Al sur cardinal arcivescov Pozzbonell in occasion del sò retorna de Roma
Ironem Biragh (1691–1773)
Al sur cardinal arcivescov Pozzbonell in occasion del sò retorna de Roma
Nol podarav mai cred la gran legria
gh'hoo faa quand l'è vegnuu, sur cardinal:
me pariva cent agn ch'el fudess via,
e domandava a tucc: quand vegnaral?
Me seva squas stremii, per veritaa,
che nol dovess mai pu tornà al paes;
perchè on strolegh m'ha ditt fin st'agn passaa
che prest doveva ess papa on Milanes.
El strolegh l'ha fallaa, segond l'usanza,
perchè el papa l'è a Roma, e lu l'è chì
che poss vedell, e gh'avarev speranza
per paricc agn, se fuss pu gioven mì.
[...]