Seksyon 2. Pinabayaan kan Pilipinas an gera bilang kasangkapan kan nasyonal na palakaw, akuon bilang parte kan ley kan nasyon itong mga prinsipyo kan ley internasyonal na minimidbid kan gabos asin minasunod sa palakaw nin katoninongan, igwaldad, hustisya,, libertad, kooperasyon, sagkod pakiki-ouon sa gabos na nasyon.
Seksyon 3. An awtoridad kan sibilyan nakakahalangkaw sa militar sa gabos na panahon. An Puwersa Armada kan Pilipinas iyo an masurog kan mga tao asin kan Estado. An katuyuhan kaini iyo an maseguro an soberanya kan Estado asin an integridad kan teritoryo nasyonal.
Seksyon 4. An primerong oblikgasyon kan Gobyerno iyo an pagsirbe asin pagprotehir kan mga syudadano. Puwedeng apodon kan gobyerno an mga tawo tanganing magdepender sa Estado, asin sa pag-otob kaito, an gabos na syudadano puwedeng pagbotan na magtao nin serbisyong personal, militar o sibil, sa irarom kan mga kondisyon na itatao kan ley.
Seksyon 5. Kaipuhan sundon kan Estado an pagpapadanay sa katoninongan asin kaaregluhan, an pangangataman sa buhay, libertad asin rugaring, sagkod an pagtabang sa karahayan kan gabos tanganing makamit kan gabos na tawo an mga biyaya kan demokrasya.
Seksyon 6. Dai paipuhan suwayon an pagiging separado kan Simbahan asin kan Estado.
Seksyon 7. Kaipuhan sundon kan Estado an sarong libreng palakaw sa luwas. Sa mga pakiki-oyon kaini sa ibang mga estado, kaipuhan enot na konsiderasyon an lubos na kapangyarihan pang-nasyon, integridad na teritoryal, kapaka'nan kan nasyon, asin an poder sa sadiring pagdesisyon.
Seksyon 8. Inaako asin sinusunod kan Pilipinas, na oyon sa kapaka'nan kan nasyon, an palakaw na libre, kontra sa pagkakaigwa nin mga armas nuklear sa teritoryo kaini.
Seksyon 9. Kaipuhan manteneron kan Estado an matanos asin dinamikong kaaregluhan sa sosyedad na sisiguro sa prosperidad asin independensya kan nasyon asin ilibre ang mga tawo sa kahidapan sa paagi nin mga palakaw na magtatao nin tamang serbisyo sosyal, na mamantener nin lubos na empleo, pinapaitaas an susundon kan pagkabuhay asin kan lalong marhay na klase nin buhay para sa gabos.
Seksyon 10. Kaipuhan manteneron kan Estado an hustisya sosyal sa gabos na parte kan kaoswagan kan nasyon.