***ზოთონჯი რე

From Wikisource
Jump to navigation Jump to search
please do not remove empty parameters (see the template documentation).
* * *
by გიორგი ხულორდავა

ზოთონჯი რე, ანწჲ ვაღირჷ ბირა,
თირც დუფორჷ კონდიდეფიშ წვანჯი,
სო მეული? აშჲ მიკირთი ცირა,
დომირთინე ჸოროფაში თანჯი.

სქან წვიწვინი ტანც დაჩხირო გომრზუ,
ღურუცალო დომიწკური თოლი,
ღორონთ ვორდი, არძა კათა მთხოზუდჷ,
გეფსკიდი დო იშენთ გეგშართოლი.

თე ორინჯექ ეკომწიკვჷ ჩირეთ,
წირფე ვორდი დო ლეტამი გალე,
ანწჲ ვამოკო ღებარეფი ბძირე,
სქან თოლეფი მოიმედჷ ხვალე.

თე ზიტყვეფცჷ ანწჲ ვაუღუ ფასი,
მარეხეთჷ მონგარუანც ჭუა,
თის ევჭოფჷნქ მუთ წოხოლე ბთასი,
სოლე იბდა,მუჭო ვისხუნუა?

თი ჯვეშ, ჰამო სისმარეფი ბჭოფი,
ვახოლუდუ აკაბურცხა წვირე,
ხვათახვალე ვორკინუდი ბორჯის
დო ზისხირო ნარღი გევონქირე.

სით მიდართი გორთილი რე შარა,
ჯვეშ იმენდეფც თე ფირქეფი ორუ,
გურ მაჭუ დო მუჭო ბთქუა ვარა,
უსქანობაშ ნარღიქ ეკომგორუ.

ზოთონჯი რე, შურშე ვამურც ბირა,
თირც დუფორჷ კონდიდეფიშ წვანჯი,
სო მეული? აშჲ მიკირთი ცირა,
დომირთინე ჸოროფაში თანჯი