312.ხატავეთის გუმორძგვებულქ მაფას წიგნი მევუჯღონი
ვოჩინანდი: „სქანდე ულირქ თუმცა დიდას დეევღონი.
-შარა ვიდი უშარექი, ხატავეთიშ სო დო სონი,
მარა ბოლჲოს ხატავეთი დავამარცხი დეევმონი.
313.მუჟანსით მა იდონეთის გინივლი სანზღვარი -კარი,
რამაზიში მოციქული, კოჩი ვძირი მოსაქვარი.
მა გუგი ოინეფი დო გუჭყვიდი ლჲაშქარ- ჯარი.
გუმორძგვებულჷ გახოლჲუქი ჯღვერი მაფუ მა თე წარი.
314.ხატავეთი გავაჩქიმი მართალჲო დო ვართი ჭორო
აქლემ-გირინიშჷ ხარგა ნადელი მომიღუ შორო.
რამაზ - მაფა ჭოფირჷ მაფუ მეპუნსჷ დო მეურთ წორო.
მომელჲუდა ბჟა თუთასჷ აწ მირჩელი ბინდი ორო.“
315.ხატავეთიშ მაფა - რამაზ ჯინით მაფუდ მა ჭოფირი.
მიშევლი იდონეთიშა ეწმაზადუაფ კოჩი ირი.
მარდუალი ფარსადანი შორ-ხოლჲოშე ქოოვძირი;
გუმორძგვება იხიოლჲუ ლჲაჸაფი დო დიჭყუ ბირი.
316.ერი ორდუ ვქეიფენდი გუმორძგვება ვიხიოლე
გოთანდუ დო მაფაქ, მიწუ: „მაფა-რაზამი მუ ღოლე?’
რამაზი - მაფა დობორკილჲო ქემუჸონი ოწოხოლე.
ფარსადანქჷ ულჲაჸაფუ მეჩუ ზიტყვა სახიოლე.
317.იდონეთიშ მაფა, რამაზს აქეიფენდ ნერი - ნერო
მაფას მაფურო ოცქვანდუ, ადღეგრძელენდ მუში ფერო.
მა გოთანას ქომიჭანეს, ჭკვერი მიწოლჲენდუ ჭკვერო;
„ქაპატილი ხატავეთის სი ორწყედა აწ ვართ ნტერო.“
318.ვუწი: „ნება თქვა გიღუნა, თქვა ქიმინით თქვანი დარი.“
ქეშიცოდუ დო გუტუეს, გუნჯეს იდონეთის კარი;
მარა, რამაზის ოგაფურო, სიათ მეჩეს წიგნი ჭარი,
გიოჭარეს ოგაფურო, ჸილჲო, ორქო, შხვათ თეგვარი.
319.ტყვექ დუმარდუ ფარსადანს დო დუდიწართ, მუს მეურჩქვანუ
უწუ: „“ორგულჲობა სქანი ღორონთქ ბოლჲოს დუმონანუ;
აწი მა დღას შერცოდიდა ღორონთქ ხანი ვამიხანუ.
მიდართუ დო შხვათი იჸონუ, ვაგაჩენდუ ართი დღა ნუ.
320.ფარსადანქი კოჩი მომიჩქ ორდოს ადრე ბინაშა მა.
მომიჩინუ: „სქანდე გორთილს ვამიძირუ ართი დღა მა.
ნაკოპულჲა ნოტყელიში ხორცით ვამიჭკომუ მა, მა
მორთი, ართი ვინადირათ, მომიჩინი ზიტყვა გამა.“
321.ცხენი ვკაზი დო ვახოლი ურიცხვო ვხვადუდუ ჯარი,
არჷძა იშუ ნოტყელჲუშა ხვამარდი დო მარჯვე, ჩქარი.
გური მათჷ გეევნათი, ბჟაქით მუჩუ სინთე დღარი.
ქემევრთი დო იხიოლეს, თაქით დუდი მა ვითარი.
322.მოვინოტყელეთ მინდორი ნოტყელეფიშ ვორდით ნტერო.
ნოტყელენსჷ მევთხოზუდით დო გოპუნდით მუჭოთ წერო.
ხიარული აშო ივშით მასქვამანდეს დელი, რერო.
მაფა, ჭკორი, მონა, შხვათი, ვლჲაჸაფენდით ართინერო.
