*გაჭირება ჩქიმსჷ ფთქუა, შხვა საქმესჷ მივოტალენქ
| *გაჭირება ჩქიმსჷ ფთქუა, შხვა საქმესჷ მივოტალენქ by |
| მაკარ ხუბუა. მეგრული ტექსტები. ტფილისი 1937. |
გაჭირება ჩქიმსჷ ფთქუა, შხვა საქმესჷ მივოტალენქ.
გურსჷ სერდაქ გომირჩქინდუ ჩქიმი დაბადებას პჭყალენქ.
გუმაშინე ჩქიმი ჭუა, ჩქიმ ჭუაში მეწამალე;
ვა პილიდა მარდი გაფუ, შხვა წამალი ვამჷმალე.
ამდღარიშა სქანი დუდი ჩქიმოთ ორდუ ძირაფილი.
უდაჩხირეთ ვიჭუქუ დო გვალო ვორექ დინაფილი.
ვართი ღურუქ მიკორინუ, სქანდე გური-წყუნაფილი.
ანთასიშახ ქიმიბდომი თქვანი აშაჭყოლიდაფა,
მარა იშენი მიჸორთი, ტყურათ ვოძირი დუს ჯაფა.
თქვან უმუშო ჩქიმი რინა, უჯგუშ შურიშ ეშალაფა!
ჟირხოლო სი შეილებუ: ჸოროფა დო გოჯოგაფა.
მუ ზომაშა მიჸორქინი, სი ქოგიჩქუ, მა ვა ფთქუა!
გურიშ ახსნას შეგისრულე, კათას ნუ გომიჯოგუა.
ჩილამურით თესჷ ფთქუა, უბედური ჩქიმი ნინა:
ვაჰ, ღორონთი, მუ შერცოდი, მუს გიჭირდუ ჩქიმი რინა!
ჸოროფა დო გოჯოგაფა ჸოფე თქვანი გონარჩქინა.
რთხინთჷ ქუმაღირსათინი ჸოროფილიშ დინოჯინა.
სახე ანგელოზიშ უღუ, სირმაშ გიოჭყვართუ თომა.
ტყურათ ვე მემიდინუა ჩქიმი ხანდილი დო შრომა!
ანწი ნებით ფიფრქე თესჷ, ჸოროფილი მაწყნარენს.
ოღონ ჭიჭე ქუმმოჯინი, მუთას დუვანებე ტერს.
შურო მუთუნსჷ ვა ვორწყექ, ღორონს უჭყორუქჷ ჭეს.
ათე ამბე მუნოღვენო, ჩქიმი უბედური ბეს?
უღორონთეთ მუს მაწვალე, თაში მუსჷ მოშქვიდუა?
ჯგირს ვე ქუნსჷ ჩქიმი ცოდა, ესხის მუსჷ მიზინდუა!
მათ ადამიანი ვორექ, სით რექ ოსურიში სქუა.
გოტირხი დო გინოჭყვიდი, ანწი მუ ჟამიშა ჩუა?
ბრელ ხანი რე სქან ჸოროფა გურსჷ მიღუ ჩუალირი.
ფულირი ჭირქ დუმასუსტუ, ანწი უჯგუ თქუალირი.
გიჩქუდასჷ, გერჩქინელე სქან ჸოროფა წორეთ ჩქიმო.
ეთექ ვარდი გემიჩანდუ სანატრელი, მეზიმილო.
სით გიჭირს დო მათი პწუხე, წორო ვორეთ წვალებურო.
დინგოჯინექ, -- ვიძიცანქჷ, გეთხუებუქ ნგარებულო.
ჩქიმ ტერს ღორონქ ნუ მეჩას, თე-ცალი დრო ტარებულო!
მუქ გარჩქინუ თე ჸოროფან, ღორონს დოუჭყუდას თინა!
ჯოჯოხეთიშ უფურაში, უსქანეთჷ ჩქიმი რინა.
შური აქმაკორობუნ დო ჯგირო ვა მათქუე ნინა.
სი მუდგაქ გაღოლასჷნი, სქანი წკუმა მათი ბდინა.
ღურელენს ვორკუქუ დო მუთა მოკო მა მეძინა.
ღურა დღაშა ჩქიმი დუდი სი ქუგოგიხვარუას.
ჩქი ჩქინი ფქიმინათჷ დო, მის ოკონი ღვარუას.
ვალიკო ხარბედია. სახარბედიო. 1921