Aar soruşlar

Todur Zanet
Aar soruşlar

Halkım, te esap aldım,
Ani bitti tefter
Bilerim, yazılarım diil metin
(Ama yok dünnedä bir er,
Nerde var devletin)

Bunu da esap aldım
Ani topraan öler,
Artık suumuş teni
Günä da balmeer taler
(Onu zihirlär idi)

Hem taa esap aldım
Gezärkän kafam aşaa
Unutmuş Halk kendi- kendini
(Başsız mı büüyer uşaa
Kurban mı oldu eceli?)

Kaldır topraktan bakışı
Al elinä bayraa
Olmaz toplamaa tardşı
Açan çorbacıysan topraa