Abat galsyn

by Magtymguly Pyragy

Abat galsyn by Magtymguly Pyragy

ABAT GALSYN

Säher tur, hudaýa ýalbar,
Yslam öýüň abat galsyn!
Ýamany goý, ýagşa ýol ber,
Şeýtan işi bibat galsyn!

Ýagşy söze gulak salgyl,
Säher wagty bidar bolgul,
Ýagşylardan alkyş algyl,
Ömrüň artyp, zyýat galsyn!

Adamzat gözden sypynça,
Ýatdan çykar gan kepinçä,
Müňde bir rabat ýapynça,
Hakdan dile, öwlat galsyn!

Pis hatyn başa mähnetdir,
Dünýäniň maly nobatdyr,
Ýigide ogul döwletdir,
Mal galynça, zürýat galsyn!

Ýigit hoşy – at-ýaragdyr,
Her işe jüret gerekdir,
Pis oguldan ýagşyrakdyr –
Pyragy, ýagşy at galsyn!

---