肥黃狗與黃鼠狼下卷
肥黃狗與黃鼠狼下卷[edit]
唐滌生撰曲
鼠狼: (白) 阿大哥呀，大哥，老阿烏已經俾人煲咗附子泡薑嚹，逓日慢嗄手，你會俾人燜南乳啵，
肥黃: (白) 嗄，嘩，喺啵，
(霸腔芙蓉中板) 俾佢哋一言嚟驚醒，嚇得我發軟蹄。 怪不得世上無百歲人，何必枉作千年計； 若果能夠不勞而獲，咁又何、何樂不為。
(七字清) 半個時辰我唔守衛； 瞌埋眉眼似發軟蹄。 任得佢偷鴨偷鵝偷豬仔； 一經煮熟你送埋嚟。
(滾花) 我條腸經已餓瘦咗兩年，好應該儃番一輪九大簋；
(黃鼠狼大喜介) 鼠狼: (白) 應該到極啦，嗱，你唔使慌，哽有得你儃嘅，
(三腳凳) 大家君子成協定，一切都冇話為。
莉莉: (接唱) 睇你爪甲咁污糟，積滿沙塵真噁睇咯； 等我代勞同你剪嗮，指甲鉗已帶埋嚟。
鼠狼: (滾花) 喺囉，你啲手甲腳甲留得太長，應該全部剪清，噉至好睇嘅；
莉莉: (白) 嚟啦，我同你剪咗佢啦，fatty 黃
肥黃: (白) 咪咪咪，咪區，剪嗮啲手甲腳甲，唓，身體髮膚受之父母，嚸剪得㗎，唔得唔得，
莉莉: (白) 哎呀大哥，你真喺傻嘅嘞，咁你都唔識享受嘅，
肥黃: (白) 嘩，乜剪手腳甲都有得享受嘅咩，嚸享受法呀，
莉莉: (白) 哽喺有定啦，大哥呀，
(白欖) 你咪咁賤格，你咪咁賤格啦，做乜要長長啲手腳甲唧， 又污糟，又邋遢， 近來世界已文明，你啲思想唔合格嘞， 第一講剪髮，第二講修甲， 修甲要揾女郎，每次五皮不折不拆， 呢趟由我代勞同你慳番，等我親親熱熱同你修甲啦，
鼠狼: (笑白) 喺囉，享受嗄啦，
肥黃: (白) 哦，咁又不妨試嗄嚹，嚟啦，
莉莉: (白) 喺囉，嚟啦前世，
鼠狼: (笑白) 大哥呀，咁我就同埋班手足，入去工作咯啵，
肥黃: (白) 得嘞得嘞，你哋入去唔喺拎得咁多得咁多啦嗄，大家冇計嘅，
鼠狼: (白) 得得得，阿大哥，我唔同你客氣嚹嗄，你同莉莉慢慢斟嗄，(下介)
莉莉: (嗲聲嗲氣白) Fatty 黃
肥黃狗: (以鼻應白) Miss 莉莉
(毛毛雨) 我好開心， 靜靜笑吟吟， 夠摩登， 想修指甲實喉噖， 佢似天仙化， 嬌姿婀娜甚夠風韻， 一於剪啦， 令我興奮，
(楔白) 真喺連老竇姓乜都唔知咯，
莉莉: (白) 大哥呀，
(接唱) 兩相偎， 兩家永合群， 叫一聲， 唉吔心肝共靈魂， 共你修甲周身舒暢樂不禁， 今生我共你心相印
(楔白) Fatty 黃呀，你舒唔舒服唧，嗄，
肥黃: (笑白) 噓，噱噱呀，認真舒服到胂啦，
(白欖) 我個心，卜卜跳， 我匿埋牆，笑一笑， 我生平最怕羞，未曾聽見過小姐叫， 佢又銷魂，又夠醮， 對眼仔又大，個心肝又小， 呢一路剪時，我就一路笑， 阿 fatty 嘅魂魄，經已出咗竅， 飛咗上九重天，幾乎連命都唔要，幾乎連命都唔要
莉莉: (笑白) Fatty 黃呀，嗱，一陣間剪清嗮啲手甲腳甲，等我同你銼滑嗄佢添呀嗄，好唔好唧，
肥黃: (白) 好，真喺修甲咁好享受嘅喎，
莉莉: (白) 哽喺啦，你估，
肥黃: (白) 噓，
(長句二王) 確喺令我好開心， 喜交桃花運， 我眼前佳麗極銷魂。 艷福飛來， 睇嗄你精定笨； 我要安排秩序， 我倆不若去週末旅行。
莉莉: (唱序) 你對我確殷勤
(唱曲) 但願形影永相隨， 只可惜未容親熱吻；
肥黃: (白) 喺囉，喺囉，你都未曾同我 ki 過 ss 啵，
莉莉: (白) 真喺唔制呀，睇嗄你吖，
