203. მორთი ხოლჲოშა, დოხოდი,, ზიტყვასჷ მუთას თქუანდა
ჩხე ჩილჲამურით რტყაფილს ამბესჷ ირჩქჲლუანდა
დუს მობირძღუდუ, მობირძღუ მა ჸოროფაში ქუა ნდა
- „უსქანეთ ვევრგუქ; მა შხირას ღორონცჷ იფუჩუანდა.
204. მიქით გინმორთინუ მა თაშინ თიშე ვეველუქ რსხებასი,
თუმც ვიტყუქ დინაფილიში დიო მა ცქვაფა- ქებასი,
ტანო დ პიჯო ბჟა ორდუ, ვორდი მათ თიში ნდვებასი,
გამამართი დო დოპილი, ავთანდი გიღუ ნება სი.
205. იდონეთი, გაჩქვენუნა, ორე სახენწიფო დიდი,
სოდეთ მაფენს შქვითი მაფა, მაფენა დო ორე რიდი,
ათე ამშვი სამაფოსჷ ფარსადანსჷ უღუ ვიდი;
მაშქვითას ხედ მუა ჩქიმი - უჸორს კოჩიშ მულჲა, სქიდი.
206. სახელი რდუ მუაჩქიმიშ - დო ჯოხოდუ - სარიდანი.
ორდუ პიჯიშ მორაგადე, ვანწალჲუდუ დარი დანი.
აქეენდუ მონა-ჯარს დო თქუანდ: „ნტერენქ ვაგირდანი,
თქვანი კოჩან - მოქმედალჲა ძირანჷ დო წარ თირანი.“
207. ხვალეიან დორინათჷ მუაჩქიმქი ვიშ მოწყინდუ
თქუ: „ნტერიშე მოვრძგვებერეექ, ბჟაქით მიჩხორუ დო რწკინდუ
კოსჷ შხირას მაწყინუანს ხვალეიან დუდიშ რინ, დუ
თუმც გიღუდას სიდინდარე, წუხება იშენთ რჩქინდუ.
208. თქუ: „ფარსადანს შევერთებუქ,“ ოჯღონუ მოციქულეფი;
მეუჩინუ: „გიღუ მაფობა იდონეთიში სრულეფი,
მოწადუ თქვანი წოხოლე მათ შეგიერთათ ხულეფი,
ართო დოვხვადათ ნტერენს დო დევცვათჷ ართი რჯულეფი.“
209.ფარსადანქ გეგუ, გეხარუ, თქუ: „ნტერენს უმოს ვაფეთე.“
ღორონს შეწირუ მარდი დო მუაჩქიმს გაგუ ამბე თე:
„რახან გორსულჲუ სი თენა, გურს ვიხიოლე მა ხეთე.
მორთი, მეხოლი, პატჲრცა საქმე აკეთი, ვაკეთე.
210. ქემერთუ დო ცუ პატიი, ზიტყვა იჩუ, ზიტყვა ეჩუ;
იდონეთიშ ჯარეფიში უჩაშალჲა სხუნით მეჩუ.
ათეთ მაფა ფარსადანქჷ ღონე მუში გაოშეჩუ
. . . . . . . . . . . . . . . . . . . . . . . . . . . . . . . . . . . . . . . . . . . .. . . . . .
211. სქუა ვაჸუნდ მაფასი დო დედოფალსი ბჟაშ მასქვამას
შხირას თქუანდ: „მომავალი - ვორწყექ - მენწარებუ შხამას.“
შხირას დენდეს: იდონეთი მის მევჩათჷ ჩქინი გამას!
ბოლჲოს დეწყინარებუდეს, თქუანდ ზიტყვას სქვამას, ჰამას.
212. ცხოდიქ იჸუ, დიკათესჷ, ირფელ ართო მუშა ვთქუათ.
თქუეს; „სარიდანიშ სქილი ქედევკინათ, მოვრდათ სქუათ;
ჩქინი რე გვარო იშენი; შხირას მოხვადუ თეჯგუათ.
ქიმიპონათ დო ვემინჯათ, მუთუნფერო შივლებუათ.“
213. მაფაშა დო დედეოფალჷშა მიდამჷჸონეს მა შხვა კათაქ
მუწკუმა ვორდი რინათჷ დო ვცხოვრენდი ბინათ მა თაქ.
ვგურაფენდი ბრძენიწკუმა: ტყურა მემიდინუ მართაქ.
მოვრდესჷ დო ჩქიმიჸურე ჩხორი იღუ ბჟა დო თუთაქ.
214.ასმათ, მიწილი მა ამბე მუქით შურო შემოჩირთას,
ხუთი წანას დინუვორდი, ვორდი ჩხორი თუთაშ მორთას
მაძირაფუ ჩქიმს იტყუდეს „სამოთხესი დინოდირთას.“
აწი სახექ ოწოხოლენქ ნაშალჲო ოკო ირთას.
215. მუჟამსთ ვათე ხუთი წანა ბჟაქით ჩხორი დომიკათუ.
გევგი ნამდა, მაფაშ ჩილქი, დედოფალქი დემოკათუ
დო დებადუ ჩქიჩქუ ძღაბიქ, თქუანჷ დო ფერი ართუ,
ასმათიქით გაბუ წყარი, იდუ ბორჯიქ, სახექ ნათუ.
