ᠴᡳᠩ ᠸᡝᠨ ᡴᡳ ᠮᡝᠩ ᠪᡳᡨ᠌ᡥᡝ/ᠵᠠᡳ ᡩᡝᠪᡨᡝᠯᡳᠨ

From Wikisource
Jump to navigation Jump to search
Manju gisun.svg

This page contains Manchu script. If it is not displayed, click here.

此頁面包含滿文。若無法顯示,請點擊這裡

Ere afaha de manju hergen bi. Tuwame muterakūci ere afaha de dosireo.



ᠮᠠᠨᠵᡠ ᠨᡳᡴᠠᠨ ᡤᡳᠰᡠᠨ ᡳ ᠴᡳᠩ ᠸᡝᠨ ᡴᡳ ᠮᡝᠩ ᠪᡳᡨ᠌ᡥᡝ ᠵᠠᡳ ᡩᡝᠪᡨᡝᠯᡳᠨ
滿漢字清文啓蒙卷之二
長白 舞格 壽平 著述
錢塘 程明遠 佩和 校梓
ᠨᡳᡴᠠᠨ ᡤᡳᠰᡠᠨ ᡴᠠᠮᠴᡳᡥᠠ ᠮᠠᠨᠵᡠᡵᠠᡵᠠ ᡶᡳᠶᡝᠯᡝᠨ ᡳ ᡤᡳᠰᡠᠨ
兼滿漢套語

ᠮᠠᠨᠵᡠ ᠪᡳᡨ᠌ᡥᡝ ᡥᡡᠯᠠᡵᠠ ᠨᡳᠶᠠᠯᠮᠠ ᠣᠴᡳ᠈ ᡠᡵᡠᠨᠠᡴᡡ ᡥᡝᡵᡤᡝᠨ ᡨᠣᠮᡝ ᡤᡝᠮᡠ ᡤᡝᡨᡠᡴᡝᠯᡝᠮᡝ ᠰᠠᠴᡳ ᠠᠴᠠᠮᠪᡳ᠈ ᠮᠠᠵᡳᡤᡝ ᡥᡝᠣᠯᡝᡩᡝᠴᡳ ᠣᠵᠣᡵᠠᡴᡡ᠈ ᠠᡳᡴᠠᠪᠠᡩᡝ ᡝᡵᡝ ᠪᡳᡨ᠌ᡥᡝᡩᡝ ᡝᠵᡝᡥᡝᠩᡤᡝ ᡤᡝᡨᡠᡴᡝᠨ ᠠᡴᡡ ᠣᠴᡳ᠈ ᡤᡡᠸᠠᡳ ᠪᡳᡨ᠌ᡥᡝᡩᡝ ᡨᡝᡳᠰᡠᠯᡝᠪᡠᡥᡝᡩᡝ ᡠᡨᡥᠠᡳ ᡨᡝᠩᡴᡳᠮᡝ ᠰᠠᠮᡝ ᠮᡠᡨᡝᡵᠠᡴᡡ ᠣᠮᠪᡳ᠈ ᡠᡨᡨᡠ ᠰᡝᡵᡝ ᠠᠩᡤᠠᠯᠠ᠈ ᠶᠠᠶᠠ ᠨᡳᠶᠠᠯᠮᠠ ᡩᡝ ᠪᡝᠯᡤᡝ ᡳ ᡤᡝᠰᡝ ᡝᡵᡩᡝᠮᡠ ᠪᡳᠴᡳ᠈ ᠪᡝᠶᡝ ᡩᡝ ᡨᡠᠰᠠᠩᡤᠠ ᠰᡝᡥᡝ ᠪᠠᡩᡝ ᠠᡳᡴᠠᠪᠠᡩᡝ ᡤᡡᠨᡳᠨ ᡩᡝ ᡨᡝᠪᡠᡵᠠᡴᡡᠴᡳ ᠣᠮᠪᡳᠣ᠈ ᡴᡳᠴᡝᡵᠠᡴᡡᠴᡳ ᡤᡝᠯᡳ ᠣᠮᠪᡳᠣ᠉

凡如讀滿洲書的人 必定字字都該當明白知道 些須怠慢使不得 倘或這個書上若記的不明白 別的書上磞見了 可就不能的確知道 豈但這樣說 凡人有粟粒之技 倘且說于己有益 倘若不存心也使得麽 若不用心也使得麼

ᠠᡤᡝ  ᡳ ᠠᠮᠪᠠ ᠠᠯᡤᡳᠨ ᠪᡝ ᡩᠣᠨᠵᡳᡶᡳ ᡤᠣᡳᡩᠠᡥᠠ᠉ ᡩᠠᠮᡠ ᠸᡝᠰᡳᡥᡠᠨ ᠴᡳᡵᠠ ᠪᡝ ᠪᠠᡥᠠᡶᡳ ᠠᠴᠠᡥᠠᡴᡡ᠉ ᡝᠨᡝᠩᡤᡳ ᠵᠠᠪᡧᠠᠨ ᡩᡝ ᡝᠮᡤᡝᡵᡳ ᡨᠠᡴᠠᡥᠠ ᠪᡝ ᡩᠠᡥᠠᠮᡝ᠈ ᠠᡤᡝ ᠰᡳ ᠸᠠᠯᡳᠶᠠᠮᡝ ᡤᡡᠨᡳᡵᠠᡴᡡ ᠣᠴᡳ᠈ ᠮᡳᠨᡳ ᠪᠣᠣᡩᡝ ᠮᠠᠵᡳᡤᡝ ᡶᡝᠯᡳᠶᡝᡵᡝᠣ᠉ ᠰᡳᠨᡳ ᡤᡳᠰᡠᡵᡝᡵᡝᠩᡤᡝ ᡠᠮᡝᠰᡳ ᡳᠨᡠ᠉ ᡝᠰᡳ ᠶᠠᠪᡠᠴᡳ᠈ ᠪᡳ ᡥᠣᠨᠣ ᠠᡤᡝ  ᡳ ᠵᠠᡴᠠᡩᡝ ᡤᡝᠨᡝᡶᡳ ᡨᠠᠴᡳᠪᡠᡵᡝ ᠪᡝ ᡩᠣᠨᠵᡳᡴᡳ ᠰᡝᠮᡝ ᡤᡡᠨᡳᡵᡝ ᠪᠠᡩᡝ᠉ ᠰᡳᠨᡳ ᠪᠣᠣᡩᡝ ᡶᡝᠯᡳᠶᡝᡵᠠᡴᡡ ᠮᡠᠵᠠᠩᡤᠠᠣ᠉ ᡩᠠᠮᡠ ᠶᠠᠪᡠᡥᠠᡳ ᠠᡤᡝ ᡩᡝ ᡝᡳᠮᡝᠪᡠᡵᡝ ᡳᠨᡝᠩᡤᡳ ᠪᡳᡴᠠᡳ᠉ ᠠᡳ ᡤᡝᠯᡳ᠈ ᠪᡳ ᡩᠠᠮᡠ ᠠᡤᡝ ᠵᡳᡩᡝᡵᠠᡴᡡ ᠠᠶᠣᠣ ᠰᡝᡵᡝ ᡩᠠᠪᠠᠯᠠ᠈ ᠵᡳᠴᡳ ᡨᡝᡨᡝᠨᡩᡝᡵᡝ᠈ ᠪᡳ ᡠᡵᡤᡠᠨᠵᡝᡥᡝ ᠰᡝᠮᡝ ᠸᠠᠵᡳᡵᠠᡴᡡ ᠪᠠᡩᡝ ᡝᡳᠮᡝᡵᡝ ᡴᠣᠣᠯᡳ ᠪᡳᠣ᠉

ᠠᡤᡝ ᠰᡳ ᠠᡨᠠᠩᡤᡳ ᡤᡝᠨᡝᠮᠪᡳ᠉ ᡤᡝᠨᡝᡴᡳ ᠰᡝᠴᡳ ᡠᡨᡥᠠᡳ ᡤᡝᠨᡝᠮᠪᡳ ᠰᡝᠮᡝ ᡥᡝᠨᡩᡠ᠈ ᡤᡝᠨᡝᡵᠠᡴᡡ ᠣᠴᡳ᠈ ᡠᡨᡥᠠᡳ ᡤᡝᠨᡝᡵᠠᡴᡡ ᠰᡝᠮᡝ ᡥᡝᠨᡩᡠ᠉ ᠪᡳ ᡩᠠᠮᡠ ᠰᡳᠨᡳ ᠠᠩᡤᠠᡳ ᠴᠠᠩᡤᡳ ᡤᡝᠨᡝᠮᠪᡳ ᠰᡝᡥᡝᠪᡝ ᡩᠣᠨᠵᡳᡵᡝ ᡩᠠᠪᠠᠯᠠ᠉ ᠰᡳ ᡝᠮᡤᡝᡵᡳ ᠶᠠᡵᡤᡳᠶᠠᠨ  ᡳ ᡤᡝᠨᡝᡵᡝ ᠪᡝ ᠣᡵᠣᠨ ᠰᠠᠪᡠᡥᠠᡴᡡ᠉ ᡩᠣᡳᡤᠣᠨᡩᡝ ᡨᠣᡴᡨᠣᠪᡠᠮᡝ ᡤᡳᠰᡠᡵᡝᡶᡳ ᡤᡡᠸᠠ ᠨᡳᠶᠠᠯᠮᠠ ᡳᠨᡠ ᡠᡨᡥᠠᡳ ᡴᡝᠨᡝᡥᡠᠨᠵᡝᡵᠠᡴᡡ ᠣᠮᠪᡳ ᠰᡝᠴᡳᠨᠠ᠉ ᡝᡵᡝ ᡤᡝᠰᡝ ᡴᠣᠣᠯᡳ ᠠᡴᡡ ᠪᠠᡳᡨᠠ ᡤᡝᠯᡳ ᠪᡳᠨᡳ᠉ ᠪᡳ ᡤᡝᠨᡝᡴᡳ ᠰᡝᠴᡳ᠈ ᡳᠨᡠ ᠮᡳᠨᡳ ᠴᡳᡥᠠ᠈ ᡤᡝᠨᡝᡵᠠᡴᡡ ᠣᠴᡳ ᡳᠨᡠ ᠮᡳᠨᡳ ᠴᡳᡥᠠ ᡩᠠᠪᠠᠯᠠ᠉ ᡠᡵᡠᠨᠠᡴᡡ ᠰᡳᠨᡩᡝ ᠠᠯᠠᡶᡳ ᠠᡳᠨᠠᠮᠪᡳ᠈ ᡨᡝᡵᡝ ᠠᠩᡤᠠᠯᠠ᠈ ᠪᡳ ᠴᠠᠨᠠᠩᡤᡳ ᡨᡠᠪᠠᡩᡝ ᡳᠰᡳᠨᠠᡶᡳ᠈ ᡝᡵᡝ ᡝᠮᡠ ᡨᡠᡵᡤᡠᠨ ᠪᡝ ᠰᡠᠸᠠᠯᡳᠶᠠᠮᡝ ᡤᡝᠮᡠ ᡨᡝᡩᡝ ᡧᠠᠩᡤᠠᠪᡠᠮᡝ ᡤᡳᠰᡠᡵᡝᡶᡳ ᠵᡳᡥᡝᠩᡤᡝ ᡴᠠᡳ᠉ ᠰᡳ ᠠᡳᠪᡳᡩᡝ ᡤᡝᠨᡝᡥᡝ᠈ ᡝᡵᡝ ᡝᡵᡳᠨ ᡩᡝ ᡨᡝᠨᡳ ᠵᡳᡶᡳ᠈ ᡤᡝᠵᡳᠩ ᠰᡝᠮᡝ ᠰᡳᠨᡩᡝ ᠸᠠᠴᡳᡥᡳᠶᠠᠮᡝ ᠠᠯᠠ ᠰᡝᠴᡳ ᡤᡝᠯᡳ ᠣᠮᠪᡳᠣ᠉ ᡝᡵᡝ ᠪᠠᡳᡨᠠ ᠰᡳᠨᠴᡳ ᡨᡠᠯᡤᡳᠶᡝᠨ ᡤᡡᠸᠠ ᠨᡳᠶᠠᠯᠮᠠ ᠠᡳᠨᠠᡥᠠ ᠰᡝᠮᡝ ᡳᠨᡠ ᠰᠠᡵᡴᡡ᠉ ᠰᡳ ᡠᠨᡝᠩᡤᡳ ᠰᠠᡵᠠᠩᡤᡝ ᡤᡝᡨᡠᡴᡝᠨ ᠣᠴᡳ᠈ ᡠᡨᡥᠠᡳ ᠮᡳᠨᡩᡝ ᡠᠯᡥᡳᠪᡠᠮᡝ ᠠᠯᠠᡵᠠᠣ᠉ ᠪᡳ ᠶᠠᡵᡤᡳᠶᠠᠨ  ᡳ ᠰᠠᡵᡴᡡ ᡴᠠᡳ᠉ ᠰᠠᠴᡳ ᡠᡨᡥᠠᡳ ᠰᡳᠨᡩᡝ ᠠᠯᠠᠮᠪᡳ ᡩᡝᡵᡝ᠉ ᡠᠮᠠᡳ ᠰᠠᡵᡴᡡ ᠪᠠᡩᡝ ᠮᡳᠮᠪᡝ ᠠᡳᠪᡝ ᠠᠯᠠ ᠰᡝᠮᠪᡳ᠉ ᠠᡴᡡᠴᡳ ᠮᡳᠮᠪᡝ ᠪᠠᠯᠠᡳ ᠪᠠᠨᠵᡳᠪᡠᡶᡳ ᠠᠯᠠ ᠰᡝᠮᠪᡳᠣ᠉ ᡝᡳᠴᡳᠪᡝ ᠰᡠᠸᡝ ᡳᠨᡠ ᠪᠠᡥᠠᡶᡳ ᡩᠣᠨᠵᡳᡵᡝᠩᡤᡝ ᡴᠠᡳ᠉ ᠠᡳᠰᡝᠮᡝ ᡝᡴᡧᡝᠮᠪᡳ᠉ ᠵᠣᠣᠴᡳᠨᠠ᠉ ᠪᡳ ᡨᡠᠸᠠᠴᡳ ᡤᡡᠸᠠ ᠨᡳᠶᠠᠯᠮᠠ ᠰᡳᠨᡩᡝ ᡝᠮᡠ ᠪᠠᡳᡨᠠ ᡶᠣᠨᠵᡳᠴᡳ ᠰᡳ ᡠᡨᡥᠠᡳ ᡩᠠᠴᡳ ᡩᡠᠪᡝ ᡩᡝ ᡳᠰᡳᡨᠠᠯᠠ ᡤᡳᠶᠠᠨ ᡤᡳᠶᠠᠨ  ᡳ ᠠᠯᠠᠮᠪᡳ᠉ ᠪᡳ ᠠᡳᡴᠠ ᠰᡳᠨᡩᡝ ᡝᠮᡠ ᠪᠠᡳᡨᠠ ᡶᠣᠨᠵᡳᠮᡝ ᠣᡥᠣᡩᡝ ᠰᡳ ᡠᡨᡥᠠᡳ ᠰᠠᡵᡴᡡ ᠰᡝᡵᡝ ᡩᠣᠨᠵᡳᡥᠠᡴᡡ ᠰᡝᡵᡝ ᠪᠠᡳᠪᡳ ᡝᡵᡴᡝᠨ ᡨᡝᡵᡴᡝᠨ ᠰᡝᠮᡝ ᠮᡳᠨᡳ ᠪᠠᡵᡠ ᠰᡳᠯᡨᠠᠮᠪᡳ᠉ ᠰᡳᠮᠪᡝ ᡤᡝᠯᡳ ᠨᡳᠶᠠᠯᠮᠠ ᠰᡝᠴᡳ ᠣᠮᠪᡳᠣ᠉

