Bože sedleško

nadpis	Bože sedleško
awtor	Handrij Zejler
lěto
žórło	http://texty.citanka.cz/
licenca	public domain
nota	stary prawopis

    Płakało Bože sedleško
    Na Žmórcu šmrěkojtym.
    Na wjeŕšku hory płakało
    Při swětle měsačnym.

    So prašała je šmrěčina
    A buki pod horu,
    Što sylzow winu porodźa
    Božemu sedlešku.

    Su škraholcy tež słyšeli
    Na hałzach jehłojtych
    Płač zrudny, kiž jich wubudźi
    Ze spanja zasparnych.

    A wotmołwić to sedleško
    Tam sobu słyšachu:
    Sym serbske hona wobešło,
    Tak šěroke hač su.

    Ze zrudnym smjertnym wobwěškom
    Wobwiwa Serbstwo so;
    Ze zwóńcow zwuk "pój dom, pój dom"!
    Sym padać słyšało.

    Škraholcy wótrych pazorow,
    Mi słowa nješkrěčće,
    Kiž njeńdu wam do wutrobow,
    Mje rudźa žałostnje.