A la memoria del malogrado General Concha

by Teodoro Cuesta

A la memoria del malogrado General Concha  (1925)  by Teodoro Cuesta

¡ Morríó com' un valiente sable 'n manu
cuanto al pasu topaba sotripando;
con fuelgu de xigante, vióse anciano
sin fuxir una vez... siempre guerriando !
¡Ay probitina España, cuán tiranu
el sinu tienes que te va dexando
sin fíos como CONCHA dispreciada
y en xirones sin cuento esfarrapada !
Del cañón al troníu, presurosu
como 'l rayu llegó siempre 'l primeru;
y yera co 'l vencíu tan piadosu
como 'n el pelear tan foscu y fieru:
debaxo 'l uniforme, bondadosu
llatía 'l corazón de 'I gran guerreru
q' una bala enemiga dexó fríu
y al pueblo de PELAYO doloríu.
Non coló pe la espalda 'I plomo airáu
que la muerte gloriosa dió al valiente...
foi 'n el pechu... de cruces adornáu,
ganaes peleando frente á frente;
por detrás non morriera tal soldáu,
pos nunca recular lu vió la xente;
y si un día non más volvies' la cara,
la pena de facello lu matara.
¿ Non viésteis les furioses granizáes
que les nubes en foscu remollinu
nos únvien en 'es récies tempestáes
q' ablucáos nos dexen y sin tinu ?
Pos ansina les bales gomitáes
por el prietu cañón, roncu y dañinu,
en calavres convierten mil rapazos
que de mil probes madres son peazos.
 -¿Q' asocede?-¿Qué pasa?-¿Por qué España,
onde Dios de sos gracies punxo 'l ñeru,
en el monte, n' el llanu y la cabaña,
del fosil disparáu ve 'l fumeru ?
-¿ Por qué mana del home tanta saña ?
¿ Crió 'l suelu español el estranjeru ?
Entóncenes morrei, morrei con gloria,
pa vivir munchos siglos en 'a historia.
Pero ¡ probe de mi ! si son hermanos
los que llocos d' afecho y aturdíos
s' esmigayen sin ver que son cristianos
y d' una madre mesma tóos fíos.
¿ Qué premiu barruntais que los tiranos
en pagu vos darán de tantos bríos ?
Lo q' á vostros mayores dió esa raza ….
¡ Cadenes, pocu pan, palu,.. y mordaza !...
¡ Dexailo por Dios Santu, que ya 'l cielu
s' escurez, por non venos, pesarosu !
-¿ Val un home la llercia y desconsuelu
que 'n el pueblu semais, de paz ansiosu ?
¿ Les llágrimes del padre, 'l fíu, 'l güelu,
enxugar podrá nunca 'l ambiciosu ?
¿ Españoles non sois ? ¿non sois cristianos ?
Pos Dios dixo: queréivos como hermanos.
Non más os esñiceis, y los conseyos
non 'cheis en sacu rotu d' isti legu;
si pataques, maíz, fabes y arbeyos
la tierra non produz, y sin sosiegu
y famientos se ven neños y vieyos
por non querer oír tan xustu ruegu,
¿ qué direis al Siñor, cuando la muerte
en folla trueque 'l cuerpu del más fuerte ?
¡ Oh ! dexailo por Dios, hermanos míos,
como piden al cielu contristáes,
famientos d' abrazar á los sos fíos,
les sin consuelu madres desdicháes;
¡ la cuna y el sepulcru 'stán mecíos !...
les hores del mortal por Dios contáes,
q' al morrer en 'a Cruz dixo al cristianu:
non derrames la sangre del to hermanu.
España de valientes foi viveru
des que Dios fexo 'l mundo y hubo día
q' enritar su león sañudu y fieru
la solmenada Europa 'tarrecía;
tanta gloria 'xuntó, que 'l orbe 'nteru
encerralla 'n so senu non podía,
y por eso COLÓN, sin sentir penes,
foi en busca de nuevos almacenes.
Del pueblu de PELAYO y so fiereza;
de la patria del CID q' estocinaba
al moru guerriador; de la grandeza
que 'l sol d' entrambos mundos allumaba,
¿ que nos queda, españoles ?-¡ La pobreza ¡
¿ Y non llorais al ver que non s' acaba
esta guerra cruel, q' atiza arteru
p' atrapanos sin fuelgu 'l estranjeru ?
¿ Non ye cosa que plasma y quita 'l xuiciu
el ver los vascongaos, refaltando
tanta griesca, trastornu y rebulliciu
sin provechu par' ellos entamando ?
Eses gracies que gocen, en perxuiciu
de mil pueblos de rabia espatuxando,
¿ por qué España consiente, sí con elles
nos mayen, cuando atorpa, les costielles ?
-¿ D' ú vienen esos fueros ?-¿ Son quiciáes
porque 'l mundu al facer Dios soberanu,