ᠠᡤᡝ ᠰᡳ ᠠᡨᠠᠩᡤᡳ ᠸᡝᠰᡳᡴᡝᠩᡤᡝ ᠠᠮᠪᠠ ᡠᡵᡤᡠᠨ ᡴᠠᡳ᠉ ᠪᡳ ᠣᡵᠣᠨ ᡳᠨᡠ ᠪᠠᡥᠠᡶᡳ ᡩᠣᠨᠵᡳᡥᠠᡴᡡ᠉ ᡩᠣᠨᠵᡳᠮᠪᡳᡥᡝ ᠪᡳᠴᡳ᠈ ᡠᡵᡤᡠᠨ  ᡳ ᡩᠣᡵᠣᡳ ᠠᠴᠠᠨᠠᠮᡝ ᡤᡝᠨᡝᠴᡳ ᠠᠴᠠᠮᠪᡳᡥᡝ᠉ ᠰᠠᡵᡴᡡ ᠣᠵᠣᡵᠣ ᠵᠠᡴᠠᡩᡝ᠈ ᡨᡠᡨᡨᡠ ᡠᡵᡤᡠᠨ ᠠᡵᠠᠮᡝ ᡤᡝᠨᡝᡥᡝᡴᡡ᠉ ᠠᡤᡝ ᡠᠮᡝ ᡝᡥᡝ ᡤᡡᠨᡳᡵᡝ᠈ ᠪᡳᡵᡝᠮᡝ ᠶᠣᠣᠨᡳ ᠸᠠᠯᡳᠶᠠᠮᡝ ᡤᠠᠮᠠᡵᠠᠣ᠉ ᠠᡤᡝ ᠠᡳᠨᡠ ᡠᡨᡨᡠ ᡤᡳᠰᡠᡵᡝᠮᠪᡳ᠉ ᠮᡠᠰᡝ ᡤᡝᠮᡠ ᠰᠠᡳᠨ ᡤᡠᠴᡠ ᡴᠠᡳ᠉ ᡩᡝᡵᡝ ᠠᠴᠠᠴᡳ ᡠᡨᡥᠠᡳ ᠸᠠᠵᡳᡥᠠ᠈ ᡠᡵᡠᠨᠠᡴᡡ ᡠᠨᡨᡠᡥᡠᠨ ᡩᠣᡵᠣ ᠪᡝ ᠸᡝᠰᡳᡥᡠᠯᡝᡶᡳ ᠠᡳᠨᠠᠮᠪᡳ᠉ ᡤᡠᠴᡠᠰᡝ ᡩᠣᡵᠣ ᡤᡠᠴᡠᠯᡝᡵᡝᡩᡝ᠈ ᡩᠠᠮᡠ ᡳᠰᡥᡠᠨᡩᡝ ᠮᡠᠵᡳᠯᡝᠨ ᡩᡝ ᡨᡝᠪᡠᠮᡝ ᠪᡳᠴᡳ᠈ ᡨᡝᠨᡳ ᡤᡠᠴᡠ  ᡳ ᡩᠣᡵᠣ ᡩᠠᠪᠠᠯᠠ᠉ ᡨᡝᡵᡝ ᡩᡠᡵᡠᠨ  ᡳ ᡶᡳᠶᠠᠨᠠᡵᠠᡵᠠᠩᡤᡝ ᡤᡝᠮᡠ ᡥᠣᠯᠣ ᡴᠠᡳ᠉ ᡝᠮᡝᠮᡠ ᡠᡵᠰᡝ ᡠᠨᡨᡠᡥᡠᠨ ᡩᠣᡵᠣ ᡩᡝ᠈ ᡠᡩᡠ ᡩᡝᠮᠪᡝᡳ ᡥᠠᠪᠴᡳᡥᡳᠶᠠᠨ ᠪᡳᠴᡳᠪᡝ᠈ ᠠᡳᡴᠠᠪᠠᡩᡝ ᡳᠨᡳ ᠪᠠᡵᡠ ᡝᠮᡠ ᡤᡡᠨᡳᠨ ᠮᡠᠵᡳᠯᡝᠨ  ᡳ ᠪᠠᡳᡨᠠ ᠪᡝ ᡥᡝᠪᡩᡝᠨᡝᠴᡳ ᡩᠠᠮᡠ ᠣᡳᠯᠣᡵᡳ ᡩᡝᠯᡝᡵᡳ ᠰᡝᠮᡝ ᠵᠠᠪᡠᠮᠪᡳ᠉ ᡨᡝᡵᡝ ᡤᡝᠰᡝᠩᡤᡝ ᠣᠴᡳ ᠠᡳ ᠠᠮᡨᠠᠩᡤᠠ᠉

ᠰᡳᡴᠰᡝ ᠰᡳ ᠠᡳᠪᡳᡩᡝ ᡤᡝᠨᡝᡥᡝ ᠪᡳᡥᡝ᠉ ᠪᡳ ᠨᡳᠶᠠᠯᠮᠠ ᠪᡝ ᡨᠠᡴᡡᡵᠠᡶᡳ᠈ ᠰᡳᠮᠪᡝ ᠰᠣᠯᡳᠮᡝ ᡤᡝᠨᡝᠪᡠᠴᡳ ᠰᡳᠨᡳ ᠪᠣᠣᡳ ᠨᡳᠶᠠᠯᠮᠠ ᠰᡳᠮᠪᡝ ᠪᠣᠣᡩᡝ ᠠᡴᡡ ᡤᡡᠸᠠᠪᠰᡳ ᡤᡝᠨᡝᡥᡝ ᠰᡝᡥᡝ᠉ ᠪᡳ ᠰᡳᠮᠪᡝ ᠪᠣᡩᠣᠴᡳ᠈ ᠠᡳᠨᠴᡳ ᠮᡝᠨᡳ ᠪᠣᠣᡩᡝ ᠵᡳᠮᠪᡳ ᡩᡝᡵᡝ ᠰᡝᠮᡝ ᡝᠮᡠ ᡳᠨᡝᠩᡤᡳ ᡧᡠᠨ ᡨᡠᡥᡝᡨᡝᠯᡝ ᠠᠯᡳᠶᠠᠴᡳ᠈ ᠰᡳ ᡠᠮᠠᡳ ᠵᡳᡥᡝᡴᡡ᠉ ᠪᠠᡳᠪᡳ ᡝᠮᡠ ᡳᠨᡝᠩᡤᡳ ᠠᠯᡳᠶᠠᡥᠠ᠈ ᡤᡡᠸᠠ ᡝᠮᡠ ᠪᠠᡳᡨᠠ ᡩᡝ ᡤᡝᠨᡝᡴᡳ ᠰᡝᠴᡳ ᡤᡝᠯᡳ ᠰᡳᠮᠪᡝ ᠵᡳᡩᡝᡵᠠᡥᡡ ᠰᡝᠮᠪᡳ᠉ ᠠᠪᠰᡳ ᡤᡡᠨᡳᠨ ᠪᠠᡳᠪᡠᡥᠠ ᠨᡳ᠉ ᠠᡤᡝ ᠰᡳᠨᡳ ᡝᡵᡝ ᡠᡨᡥᠠᡳ ᠸᠠᡴᠠ ᠣᡥᠣᠪᡳ᠉ ᠸᡝ ᠶᠠ ᡩᡝ ᡝᠮᡠ ᡥᡝᡧᡠ ᡥᠠᡧᡠ  ᡳ ᠪᠠᡳᡨᠠ ᠠᡴᡡ ᠨᡳ᠉ ᡩᠠᠮᡠ ᠸᡝᡵᡳ ᠪᠣᠣᡩᡝ ᡶᡝᠯᡳᠶᡝᠮᠪᡳᠣ᠈ ᡨᡝᡵᡝ ᠠᠩᡤᠠᠯᠠ ᠮᡳᠨᡳ ᠪᡝᠶᡝ ᡧᡠᠨᡨᡠᡥᡠᠨᡳ ᠠᠯᠪᠠᠨ ᡩᡝ ᡴᠠᠮᡝ ᠵᠠᠪᡩᡠᡵᠠᡴᡡ ᠪᡳᠮᡝ᠈ ᠸᡝᡵᡳ ᠴᡳᠰᡠᡳ ᠪᠠᡳᡨᠠᡩᡝ ᡩᠠᠨᠠᠮᡝ ᡤᡝᠨᡝ ᠰᡝᠴᡳ ᡤᡳᠶᠠᠨᠠᡴᡡ ᡧᠣᠯᠣ ᠪᡳᠣ᠉

