117. Al yel nulik balmil jöltum jölsetel

sedobs valikes flenes, födeles e liladeles mödik ‚volapükableda‘ flenaglidi ladlikün obas. Volapük obsik emekom in yel balmil jöltum jölsebal mostepis no peblesenöl. In Melop paitidom volapük ya in bleds maniföfik. (Ekó ‚O῾eio Vaisenfreund‘ (nepalaflen)^[1] nümi foltum kilsejöl e lemänikosi!) In löfik fatalaned deutik nü binon maniföföl volapükiko konletavöleki de poedats e peneds. Flen gletik volapüka in Pleús pelom redakelé nebemedik bleda ät peneli patik, kel sunün uklinopenom segivami telid glamata e vödasbuka, bi glamat segivama telid sötom pubön in vigs mäl jü jöl. Vö! stunlik binos, li-foviko nuläbs teldik in volapük sedoms obes ya penedis in pük nulik! — Jen binos, das teldiks nuläbas at älaboms glamati u bledi kotö delis jöl, e ya äsedoms obes penedis neblamik in volapük. Akanóbs-la nemön ed änemóbs-la nemis, if no ädledóbs-la viodön(i) müki volapükaflenas löfik obas. — Pöks mödikün, kel paimekoms, aitefoms te finami kimifala — i e kosiadis neklülik vödas… Elsó laboms töbi nemödik in menodön. Defoms obes egelo te tim e mon al mostep nog mödo fovikum, pato in pötiks bükatonabs lenulik, in glamats e polüglots… Zesüdos vö, das äkanóbs-la kosekönok te nog soaliko diné gletik balama netas, e das älabóbs-la sibini takedik e kudalivik, äsó redakel alik bledas gletikum. — Blinomös obes yel balmil jöltum jölsetel sibini ät dub lebén mäzenala sembal geilik!! Atosi govomöd God! — Ab flenes obas id al yel nulik lövokobs, äs egelo:

„Menadé bal püki bal!“

Küpets (fonät: ‚Wikisource’).

1. Oheio Waisenfreund

Se Volapükabled zenodik 1882, Nüm: 13, Pads: 53.