A Palazz Litta...
Ferdinando Fontana (1850-1901)
A Palazz Litta...
A Palazz Litta, dopo colazion,
i impiegaa, come al solit, fan do ciaccier;
e, come al solit, càtten l'occasion
de cuntà quaj storiella.
Pocch dì fà vun l'ha ditt: - "Vorii sentinn
vunna, che me par bella?
Iersira mia sorella,
che la va intorna anmò cont i vestinn,
la leggeva on giornal,
e, avend trovaa, in su la quarta pagina,
scritt Sifilide Costituzional,
l'ha dimandaa coss'el voreva dì.
Nun, tucc, senza rispond, semm restaa lì;
ma el papà, finalment,
per tajà curt de sbalz all'argoment
el gà rispost inscì:
- La Sifilide Costituzional
l'è on metod de governo!... - Natural,...
poss no spiegatt sti robb chì sui duu pe...
ma, col temp, de per tì te i capiree!"
Mò giust, in quella, riva el Capp d'offizzi,
on brav omm, che ghe pias a viv quïett
senza cruzzi e pendizzi,
de quella pasta che se fà i past froll,
e, sentend quej paroll
de Costituzional e de Governo
el dis, on poo rabbiaa:
"Ma dovaroo ripèttel in eterno?
I hoo giamò visaa,
e per l'ultima volta i visi anmò:
de politica vuj che en parlen no!"