A ona donna desgarbada che gh'è vegnuu tanto de goss
Pelliscion
A ona donna desgarbada che gh'è vegnuu tanto de goss
N'hoo piasè che te sia vegnuu el goss!
N'hoo piasè!... N'hoo piasè!... Magara inscì
ten vegness foeura on olter pussee gross;
ch'el sarav propi quell che cerchi mi!
Perchè te me guardavet nanch adoss
in temp che sera tutt amor per tì?
Perchè tanc voeult, che t'hoo cercaa di coss
lecit e onest, no t'ee mai ditt de sì?
Perchè, con pu te fava di finezz,
con pu mi, bacol, te correva adree,
e ti te me trattavet con del sprezz?
Ten mò de cunt la piva che te gh'ee,
e disingannet pur! Chè i tò bellezz
de compensà el defett n'hin minga assee!
Ades set chi te see
cont al coll quell boccon de mercanzia?
Te see ona donna di pu brutt che sia.