肥黃狗與黃鼠狼上卷

肥黃狗與黃鼠狼上卷

唐滌生撰曲

(肥黃狗吠叫上場介) 肥黃: (走馬) 雖則我哋啲狗乃喺禽獸， 有陣人亦冇咁忠厚， 稱我喺鼠摸與狗偷喎， 實在我狗邊會去偷唧， 睇更一晚隨時都睇到日頭， 因乜嘢懶嚫都話喺狗得嘎， 我心想懶都冇陣敢去唞， 俾佢喝一聲， 我服從就要走嘅啦， 查實你哋喺畀氣我受， 擺頭擺尾當主人喺老竇， 其實我重叻過阿茂和阿壽， 我話尾醒頭， 重週時、看牛、防賊嚴密冇走漏， 你靜靜將嘢攨呀， 我實會追到你瘦定嘞， 有陣重全捱義氣， 把人來救， 有陣時為樂趣， 用我嚟做戲， 將狗鬥添呀， 有陣重常為密探， 把線路尋求，

(楔白) 嘿嘿，我重會做偵探添啵，都唔喺嚇你，

(接唱) 真正樣樣我幫得手， 人哋有陣去講說話， 我亦能接受， 我重會英文， 並無假柳

(白) 嘿嘿，都唔喺發吟發話嘞，你話我條命好又得，唔好又得，嚡，都唔喺嚇你，呢，我主人養咗我一年喥啫，我就開始有職業囉啵，哦，嗰種職業唔使我寫信去報館咁排長龍去應考㗎，唔使嘅，天跌落嚟嘅嘞自自然然，吖哽有得做啦，“你做咩嘢呀肥黃，懶叻”，哎喲，乜懶叻呀，守門口嗱、看貨倉嗱，淨喺看住啲家禽家畜咁就夠抵呢，哦，喺定啦，“喂喂，咁嚸解你條命，又會講唔好又得嘅呢呢又”，嚡，你唔知嘅嘞，

(長句二王) 人撈世界似矮仔上樓梯， 我都永冇升級捱一世嘅咯， 亦知到惟求一飽， 都未敢亂胡為， 可嘆個新到嘅花王， 嘿，佢令我真氣翳， 絕不守時開飯， 任佢意到唧管送嚟喎， 更有陣賭淨輸乾， 竟將我連罉都抵制；

(白) 嘿，你話捱兩餐瘦米幾辛苦唧，嚡，咁都未算陰功呀，嚡，重將我鬼咁刻薄，隨時都將我吊罉㗎，你估我唔付出相當精神嘎，(倉) 你估我唔付出相當勞力嘎，(倉) 呢，淨喺看住嗰只黃鼠狼，咁就抵食你嗰兩餐瘦米啦，

(長句滾花) 講起嗰只黃鼠狼， 佢性格都非常曳啵， 成日拉雞和偷米， 有我肥黃座鎮， 都未到佢亂胡為， 佢有次偷入後園， 想話拉豬仔， 俾我狂追猛吠， 嚇到佢魂魄都唔齊。

(楔白) 咁就抵番啦

(接唱) 若果俾佢偷竊成功， 我就當堂死畀佢睇；

(春風得意) 試問誰個都有膽敢趯入嚟，

(楔白) 你試嗄

(接唱) 我喺得人懼畏嘅， 嗱，擺響處就夠威， 嗰啲鼠摸真膽細， 我“胡…胡”撲起似想向人噬，

(吠介、楔白) 你重敢唔敢入嚟

(接唱) 我完全無亂諦， 忠心將主衛， 對職責又冇虧， 若有乞兒攞米， 佢啲衣衫太噁睇， 我吠起誰唔畏呀又， 責任長日要守衛， 費盡勞力冇所謂， 若然被竊我一一身蟻嘅啵， 最忌黃鼠狼， 佢四圍咁睺重眼詈詈， 想噅准我話盪入嚟喎， 任由佢入嚸施為

(白) 哼，佢都開胃嚹佢，俾佢入嚫去呀，嗰啲雞鵝豬鴨，毛都冇條剩囉，咁都得嘅咩，嚡，我盡責都喺假嘅啫，人哋唔盡責弊呃，呢邊個啫，就今晚個新花王就夠抵死啦，而家咁夜都重未拎飯嚟我食，嚡，唔嗵真喺走到去“防止虐畜會”嚟告佢一狀咩，嚟出傳票拉佢呀，嚡，唔喺聽暇重罰倒我主人添，開講有話，“狗瘦就主人羞”啦嘛，冇法咯，疊埋心水，瞓番一覺罷啦，

