Amor (Jemoli)

by Speri Della Chiesa Jemoli

Amor (Jemoli) by Speri Della Chiesa Jemoli

Speri Della Chiesa Jemoli (1865-1946)

Amor

Amor!!... Foeugh delizios... tremenda fiamma;
Manna del ciel... e tossich infernal;
Gioja e martiri... spada a doppia lamma
Che tocca e sanna, o dà ferid mortal;

Farsa e tragedia... opera buffa e dramma;
Germoeuj del ben e orìgin d'ogni mal;
Palud col fond de melma spessa e gramma...
Sorgent limpida e fresca de Ideal!!...

Per tì combatt l'egoismo e 'l sacrifizzi...
Per tì tutt i virtù se fann lusent...
Per tì se descadenna tutt i vizzi!...

E, come in tì se troeuva i pocch confort
De sta vitta, per tì certi moment
Diventa ona delizia anca la Mort!!...