A la sura Marianin
Ambrogio Alberti (XIX sec.)
A la sura Marianin
Quand mi stava de casa in del Cappell,
in sta bottega gh'era on pettenee:
gh'è poeu vegnuu on pastee; poeu on formaggee,
che, per la grassa, el gh'ha giontaa la pell.
El metteva pietaa, domà a vedell
el local, vonc e sporch per quij mestee!
Adess, mò, gh'è andaa dent on cappellee,
che l'ha ridott in moeud ch'el par pu quell.
Ma el lusso come lusso l'è nient!
L'è 'l sò faccioeu, mostos, tira-basitt,
che me fa slongà el coll quand passi arent.
El primm cappell che crompi, foo protesta,
de toeull de lee... ma che cappell d'Egitt,
se, in fin di cunt, la me fa perd la testa!