ántes fexo les tierres vascongáes
q' el xardín celestial suelu asturianu ?
¿ Non semos d' un ventráo ?-¿ Sos bondáes
amorosu non vierte so 'l cristianu ?
-¿ Qué mil Xudes entós fai el Gobiernu
que non únvia los fuerus al infiernu ?
 -¿ Qué dotrina estudiais ?-¿ Qué catecismu
pa vosotros se fexo solamente,
q' emburriáis la nación hácia´l abismu,
q' espumosu llevántase ruxente ?
-¿ Quién vos lleva á guerriar ? –i El egoísmu!...
-¿ Y ye bon español quien tal consiente ?
-¿ Por qué si pa vosotros Iluz el día
á escures ha de estar la patria mía ?
¿ Queréis rey ?-¡ Non !... decís: Señor queremos
en el nome no más, pero absoluto
d' ESPAÑA y de les INDIES lu faremos
á quien todos pagueis ricu tributu.
¡ Rey los vascos !... mil veces morreremos
semando pe la tierra 'l llantu y lutu,
primero que de libres non pudiamos
en presencia del mundo apellidamos.
Pos molleres de fierro, cocorotes
de duro pedernal, ¿ por qué rabiáos
el canil regañais, y los garrotes
teneis contra nosotros llevantáos ?
-¿ Querer la libertá merez azotes ?
-¿ Non y' isti vostru puxu, condenáos ?
-¿ Entóncenes por qué, libres de penes,
saborgar non dexais tan dulces bienes ?
Tras los picos q' esguilen á I' altura
disparáis el cañón al pueblo iberu;
en 'es nuestres MONTAÑES, sepultura
al triar topó siémpre ´l estranjeru;
del feroz africanu la bravura
el astur amansó cual naide fieru,
vengando 'n COVADONGA ´l gran cachete
que 'l moru dió á Rodrigo 'n GUADALETE.
El XIGANTE del siglu, 'I más mimau
pe la fortuna lloca, quixo un día
solmenar, en sos fuerces enfotau,
esta probe nación q' aborrecía.
-¿ Quién el gritu de guerra llanzó osau,
que 'l vientu temerosu repitía ?
< Isti PUEBLU non más, cuyos guerreros
el valor y el deber tienen por fueros. »
D' esos homes cristianos y aguerríos
los descendientes somos, y queremos
cien mil veces morrer, si nuestros fíos,
como sos padres, libres non los vemos;
en 'os praos, los montes y en 'os ríos
¡ abaxo los tiranos !... gritaremos.
pos aquí, hasta la fonte que mermura,
«VIVA LA LIBERTÁ» diz con dolzura.
Dos palabres non más decir quixera
pa dexar de falar y cierrá 'l picu;
mande Xuan, mande Pedro, ¿ la cevera
metereis sin pagalla pe 'l focicu ?
¿ hay dalgunu tan reciu de mollera
que non sepia, bien sea probe ó ricu,
q' agora como siempre los mandones
fixeron de los tontos escalones ?
¡ Empapielle 'l cañón !... más el troníu
non s' escuche, que muerte dá y espantu,
¡ doléivos de la patria ! -¿ He bon fíu
quien no aforra á la madre triste llantu ?
Dexai que Dios del cielu condolíu
al ver tanta llaceria y dolor tantu,
á so divinu soplu, poderosa
la llevante otra vez y vitoriosa.
Non son carlistes, non, los que 'na guerra
al pendón liberal finquen el diente;
¡ esta planta non guaña ya en 'a tierra
que con sangre regó tantu valiente !
Buscáí lloñe d' ESPAÑA que s' emperra
en sentar en el tronu al Pretindiente,
pos aquí quien llevanta la cabeza,
non ye el carlismu, non... ¡ ye la probeza...!
La probeza, melliza del tormentu,
manancial de dolor, que sin soldáos
en ciodáes y pueblos toma asientu
 cuando dexa 'l llabriegu los sembraos;
la probeza, de Dios xustu escarmientu,
q' al miranos, per llocos y olvidaos
de so dotrina santa, xosticieru,
castíganos con ella quier severu.
Oyéime por favor: á tantos males
co ta paz sospirada fin pondremos...
los fosiles, los sables y les bales
pe l' llaviegu y forcau trocaremos;
co los doraos frutos, les señales
d' esta guerra sanguina borraremos,
pero siempre de CONCHA á la memoria
en letres d' oro cuntará la HISTORIA:
« ¡ Non coló pe la espalda 'l plomo airau
que la muerte gloriosa dió al valiente !...
foi 'n el pechu.. de cruces adornau,
ganaes peleando frente á frente;
por detrás non morriera tal soldau,
pos nunca recular lu vió la xente,
y si un día non más volviés la cara,
L A PENA DE FACELLO LU MATARA.