ᠪᡳ ᠰᡳᠨᡩᡝ ᠶᠠᠨᡩᡠᡥᠠ ᠪᠠᡳᡨᠠ ᠪᡝ ᠰᡳ ᡨᡝᡩᡝ ᡥᡝᠨᡩᡠᡥᡝᠪᡳᠣ᠉ ᡨᡝᡵᡝ ᡤᡡᠨᡳᠨ ᠪᡝ ᡨᡠᠸᠠᠴᡳ ᠣᠮᠪᡳᠣ ᠣᠵᠣᡵᠠᡴᡡᠨ᠉ ᠪᡳ ᡨᡝᡩᡝ ᡥᡝᠨᡩᡠᡥᡝᠪᡳ᠉ ᡳᠨᡳ ᡥᡝᠨᡩᡠᡵᡝᠩᡤᡝ᠈ ᡝᠮᡠ ᠨᡳᠶᠠᠯᠮᠠ ᠪᠠᡳᡨᠠ ᠣᠴᡳ᠈ ᡴᡝᠮᡠᠨᡳ ᠵᠠ ᠪᡳᡥᡝ᠈ ᡤᡝᡵᡝᠨ  ᡳ ᠪᠠᡳᡨᠠ ᠣᠵᠣᡵᠣ ᠵᠠᡴᠠᡩᡝ ᡠᠮᡝᠰᡳ ᠮᠠᠩᡤᠠ᠈ ᡝᠯᡥᡝᡴᡝᠨ  ᡳ ᠣᠰᠣ ᡠᠮᡝ ᡥᠠᡥᡳᠯᠠᡵᠠ ᠰᡝᡥᡝ᠉ ᠪᡳ ᡤᡝᠯᡳ ᡝᡵᡝ ᠪᠠᡳᡨᠠ ᠪᡝ ᠵᡳᡩᡠᠵᡳ ᠠᡨᠠᠩᡤᡳ ᡨᡝᠨᡳ ᠶᠠᡵᡤᡳᠶᠠᠨ ᠮᡝᠵᡳᡤᡝ ᠪᠠᡥᠠᡵᠠ ᠰᡝᠮᡝ ᡳᠨᡩᡝ ᡶᠣᠨᠵᡳᠴᡳ᠈ ᡳᠨᡳ ᡤᡳᠰᡠᠨ ᠮᡝᠵᡳᡤᡝ ᠪᠠᡥᠠᠴᡳ᠈ ᠰᡳᠨᡩᡝ ᠪᡝᠨᡝᠪᡠᠴᡳ ᡠᡨᡥᠠᡳ ᠸᠠᠵᡳᡥᠠ᠉ ᠠᡳᠰᡝᠮᡝ ᡝᠮᡩᡠᠪᡝᡳ ᡶᠣᠨᠵᡳᠮᠪᡳ ᠰᡝᡥᡝ᠉ ᠪᡳ ᡳᠨᡳ ᠠᡵᠪᡠᠨ ᠪᡝ ᡨᡠᠸᠠᠴᡳ ᡳᠨᡠ ᠪᠠᡳᡨᠠ ᠪᡝ ᠰᠠᡵᡨᠠᠪᡠᡵᡝ ᠨᡳᠶᠠᠯᠮᠠ ᠸᠠᡴᠠ᠉ ᠰᡳ ᡩᠠᠮᡠ ᠮᡠᠵᡳᠯᡝᠨ ᠪᡝ ᠰᡠᠯᠠᡴᠠᠨ ᠰᡳᠨᡩᠠ᠉ ᠰᡳᠨᡳ ᠪᠠᡳᡨᠠ ᠪᡝ ᠮᡠᡨᡝᠪᡠᠴᡳ ᡠᡨᡥᠠᡳ ᠸᠠᠵᡳᡥᠠ᠉ ᡝᡩᡝ ᠠᡳ ᡴᡝᠨᡝᡥᡠᠨᠵᡝᡵᡝ ᠪᠠᠪᡳ᠉

ᠰᡳ ᠨᠠᡵᠠᠩᡤᡳ ᠮᡳᠮᠪᡝ ᠠᡳᠪᡳᡩᡝ ᡤᡝᠨᡝ ᠰᡝᠮᠪᡳ᠉ ᠠᠪᠰᡳ ᡨᠣᡴᡨᠣᡥᠣᠨ ᠠᡴᡡ ᠪᠠᡳ᠉ ᡝᠮᡠ ᠠᡴᡩᡠᠨ ᡤᡳᠰᡠᠨ ᠪᡳᠴᡳ ᡤᡡᠸᠠ ᠨᡳᠶᠠᠯᠮᠠ ᡳᠨᡠ ᡩᠠᡥᠠᠮᡝ ᠶᠠᠪᡠᡵᡝ ᡩᡝ ᠵᠠ ᠰᡝᠴᡳᠨᠠ᠈ ᡝᡵᡝ ᡤᡝᠰᡝ ᠠᠩᡤᠠ ᡠᠪᠠᡧᠠᡴᡡ ᠨᡳᠶᠠᠯᠮᠠ ᡤᡝᠯᡳ ᠪᡳᠨᡳ᠉ ᠪᡝᠶᡝ ᡤᡝᠨᡝᡴᡳ ᠰᡝᡥᡝ ᡩᠠᠪᠠᠯᠠ᠈ ᠸᡝ ᠰᡳᠮᠪᡝ ᡤᡝᠨᡝ ᠰᡝᡥᡝ᠉ ᡨᡝ ᠪᡳᠴᡳᠪᡝ ᡤᡝᠨᡝᡵᠠᡴᡡ ᠨᡳᠶᠠᠯᠮᠠ ᠪᡝ ᡝᡵᡤᡝᠯᡝᡨᡝᡳ ᡤᡝᠨᡝ ᠰᡝᠴᡳ ᠣᠮᠪᡳᠣ᠉ ᠨᡳᠶᠠᠯᠮᠠ ᡥᡝᠨᡩᡠᡵᡝ ᠪᠠᠯᠠᠮᠠ᠈ ᠨᡳᠶᠠᠯᠮᠠ ᠪᡝ ᠰᠠᡥᠠᠩᡤᡝ ᡤᡝᡨᡠᡴᡝᠨ᠈ ᠪᡝᠶᡝᠪᡝ ᠰᠠᡥᠠᠩᡤᡝ ᡥᡡᠯᡥᡳ ᠰᡝᡥᡝᠩᡤᡝ ᡴᠠᡳ᠉ ᠶᠠᠶᠠ ᠪᠠᡳᡨᠠ ᡩᡝ ᡩᠠᠮᡠ ᠪᡝᠶᡝᡳ ᠴᡳᡥᠠᡴᡡ ᠪᠠᡩᡝ ᡳᠨᡠ ᠨᡳᠶᠠᠯᠮᠠ ᡩᡝ ᡠᠮᡝ ᡳᠰᡳᠪᡠᡵᡝ ᠣᠴᡳ᠈ ᠠᡳᠨᠴᡳ ᠣᠵᠣᡵᠠᡴᡡ ᠰᡝᡵᡝ ᠪᠠ ᡠᡨᡥᠠᡳ ᠠᡴᡡ ᡩᡝᡵᡝ᠉ ᠮᡳᠨᡳ ᡝᠮᡠ ᠪᠠᡳᡨᠠ᠈ ᠪᠠᡳᠪᡳ ᠶᠠᠪᡠᠴᡳ ᠣᠵᠣᡵᠠᡴᡡ ᡤᡝᠰᡝ᠈ ᠠᡤᡝ ᠰᡳ ᡤᠣᠰᡳᠴᡳ ᠮᡳᠨᡳ ᡶᡠᠨᡩᡝ ᡤᡝᠨᡝᡶᡳ ᡤᡳᠰᡠᡵᡝᠮᡝ ᠮᡠᡨᡝᠪᡠᡥᡝ ᠮᠠᠩᡤᡳ᠈ ᠪᡳ ᠠᡤᡝ  ᡳ ᡶᡝᡵᡤᡠᠸᡝᠴᡠᡴᡝ ᡤᡡᠨᡳᠨ ᠪᡝ ᠠᡳᠨᠠᡥᠠ ᠰᡝᠮᡝ ᡠᡵᡤᡝᡩᡝᡵᠠᡴᡡ᠉ ᡠᡵᡠᠨᠠᡴᡡ ᡠᠵᡝᠨ ᠪᠠᡳᠯᡳ ᡳᠰᡳᠪᡠᡴᡳ᠉ ᡝᡵᡝ ᡤᡝᠮᡠ ᠠᠨ  ᡳ ᠵᡝᡵᡤᡳ ᠪᠠᡳᡨᠠ ᡴᠠᡳ᠉ ᠰᡳᠨᡳ ᠪᡝᠶᡝ ᡤᡝᠨᡝᡶᡳ ᡠᡨᡥᠠᡳ ᡤᡳᠰᡠᡵᡝᠮᠪᡳ ᡩᡝᡵᡝ᠉ ᡝᡩᡝ ᠨᡳᠶᠠᠯᠮᠠ ᡩᡝ ᠠᡳ ᠪᠠᡳᡵᡝ ᠪᠠᠪᡳ᠉ ᡨᡠᡨᡨᡠ ᠰᡝᠮᡝ ᡨᡝ ᡩᠣᡳᡤᠣᠨᡩᡝ ᡤᡳᠰᡠᡵᡝᡵᠠᡴᡡᠴᡳ ᠣᠵᠣᡵᠠᡴᡡ᠉ ᠠᡳᡴᠠᠪᠠᡩᡝ ᡨᡝ ᠮᡠᡨᡝᠮᠪᡳ ᠰᡝᠮᡝ ᡥᡝᠨᡩᡠᡶᡳ᠈ ᠠᠮᠠᡤᠠ ᡳᠨᡝᠩᡤᡳ ᠮᡠᡨᡝᡵᠠᡴᡡ ᠣᡥᠣᡩᡝ ᠠᡳᠨᠠᡵᠠ᠈ ᡨᡝ ᠮᡠᡨᡝᡵᠠᡴᡡ ᠰᡝᠮᡝ ᡥᡝᠨᡩᡠᠴᡳ᠈ ᠠᠮᠠᡤᠠ ᡳᠨᡝᠩᡤᡳ ᠮᡠᡨᡝᠪᡠᡥᡝᡩᡝ ᡤᡝᠯᡳ ᠠᡳᠨᠠᡵᠠ᠉ ᡤᡳᠶᠠᠨ ᠪᡝ ᠪᠣᡩᠣᠮᡝ ᠣᡥᠣᡩᡝ᠈ ᠪᡳ ᡝᠰᡳ ᠮᡠᡨᡝᡵᡝᡳ ᡨᡝᡳᠯᡝ ᡶᠠᡧᡧᠠᠴᡳ᠈ ᡨᠠᠯᡠ ᡩᡝ ᠰᡳᠨᡳ ᠪᠠᡳᡨᠠ ᠪᡝ ᠮᡠᡨᡝᠪᡠᠴᡳ᠈ ᠰᡳ ᡳᠨᡠ ᡠᠮᡝ ᡠᡵᡤᡠᠨᠵᡝᡵᡝ᠈ ᠰᡳᠨᡳ ᠪᠠᡳᡨᠠ ᠪᡝ ᠮᡠᡨᡝᠪᡠᡵᠠᡴᡡ ᠣᠴᡳ᠈ ᠰᡳ ᡳᠨᡠ ᡠᠮᡝ ᡠᠰᡥᠠᡵᠠ᠉ ᡠᡨᡨᡠ ᠣᡥᠣᡩᡝ ᠪᡳ ᡨᡝᠨᡳ ᠰᡳᠨᡳ ᡶᡠᠨᡩᡝ ᡤᡝᠨᡝᡶᡳ ᡶᠠᡧᡧᠠᠴᡳ ᠣᠮᠪᡳ᠉

