Aquesto se pot canta sur l'ayre de las fouillos à l'Espagnolo

From Wikisource
Jump to navigation Jump to search
Aquesto se pot canta sur l'ayre de las fouillos à l'Espagnolo
by Pèire Godolin



Aquesto se pot canta sur l'ayre de las fouillos à l'Espagnolo

      
Ay, ay, nou beyré jou jamay
L'houro que tant é tant me trigo,
Couro ma Poutouno me digo,
Que ma languisou li desplay.

Tout le sante-baten del jour
Daban sa finéstro jou rodi,
Per li guigna de l'él, se podi,
Que le siu m'aluco d'amour.

Atal soulet é sense brut,
Passi moun temps en triste leze,
É lébi le cap per la beze,
Coumo qui cérco un estournut.

Quand per passa ni repassa
Moun foc nou s'apazimo gayre,
Yeu fau milo castéls en l'ayre,
É me flati dan le pensa.

Béni m'estrena d'un poutet,
Ça disi jou, bélo Aymieto,
Que petara sur ta bouqueto
Coumo quand cridi le gatet.

L'embejo me pren autaléu
De palpuga sas mas doucetos,
É de soun se ple d'amouretos,
Les dous grumicelets de néu.

Amour, fay qu'un pensa ta bél
Moun paure cor toutjour assiste,
Car sens'el yeu demori triste
Coum'un capou jouts un cremél.