323.ქალაქიში ნახორეფი მიჯინედუ არიძონა
მა ლიმა გინოგაფილილსი მედიდებუდ წანა, ხოწა.
ღვანწკი მიგუდ ნორცხვას ჩილჲამურიშ გინახოწა.
. . . . . . . . . . . . . . . . . . .
324.მინივლი მარდუალიშა მონწყილი ვორდი ვართი;
ვძირი ჩქიმი მაჭუალი თუთა ვითოხუთიშ ნართი;
თქუ თენა დო ჩხორიამქჷ უფერულჲო სახექ დართი.
ნატანჯი დო ნახანდილსჷ შხვას აძინუდ ჭირი ართი.
325.თუთას ტანსჷ მიკაქუნდუ ხაბარდულჲო ჭერი კაბა.
ხაბარდელსჷ ასქვამანდუ შხვა თოლეფი დო რდუ ჭაბა -
ურცხოქ გეგი ურცხოშ დება სიმართლე დო ვართ დაბა
ზიტყვა მუშა ვაგინძარა ორდუ ოცქვაფური შაბა.
326.ჭყოლირს მაფუდ გოკირილი ხე, რამაზის ნალიმარი.
დედოფალქი ოხუნიშე გუდირთ იშუ ჩქიმდა წყარი.
სქუაშორო გოვჭუდუ დო თეშე ღვანწკი დალიბარი,
გუმორძგვალჲა მომახვამუ, დომიხვამუ დუდი, ჯარი.
327.ხოლჲოს თუთა დომიხუნეს დო დომიჭყუ მარდის გაფა.
ასეშახი დოხართელსი ჯაჭვი მოკირანდუ მა ფა.
ფულირო ვუჯინედითი, მითანდუდუ სინთეთ დღაფა
ასეშახი მოწყენილი იხიოლჲანდ ზურნა-დაფა.
328.ორდუ შუმა-ხიარულო, ქეიფი დო დროსი ღალჲა
მათი დიდო ვხიარულენდჷ, გურქჷთ მიჭყუ მა რდუალჲა.
ბჟა მიჯინედ, ვუჯინედი, დაჩხირქ მიჭყუ შქირატალჲა.
ჸოროფილის მეჯინასჷ მუთუნ ვაუჯგ დღას მართალჲა.
329.მაბირენქ ბირა მიოტეს, ფურცქით მიწუ თე დროს მაფაქ.
სქუა, სქუა ტარიელი, გოგიმორძგვუ ხანდილ -ჯაფაქ;
მიწუ დო მუჩუ მა ღვენა, გემებრელჲუ ღვენაქ, ცქვაფაქ,
თექ ყოროფა გამიმტკიცუ - მემეშორუ გოჯოგაფაქ.
330.ხოლჲოს ვხედით, ვლჲაჸაფენდით მირუდესჷ დიდი რინ, დი.
დედოფალქი ბჟა იჸონუ მუჟანსთ სინთეს ირანდ ბინდი.
ქეიფობა ვაართშახი, გაჭირებათ დუდი ვინდი.
დაბადება ჩქიმი ვიჭყე, ვთქვილი: „შურო მოთ გოვრჩქინდი.“
331.გევდივრთით მუჟანსით მივწყინეთ სტაქან ყანწით ღვინიშ შუნმა,
ვიდი, ბინაშა მიევლი თუმც კოპული მემეოგუ მა.
შური გვალჲო მაღალჲუდუ მივშინ დუდი მა თიწკუმა.“
დიჭყუ ნგარა დო თქუ შხირას: „მუ მოხვარუ აწი მუ მა.
332.მუ ვთქუა აწი დინაფილქ, ქოვპილჲუნს მა თიშ ჯაბია.
მონაქ მიმელჲუ დო მიწუ, სი რჭანაფურენს ძღაბია.
ქივჩინი ვიდი ჩქარ-ჩქარო მოზოგუდ ვარ მა ხაბია.
ასმათიქ ვხვადუ შარასჷ დო უძიცანდუ წაბია.
333.ქედივხუნე, ვურჩქილედი ნარაგადის ტანჯვა -შხირი
მიწუ ამბე თუთას ბჟაში ნარაგადი მუში ირი.
წიგნი მუჩუ მონაჭარა, საჸოროფო გასაკვირი.“
თქუ თენა დო დიჭყუ ნგარა დუდჷშა მიღუ დიდიჭირი.