(黃鼠狼與女黃鼠狼上介) 黃鼠狼: (白) 莉莉，我哋做世界要小心至好呀，

莉莉: (白) 哽喺啦

(下西岐) 大廈門前隨處睺， 對住肥黃真冇收，

鼠狼: (接唱) 裡面有好多鴨雞， 不能任、任意偷嘅， 佢盡忠責任成日冇疏漏，

莉莉: (接唱) 似若猛虎未容共佢相爭鬥，

鼠狼: (接唱) 我哋應要用計來度謀

莉莉: (花下句) 肥黃狗佢凶神惡煞，鼠狼哥呀你要執生行頭。 因住佢一咁齕過嚟，咬住你絕唔放口；

鼠狼: (笑白) 哈哈，哎呀，我會見機而行嘅，嗱，等我埋去髡嗄佢先，如果治佢掂呢就由你出頭，畀一輪生藕佢噍，實冇甩拖嘅，莉莉呀，你匿埋一便，上番啲脂粉唇膏先，

莉莉: (白) 哦，咁你打頭陣先囉啵，我去裝扮嗄，(下介)

(黃鼠狼行前肥黃狗處細聲白介) 鼠狼: (白) 肥黃、肥黃， (肥黃狗吠數聲驚醒、黃鼠狼急退後數步介)

肥黃: (喝白) 黃鼠狼，你鬼鬼崇崇走嚟做乜嘢，喺唔喺想死，好走囉啵，

鼠狼: (忙白) 喂喂喂，肥黃大哥，乜講啲咁傷感情說話呀，老實話畀你聽啦，你呢幾日呀，我睇見你冇厘心機，烏眉瞌睡呀，所以呢特登嚟問候你㗎咋，

肥黃: (白) 嗄，乜我烏眉瞌睡、冇厘心機咁，唔喺啩，

鼠狼: (白) 你自己唔知㗎咋，

(蘇武牧羊) 呢因何阿大哥你冇厘神， 你頸都梗， 我戥你傷心， 嚡，真擔憂， 瘦蜢蜢， 你十足似個病人， 唔嗵日日被蚊針， 喂，攪到未能瞓， 你已吊幾餐飯， 一定餓到失魂， 你肥亦變瘦， 心中不滿， 我戥你悲憤

(楔白) 好戥你唔抵

肥黃: (白) 吖，你話佢而家靠激吖噈靠翳呢嗄，已經鬼咁肚餓，佢重偏偏提起話我冇飯開添，你話嚸抵得佢死樣呢你話，吖——好，拋番佢轉頭，嚸都要替主人撐番面子得嘎嘛，喺嘛，喂，黃鼠狼，混你個賬，我都使吊罉咁丟架，胂嘅你都，混你個撓，

(女人) 我常慣識儃， 常慣識儃， 一天三四餐， 唔計朝晚， 唔計朝晚， 一餐好晏， 鵝頭與豬踭， 重蒸膏蟹啵， 芙蓉翅味更盞， 還有一味燕窩白鴿蛋， 蠔油和勻蝦仔晏

鼠狼: (白) 哈哈哈，哎呀，阿大哥，你顧住難為你自己個肚呀，

(夜上海) 你還扮傻， 可奈何， 若果抵多幾餐要見閻羅， 你明肚餓， 真折墮， 使乜呃我呀， 精精哋你順從我， 唔使肚餓時時受折磨

(大笑介白) 哈哈哈，阿大哥，我話畀你聽啦，工字不出頭嘅，人哋打工一年好過一年，你就年年都喺一樣，重要捱餓添，唉，咁嚸撈得㗎，

肥黃: (白) 嗄——嚡，真喺冇法咯，連只底都俾佢睇清楚埋，如果要再抵多兩餐餓，確喺、確喺嚸算呢你話，

(乙反木魚) 真苦楚， 我叫句鼠狼哥；

(楔白) 唉，呢趟唔講話個肚餓到軟，連牙齩都餓軟埋咯，

(接唱) 唔怪得話奸奸狡狡朝魚晚炒，忠忠直直呀，反要受折磨。 確喺工字不出頭，你呢句說話並非激我； 我呢件爛棉衲，

(楔白) 唔著就冷，著住又臭嘣嘣，

(接唱) 我都經已著咗兩年多。 到今日意冷心灰，但不知你如何教我；

(二王) 我都知到難求富貴， 何必把歲月蹉跎。 忍不住眼淚汪汪， 吠幾聲鳴哀苦楚； (肥黃狗吠介)

鼠狼: (白) 大哥，識時務者為俊傑，你耷低個葫蘆頭，豎起嗰對蜆殼耳，聽我講啦，

肥黃: (白) 願聆高論，願聆高論，

黃鼠狼: (大笑介白) 哈哈哈…

(白欖) 唔喺認沙塵，自己稱白霍， 只要你衷心，同我嚟合作， 每日詐瞓半點鐘，你就可以不勞而獲， 嗱燒鵝髀，送得杯落， 鹵鴨翼，扣肉燘粉葛， 餐餐都九大簋，真喺任嚓唔嬲， 包你肚飽腸肥唔使咁乾涸，唔使咁乾涸，

