(მადლი შენს გამჩენს, ლამაზო, ქალო შავ-თვალებიანო...)
Jump to navigation
Jump to search
| მადლი შენს გამჩენს, ლამაზო, ქალო შავ-თვალებიანო... ავტორი: ნიკოლოზ ბარათაშვილი |
| 10 იანვარი, 1845 |
მადლი შენს გამჩენს. ლამაზო, ქალო შავთვალებიანო,
დღისით მზევ, ღამე მთოვარევ, წყნარო და ამოდ ხმიანო!
შენის ლოდინით ვსულდგმულვარ, თაყვანსვსცემ შენსა სახელსა;
დედის ერთა ვარ, ნუ მამკლავ, ნუ დამანანებ სოფელსა!
ღარიბი ვინმე მოვსულვარ, სოფლისა მუშა საწყალი,
ამხანაგად მყავს ნაბადი, ძმობილად — ბასრი ხანჯალი,
მე სხვა სიმდიდრე რად მინდა? მე შენი გულიც მეყოფის,
მის ფასი კიდე საუნჯე ცას ქვეშეთ განა იმყოფის?