Bauzant, car m'avètz ensenhat
Bauzant, car m'avètz ensenhat,
trobarai l'ensenh' a vòstr' at
que d'aiçò dont sètz en error
vos esclarzirai la brunor ;
qu'èu ai lo mestièr avezat5
d'amor, e vos tant oblidat,
que ren non sabètz ves ont cor.
De catre devisas d'amor
me mandatz chausir la melhor,
et èu farai-o volontièrs :10
ben n'estai cant pros cavalièrs
conquièr dòmna de grant valor,
mas chascuns o fai per onor
e l'onors es coma logièrs.
O cant druts a tots prètz entièrs15
es per proeza lausengièrs
vas toseta tant qu'ab lèis jai,
benlèu lèis non sap bon ni'lh plai.
Mas car a tant valents mestièrs
e l'agrats non es tant plenièrs20
com a coral amor s'eschai.
Cant bona dòmn' ab prètz verai
vas amor de toset se trai,
leis sembla que'n fòrce talants,
e lor amors non es durants25
que'l tosets ven e'lh dòmna vai.
Èu sai ben qu'enemics n’aurai,
car es tant vertadièrs mos chants!
Mas cant fins còrs e bèls semblants
s'acòrd' en joves benestants,30
lor s’ajost’ amors finaments
ses retrait de prètz e de sen
et es fins jòis, ses tots enjans,
et amors cui prètz es comants
fai chascun per valor valent.35
Etam tot' amor avinent,
Bauzant, mas la plus jove’n prent
e vos avètz d'aitant mal dit
qu'ab l’Aguer-en-Ton’ ai falhit,
car l'eslonhèi de nòstra gent ;40
mas èu n'ai bon razonament,
car sol mos consirs l’enquerit.