akesi li wile lon nena/sitelen Lasina
| akesi li wile lon nena (2022) by |
tan lipu lipu ni pi sitelen pona li lon ni. |
akesi li wile lon nena
kasi pona li lon ona
taso nena li suli mute
ona li ken ala tawa
ona li toki tawa waso
"waso o pona e mi"
"sina wile e pona seme"
"mi wile lon nena suli
o tawa ona e mi"
"taso mi waso lili a
luka mi li wawa ala
mi taso la mi sewi
mi en sina la anpa"
akesi li lukin e waso
suli li sama luka ona
"mi o sona e ni
pakala la mi sona ala
mi alasa e nasin ante
awen la sina waso pona"
akesi li tawa ma ante
ona li lukin e pipi
"pipi o pona e mi"
"tenpo ni la mi pali
taso mi ken awen lili
sina wile e pona seme"
"mi wile lon nena suli"
"nena suli li tomo mi
mi ken tawa ale ona
mi pana lukin e nasin
o tawa lon poka mi"
pipi en akesi li tawa
"nena sina li weka seme"
"ona li lon weka a"
ona tu li awen tawa
"nena sina li weka seme"
"ona li lon poka a"
awen la ona li tawa
"nena sina li weka seme-"
"ONA LI LON NOKA SINA"
noka li kama tawa ala
nena lili li lon anpa
"ona li ni ala ni?"
"O NOKA ALA E ONA"
akesi li weka e noka
"a mi wile ala noka
taso mi nasa tan ni:
nena li suli mute ala"
"ona li suli mute a
pipi mute li lon ona
mi ken tawa sewi ona
sina wile ala wile lukin?"
"ni la mi wile ala
mi alasa e nasin ante
awen la sina pipi pona"
akesi li tawa poka nena
"ale o pona e mi"
jan li kute e ona
"sina wile e pona seme"
"mi wile tawa nena suli"
"mi sona e ilo tawa
ona la tawa li pona"
"o kepeken ona e mi"
"ona li wile e mani
ni li tan jan lawa"
"mi jo ala e mani"
"ni la sina ken ala"
"ni li nasa tawa mi
mi alasa e nasin ante
awen la sina jan pona"
akesi li alasa lon poka
ona li lukin e soweli
"soweli o pona e mi
mi wile lon nena suli"
soweli li lukin e ona
soweli li moku e kasi
"sina ken ala ken kute"
"mi kute wawa e sina
taso o toki e tan"
"kasi pona li lon nena
mama li toki e ni"
"lete kin li lon ona
selo mi li len wawa
mi ken awen lon ona
selo sina li len ala"
"len li kama tan seme"
"len mi li tan insa
ante la mi sona ala"
akesi li toki ala lili
poka la ona li toki
"sina ken ala ken tawa
sina ken la o ni
o jo e kasi moku
o kama sin lon ni
o tawa mi e ona"
"wile ni li pona mute
o awen lon tenpo lili"
soweli li tawa sewi nena
akesi li awen lon anpa
ona li lukin e kala
akesi li toki tawa ona
"sina wile ala wile moku
soweli li pana e kasi"
"tenpo ni la wile ala
mi moku lon tenpo poka
awen la sina akesi pona"
akesi li tawa poka nena
ona li awen tawa soweli
taso awen li lili a
soweli li kama tan nena
uta la kasi li lon
ona li anpa e ona
akesi li lukin li mu
"kasi ni li pona a"
"ike la mi pakala lili
mi moku lili e ona"
"ni li suli ala a
sina pana e kasi mute
awen la sina soweli pona"
akesi li moku e kasi
ona tu li pilin pona
|
This work is available under the Creative Commons CC0 1.0 Universal Public Domain Dedication.
The person who associated a work with this deed has dedicated the work to the public domain by waiving all of his or her rights to the work worldwide under copyright law, including all related and neighboring rights, to the extent allowed by law. You can copy, modify, distribute and perform the work, even for commercial purposes, all without asking permission. |