Alla sura Cecchina Gussona
Jump to navigation
Jump to search
Carl'Alfons Pelliscion (1734-1818)
Alla sura Cecchina Gussona
Sura Cecchina, la vegna pur
con tutta libertaa, quand la voeur lee,
a mangià l'uga; e che ne mangia assee,
che ghe n'è paricc sgrazz ch'hin già madur.
Che la prometta donca del sicur
chè quanto prima la sarà a Soree,
se de no, se la tarda anch mò pussee
me la mangien di olter creatur.
E, se la gh'ha on quaj zest de mettem dent,
de regallà a sò zio e sova zia,
che le porta anca quell, che son content.
Ma tornì a dì, sura Cecchina mia,
che la me manca no; diversament
mi la foo cattà tutta quand se sia,
e poeu la doni via
a quella bella sposa del Pedroeu,
e a lee gh'en tocca nanch on pinciroeu!