肥黃: (白) 乜嚸呀，乜嫌我個嘴巴大過頭呀，
莉莉: (笑白) 唔喺，呢，你對大虎牙囉，齙咗開嚟，人哋想同你親吻唧，容乜易俾你齕斷我條脷㗎，我真喺唔制呀，而家大家拍拖出街，人哋都會笑我嘅，
肥黃: (白) 哦，咁有乜辦法嚟補救呀，嚸補救呢莉莉，
莉莉: (白) 你問我呀，咁呢，除非你去脫咗佢啦，咁我就同你親吻拍拖嘞，
肥黃: (白) 嘩，咪咪，咪區，乜落咗佢呀，咁嚸得㗎，我最靠呢兩隻牙食糊嘅，你睇幾好睇，我一“胡”，你睇又夠威，幾好睇呀，又威風，落咗佢喎成個落嗮威，唔制唔制唔制，
莉莉: (白) 唉吔真喺憎你嘅啫，乜你咁唔識想㗎，
(梳妝台) 世界花花應該學脫牙， 我送熱吻， 不怕羞家， 但極憎你對“齙牙”， 等我同你剝啦， 好過受人話， 照市價“快打拿”， 我贈醫脫“齙牙”
(白) 哎呀好唔好唧，脫咗佢啦，fatty 黃，我要你脫，
肥黃: (白) 哦，脫啦脫啦，
莉莉: (白) 嗱脫喇啵，
肥黃: (背場白) 嚡，我當堂就不由自主，擘大咗嗰個嘴巴，齙起嗰兩隻虎牙，咁就等候莉莉將我嚟擺佈，於是乎莉莉對住我個對虎牙嚟剝嘞，一手揸住個鉗，一手摸住我塊面，噓吔，佢一摸摸落我塊面，當堂成身毛管“渣”一聲猋起嗮，嗰陣慢講話痛苦我唔知，就算你問我 fatty 黃呀，你個 father 姓乜名乜呀，連老竇姓乜名乜我都唔曉答你嘞，正在“噱”緊嘅時候，忽然間就听見“嘞”一聲，嘩喺，兩隻虎牙當堂變咗“孔雀東南飛”，冇咯，冇啦，冇咯冇咯，嘩喺，我罨住嗰個嘴嘅時候，嗰只黃鼠狼經已搬咗我主人好多嘢出嚟，嘩嘩嘩，佢真喺唔多客氣嘅啵，
鼠狼: (白) 阿莉莉，做妥未呀，
莉莉: (白) 得嚹，爪又剪埋，牙又剝嗮嚹，
黃鼠狼: (笑介白) 哈哈哈… 阿大哥，聽日我哽同莉莉拎啲九大簋嚟你食，你唔使慌嗄，
肥黃: (白) 喂喂喂咪住，嘩喺喂，你實實在在鼠咗我主人幾多嘢咁㗎，
鼠狼: (白) 咁就十零隻雞鴨，同一袋米，三隻豬仔啫，好少咋，
莉莉: (白) 咁夠嘞，fatty 黃，拜拜，
肥黃: (白) 喂喂喂，你哋記得聽晚拎九大簋嚟我嚓呀，
莉莉: (白) 得嘞，咪咁長氣啦，
鼠狼: (白) 我哋走嚹，拜拜，
肥黃: (白) 拜拜，哈，乜咁奇呢喂，當阿莉莉喺嗻嘅時候，剝咗對虎牙嗰陣一啲痛苦都唔覺，佢一擰轉背唧，而家喳喳聲咁痛，委實痛，好嘞，呢頭痛楚未完，嗰個新花王耷頭耷腦就拎住我兜狗飯嚟畀我食，我即時使起對太獅眼，望落佢狗兜嗰喥，哼，豈有此理，又喺清湯撈白飯，嘩，嗰陣嗰把狗火當堂一起，我，我唔會留番個肚食九大簋咩，使喫你嗰兜噉嘅衰飯，混賬你話，當堂惡向膽邊生，怒從心上起，把佢嗰隻狗兜一腳，踢到去半天高，嚇到個花王走直辮尾，嘩，走夾唔唞，我噈話知佢，唔理咁多咯，行埋去牆邊，一條心，等阿莉莉搦九大簋嚟我儃至得，(過場介)
(白) 呵，喂乜嚸解咁㗎，乜黃鼠狼兩兄妹，都幾夠冇腰骨嘅啵，而家都半夜㗎啦，都重未搦九大簋嚟，牙又痛，肚又餓，嚸呢，等等嗄，唔喺嚹，瞌番覺先啦，
(梆子慢板板面、黃鼠狼兄妹上介) 鼠狼: (楔白) 莉莉呀，呢趟只肥黃都幾好睇嘅啵，又冇牙、又冇爪，重嚸看守得門口呀嗄，哈哈哈…
莉莉: (楔白) 大哥呀，全靠我出機器咋，
(士工慢板) 英雄難過美人關， 任得佢如何威猛， 施展溫柔手段， 將佢推落深潭。 令佢意醉情迷， 不顧前途毀滅， 恍似撲火燈蛾， 真是可憐可嘆；
