Ahimè!
Jump to navigation
Jump to search
| ←L'ortolaninna | Ahimè! (1894) by |
Sô de luj→ |
Chi sà dove l'è andada
La morettina mia?
Ah! L'è scappada via
E l'è tornada pù.
Ohimè, ohimè!
La mia morettina
Chi sà in dove l'è!
L'è averta la finestra,
L'è vœuja la stanzetta:
E sôl in la gabbietta
El ciccio el canta anch lu:
Ohimè, ohimè!
La morettina cara
Chi sà in dove l'è!
Sul poggiorin pù on'anima
E i pover fior tucc pass,
Mœuren disend cont mi:
Ohimè, ohimè!
La morettina cara
Chi sà in dove l'è!
O gent l'avii incontrada?
Avii veduu ona stella?
No gh'è che lee inscì bella
E se pò no sbaglià.
Ohimè, ohimè!
La morettina cara
Disimm in dove l'è.
Se vœuja la stanzètta
Se sôl el sò ciccin,
Se i fior sul poggiorin,
Inscì poden restà,
No no.... no no.
Per mi la morettina
La dev tornà ancamò