ᠪᡳ ᠠᡤᡝ ᠪᡝ ᡨᠠᡶᡠᠯᠠᡥᠠᠩᡤᡝ ᠰᡳᠮᠪᡝ ᠰᠠᡳᠨ ᠣᡴᡳᠨᡳ᠈ ᡝᡥᡝ ᡨᠠᠴᡳᡵᠠᡥᡡ ᠰᡝᡵᡝ ᡤᡡᠨᡳᠨ᠈ ᡤᡳᠶᠠᠨ ᡩᡝ ᠠᠴᠠᠨᠠᡵᠠ ᡤᡝᠰᡝ ᠣᠴᡳ᠈ ᠰᡳ ᡠᡨᡥᠠᡳ ᡩᠠᡥᠠᠮᡝ ᠶᠠᠪᡠ᠉ ᡤᡳᠶᠠᠨ ᡩᡝ ᠠᠴᠠᠨᠠᡵᠠᡴᡡ ᠣᠴᡳ ᡠᡨᡥᠠᡳ ᠨᠠᡴᠠ᠉ ᠰᡳᠮᠪᡝ ᠣᡶᡳ ᠪᡳ ᡨᡝᠨᡳ ᡠᡨᡨᡠ ᡤᡳᠰᡠᡵᡝᡵᡝ ᡩᠠᠪᠠᠯᠠ᠈ ᡤᡡᠸᠠ ᡩᡝ ᠪᡳᡥᡝ ᠪᡳᠴᡳ᠈ ᠪᡳ ᡳᠨᡠ ᡝᡵᡝ ᡤᡝᠰᡝ ᡤᡳᠰᡠᡵᡝᡵᠠᡴᡡ ᠪᡳᡥᡝ᠉ ᡝᠴᡳ ᠠᡳ᠈ ᠠᡤᡝ ᠰᡳ ᠰᡝᡵᡝᠩᡤᡝ ᡤᡡᠨᡳᠨ ᠰᠠᡥᠠ᠈ ᡤᡠᠴᡠ ᠣᡶᡳ ᡨᡝᠨᡳ ᡠᡨᡨᡠ ᡨᠠᡶᡠᠯᠠᡵᠠ ᡩᠠᠪᠠᠯᠠ᠈ ᠠᡳᡴᠠᠪᠠᡩᡝ ᠠᡵᠰᠠᡵᡳ ᡤᡠᠴᡠ ᠣᠴᡳ ᠨᡳᠶᠠᠯᠮᠠᡳ ᡝᠨᡩᡝᠪᡠᡴᡠ ᠪᡝ ᠰᠠᡥᠠ ᠮᠠᠩᡤᡳ᠈ ᡨᠠᡶᡠᠯᠠᡵᠠᡴᡡ ᠰᡝᡵᡝ ᠠᠩᡤᠠᠯᠠ ᡥᠣᠨᠣ ᠪᠠᠰᡠᠮᠪᡳᡴᠠᡳ᠉ ᡩᠣᠨᠵᡳᠴᡳ ᡨᠣᠨᡩᠣᡳ ᡤᡳᠰᡠᠨ ᡧᠠᠨ ᡩᡝ ᡳᠴᠠᡴᡡ ᠪᡳᠴᡳᠪᡝ ᠶᠠᠪᡠᠨ ᡩᡝ ᡨᡠᠰᠠ᠈ ᠰᠠᡳᠨ ᠣᡴᡨᠣ ᠠᠩᡤᠠ ᡩᡝ ᡤᠣᠰᡳᡥᠣᠨ ᠪᡳᠴᡳᠪᡝ ᠨᡳᠮᡝᡴᡠ ᡩᡝ ᡨᡠᠰᠠ ᠰᡝᡥᡝᠪᡳ᠉ ᡤᡝᠮᡠ ᠠᡤᡝ  ᡳ ᠠᡩᠠᠯᡳ ᡤᡠᠴᡠᠰᡝ ᡩᡝ ᠰᠠᡳᠨ ᠨᡳᠩᡤᡝ᠈ ᡤᡳᠶᠠᠨᠠᡴᡡ ᡠᡩᡠ ᠪᡳ᠉

ᡝᡵᡝᠪᡝ ᠰᠠᡳᠨ ᠰᡝᠴᡳ ᠣᠵᠣᡵᠠᡴᡡ᠈ ᡝᡵᡝᠴᡳ ᠰᠠᡳᠨ ᠨᡳᠩᡤᡝ ᠠᡳ ᠶᠠᡩᠠᡵᠠ᠈ ᡝᡵᡝᠪᡝ ᠰᠠᡳᠨ ᠰᡝᡵᠠᡴᡡ ᠣᠴᡳ᠈ ᡤᡝᠯᡳ ᠠᡳ ᡤᡝᠰᡝᠩᡤᡝ ᠪᡝ ᠰᠠᡳᠨ ᠰᡝᠮᠪᡳ᠉ ᠰᡳ ᡠᠮᡝᠰᡳ ᠰᠠᡳᠨ ᠨᡳᠩᡤᡝ ᠪᡝ ᠰᠠᠪᡠᡥᠠᡴᡡ ᠣᡶᡳ ᡨᡝᠨᡳ ᡝᡵᡝᠪᡝ ᠰᠠᡳᠨ ᠰᡝᡵᡝ ᡩᠠᠪᠠᠯᠠ᠉ ᡝᡵᡝᠴᡳ ᠰᠠᡳᠨ ᠨᡳᠩᡤᡝ ᠪᡝ ᠰᠠᠪᡠᡥᠠ ᠰᡝᡥᡝᡩᡝ᠈ ᡤᡝᠯᡳ ᡨᡝᡵᡝᠪᡝ ᠰᠠᡳᠨ ᠰᡝᠮᠪᡳᠮᡝ᠈ ᡝᡵᡝᠪᡝ ᠰᠠᡳᠨ ᠰᡝᡵᠠᡴᡡ ᡴᠠᡳ᠉ ᠰᠠᡳᠨ ᠵᠠᡴᠠ ᠰᡝᡵᡝᠩᡤᡝ᠈ ᠶᠠᠶᠠ ᠴᡳ ᡝᠨᠴᡠ ᠮᡠᠰᡝᡳ ᡨᡝᡳᠯᡝ ᠰᠠᡳᠨ ᠰᡝᡵᡝᠩᡤᡝ ᠸᠠᡴᠠ᠉ ᠨᡳᠶᠠᠯᠮᠠ ᡨᠣᠮᡝ ᠰᠠᠪᡠᡶᡳ ᠪᡠᠶᡝᡵᠠᡴᡡᠩᡤᡝ ᠠᡴᡡ᠈ ᡨᡝᡵᡝᠪᡝ ᡨᡝᠨᡳ ᠰᠠᡳᠨ ᠵᠠᡴᠠ ᠰᡝᠴᡳ ᠣᠵᠣᡵᠣ ᡩᠠᠪᠠᠯᠠ᠈ ᠰᠠᡳᠨ ᡝᡥᡝ ᠨᡳᠩᡤᡝ ᠪᡝ ᡳᠯᡤᠠᠪᡠᡵᠠᡴᡡ ᠣᠴᡳ᠈ ᠪᡳᡵᡝᠮᡝ ᡤᡝᠮᡠ ᠰᠠᡳᠨ ᠰᡝᠴᡳ ᡤᡝᠯᡳ ᠣᠮᠪᡳᠣ᠉

ᠪᡳ ᡳᠨᡳ ᡤᡳᠰᡠᠨ  ᡳ ᠮᡠᡩᠠᠨ ᠪᡝ ᡩᠣᠨᠵᡳᠴᡳ᠈ ᠰᡳᠨᡩᡝ ᠠᡳᡴᠠ ᠵᠠᡴᠠ ᠪᠠᡳᡴᡳ ᠰᡝᡵᡝ ᡤᡝᠰᡝ᠈ ᡳ ᠮᡳᠨᡩᡝ ᠠᡳ ᠵᠠᡴᠠ ᠪᠠᡳᡴᡳ ᠰᡝᡵᡝ᠈ ᠮᡳᠨᡩᡝ ᡠᠮᠠᡳ ᠪᠠᡳᠴᡳ ᠠᠴᠠᡵᠠ ᠵᠠᡴᠠ ᠠᡴᡡ ᡴᠠᡳ᠉ ᡤᡡᠨᡳᠴᡳ ᠰᡳᠨᡩᡝ ᡠᡵᡠᠨᠠᡴᡡ ᠪᡳᠰᡳᡵᡝ ᠵᠠᡴᠠ ᠪᡝ᠉ ᡳ ᡨᡝᠨᡳ ᠪᠠᡳᡴᡳ ᠰᡝᡵᡝ ᡩᠠᠪᠠᠯᠠ᠉ ᠠᡴᡡ ᡝᡴᡳᠶᡝᡥᡠᠨ ᠵᠠᡴᠠ ᠪᡝ ᠪᠠᡳᡵᡝ ᠠᡳᠪᡳ᠉ ᡩᠠᠮᡠ  ᡳ ᡝᠮᡤᡝᡵᡳ ᠰᡳᠨᡩᡝ ᠪᠠᡳᡴᡳ ᠰᡝᡥᡝᠪᡝ ᡩᠠᡥᠠᠮᡝ᠈ ᠰᡳ ᡠᡨᡥᠠᡳ ᡨᡝᡩᡝ ᠪᡠᠴᡳᠨᠠ᠉ ᡝᡵᡝ ᡠᡨᡥᠠᡳ ᡶᡝᡵᡤᡠᠸᡝᠴᡠᡴᡝ ᠰᡝᠴᡳᠨᠠ᠉ ᠮᡳᠨᡩᡝ ᠪᡳᠰᡳᡵᡝᠩᡤᡝ ᠣᠴᡳ᠈ ᡳᠨᡩᡝ ᠪᡠᠮᠪᡳ ᡩᡝᡵᡝ᠈ ᠮᡳᠨᡩᡝ ᡠᠮᠠᡳ ᠠᡴᡡ ᠪᠠᡩᡝ ᠮᡳᠮᠪᡝ ᠠᡳᠪᡝ ᠪᡠ ᠰᡝᠮᠪᡳ᠉ ᠠᡴᡡᠴᡳ ᠮᡳᠮᠪᡝ ᡠᡩᠠᡶᡳ ᡳᠨᡩᡝ ᠪᡠ ᠰᡝᠮᠪᡳᠣ᠉ ᡝᡵᡝ ᠠᡳᠨᠠᡥᠠᡳ ᠣᠮᠪᡳᠨᡳ᠉ ᠪᡳ ᡥᠣᠨᠣ ᡶᠠᠴᡳᡥᡳᠶᠠᡧᠠᠮᡝ ᠨᡝ ᠪᠠᠪᠠᡩᡝ ᠪᠠᡳᡵᡝ᠈ ᡝᠯᡝᠮᠠᠩᡤᠠ ᠮᡳᠨᡩᡝ ᠪᠠᡳᠮᠪᡳ ᠰᡝᡵᡝᠩᡤᡝ᠉ ᠵᠠᠴᡳ ᡴᠣᠣᠯᡳ ᠠᡴᡡ ᠰᡝᠴᡳᠨᠠ᠉ ᡳᠰᡥᡠᠨᡩᡝ ᡤᡳᠯᠵᠠᠮᡝ ᡤᡡᠨᡳᠴᡳ ᡨᡝᠨᡳ ᡤᡠᠴᡠ  ᡳ ᡩᠣᡵᠣ ᡩᠠᠪᠠᠯᠠ᠉ ᡩᠠᠮᡠ ᠨᡳᠶᠠᠯᠮᠠ ᠪᡝ ᡴᠣᡵᠣ ᠠᡵᠠᡶᡳ ᠪᡝᠶᡝᡩᡝ ᡨᡠᠰᠠ ᠠᡵᠠᡴᡳ ᠰᡝᠴᡳ ᠣᠮᠪᡳᠣ᠉ ᡝᡵᡝ ᡠᡨᡥᠠᡳ ᠠᡳᠨᠠᡥᠠᡳ ᠣᠮᠪᡳᠨᡳ᠉ ᠮᡳᠨᡳ ᡤᡡᠨᡳᠨᡩᡝ ᠣᠴᡳ ᡳ ᠰᡳᠨᡩᡝ ᠠᠩᡤᠠ ᠵᡠᠸᠠᡶᡳ ᠪᠠᡳᡵᠠᡴᡡ ᠣᠴᡳ ᠸᠠᠵᡳᡥᠠ᠉ ᠠᡳᡴᠠᠪᠠᡩᡝ ᠰᡳᠨᡳ ᠪᠠᡵᡠ ᠪᠠᡳᠮᡝ ᠣᡥᠣᡩᡝ ᠪᡳᠰᡳᡵᡝᡳ ᡨᡝᡳᠯᡝ ᡳᠨᡩᡝ ᠠᠴᠠᠪᡠᠮᡝ ᠪᡠᠴᡳ᠈ ᡨᡝᠨᡳ ᡳᠨᡠ  ᡳ ᡤᡝᠰᡝ᠉

