* ამჭუან სარკეს ინვოჯინინ
Jump to navigation
Jump to search
ამჭუან სარკეს ინვოჯინინ
თოლქ ქამოსქიდ თუმაშა, -
დიდაღურელ, ნაადრევო
ჩეს ურჯგინუ უჩაშა!
ამდღარ უკულ მუჭო მიღდას
მა იმენდი ჭუმანშა,
ღუმა დუთუ, თირს ქუმურთუმ
ჩქიმ ეზო დო შუკაშა.
განჩი მუთუნ ვერაგადე
ანწი ქირსე თუთაშა,
ვარა მუ გარზ აფუნშა დო
ვარდიშ გოფალუაშა.
მუ ბქიმინათ, ფრიმულ ორდას
ჩე, ვეთირე უჩაშა!
ჩქიმ გუმარაშ შუკა მისხუნ
რუსათაველიშ ქუჩაშა.
თხირიშ კეტშე ბიგას დოფთოლ,
წყარს ვაგიბბუნქ ტუტაშა,
კუნტა რინაშ სამაცქვარო
ლერსის ბჭარუნქ ღურაშა.
ამდღა სარკეს ინვოჯინინ,
ჩეს ურჯგინუ უჩაშა,
დობრჩინექო, დიდაღურელ,
ჭიჭე მემიძ ჸურაფშა.