鼠狼: (五槌滾花) 邊個叫佢多情自作，呢佢有如白鱔上沙灘。 我要將佢取笑一番，得意何妨牙斬斬；
莉莉: (白) Fatty 黃，起身啦，拎九大簋嚟你食嚹，
肥黃: (白) 哦，莉莉，啱嘞啱嘞，擺九大簋嚟啦，
黃鼠狼、莉莉: (大笑介白) 哈哈哈…
肥黃: (白) 哦，喂，乜你兩隻嘢，空手掉空腳，一啲嘢都冇帶嚟我食呀，
鼠狼: (白) 肥黃，乜你想食九大簋咩，開胃嚹你，
莉莉: (白) 夜啲啦，fatty 黃，
肥黃: (白) 嗄，乜重夜啲，哦，我呸，
(爽二王) 喂，你竟敢把協約推翻。 你都算過橋抽板； 不應視作為閒。 我肥黃素來火氣猛；
(作兇猛狀白) 你睇嗄，
(黃鼠狼、莉莉笑介)
(接唱爽二王) 你睇嗄我塊面似玄檀。 將你兩人嚟當飯； (肥黃作兇猛狀)
鼠狼: (白) 哈哈哈，哎呀，呀肥黃，你往日呢就張牙舞爪，我都驚你七分嘅，今日你爪又剪咗去，牙又脫埋，我重驚你，你驚我喥，
莉莉: (白) Fatty 黃，
(木魚) 乜你想學人做大食懶， 你真喺懵得太交關； 世間又嚸會不勞而獲㗎，就算去偷去搶，都要血汗歸還。
鼠狼: (白) 冇錯嚹，
(接唱) 真喺瞓喺喥就有得食喎，乜你個頭腦咁單簡； 你羨慕有啲不勞而獲，你知否佢有背景支撐。 我一不做二不休，咪怪我橫施離間；
莉莉: (接唱) 話畀你主人知道…
(楔白) 呢煲就夠傑咯啩肥黃，
(接唱) 你想捱瘦米都幾艱難。
鼠狼: (白) 哈哈哈，好嘞好嘞，以後門戶開放，我哋亦唔再騷擾你嚹肥黃，你估莉莉真喺我個妹嚟咩，我話畀你聽吖，你估佢喺我邊個呀，佢喺我妾侍呀，咪想愴你個心嚹，拜拜，
莉莉: (白) 拜拜 (二人下介)
肥黃: (沉腔花) 哎吔吔， 真喺涕淚縱橫。
(乙反中板) 失足恨錯已難返， 深悔懵閉一時， 今回俾佢認真揤膽； 長日守門庭， 絕不知道世途險惡， 我今趟唔死都一身潺。 邊個叫我作弊罪如山， 誰想會蹉落深潭， 我確喺不應， 想做大食懶； 引狼入室太荒唐， 任得佢拉雞偷米， 我良心何在呀， 抵受人彈。
(滾花) 唯有厚顏求恕見主人，若得佢海量汪涵，寧願餐餐捱淡飯；
(哭白) 嚡，醜婦都要見家翁，邊個叫你陸榮庭睇相，唔衰自己攞嚟衰呢，於是乎我就惗定一番說話，好似揾油盪嘴，打算入去揾個主人嚟講啦，叫佢畀一次機會過我，等我留番長啲手甲腳甲，長番出兩隻大虎牙，再同佢守過門口啦，唔講話兩餐瘦米咯，就算一餐半餐都冇所謂咯，咁就想入門口見主人囉啵，嘩，嚸不知都唔使我入去見佢，佢都是經已等咗我好耐咯，嘩，一由頭望到佢落腳，原來是佢手上揸住椂大柴，揦埋個面口，咁嘅情形，重有唔喺想摳我一餐嘎，有命嘅，三十六著走為上著，於是乎，一個“向後轉”，一支箭咁猋咗出街先至算喺啦，好嚹，而家咁就從今以後流浪荒山，做咗一隻野狗添，舊時就成個肥仔黃，而家就變咗成個瘦骨黃咯黃，
(白) 嚡，
(直起南音) 呢只肥狗都變咗瘦狗咯， 學人嘆嗄五更； 初更明月，照山岩。 冇爪又焉能，求飽飯； 冇牙焉可，再去看更。 一夕風流，咁噈臨大難； 今夕荒山淪落，自覺羞顏。 二更明月，照住我淚潸潸； 方知飢微世界，喺揾食艱難。 安分之時，重有個肥肚腩啵； 錯想不勞而獲，狼狽為奸。 三更明月，照住我長嗟嘆啵； 唔應監守自盜，抵我受摧殘。 四更明月，照住我向個天嚟喊； 我一場大喊，足足喊到五更。 五更又覺，天寒冷； 今晚飢寒交迫，慘絕人寰。 (曲終)