ᡤᡳᠶᠠᠨ  ᡳ ᠰᡳ ᠨᡳᠩᡤᡝ ᠣᠴᡳ᠈ ᠰᡳ ᡠᡵᡠᠨᠠᡴᡡ ᠪᠠᡥᠠᠮᠪᡳ᠈ ᡨᡝᠮᡧᡝᡶᡳ ᠠᡳᠨᠠᠮᠪᡳ᠉ ᡨᡝᠮᡧᡝᠴᡳ ᡠᡨᡥᠠᡳ ᠪᠠᡥᠠᡵᠠ᠈ ᡨᡝᠮᡧᡝᡵᠠᡴᡡ ᠣᠴᡳ ᡠᡨᡥᠠᡳ ᠪᠠᡥᠠᡵᠠᡴᡡᠨ᠉ ᠰᡳᠨᡳ ᠪᠠᡥᠠᡵᠠ ᡤᡳᠶᠠᠨ ᠣᠴᡳ᠈ ᡠᡨᡥᠠᡳ ᡨᡝᠮᡧᡝᡵᠠᡴᡡ ᠰᡝᠮᡝ ᡳᠨᡠ ᠪᠠᡥᠠᠮᠪᡳ᠈ ᠰᡳᠨᡳ ᠪᠠᡥᠠᡵᠠ ᡤᡳᠶᠠᠨ ᠸᠠᡴᠠ ᠣᠴᡳ᠈ ᡠᡩᡠ ᡨᡝᠮᡧᡝᡥᡝ ᠰᡝᠮᡝ ᡳᠨᡠ ᠪᠠᡥᠠᡵᠠᡴᡡ᠉ ᠨᡳᠶᠠᠯᠮᠠᡳ ᡥᡝᠨᡩᡠᡵᡝ ᠪᠠᠯᠠᠮᠠ᠈ ᠠᠨᠠᠪᡠᡥᠠ ᠨᡳᠶᠠᠯᠮᠠ ᠠᠯᡳᠨ ᠪᡝ ᡨᡠᠸᠠᡴᡳᠶᠠᠮᠪᡳ᠈ ᠪᠣᡧᠣᠪᡠᡥᠠ ᠨᡳᠶᠠᠯᠮᠠ ᠪᠣᠣ ᠪᡝ ᡨᡠᠸᠠᡴᡳᠶᠠᠮᠪᡳ ᠰᡝᡥᡝᠪᡳ᠉ ᠮᡳᠨᡳ ᡤᡡᠨᡳᠨ ᡩᡝ ᠣᠴᡳ ᠣᠶᠣᠮᠪᡠᡵᠠᡴᡡ ᠪᡳᠮᡝ᠈ ᠪᠠᡳᠪᡳ ᠨᡳᠶᠠᠯᠮᠠᡳ ᠪᠠᡵᡠ ᡨᡝᠮᡧᡝᡵᡝ ᠠᠩᡤᠠᠯᠠ᠈ ᡥᠣᠨᠣ ᡝᠮᡠ ᡩᡝᡵᡝ ᠠᡵᠠᡵᠠ ᡩᡝ ᡳᠰᡳᡵᠠᡴᡡ᠉ ᠠᡳ ᠣᠴᡳᠪᡝ᠈ ᡳᠨᡳ ᠴᡳᠰᡠᡳ ᡝᠮᡠ ᡩᠣᡵᠣ ᡤᡳᠶᠠᠨ ᠪᡳ᠉ ᡳᠨᡠ ᠨᡳᠶᠠᠯᠮᠠᡳ ᡥᠠᠴᡳᡥᡳᠶᠠᠴᡳ ᠣᠵᠣᡵᠣᠩᡤᡝ ᠸᠠᡴᠠ ᡴᠠᡳ᠉

ᠰᡳ ᡤᠠᡳᡴᡳ ᠰᡝᠴᡳ ᡠᡨᡥᠠᡳ ᡤᠠᡳᠰᡠ᠈ ᡨᡝ ᡤᠠᡳᡵᠠᡴᡡ ᠣᠴᡳ᠈ ᡤᡡᠸᠠ ᡤᠠᡳᡥᠠ ᡩᡝ ᠰᡳᠨᡳ ᡩᠣᠯᠣ ᡠᠮᡝ ᡝᡥᡝ ᡤᡡᠨᡳᡵᡝ᠉ ᡨᡝᡵᡝ ᡝᡵᡳᠨ ᡩᡝ ᠣᡥᠣ ᠮᠠᠩᡤᡳ᠈ ᠰᡳ ᠠᠯᡳᠶᠠᡥᠠ ᠰᡝᠮᡝ ᡳᠨᡠ ᠠᠮᠴᠠᡵᠠᡴᡡ ᠣᠮᠪᡳ᠉ ᡠᡩᡠ ᡤᠠᡳᡴᡳ ᠰᡝᡥᡝ ᠰᡝᠮᡝ ᡳᠨᡠ ᠪᠠᡥᠠᡵᠠᡴᡡ ᡴᠠᡳ᠉ ᡥᡡᠸᠠᠩᡤᡳᠶᠠᡵᠠᡴᡡ᠈ ᡝᡵᡝ ᡝᠮᡤᡝᡵᡳ ᠮᡳᠨᡳᠩᡤᡝ ᠣᡥᠣ ᡴᠠᡳ᠉ ᠸᡝ ᠠᡳ ᡤᡝᠯᡥᡠᠨ ᠠᡴᡡ ᠵᡳᡶᡳ ᠮᡳᠨᡳ ᡝᠵᡝᠯᡝᡥᡝ ᠵᠠᡴᠠ ᠪᡝ ᡤᠠᡳᠮᠪᡳ᠉ ᠰᡳ ᡥᠣᠨ ᡥᠠᡳᡵᠠᡵᠠ ᡤᡝᠰᡝ ᠣᠴᡳ ᡠᡨᡥᠠᡳ ᠵᠣᠣ ᠪᠠᡳ᠈ ᠴᡳᡥᠠᠩᡤᠠᡳ ᠪᡠᡵᡝ ᠣᠴᡳ ᡤᠠᡳᠴᡳ ᡳᠨᡠ ᠠᠮᡨᠠᠩᡤᠠ ᡩᡝᡵᡝ᠉ ᡠᠮᠠᡳ ᠴᡳᡥᠠᡴᡡ ᠪᠠᡩᡝ ᡤᠠᡳᡥᠠ ᠰᡝᠮᡝ ᠠᠮᡨᠠᠩᡤᠠ᠉

ᠰᡳ ᡨᡝᡩᡝ ᡥᡝᠨᡩᡠ᠈ ᠵᡳᡩᡠᠵᡳ ᠪᡠᠮᠪᡳᠣ ᠪᡠᡵᠠᡴᡡᠨ᠉ ᠪᡠᡵᡝ ᡤᡝᠰᡝ ᠣᠴᡳ ᠨᡳᠶᠠᠯᠮᠠ ᡳᠨᡠ ᠪᠠᡥᠠᠮᠪᡳ ᠰᡝᠮᡝ ᡝᡵᡝᠮᡝ ᡤᡡᠨᡳᠮᠪᡳ᠉ ᠴᠠᠨᠠᠩᡤᡳ ᠪᡠᠮᠪᡳ ᠰᡝᠴᡳ ᠪᡠᡥᡝᡴᡡ᠉ ᠰᡳᡴᠰᡝ ᠪᡠᠮᠪᡳ ᠰᡝᠴᡳ ᡤᡝᠯᡳ ᠪᡠᡥᡝᡴᡡ᠉ ᠰᡳ ᠪᡠᡵᠠᡴᡡ ᠣᠴᡳ ᡳᠨᡠ ᠣᡴᡳᠨᡳ᠉ ᡩᠠᠮᡠ ᡝᠮᡠ ᠶᠠᡵᡤᡳᠶᠠᠨ  ᡳ ᠮᡝᠵᡳᡤᡝ ᡳᠰᡳᠪᡠᠴᡳ᠈ ᡴᡝᠮᡠᠨᡳ ᠮᠠᠵᡳᡤᡝ ᠶᡝᠪᡝ᠉ ᠪᠠᡳᠪᡳ ᡝᠨᡝᠩᡤᡳ ᠴᡳᠮᠠᡵᡳ ᠰᡝᠮᡝ ᠠᠨᠠᡨᠠᡵᠠᠩᡤᡝ᠉ ᠴᠣᡥᠣᠮᡝ ᠨᡳᠶᠠᠯᠮᠠ ᠪᡝ ᡝᡳᡨᡝᡵᡝᡵᡝᠩᡤᡝ ᠰᡝᠴᡳᠨᠠ᠉ ᠪᡠᡵᡝ ᠪᡠᡵᠠᡴᡡ ᡩᡝ ᠠᡳᠪᡳ᠉ ᡝᠮᡠ ᡴᡝᠩᠰᡝ ᠯᠠᠰᡥᠠ ᡤᡳᠰᡠᠨ ᠪᡳᠴᡳ᠈ ᠨᡳᠶᠠᠯᠮᠠ ᡳᠨᡠ ᡤᠠᠰᠠᡵᠠ ᠪᠠ ᠠᡴᡡ᠉ ᡩᠠᠮᡠ ᠠᠩᡤᠠᡳ ᡳᠴᡳ ᡤᡳᠰᡠᡵᡝᡥᡝ ᡤᠣᠵᡳᠮᡝ᠈ ᠠᠮᠠᡤᠠ ᡳᠨᡝᠩᡤᡳ ᠠᠴᠠᠨᠠᡵᠠ ᠠᠴᠠᠨᠠᡵᠠᡴᡡ ᠪᠠᠪᡝ ᡳᠨᡠ ᠮᠠᠵᡳᡤᡝ ᠪᠣᡩᠣᡵᠠᡴᡡ ᠣᠴᡳ᠈ ᡝᡵᡝᠪᡝ ᡤᡝᠯᡳ ᠠᡴᡩᡠᠨ ᠪᡳᠰᡳᡵᡝ ᠨᡳᠶᠠᠯᠮᠠ ᠰᡝᠴᡳ ᠣᠮᠪᡳᠣ᠉

ᡝᡵᡝ ᡤᡝᠮᡠ ᠰᡳᡩᡝᠨ  ᡳ ᠪᠠᡳᡨᠠ᠈ ᠴᡳᠰᡠᡳ ᠪᠠᡳᡨᠠ ᡩᡝ ᡩᡠᡳᠪᡠᠯᡝᠴᡳ ᠣᠵᠣᡵᠠᡴᡡ᠉ ᠴᡳᠰᡠᡳ ᠪᠠᡳᡨᠠ ᠣᠴᡳ᠈ ᡴᡝᠮᡠᠨᡳ ᠠᡳᠨᠠᠮᡝ ᠠᡳᠨᠠᠮᡝ ᠣᠴᡳ ᠣᠵᠣᡵᠣ᠉ ᠰᡳᡩᡝᠨ  ᡳ ᠪᠠᡳᡨᠠ ᡩᡝ ᠣᠴᡳ᠈ ᠮᠠᠵᡳᡤᡝ ᡤᡡᠨᡳᠨᡩᡝ ᡨᡝᠪᡠᡵᠠᡴᡡ ᡥᡝᠣᠯᡝᡩᡝᡶᡳ ᠪᠠᡳᡨᠠ ᡨᡠᠴᡳᡴᡝ ᠮᠠᠩᡤᡳ᠈ ᠵᠠ ᠠᡴᡡ ᡴᠠᡳ᠉ ᠸᡝ ᠠᠯᡳᠶᠠᠮᡝ ᡤᠠᡳᠮᠪᡳ᠉ ᠰᡳ ᠠᠯᡳᠶᠠᠮᡝ ᡤᠠᡳᠮᠪᡳᠣ᠉ ᠪᡳ ᠠᠯᡳᠶᠠᠮᡝ ᡤᠠᡳᠮᠪᡳᠣ᠉ ᡝᡳᠴᡳ ᠰᡳᠨᡩᡝ ᠠᠯᠠᡥᠠᡴᡡ ᠰᡝᠮᠪᡳᠣ᠈ ᡝᡳᠴᡳ ᠰᡳᠮᠪᡝ ᡩᠣᠨᠵᡳᡥᠠᡴᡡ ᠰᡝᠮᠪᡳᠣ᠈ ᡝᡳᠴᡳ ᠰᡳᠮᠪᡝ ᡩᠣᠨᠵᡳᡵᠠᡴᡡ ᠰᡝᠮᠪᡳᠣ᠉ ᡩᡝᡴᡩᡝᠨᡳ ᡥᡝᠨᡩᡠᡥᡝᠩᡤᡝ ᠰᠠᡳᠨ᠈ ᠠᠩᡤᠠ ᠵᠠᠯᡠ ᠠᡧᡠ᠈ ᠠᠩᡤᠠ ᠵᠠᠯᡠ ᡠᠮᡝ ᡤᡳᠰᡠᡵᡝᡵᡝ ᠰᡝᡥᡝᠪᡳ᠉ ᠣᡳᡥᠣᡵᡳᠯᠠᠴᡳ ᠣᠮᠪᡳᠣ᠉

