*მართალი მის ათქუე სქანი ცქვაფა?
| *მართალი მის ათქუე სქანი ცქვაფა? by |
| იოსებ ყიფშიძე "რჩეული თხზულებანი" თბ.1994წ. ხ.368-369 |
1.
ბოში: მართალი მის ათქუე სქანი ცქვაფა?
სისქვამეშე თქვა ზოჯუნთ არძო ცირეფიში მაფა.
სქანი ჸოროფა ქოპილჷნს, გურიშა მჷმაკათუუ რძაფა,
მილიონიშა ქომისხუნუ სქანი ძირაფა, თოლიშ რძღაფა.
დუსუ ვა მჷგოწონუა ნაბტან ნინაშ ტარკალითი,
ცირეფი ბრელი მიძირჷნა რუსი, ქორთუ, მარგალითი,
მარა მითა მიძირჷნა სქანიცალი მაგალითი:
ფირუზ-დალი აკოწყორილი, ნაკათები მარგალიში,
ბჟა დო თუთას აჩაკრენს, მანათლებელს სისერაში;
სილამაზე, ერთი-მორთი, გიღუ წორეთ სისქვამეთი,
თჷრიშ ურჩიაში რექ წარი-წამი კჷსერიში.
ანგილოზეფს გოგურუანქ, სი რექ ედამიში ნარდი;
მუ კოსუ რე, ვა ახარენს პიჯისახე სქანი ვარდი?
სქანი ჸოროფაქ მა დოპილჷ, შურქ მიდართჷ მუჭოთი კუმა;
დობღურე, ვე გეცოდებუქო, ვართ მინგარქო, მუჭო თქუა?
ვარდიში უჯგუში რე, ქოპიორილი ატამა,
წორეთ ანდამატი რექ, მუთუნი კილი ვა გაგორუუ, ახალგაზდა
ძღაბი რექ.
ჩქიმი გურიშ იმენდი რე სქანი თოლი ფართო გვირა;
თქვა ნორჩქვენა ფშვენიერი იადონიტოლი ბირა;
ღორონც ვა დებადებუდუ სქანიმანგი ტოლი ცირა:
ტანო ჩეჯა ოსვისვინა, პიჯო მესიშ ვარდიჯგურა,
სქანი უჯგუში მა მი ბძირა, ირინერიში მოსაწონე?
ოფუჩაფალი ხატიჯგურა!
კჷსერს სათი გიგობუ ნი,
მა ქოპუნი ეთი ჯგურა!
მეტ მუ მოკოდჷ ქეჸანას? გაჸვენუაფუდი ხეს,
გურჯიბეს იპუაფუდი, ქობძირჷნდი კჷდჷრ ჩეს,
ჰამას მოგახუტოლუდი სქანი პიკვალი ძუძუ ჩეს;
თენა თაში ქოჸუას, ფირქის ჩებთხინუა ჭეს.
დროთ მაძიცინე, მალაჸაფე,
დროთ ფურინა ქარი ლექ,
დროთ შვიდი, წყნარი ლექ,
ჩქიმი მასქილადაფარი უკლებაში წყარი ლექ.
შურო ღორონთი ვა ნორჩქენე, ირო დამიჩემი ვარი,
დებკილი დო ქობღურუუქ, მიდმაჸუნუუ სქანი ჯარი;
მუთ ქომიღუ ნი, გეეჭარი, სი მიხვარი, გააფარი,
ოღონც ქოჸოფირი სანი ჩქიმი გური გაახარი,
უსქანეთ ვა დოპილა, გომინჯჸ სამოთხეში კარი!
2.
ცირა: ბოში, გორწყექ ჭარუნქჷ ნი, თენა დოიგურუაფუ,
ზარალი გაფუ, კალამს ტახჷ, მელანი დოისქჷრუაფუ;
ჩქიმი ცქვაფა დოიჭყაფუ, ფიფქრენქ ვა მაღორენქჷ ნი;
სი ვა მიწუე, მათ ქომიჩქჷ, გჷშნაგორა ვორექჷ ნი.
3.
ბოში: ქორექჷ და, ქოჸოფირი გინოჭყვიდი აკაშა,
სქანისხეი ვა მოშქურუ ხენწჷფე დო მაფაშა,
სქანი ძირაფას იფსხუნუა შუმუა-ჭკუმუა, რძღაფაშა.
ცირა-კვაზა, მალას მორთი დო მიიბშათ პაპაშა!