Azadym kany

From Wikisource
Jump to navigation Jump to search
Azadym kany
by Magtymguly Pyragy


AZADYM KANY


Pelek, idär idim, sen duçar bolduň,
Gözümniň nurany – Azadym kany?!
Ýüregim soguryp, seglere berdiň,
Şährimniň soltany – Azadym kany?!

Ymamsyz galandyr mesjit-mährabym,
Dogmady nur saçyp ol mahy-tabym,
Ýowuz galdym, sil alypdyr etrapym,
Köňlümniň ummany – Azadym kany?!

Şekerlikden zäher boldy sözlerim,
Zagpyran dek sargarypdyr ýüzlerim,
Kuwwat gitdi, gubarlandy gözlerim,
Münberim azany – Azadym kany?!

Tört paslym nar boldy, daglar eridi,
Diriler uçdular, öli ýöridi,
Giden baryp haka maňlaý diredi,
İlimniň zybany – Azadym kany?!

Topraklar sil boldy, siller gum boldy,
Humlar jam boldular, jamlar hum boldy,
Höwesler ýas boldy, pişäm gam boldy,
Ýüregim aramy – Azadym kany?!

Ölüler dirilip, arza bardylar,
Hakdan bir kelamny ýörip sordular,
Çoh ýalbaryp, “Goýber!” diýip durdular,
Öli-diri döwrany – Azadym kany?!

Käpirler bolupdyr ýyglap musulman,
Haka ýalbarypdyr Hydyr, Süleýman,
Bug bolulp göterilen arza, gör, umman,
Gökleňiň pälwany – Azadym kany?!

Armanym ýok, pelek, bir söweş kylsam,
Ýa ýyksaň, basylsam, ýa seriň alsam,
Seglere aş eýläp, bazarga salsam,
Bagymyň reýhany – Azadym kany?!

Güwşlüler eşitgeç, bary ker boldy,
Daglar eräp akdy, daşlar ýer boldy,
Mollalar “Kuransyz”, pirler kör boldy,
Sahyplar “Kurany” – Azadym kany?!

Zemin ýüzün syýa duman eýlediň,
Diýgil pelek, kimni aman eýlediň,
Pyragyny, bak, biiman eýlediň, –
Namysym, imanym – Azadym kany?!




This work was published before January 1, 1929, and is in the public domain worldwide because the author died at least 100 years ago.