ᠰᡠᠸᡝ ᡨᡝᡩᡝ ᠠᠴᠠᠨᠠᠴᡳ᠈ ᠮᡳᠮᠪᡝ ᡤᡠᡳᠯᡝᡶᡳ ᠰᠠᠰᠠ ᠶᠣᡴᡳ᠉ ᠪᡳ ᠪᠣᠣᡩᡝ ᠰᡠᠸᡝᠮᠪᡝ ᠠᠯᡳᠶᠠᡵᠠ᠉ ᠰᠠᡳᡴᠠᠨ ᡝᠵᡝ᠈ ᠮᡳᠨᡳ ᡝᡵᡝ ᠵᡝᡵᡤᡳ ᡤᡳᠰᡠᠨ ᠪᡝ ᡠᠮᡝ ᠣᠩᡤᠣᡵᠣ᠉ ᠪᡝ ᠰᡳᠮᠪᡝ ᡤᡠᡳᠯᡝᠨᠵᡳᠴᡳ ᠣᠵᠣᡵᠠᡴᡡ ᡴᠠᡳ᠉ ᠰᡳᠨᡳ ᠪᠣᠣ ᡨᡝᡥᡝᠩᡤᡝ ᡠᠮᡝᠰᡳ ᡤᠣᡵᠣ᠈ ᡤᡝᠯᡳ ᠰᡳᠨᡳ ᠪᠣᠣᡩᡝ ᡳᠰᡳᠨᠵᡳᡨᡝᠯᡝ ᠠᡳ ᡝᡵᡳᠨ ᠣᡥᠣ᠉ ᠨᡝᠮᡝᠮᡝ ᠮᡝᠨᡳ ᡤᡝᠨᡝᡵᡝ ᠪᡝ ᡨᠣᠣᡴᠠᠪᡠᡵᡝ ᡩᡝ ᡳᠰᡳᠨᠠᡵᠠᡴᡡᠨ᠉ ᠵᠠᡳ ᡩᡝ ᠣᠴᡳ᠈ ᠮᡝᠨᡳ ᡤᡡᠨᡳᠨ ᡩᡝ ᡳᠨᡠ ᠮᡠᡩᠠᠯᡳᠮᡝ ᠶᠠᠪᡠᡵᡝ ᠪᡝ ᠰᡝᠩᡤᡠᠸᡝᠨᡩᡝᡵᡝᠩᡤᡝ ᠸᠠᡴᠠ᠉ ᡩᠠᠮᡠ ᠰᡳ ᡤᡝᠨᡝᡴᡳ ᠰᡝᠮᠪᡳᠮᡝ ᡤᡝᠯᡳ ᡤᡝᠨᡝᡵᠠᡴᡡ᠈ ᡤᡝᠨᡝᡵᠠᡴᡡ ᠪᡳᠮᡝ ᡤᡝᠯᡳ ᡤᡝᠨᡝᡴᡳ ᠰᡝᠮᠪᡳ᠈ ᡝᠮᡩᡠᠪᡝᡳ ᠠᠮᠠᠰᡳ ᠵᡠᠯᡝᠰᡳ ᠨᡳᠶᠠᠯᠮᠠ ᠪᡝ ᠠᡴᠠᠪᡠᠮᠪᡳ᠈ ᡠᠮᠠᡳ ᡨᠣᡴᡨᠣᡥᠣ ᡤᡳᠰᡠᠨ ᠠᡴᡡ᠈ ᡝᡵᡝ ᡤᡝᠰᡝ ᡠᡧᠠᠨ ᡶᠠᡧᠠᠨ ᡩᡝ ᠸᡝ ᡥᠠᠮᡳᡵᡝ᠉

ᡳ ᠪᠠᠨᡳᡨᠠᡳ ᡠᡨᡨᡠ ᡴᠠᡳ᠈ ᠠᡩᠠᡵᠠᠮᡝ ᡥᠠᠯᠠᠮᡝ ᠮᡠᡨᡝᠮᠪᡳ᠈ ᠠᡳ ᡤᡝᠯᡳ᠈ ᠪᠠᠨᡳᡨᠠᡳ ᡠᡨᡨᡠ ᠣᠴᡳ᠈ ᡠᡨᡥᠠᡳ ᡥᠠᠯᠠᠴᡳ ᠣᠵᠣᡵᠠᡴᡡ ᠨᡳᠣ᠈ ᡝᠨᡩᡠᡵᡳᠩᡤᡝ ᠨᡳᠶᠠᠯᠮᠠ ᠰᡝᠮᡝ ᡥᠣᠨᠣ ᡝᠨᡩᡝᠪᡠᡴᡠ ᠪᡝ ᡩᠠᠰᠠᡴᡳ ᠰᡝᡵᡝ ᠪᠠᡩᡝ᠈ ᠵᡝᡵᡤᡳ ᠨᡳᠶᠠᠯᠮᠠ ᠪᡝ ᠠᡳ ᡥᡝᠨᡩᡠᡵᡝ᠈ ᡳᠨᡳ ᡤᡡᠨᡳᠨ  ᡳ ᠴᡳᡥᠠᡳ ᠶᠠᠪᡠᡵᡝᠩᡤᡝ ᡨᡝᠨᡳ ᡠᠰᡠᠨ ᡨᠠᠴᡳᡶᡳ ᡝᠮᡠ ᡤᡝᡨᡝᡵᠠᡴᡡ ᠨᡳᠶᠠᠯᠮᠠ ᡴᠠᡳ᠈ ᡩᠠᠮᡠ ᠪᡝᠶᡝᡳ ᠰᠠᡥᠠ ᡨᡝᡳᠯᡝ ᠣᠴᡳ᠈ ᠠᡳᡩᡝ ᡳᠰᡳᠨᠠᠮᠪᡳ ᡴᡝᠮᡠᠨᡳ ᠮᠠᠩᡤᠠ ᡠᡵᠰᡝ ᡩᡝ ᠠᡩᠠᠨᠠᡶᡳ ᡨᡝᡵᡝᡳ ᡨᠠᠴᡳᠨ ᡶᠣᠨᠵᡳᠨ ᠪᡝ ᡨᠠᠴᡳᡵᡝ᠈ ᡨᡝᡵᡝᡳ ᠶᠠᠪᡠᠨ ᠪᡝ ᠠᠯᡥᡡᡩᠠᠮᡝ ᠶᠠᠪᡠᡵᡝ ᠣᡥᠣᡩᡝ ᡨᡝᠨᡳ ᡥᡡᠸᠠᡧᠠᡶᡳ ᡝᠮᡠ ᠰᠠᡳᠨ ᠨᡳᠶᠠᠯᠮᠠ ᠣᠴᡳ ᠣᠵᠣᡵᠣ ᡩᠠᠪᠠᠯᠠ᠉ ᡠᡨᡨᡠ ᡥᡡᠯᡠᡵᡳ ᠮᠠᠯᠠᡵᡳ ᠶᠠᠪᡠᠴᡳ ᠣᠶᠣᠮᠪᡠᡵᡝ ᠠᡳᠪᡳ᠉

ᠯᠠᠯᠠᠨᠵᡳ ᠰᡳᠨᡳ ᠶᠠᠪᡠᡥᠠ ᠪᠠᡳᡨᠠ ᠰᡝᠮᠪᡳᠮᡝ᠈ ᠰᡳ ᠠᠯᡳᠮᡝ ᡤᠠᡳᡵᠠᡴᡡᠩᡤᡝ ᡝᠯᡝᠮᠠᠩᡤᠠ ᡩᠠᠯᠵᡳ ᠠᡴᡡ ᠨᡳᠶᠠᠯᠮᠠ ᡩᡝ ᠠᠨᠠᡨᠠᠮᠪᡳ᠈ ᠶᠠᡵᡤᡳᠶᠠᠨ ᠣᠴᡳᠪᡝ ᡨᠠᡧᠠᠨ ᠣᠴᡳᠪᡝ ᡩᡠᠪᡝᠨᡨᡝᠯᡝ ᡩᠠᠯᡩᠠᠴᡳ ᠣᠵᠣᡵᠠᡴᡡ᠈ ᡳᠨᡳ ᠴᡳᠰᡠᡳ ᡨᡠᠴᡳᠨᠵᡳᠮᠪᡳ ᠨᡳᠶᠠᠯᠮᠠ ᡩᡝ ᠠᠨᠠᡨᠠᡥᠠ ᡩᡝ᠈ ᡠᡨᡥᠠᡳ ᡠᡴᠴᠠᠴᡳ ᠣᠮᠪᡳᠣ ᡤᡠᠸᡝᠴᡳ ᠣᠮᠪᡳᠣ᠈ ᡨᡝ ᠪᡳᠴᡳᠪᡝ ᠰᡳ ᠠᠯᡳᠮᡝ ᡤᠠᡳᠵᠠᡵᠠᡴᡡ ᠣᠰᠣ ᠨᠠᡴᡡ᠈ ᡥᡝᡨᡠ ᠨᡳᠶᠠᠯᠮᠠ ᠵᡳᡶᡳ ᠰᡳᠨᡳ ᠶᠠᠪᡠᡥᠠ ᠪᠠᡳᡨᠠ ᠮᡠᠵᠠᠩᡤᠠ ᠰᡝᡥᡝᡩᡝ ᡨᡝᡵᡝ ᡝᡵᡳᠨ ᡩᡝ ᡩᠣᠰᡳᠴᡳ ᡳᠨᡠ ᠸᠠᡴᠠ᠈ ᠪᡝᡩᡝᡵᡝᠴᡳ ᡳᠨᡠ ᠸᠠᡴᠠ᠈ ᡩᠠᠮᡠ ᠶᠠᠰᠠ ᡤᡝᡥᡠᠨ ᠣᠵᠣᡵᠣ ᡩᠠᠪᠠᠯᠠ᠈ ᠵᠠᡳ ᡶᠠᡴᠰᡳᡩᠠᡴᡳ ᠰᡝᠮᡝ ᠵᠠᠪᡠᠮᡝ ᠮᡠᡨᡝᠮᠪᡳᠣ᠈ ᡳᠨᡝᠮᡝᠨᡝ ᡝᠮᡠ ᠶᠠᡵᡤᡳᠶᠠᠨ  ᡳ ᠪᠠᠪᡝ ᡨᡠᠴᡳᠪᡠᡶᡳ ᡤᡳᠰᡠᡵᡝᠴᡳ ᠨᡳᠶᠠᠯᠮᠠ ᡤᡝᠯᡳ ᡝᠮᡠ ᡤᡳᠯᠵᠠᠮᡝ ᡤᡡᠨᡳᡵᡝ ᠪᠠᠪᡳ᠈ ᡝᡵᡴᡝᠨ ᡨᡝᡵᡴᡝᠨ  ᡳ ᠰᡝᡵᡝᠩᡤᡝ ᡳᠨᡠ ᠪᠠᡳᡨᠠᡴᡡ ᡴᠠᡳ᠉

