Bim tävelas

Su nisul Madagascar fotabim milagik glofom, penemöl bim tävelas. Rivom geili de füts plu ka 30 du bleds omik vedoms lonedik füts 6-7. Polom fluki smeköl gudiko; ye lönüg pedivöl üno binom, das ninom mödi gletik vata klinik, flifik i du yelatim hitikün, e pledalom so täveles nekulivöpa pladi fonädas. Mens, kels voboms nilü bims somik, no deblinoms dlinavati okas se flums, sod se bim makabik at. Tävel sembal nunodom, das, ven edotom balna tefü velat konas polelas oka, sembal manas at espinom me sped dibiko toläds 4-5 in fin bigik bledagleipöpa, ba toläds 6 löpü balam ota ko stam, se kel, na lel pidesezugom, möd vata klülik esäfonom, de kel ekonleton in gef e edlinon dili. Ebinom lukalodik, dulogik e lefulo dlinik. Stam bima at sümom ute de Pisang; ye labom bledis te su flans tel fomü lutöm gletik pesevidöl. Bleds disik defaloms, du bim glofom, e len stam bäledik sotimo bleds disikün binoms füts 30 löpü glun. Bim labom bledis za 20-24, lonedik füts 4-6, du gleipöps omsik laboms lonedi de füts jü 8. Bled binom lonedlik e nidiko glünik. Fluk no binom vaetik, ye pefulöl ko steif feinik satinabidik, laböl köli nidiko yulibik u püpunaledik, in kel sidakers za 30-40 sibinoms.

Se Volapük: Gased al pakam Volapüka 1894, Nüm: 6, Pad: 5.