Author:Ebubekir Pamukçu

Ebubekir Pamukçu yew nuskar u siyasetkarê şarê Zazayan bi. 2.4.1946 de dewa Çermugi, Buderan de ameyo riyê dınya. Wendışê mektebê verêni dewa xo de qedena u dıma kewt imtehanê mektebê malımine u qezenc kerd. Mektebê malımine Erğeni de wend u uca qedena. Uca malımine gırewte, labelê caanê binan de malımine kerde, zey Dêrsım, Pulur de.

Serra 1968ine de Estenbol, Şile de zeweciya. Çehar teney domanê/qıjê xo biy. Bado Estamol de universıteo berz qedena u taê caan de malımine kerde. Serra 1976ine de Estamol de metbea kıtab-vetışi herinê. Tiya de pêseroka Piya vete. Ena pêseroke de xeylê şıirê dewa (qewğa) xo ki/zi estê.

Cunta eskerê dewrê Kenan Evreni de o malımine ra eşt. O wext ey xeylê heqaret u işkence diyo. Peyniye de mecbur mend u welat terk kerd. Serra 1983y de ame İsweç de mend. İsweç de ki pasif nêvıderd. Dewa Zazaistani rê, zıwan, kultur u tarixê Zazayan sero kar kerd. Seba zıwan, kultur u tarixê Zazayan serra 1985ine de pêseroka Ayrey vete.

Serranê 1985-1987 miyan de 14 amarê Ayrey u serranê 1988-1992 miyan de ki anci 14 amarê Piya veti. Labelê serra 1991ine de 18ê aşma/menga Temmuze de Stockholm de nêweşiya qanseri ra çımê xo nay werê u resa heqiya xo.