***ირფელც მუში ოჩი გეძ

From Wikisource
Jump to navigation Jump to search
please do not remove empty parameters (see the template documentation).
ირფელს მუში ოჩი გეძ
by გიორგი სიჭინავა
წყუ:გიორგი სიჭინავა "ნანაგე" თბ. 2011 წ.ხ. 56-57

  
ირფელც მუში ოჩი გეძჷ,
ირფელი მუშის გაფულენც,
ბორჯიშ ელასირელი ხამ
იმენდეფც ცაფულანც.

წყარეფ ვეგიხუნუანც
ხვამარდეფიშ ნაულას,
კოჩიშ თოლი ვაძირჷნც
ღორონთიშ ნაფულას.

დოთჷნცჷ დო დოჭვენცჷნი,
ცა გოსარკჷნც მუნაფილი
დო ბჟაცალო გამწოდირთ
შურ, ჸოროფათ ფუნაფილი.

კინე დირთუ აფუნი დო
გეითოფალუნც ხუმაფილი...
სი ღორონთიშ ნაჭყოლოფა
შხვაშა გაფუ თხუაფილი.

მუ ოკოდ სქან მარქვალც
ტურტურუაშ ოგვაჯეს,
ინეფქ შხვადო მირდესჷ დო
ფსუა შხვადო გოფაჩეს.

აკა აშო მიკირთი დო
გონწყი გური, წყუნაფილი,
ცოდა იზმა მონკა ვარე
ჩილამურით რტუაფილი.

შარეფ გინოფორჩილ ორდ
კაკლარი დო ძიგირით
დო სი ხოლო ონირზჷდი
ათე რინას კიდირით,

უკულ ოჭიში ქურთინე დო
ვამიჩქ, მი მუს თქუანცჷნი,
მუშ მაქექა ჸოფე შარა,
მასქური გიჯიკუანცჷნი.

თუდო დოლო, სქანიცალო,
დუც სიჭიჭათ იჩუანც,
მარა ირ კოჩი, მით ქორენი,
კუჩხის გიობიჯგუანც.

ნგერი მუთუნ ნგერი ვარე
ომანეშა ინტებუნი,
დუდი გაფუ ონგარალი,
მითინ ვაგენირზებუნი.