ᠰᡠᠸᡝ ᡨᡝᡵᡝᠪᡝ ᠪᠠᡳ ᡨᡠᠸᠠᡵᠠ ᡩᡝ ᠠᠯᠪᠠᡨᡠ ᡩᠠᠪᠠᠯᠠ᠈ ᡩᠣᠯᠣ ᡠᠮᡝᠰᡳ ᡤᡝᡨᡠᡴᡝᠨ ᠨᡳᠩᡤᡝ ᡴᠠᡳ᠈ ᠸᠠᡴᠠ ᠣᠴᡳ ᠠᡳ᠈ ᠪᡳ ᡳᠮᠪᡝ ᡨᡠᠸᠠᠴᡳ ᡳᠨᡠ ᡝᠮᡠ ᡤᡳᠯᡨᡠᡴᠠᠨ ᠶᡝᠪᡴᡝᠨ ᠨᡳᠶᠠᠯᠮᠠ᠈ ᡳᠴᡳᡥᡳᠶᠠᡥᠠᠩᡤᡝ ᠪᠠᡳᡨᠠ ᡨᠣᠮᡝ ᡩᠠᠴᡠᠨ᠈ ᡤᡳᠰᡠᡵᡝᡥᡝᠩᡤᡝ ᡤᡳᠰᡠᠨ ᡨᠣᠮᡝ ᠮᠠᠩᡤᠠ᠈ ᡝᡳᡨᡝᠨ ᡥᠠᠴᡳᠨ ᡩᡝ ᠮᡠᡨᡝᡵᠠᡴᡡ ᠰᡝᡵᡝ ᠪᠠ ᠠᡴᡡ᠈ ᡝᡵᡝᠪᡝ ᡨᡠᠸᠠᠮᡝ ᠣᡥᠣᡩᡝ ᠨᡳᠶᠠᠯᠮᠠ ᠪᡝ ᠴᡳᡵᠠ  ᡳ ᡨᡠᠸᠠᠴᡳ ᠣᠵᠣᡵᠠᡴᡡ᠈ ᠮᡝᡩᡝᡵᡳ ᠮᡠᡴᡝ ᠪᡝ ᡥᡳᠶᠠᠰᡝ  ᡳ ᠮᡳᠶᠠᠯᡳᠴᡳ ᠣᠵᠣᡵᠠᡴᡡ ᠰᡝᡥᡝ ᡤᡳᠰᡠᠨ ᡠᠮᠠᡳ ᡨᠠᡧᠠᠨ ᠠᡴᡡ ᡴᠠᡳ᠈ ᡝᡩᡝ ᡳᠨᡠ ᡩᠠᠮᡠ ᠨᡳᠶᠠᠯᠮᠠ  ᡳ ᡶᠠᡧᡧᠠᡵᠠ ᡶᠠᡧᡧᠠᡵᠠᡴᡡ ᠪᡝ ᡥᡝᠨᡩᡠᡵᡝ ᡩᠠᠪᠠᠯᠠ᠈ ᡶᠠᡧᡧᠠᠴᡳ ᡨᡝᡨᡝᠨᡩᡝᡵᡝ ᠠᡳ ᡥᠠᠴᡳᠨ  ᡳ ᠮᠠᠩᡤᠠ ᠪᠠᡳᡨᠠ ᠰᡝᠮᡝ ᠮᡠᡨᡝᠪᡠᡵᠠᡴᡡ ᠨᡳ᠉

ᠰᡳ ᡨᡠᠪᠠᠴᡳ ᠪᠠᡥᠠᡶᡳ ᡠᡴᠴᠠᡥᠠ ᠰᡝᡵᡝ ᠪᡝ ᡩᠣᠨᠵᡳᡵᡝ ᠵᠠᡴᠠᡩᡝ᠈ ᠪᡳ ᡠᠮᡝᠰᡳ ᠰᡝᠯᠠᡥᠠ᠈ ᠨᡝᠨᡝᠮᡝ ᡩᠣᠨᠵᡳᡥᠠ ᡤᡳᠰᡠᠨ᠈ ᡥᠣᠨᠣ ᠪᡠᡵᡠ ᠪᠠᡵᠠ ᠪᡳᡥᡝ᠈ ᠠᠮᠠᠯᠠ ᡩᡠᡵ ᠰᡝᠮᡝ ᡤᡳᠰᡠᡵᡝᡵᡝ ᠵᠠᡴᠠᡩᡝ᠈ ᠪᡳ ᡨᡝᠨᡳ ᠠᡴᡩᠠᡥᠠ᠈ ᠶᠠᠯᠠ ᠰᡳᠨᡳ ᡝᡵᡝ ᡤᡝᠰᡝ ᡥᡡᡨᡠᡵᡳᠩᡤᠠ ᠨᡳᠶᠠᠯᠮᠠ ᠠᡳᠨᠠᡥᠠ ᠰᡝᠮᡝ ᡶᡝᠩᡧᡝᠨ ᠠᡴᡡ ᠪᠠᡩᡝ ᡨᡠᡥᡝᠨᡝᡵᠠᡴᡡ ᠰᡝᠴᡳᠨᠠ᠈ ᡩᠠᠮᡠ ᠰᡳᠨᡳ ᠣᠩᡤᠣᠯᠣ ᡤᡡᠨᡳᠨ ᠪᠠᡥᠠᠪᡠᡥᠠ ᠪᠠᠪᡝ ᠨᡳᠶᠠᠯᠮᠠ ᠠᡩᠠᡵᠠᠮᡝ ᠪᠠᡥᠠᡶᡳ ᠰᠠᡵᠠ᠈ ᡥᡝᡨᡠ ᠨᡳᠶᠠᠯᠮᠠ ᠰᡳᠨᡳ ᠵᠠᠯᡳᠨ ᠣᡳᡥᠣᡵᡳ ᡶᠠᠴᡳᡥᡳᠶᠠᡧᠠᠮᠪᡳᡥᡝ᠈ ᡝᡵᡝ ᡤᡝᠮᡠ ᠠᡤᡝ ᠰᡳ ᠰᡝᡳᠪᡝᠨᡳ ᡤᡠᠴᡠᠰᡝ ᡩᡝ ᡥᠠᠪᠴᡳᡥᡳᠶᠠᠨ ᠣᡶᡳ ᡨᡝᠨᡳ ᡤᡝᠮᡠ ᡠᡨᡨᡠ ᡥᡳᠩ ᠰᡝᠮᡝ ᡤᡡᠨᡳᠨ ᡩᡝ ᡨᡝᠪᡠᡵᡝ ᡩᠠᠪᠠᠯᠠ᠈ ᠰᠠᡳᠨ ᠪᠠ ᠠᡴᡡ ᠪᡳᡥᡝ ᠪᡳᠴᡳ᠈ ᠸᡝ ᠵᡳᡶᡳ ᡥᡝᡵᠰᡝᠮᠪᡳᡥᡝᠨᡳ᠈ ᡨᡝᡵᡝ ᠠᠩᡤᠠᠯᠠ ᠪᠠᡥᠠᠴᡳ ᡠᡵᡤᡠᠨ ᠰᡝᠴᡳ ᠣᠵᠣᡵᠠᡴᡡ᠈ ᡠᡶᠠᡵᠠᠴᡳ ᡴᠣᡵᠣ ᠰᡝᠴᡳ ᠣᠵᠣᡵᠠᡴᡡ ᡤᡝᠮᡠ ᠮᡝᠨᡳ ᠮᡝᠨᡳ ᡨᡝᡳᠰᡠ  ᡳ ᡩᠣᡵᡤᡳ ᠪᠠᡳᡨᠠ ᡳᠨᡳ ᠴᡳᠰᡠᡳ ᡝᠮᡠ ᡨᠣᡴᡨᠣᡥᠣ ᡤᡳᠶᠠᠨ ᠪᡳ᠈ ᡝᡩᡝ ᠠᡳ ᡶᡝᡵᡤᡠᠸᡝᡵᡝ ᠪᠠᠪᡳ᠉

ᠠᡤᡝ ᡶᡝᡵᡤᡠᠸᡝᠴᡠᡴᡝ ᡤᡡᠨᡳᠨ ᠪᡝ ᠪᡳ ᠸᠠᠴᡳᡥᡳᠶᠠᠮᡝ ᠰᠠᡥᠠ᠈ ᡝᡵᡝ ᡩᡠᡵᡠᠨ  ᡳ ᠮᡠᠵᡳᠯᡝᠨ ᠠᡴᡡᠮᠪᡠᡥᠠ ᠪᡝ ᠪᡳ ᡥᡠᡴᡧᡝᠮᡝ ᡤᡡᠨᡳᡵᠠᡴᡡ ᠰᡝᡵᡝ ᡩᠣᡵᠣ ᠪᡳᠣ᠈ ᠨᡝ ᡠᡩᡠ ᡴᠠᡵᡠᠯᠠᠮᡝ ᠮᡠᡨᡝᡵᠠᡴᡡ ᠪᡳᠴᡳᠪᡝ᠈ ᠠᠮᠠᡤᠠ ᡳᠨᡝᠩᡤᡳ ᡠᡵᡠᠨᠠᡴᡡ ᡴᡳᠴᡝᠮᡝ ᡶᠠᡧᡧᠠᠮᡝ ᡴᠠᡵᡠᠯᠠᠮᠪᡳ᠈ ᡩᠠᠮᡠ ᠨᡝ ᠪᡳ ᠠᡳᠰᡝᡵᡝ ᠮᡠᠵᡳᠯᡝᠨ ᡩᡝ ᡥᠠᡩᠠᡥᠠᡳ ᡝᠵᡝᡶᡳ ᠠᡳᠨᠠᡥᠠ ᠰᡝᠮᡝ ᡳᠨᡠ ᠣᠩᡤᠣᡵᠠᡴᡡ ᠣᠪᡠᡴᡳ᠈ ᠠᡤᡝ ᠠᡳᠨᡠ ᡠᡨᡨᡠ ᡤᡳᠰᡠᡵᡝᠮᠪᡳ᠈ ᠶᠠ ᡤᡝᠮᡠ ᡤᡠᠴᡠ ᠸᠠᡴᠠ ᡳᠨᡝᠩᡤᡳ ᠰᡝᠴᡳ ᠮᠣᠣᡳ ᠠᠪᡩᠠᡥᠠ ᠴᡳ ᡥᠣᠨᠣ ᡶᡠᠯᡠ ᡴᠠᡳ᠈ ᠨᡳᠶᠠᠯᠮᠠ ᠰᡝᠮᡝ ᠪᠠᠨᠵᡳᡶᡳ ᠶᠠ ᠪᠠᡩᡝ ᡠᠴᠠᡵᠠᠪᡠᡵᠠᡴᡡ ᠪᡝ ᠰᠠᠮᠪᡳᠨᡳ ᡠᡵᡠᠨᠠᡴᡡ ᠰᡝᡵ ᠰᡝᡵᡝ ᠪᠠᠴᡳ ᠠᠨᠠᠮᡝ ᠶᠣᠣᠨᡳ ᡤᡝᠮᡠ ᡴᠠᡵᡠᠯᠠᠪᡠᡵᡝ ᠪᡝ ᡝᡵᡝᠮᡝ ᡤᡡᠨᡳᠴᡳ ᠣᠮᠪᡳᠣ᠈ ᠠᡤᡝ ᠰᡳ ᠵᠠᠴᡳ ᡤᡡᠨᡳᠨ ᡶᡠᠯᡠ᠈ ᠵᠠᠴᡳ ᡴᡳᠮᠴᡳᡴᡡ ᠪᠠᡳ᠉

ᠰᡳ ᠠᡳ ᡠᡨᡨᡠ ᡝᠯᡝᠴᡠᠨ ᠪᡝ ᠰᠠᡵᡴᡡ᠈ ᡤᡝᠮᡠ ᠰᡳᠨᡳ ᠠᡩᠠᠯᡳ ᠣᠴᡳ ᡳᠨᡠ ᠵᠣᠣ ᡴᠠᡳ᠈ ᠯᠠᠪᡩᡠᡴᠠᠨ  ᡳ ᠪᠠᡥᠠᡵᠠᠩᡤᡝ ᡴᠣᠮᠰᠣᡴᠣᠨ  ᡳ ᠪᠠᡥᠠᡵᠠ ᡩᡝ ᡳᠰᡳᡵᠠᡴᡡ᠈ ᡴᠣᠮᠰᠣᡴᠣᠨ  ᡳ ᠪᠠᡥᠠᡵᠠᠩᡤᡝ ᠨᡝ ᠪᠠᡥᠠᡵᠠ ᡩᡝ ᡳᠰᡳᡵᠠᡴᡡ᠈ ᠯᠠᠪᡩᡠ ᠮᡝᠮᡝᡵᡝᡶᡳ ᠯᠠᠯᠠᠨᠵᡳ ᠨᡳᠶᠠᠩᡤᡡᠮᡝ ᠮᡠᡨᡝᡵᠠᡴᡡ ᠣᠴᡳ᠈ ᡳᠨᡠ ᠪᠠᡳᡨᠠᡴᡡ᠈ ᡩᠠᠮᡠ ᡩᡝᡵᡤᡳ ᡩᡝ ᡩᡠᡳᠪᡠᠯᡝᠴᡳ ᡳᠰᡳᡵᠠᡴᡡ ᠪᡳᠴᡳᠪᡝ ᡶᡝᠵᡝᡵᡤᡳ ᡩᡝ ᡩᡠᡳᠪᡠᠯᡝᠴᡳ ᡶᡠᠨᠴᡝᡨᡝᠯᡝ ᠪᡳ ᠰᡝᠴᡳ ᡠᡨᡥᠠᡳ ᠸᠠᠵᡳᡥᠠ᠈ ᡠᡵᡠᡳ ᠵᡠᠯᡝᠰᡳ ᡤᡝᠨᡝᡵᡝ ᡤᠣᠵᡳᠮᡝ᠈ ᠠᠮᠠᠰᡳ ᡶᠣᡵᠣᡶᡳ ᡨᡠᠸᠠᡵᠠᡴᡡ ᠣᠴᡳ ᠣᠮᠪᡳᠣ᠉

