Autet e bas entre’ls prims fuòlhs

From Wikisource
Jump to navigation Jump to search
Autet e bas entre’ls prims fuòlhs
by Arnaut Daniel

Autet e bas entre’ls prims fuòlhs,
Son nòu de flors els rams li renc,
E no’i ten mut bèc ni gola
Nulhs ausèls, ans bralh’ e chanta
Cadaüs
En son us :
Pel jòi qu’ai d’els e del temps
Chant, mas Amors mi assauta,
Qui’ls motz ab lo son acòrda.

Dieu o grasisc e a mos uòlhs,
Que per lor conoissença’m ven
Jòis, qu’adrech aucís e fol
L’ira qu’ieu aguí e l’anta.
Er vau sus,
Qui que’n mus,
D’Amor dont sui fins e frems ;
Qu’ab lieis qu’al còr plus m’asauta
Sui lïatz ab ferma còrda

Mercés, Amors, qu’aras m’acuòlhs !
Tard mi fo, mas en grat m’o prenc,
Car, si m’ard dens la meola,
Lo fuòcs non vuòlh qu’scanta ;
Mas pels us
Estau clus
Que d’autrui jòis tan grèus gems,
E pustèla aj’ en sa gauta
Cel qu’ab lieis si desacòrda !

De bon’ amor falsa l’escuòlhs
E drutz es tornatz en fadenc
Qui di que’l parlar no’lh cola
Nulha ren qu’al còr creanta
De prèz l’us ;
Car enfrus
Es d’aquò qu’eu mout ai crems,
E qui de parlar trassauta
Dreitz es qu’en la lenga’s mòrda.

Vers es qu’ieu l’am, et es orguòlhs,
Mas ab jausir celat lo trenc ;
Qu’anc, pòs Santz Pauls fetz pistola
Ni nulhs òm dejun quaranta,
Non pòc plus
Neis Jesùs
Far de tals, car tot ensems
A’ls bons aips dont es plus auta
Cela qu’òm per pros recòrda.

Prètz e Valors, vòstre capduòlhs
Es la bèla qu’ab si’m retenc
Qui m’a sol et ieu lieis sola,
Qu’autr’ el mond non m’atalanta ;
Ans sui brus
Et estrus
Ad autras e’l còr tenh prems
Mas pel sieu jòi trep’ e sauta :
Non vuolh qu’autra m’o comòrda.

Arnautz am’ e non di nems,
Qu’Amors l’afrena la gauta.
Que fòls gaps non la’lh comòrda.


This work was published before January 1, 1929, and is in the public domain worldwide because the author died at least 100 years ago.