    O přećelo, mój Budyš'no,
    Mój zabyć njemóžemoj so.