216.ვემიანჭუ, ვარაგადე ჩქიმი ნინას მუში ცქვაფა
მუშე ხანდილს ვამიმანგრუ ბაწარი დო ჯაჭვი ცაფა.“
დიჭყეს ნგარა დო თვალჲუა, ჩილჲამურით დიხაშ რძღაფა,
ასმათიქით წყარი გაბუ-დაჭყაფინუ შურიშ რთაფა.
217. „მა დო ძღაბის ქედომიჭყეს რდუაჲა დო ვორდით ართო,
თიწკუმა გუდ ბჟაში გვერდის, ორდუ ჩხორიამი ფართო.
ვუჸორდითი ჟირიხოლჲო მაფასჷ დო ვრდუნდეს ართო
მიშით პილჲუნს უზისხირეთ დატანჯული რინი ართო.“
218. თქუ თენა დო ტარიელსჷ გრძნობაქ რაგადიშ მეუდინუ
ავთანდიქით დიჭყუ ნგარა ჭირსჷ ჭირი მეუძინუ -
ასმათიქი ჟირი - ხოლჲოს წყარი გაბუ, გაკურცხინუ
ტარიელქ თქუ: „ქეგეგონე, მარა ღურუ გემობინუ.“
219.ვთქუა ამბეს, ქეგეგონი, სოჲშახთ მიღუ ბარე ჯანი;
ათე ძღაბიშ სახელი რდუ - ჯოხოდ - ნესტან დარეჯანი.
ევშა თუთაშ მოტოლჷუე, დარი საზარხულჲე ჩხანი
მიშეთ მიღუ ოდინაფუ - ნირსიამი ნწარე დღა - ნი.
220. მირდუ ნესტან - დარეჯანქჷ - ოლემუშა მათ გილჲურდი,
ვბურთენდი დო ვლჲაჸაფენდი კატუშორო ლჲომს, პილჲუნდი.
მაფაქ ჸუდე ააშენუ ნესტანი დინას მალჲურდი - ,
გებდუ კარი მანგარი, ლჲაკვი უღუდუ კილჲუნდი.
221. ჸუდეს ნესტან- დარეჯანი -მითა ორდუ- ორდუ ხვალე,
აბანა დო მოსანწყუე დინახ უღუდ დინახალე.
სარწკველჲენსჷ ღარი გეძუდ ბროლიშწყარის მოხვარხვალე;
ვავორწყედი, ბინენდ ათაქ, - მიშეთ აწი დუს ვიჩალე.
222. ფარსადანსჷ რქვილი ჸუნდუ და ქაჯეთის გათხილირი,
რქვილიშ სახელი - დავარი - იჩინენდუ კოჩი ირი.
მაფაქ ნესტან - დარეჯანი დავარს მეჩუ, ჩქიმ დღა ჭვირი,
ოგურაფალჲო სიბრძნეში ბოლჲოს ჸოფედუკონ ჯგირი.
223. გურაფულენდ გურიშ ვარდი აგურუდუ ცაში ნაქმის.
ვითოხუთის დინუორდი.“ -გინირთუდო ართი ვა ქმის..
„ჸოთამა დო მოქმენდალჲას ოცქვანდესჷ ჩქიმჷ ნასაქმის.
-სით გეგენდა, შემიცოდე, მის აჭარუ უჩა დღაქ მის?!..
224. ჩქიმი მუმა სარდანქჷ დოღურუ დო მემიდინუ.
მაფაქი დო მონა ლაშქრენქ ლჲაჸაფი დო ბირა ინუ;
ათექ მუჩუ მონა ჭირიშ -ჭირი, ვაის უი მემიძინუ.
მარა ვუჸორდჷ ფარსადანსით, ვმინჯურენდუ მა აწიმინუ.
225. დინაფა მუმაშ ვინგარი ძაძეფით ვორდი ფორილი;
დღა დო სერ გურ მაფუდუ ნგარათი გუმოჭორილი,
ოგორალენქით მიდინუ, დინუ მით პუნდუ გორილი.
დიჭყუ ნგარა დო ართი თქუ: „მა ოკო ვორდე თხორილი.“
226.ჩქიმი თაშინი რინა მუჟამსთ ფარსადანქით გეგუ
მიწუ: ნგარა ქემიოტე, ვეშილებე, აში ვერგუ.
- მუმაში არგილს დარნიშნე, სქანი ქცევა ეთისთ მეგუ.“
დამნიშნუ დო ქედოდირთუ, მუ აბეგუ, მუქთ იბეგუ.
227.მიდეჸონეს დო ასაქმეს, დანიშნეს დო დახუნუეს,
ასეშახი მუნაფილი ცა სარკესჷ, ვამუნუეს,
მონა- ჯარენქ დო ლაშქარენქ მიწონეს დო ისხუნუეს.
ჯვეში თქუეს ლჲაჸაფ- ბირა, დინაფა დო ღურუ ნუეს.
228.ტარიელქ თქუ: "მივქინიშით, ვარე დღა დო ორე სერი.“
ასმათს უწუ, მაღალჲაფუ დო ქედოდგესჷ ოსერი.
დინჯირეს დო ტარიელქ თქუ: „დავაბოლენქ - გოთანდ სერი.“
ობეს დუღა ჩილაჲმური, უსქირაფუდ თუმცა დღერი.