肥黃: (白) 哦，喂喂，哇嗄，你叫我每日詐瞓半個鐘頭，咁就等你入嚟謴嘢喺嘛，

黃鼠狼: (奸笑介白) 哈哈哈… 阿大哥，乜講謴謴聲咁噁聽呀，呢啲喺大家技術上合作唧，

肥黃: (白) 技術上合作，咁樣唔喺謴喺叫乜啫，唔得唔得唔得，混賬，

(高腔花下句) 分明叫我開門揖盜，如斯犯法豈甘為。 有何面目對主人，決不敢通同作弊；

(白) 誃誃誃誃誃，你想引誘我作不道德嘅行為，唔啱牙嘅，誃誃誃，誃囉啵，

黃鼠狼: (笑介白) 哈哈哈… 大哥，都怕唔使咁崛情趕我誃啩，嗱呢樣唔啱牙，又傾第二樣啫，

肥黃: (白) 哼，不同道不相為謀，有乜好傾呀，

黃鼠狼: (笑介白) 哈哈哈…所傾者多之至啦，阿大哥，我問你嗄，你而家呢，都有三四年狗身嘅咯啵，喺咪吖，喂喂，咁你有冇女朋友行呀，

肥黃: (白) 嗄，有冇同女仔拍拖，嚡，兩餐都捱唔掂，重攪得同女仔拍拖，行行行，行鬼行馬咩，

(梆子中板) 呢處喺高尚嘅住宅區， 啲狗女異常嬌貴， 隻隻都有出世紙嘅， 坐飛機到嚟㗎。 佢生長在望族名門， 歷代狗展冠軍， 睇見我都好似唔多開胃喎； 我重想話打、打嗄交情， 誰知佢等嬌嗔大發， 向住我鼻哥一爪啫， 就爪落嚟。

(滾花) 唉，佢對我冷眼都唔瞧，講起就真喺抌心抌肺；

黃鼠狼: (奸笑介白) 哈哈哈… 哎喲，阿大哥呀，你唔使咁心灰嘅，嗱，等我介紹我個妹阿莉莉，俾你相識呢，好嘛，

肥黃: (白) 哦，你有個妹叫莉莉吖，介紹我相識，好好好吖，

鼠狼: (白) 莉莉…莉莉，

莉莉: (白) 嚟嚹…

(賣相思) 我已扮成更嬌麗， 氣息高貴， 佢一睇見， 當會著曬迷， 我帶笑行前， 牠手踭一於變雞， 老襯撞埋嚟， 我定必一咁噬

鼠狼: (白) 阿莉莉，莉莉莉莉，埋嚟埋嚟埋嚟，等我介紹你兩隻相識，呢只就喺肥黃大哥，

莉莉: (白) 大哥

鼠狼: (白) 呢只就喺舍妹莉莉，

肥黃: (白) 我哋狗仰，真喺狗仰、狗仰、狗仰，

莉莉: (白) 大哥，幸會、幸會， (肥黃狗傻笑介)

(減字芙蓉) 小妹多時心仰慕，阿大哥相貌確雄威。

肥黃: (白) 好睇呀，好靚呀

莉莉: (楔白) 我真喺鍾意你…個葫蘆頭呀，

肥黃: (接唱) 所以有我守門前，誰敢拉雞和偷米；

(楔白) 你就夠生得銷魂啦，

莉莉: (接唱) 但願長相伴，癡心一片為情迷。

(楔白) 乜你咁得我歡喜嘅啫，嗄，

肥黃: (楔白) 喺咩，

鼠狼: (接唱) 舍妹對你咁熱情，相信合作都無所謂；

(楔白) 大哥，我就喺你個未來舅爺咯，

肥黃: (唱霸腔芙蓉中板) 恕我公私難混合，講到合作都不消提。

(霸腔花) 我素來忠直對主人，犯法之行心有愧；

莉莉: (笑介白) 哈哈哈… 哎喲大哥，你成日咁盡忠主人，咁你真喺太過唔化咯，

肥黃: (白) 我唔化，嚸解呀，

莉莉: (白) 大哥，

(梆子中板) 你蠢得太交關， 向主人盡忠職責， 可知佢當你似地底泥。 對面隻老阿烏， 一到年邁無能， 就俾主人話佢食枉米； 㓥咗嚟煲附子泡薑， 人類無情寡義， 你何必盡責咁癡迷。

(白) 大哥呀，

(花) 如果你肯合作同撈呢，我定必餐餐送來九大簋；