福州土腔聖經/創世記/7

From Wikisource
Jump to navigation Jump to search
福州土腔新舊約全書  (1937) 
創世記/第七章

第七章[edit]

挪亞共家眷帶連衆生其種齊上大船
耶和華共挪亞講、落者世代中間、我見汝是義人着我面前、汝仱共汝一厝𠆧、都上大船。
該當揀清潔其頭生、牯七頭牳七頭、賣清潔其頭生、牳牯二頭。
天禮其鳥、也帶牯七頭、牳七頭、以致留者種類落地上。
因再過七日、我剝降大雨落地上、四十日、四十晡、凡我所造其衆生、我剝滅落地上。
挪亞就都憑耶和華所命其話遵行。
當洪水浸者地時候、挪亞已經六百歲。
挪亞就共𡚸仔連媳婦、都上去大船、避者洪水。
清潔其頭生、共賣清潔其頭生飛鳥、共爬地兜各種蟲蟻。
牳牯相配、都跟挪亞入去大船禮、照上帝所命其話。
過七日後、洪水浸者地。
十一 〇肘肘挪亞六百歲、二月十七日、大海其源頭都崩出、天其門空也開起。
十二 雨逿地上四十日四十晡。
十三 當許一日、挪亞帶老小、連伊仔閃含雅弗共三個媳婦、都入去大船禮。
十四 伊各𠆧共百獸六畜、連爬地兜各種蟲蟻、飛鳥、都憑伊其類。
十五 凡務血氣活其乇、一合一合、跟挪亞上去大船。
十六 凡務血氣其、牳牯相配、憑耶和華其命都入去、耶和華就將伊關落船裏。
十七 洪水浸者地、至四十日、水勢大、大船就離地浮起。
洪水浸地水勢極大地上衆生都浸死
十八 水勢落地上莽漲莽高、船落水面浮來浮去。
十九 水勢落地上漲頂高、普天下高山都浸去。
二十 水勢高去山、一丈五尺、山嶺都㵥去。
二一 凡務血氣活着世上其飛鳥、頭生野獸、共爬地兜其蟲蟻、連𠆧、都浸死。
二二 大凡着乾地禮、有鼻⿰亻鞋通呼吸其氣、攏總都死。
二三 着地面其衆生、自𠆧至六畜、蟲蟻、天禮其鳥、都滅亡、惟獨挪亞共齊着船禮其、都留伊活命。
二四 水漲着地上、經一百五十日。


前一章 · 下一章 · 轉去《創世記》目錄
Information about this edition
Edition:
Source: 珍本聖經數位典藏 (fhl.net)
Contributor(s): Davidzdh
Level of progress: The text has been proofread and corrected by one user, who has checked the text with a reference edition. The text is properly formatted and supplied with information about the source. The text is reasonably reliable.
Notes:
Proofreaders: