229. Penéd balsevelid
Lenú laböl volapükabledi nüm telsekil, liladob ko gälod gletik, das vödasbuk volapüka opubom.
Bonedob atoso völeki lölik, begöl, al aimekön potön obé blogi alik foviko pos epubön me kluzifaban [1]. Togo begob, id in yel kömöl al potön obé volapükabledi fläniko.
Begob, al sivön onsé suämi plo volapükabled (yela balmil jöltum jölsekil) e plo vödasbuk lölik sa delids potamonik foviko de tedamadom obik : Ernst Vasmut[2], bukatedam in Berlin, Verdesüt mäl[3]. Ya emekob kodedi zesüdik al pelam suäma.
Ple ob as jäfatävel volapük ailabom veüti gletik, bi nolob gudikün, livemo töbik binom lenad pükas valik jäfané zesüdikas, ed aidalogob klu nefikulo se plaks oba pösodo pemeköls gletobidikis füdeni, veüti, leitami e benodi, kelis volapük at ailabom in volated e nog um oilabom.
Volated ailabom nedi volapüka, e nefikul in lenad ata püka binom glepün pakama ota.
Vödasbuk aidukom volapüki gö plobo len velatiki zeili plagik, ed aigälokob, das ut eb deutik sembal äbinom, kel in vobad gletik esumom vobi balid in namis ed egivom blöfi völada e steifa snatik voba deutik. —
Oifovöl komedi gudikün volapüka valoflano in täveds veitik oba, ed olaidunöl pakami seva püka ät, aivipob beginamé menälik onsa seki gudikün, e lesagöl lestimi sikik oba, disopenobok
Küpets (fonät: ‚Wikisource’).
Se Volapükabled zenodik 1883, Nüm: 25, Pads: 101–102.