Addio di Meneghino

Addio di Meneghino

da "Il Barone di Birbanza" - atto terzo

Car el mè car Milan, me creppa el coeur
d'avett de bandonà.
Ferr e strasc, cardeghee,
revendiroeu, postee,
conch, e tajee, e messô,
garzonscij de sartô;
canaja, che vivii
de menuder guadagn,
e criee per i straa con i cavagn;
cioviroeu de San Sater,
tucc compagnon de better,
el vost car Meneghin
el va in lontan paes....
Se pu no s'vedaremm, a revedès!...
Mortadell di Tíri Scagn,
busecca de la Goeubba,
passaritt di Trii Merla,
carna de manz del Pioeucc,
ris in cagnon del Fus,
supp sbroeusgier di Tre Legor,
formaj de la Cagnoeura,
stracchin de la Senavra,
guarnazza del Bisson,
moscatell di Trii Re,
montarobbi del Gall,
pont de Stura del Gamber,
malvasia d'offellee,
tucc coss de tesoree,
el vost car Meneghin ci va in lontan paes...
Se pu no' s vedaremm, a revedès!...
E tí, corta bandida de la gora,
cornucopia dei venter,
cuccagna di leccard,
caos di bon boccon,
stupor di forestee,
bondanzia di nostran,
gran Verzee de Milan,
Meneghin l'è confus
avend d'andà lontan di tò pasquee!..
Chi abbandona el Verzee resta un gambus,
e s' fa magher i verz via del Verzee!...