*ანთას წანაქჷ
Jump to navigation
Jump to search
ანთას წანაქჷ მიკილუ,
გურ მინჯამუ დო მიკილუ.
თე ვარვალია გოთანა,
მუდგარენქ დომიკიკილუ.
ანთას წანაქჷ მიკილუ,
ურწყებო ხოლო იბძირექ.
მურიცხო გეგლაფქიმინეს,
ჩხორო ჩხორიათ იბწირექ.
ანთას წანაქჷ მიკილუ,
ურწყებო ხოლო იბძირექ.
ჩქიმ ნარღი ქათურჩაფუნა
ჯამფეზია დო ინჭირეფც.
ქუმულუნ, მუ გაქიმინე,
ჭუეფი ოკო ინჭირე.
შურ თხოლოს მითნოტყობუე,
ჟი მუნარენი ინჩქი რე.
საბოლათ მუ რე ქიანა? -
ართ ნოჯვეშია ჭინჭი რე.
დიხაშე ვეშესოფენი
ჩქიმ უჯვეშაში ჯინჯი რე.
ბჟა ვორექ ცას დოჸაშილი
ლერსიშე ელნაპიორა.
თუთაშე მუკორცვილი დო
თაქ ლანდო გილნასიორა.
მურიცხეფჲ ეკმოძახანდეს,
სქანნერჲ გორჩქინა მიჸორა.
წანეფ ტანშა მაფ გერდილი,
დღალეფჲ ფურცელეფ შქიორა.
თუთაშე მუკორცვილი დო
ბორიას გილნაფიორა.
ბჟა ვორექ ცას დოჸაშილი
ლერსიშე ელნაპიორა.