176. Tefü glamat volapüka
Yunúl balsetelid ata yela, del motöfazäla balsejölid geiluga ledükik lesona dalitalikün Ludvig de Badän[1], datuvél volapüka älabom stimi geilik, al dälön lovegivön pösodik samadi magifik glamata omik segivama telid geiliké sölé penemöl nü, soné telid geiluga regik ledalitaliküna ledüka de Badän, su Mainau, nisúl löfliko keiník, filial päda Lizelsteten. Peseviko ya segivam balid buka ät elabom stimi geilik pelovegivöna soné balid geiluga regik ledüka de Badän, klonalesoné Fridrih[2], su Mainau: jen, kel datuveli e pübeli volapüka no nemödo älanimom ed oilanimom al fovi püdavoleka omik zisumöla menadi valugik.
De Sved (Stok῾olm) ägetom redakél volapükableda yunúl balsekilid ata yela dub geilug regik (ofa) ji-klonalesón Fiktoria[3], pemotik ji-leson de Badän, danapenodi vemo stimöli plo glamat volapüka segivama telid. Penod at äbinom pedätöl de yunul zül, pepotöl e pedisopenöl fa söl cämal Ludvig Duglas[4]. —
In Sved volapük mostepom glolik.
Küpets (fonät: ‚Wikisource’).
Se Volapükabled zenodik 1882, Nüm: 19, Pads: 77.