ᠰᡳ ᡨᡝᡵᡝ ᠪᠠᡳᡨᠠ ᠪᡝ ᡶᠠᡧᡧᠠᠴᡳᠨᠠ᠈ ᠠᡳ ᡠᡨᡨᡠ ᡥᡝᠣᠯᡝᠨ᠈ ᡨᡝᡵᡝ ᠪᠠᡳᡨᠠ ᡩᡝ ᡥᠣᠯᠪᠣᠪᡠᡥᠠᠩᡤᡝ ᡠᠵᡝᠨ ᠠᠮᠪᠠ᠈ ᠠᠮᠪᡠᠯᠠ ᠨᠠᡵᡥᡡᡧᠠᠴᡳ ᠠᠴᠠᠮᠪᡳ᠈ ᠪᠠᠯᠠᡳ ᠨᡳᠶᠠᠯᠮᠠ ᡩᡝ ᡶᡳᡵᡤᡝᠮᠪᡠᠴᡳ ᠣᠵᠣᡵᠠᡴᡡ ᡴᠠᡳ᠈ ᠪᠠᡳᡨᠠ ᠰᡝᡵᡝᠩᡤᡝ ᠠᡳ ᠪᠣᠯᠵᠣᠨ᠈ ᡩᠣᡳᡤᠣᠮᡧᠣᡵᠠᡴᡡᠩᡤᡝ ᡠᡨᡥᠠᡳ ᠸᠠᡴᠠ ᠰᡝᠴᡳᠨᠠ᠈ ᠠᡳᡴᠠᠪᠠᡩᡝ ᠰᡳ ᠣᠯᡤᠣᡧᠣᡵᠣ ᡩᠠᡩᡝ ᡤᡝᠯᡳ ᠣᠯᡤᠣᡧᠣᡵᠣ᠈ ᡤᡳᠩᡤᡠᠯᡝᡵᡝ ᡩᠠᡩᡝ ᡤᡝᠯᡳ ᡤᡳᠩᡤᡠᠯᡝᡵᡝ᠈ ᠵᠠᡳ ᡩᡠᡵᡠᠨ ᡴᡝᠮᡠᠨ ᠴᡳ ᠵᡠᡵᠴᡝᡵᠠᡴᡡ᠈ ᡨᠣᠪ ᠰᡝᡵᡝ ᡤᡡᠨᡳᠨ ᠪᡝ ᠵᠠᡶᠠᡶᡳ ᠶᠠᠪᡠᠮᡝ ᠣᡥᠣᡩᡝ ᠠᡳᠨᠴᡳ ᡝᡳᡨᡝᠨ ᠪᠠᡳᡨᠠ ᡩᡝ ᡤᡝᠮᡠ ᡩᠣᠰᠣᠪᡠᠮᠪᡳ ᡩᡝᡵᡝ᠈ ᡝᡵᡝ ᠪᠠᡳ ᠮᡳᠨᡳ ᠰᠠᡥᠠ ᡨᡝᡳᠯᡝ ᠰᡳᠨᡩᡝ ᠵᠣᠮᠪᡠᡥᠠᠩᡤᡝ ᠠᡩᠠᡵᠠᠮᡝ ᡳᠴᡳᡥᡳᠶᠠᠮᡝ ᡤᠠᠮᠠᠴᡳ ᠠᠴᠠᡵᠠ ᠪᠠᠪᡝ᠈ ᠰᡳᠨᡳ ᠯᠠᠰᡥᠠᠯᠠᡵᠠ ᡩᡝᠪᡳ᠉

ᠶᠠᠶᠠ ᠪᠠᡳᡨᠠ ᠪᡝ ᡝᠮᡤᡝᡵᡳ ᠸᠠᠴᡳᡥᡳᠶᠠᠪᡠᠴᡳ ᠰᠠᡳᠨ ᡩᠠᠪᠠᠯᠠ᠈ ᠵᡠᠸᡝᡩᡝᡵᡝ ᡩᡝ ᡳᠰᡳᠨᠠᠴᡳ ᠠᡳ ᠰᠠᡳᠨ ᠪᠠ ᠪᠠᠨᠵᡳᠨᠠᡵᠠ᠈ ᠪᠠᡳᡨᠠ ᡧᠠᠩᡤᠠᡶᡳ ᠵᠠᠪᠴᠠᡵᠠ ᠠᠩᡤᠠᠯᠠ᠈ ᡩᡝᡵᡳᠪᡠᡵᡝ ᠣᠩᡤᠣᠯᠣ ᠣᠯᡤᠣᡧᠣᡵᠣ ᡩᡝ ᡳᠰᡳᡵᠠᡴᡡ᠈ ᡝᡵᡝ ᠪᠠᡳᡨᠠ ᡴᡝᠮᡠᠨᡳ ᡳᠵᡳᠰᡥᡡᠨ ᠰᡝᠴᡳ ᠣᠮᠪᡳ᠈ ᠠᠰᡠᡵᡠ ᠮᡠᡵᡨᠠᠰᡥᡡᠨ ᠰᡝᡵᡝ ᠪᠠ ᠠᡴᡡ᠈ ᠮᠠ ᠯᡳ ᠰᡝᠮᡝ ᠸᠠᠴᡳᡥᡳᠶᠠᠴᡳ ᠣᠮᠪᡳ᠈ ᡝᡩᡝ ᠠᡳ ᡩᠠᡥᡡᠨ ᡩᠠᡥᡡᠨ  ᡳ ᡶᠣᠨᠵᡳᡵᡝ ᠪᠠᠪᡳ᠈ ᠰᡳ ᠰᠠᡵᡴᡡ᠈ ᡝᡵᡝ ᠪᠠᡳᡨᠠ ᠪᡝ ᡠᡵᡠᠨᠠᡴᡡ ᠵᡠᠸᡝᡩᡝᡵᡝ ᡩᡝ ᡳᠰᡳᠪᡠᠮᠪᡳ᠈ ᠠᡩᠠᡵᠠᠮᡝ ᠰᡝᠴᡳ᠈ ᡝᡵᡝ ᠠᠮᠪᠠ ᠮᡠᡵᡠ ᠪᡝ ᡨᡠᠸᠠᠴᡳ ᡠᡨᡥᠠᡳ ᡠᠮᡝᠰᡳ ᡧᠠᡩᠠᠴᡠᡴᠠ ᠪᠠᡳᡨᠠ᠈ ᠠᡳᡴᠠᠪᠠᡩᡝ ᡩᠠ ᠰᡝᡴᡳᠶᡝᠨ ᠪᡝ ᡤᡝᡨᡠᡴᡝᠯᡝᠪᡠᡵᠠᡴᡡ ᠣᠴᡳ᠈ ᠠᠮᠠᡤᠠ ᡳᠨᡝᠩᡤᡳ ᡠᡵᡠᠨᠠᡴᡡ ᡩᡝᠪᡴᡝᠪᡠᡵᡝ ᡩᡝ ᡳᠰᡳᠨᠠᠮᠪᡳ᠉

ᡝᠮᡝᠮᡠ ᡠᡵᠰᡝ ᡠᡨᡨᡠ ᡤᡳᠰᡠᡵᡝᠮᠪᡳ᠈ ᡝᠮᡝᠮᡠ ᡠᡵᠰᡝ ᡤᡝᠯᡳ ᡨᡠᡨᡨᡠ ᡤᡳᠰᡠᡵᡝᠮᠪᡳ᠈ ᡤᡡᠨᡳᠴᡳ ᡤᡝᠮᡠ ᡨᠠᡧᠠᠨ᠈ ᠠᡳᠨᠠᡥᠠᡳ ᠶᠠᡵᡤᡳᠶᠠᠨ ᠨᡳ᠈ ᡨᡝ ᠶᠠ ᠪᡝ ᠠᡴᡩᠠᠴᡳ ᠣᠵᠣᡵᠣ᠈ ᠶᠠ ᠪᡝ ᡩᠣᠨᠵᡳᠴᡳ ᠣᠵᠣᡵᠣ᠈ ᡝᠯᡝᠮᠠᠩᡤᠠ ᠮᡠᠵᡳᠯᡝᠨ ᡶᠠᡵᡶᠠᠪᡠᡵᡝ ᠵᠠᡴᠠᡩᡝ᠈ ᡝᡵᡝ ᠪᠠᡳᡨᠠ  ᡳ ᠠᡳᠰᡳ ᠵᠣᠪᠣᠯᠣᠨ ᠮᡠᡨᡝᠪᡠᡵᡝ ᠪᠠᠪᡝ ᡳᠨᡠ ᡤᡝᠮᡠ ᡨᠣᡴᡨᠣᠪᡠᠮᡝ ᠮᡠᡨᡝᡵᠠᡴᡡ ᠣᡥᠣᠪᡳ᠈ ᡨᡝ ᠠᠪᠰᡳ ᠣᡥᠣᡩᡝ ᠰᠠᡳᠨ ᠵᡳᠶᡝ᠈ ᠰᠠᡵᡴᡡ ᠰᡝᠮᡝ ᠠᡵᠠᡴᡳ ᠰᡝᠴᡳ᠈ ᠶᠠᡵᡤᡳᠶᠠᠨ ᠪᡝ ᡨᠠᡧᠠᠨ ᠣᠪᡠᠴᡳ ᠣᠵᠣᡵᠠᡴᡡ ᠰᡝᡵᡝ ᠠᠩᡤᠠᠯᠠ᠈ ᡨᠠᡧᠠᠨ ᠪᡝ ᠶᠠᡵᡤᡳᠶᠠᠨ ᠣᠪᡠᠴᡳ ᡳᠨᡠ ᠣᠵᠣᡵᠠᡴᡡ᠈ ᡠᡵᡠ ᠪᡝ ᠸᠠᡴᠠ ᠰᡝᠴᡳ ᠣᠵᠣᡵᠠᡴᡡ ᠰᡝᡵᡝ ᠠᠩᡤᠠᠯᠠ᠈ ᠸᠠᡴᠠ ᠪᡝ ᡠᡵᡠ ᠰᡝᠴᡳ ᡳᠨᡠ ᠣᠵᠣᡵᠠᡴᡡ᠈ ᡝᡳᡨᡝᡵᡝᠴᡳᠪᡝ᠈ ᡠᡵᡠᠨᠠᡴᡡ ᡠᡵᡠ ᠸᠠᡴᠠ ᠶᠠᡵᡤᡳᠶᠠᠨ ᡨᠠᡧᠠᠨ  ᡳ ᠪᠠᠪᡝ ᡨᡝᠩᡴᡳᠮᡝ ᠰᠠᡥᠠ ᠮᠠᠩᡤᡳ᠈ ᡨᡝᠨᡳ ᠣᠵᠣᡵᠣ ᡩᠠᠪᠠᠯᠠ᠈ ᠨᠠᠮᠪᡠᡥᠠ ᠨᠠᠮᠪᡠᡥᠠᡳ ᡠᡨᡥᠠᡳ ᡥᡡᠯᡥᡳᡩᠠᠮᡝ ᡤᡳᠰᡠᡵᡝᠴᡳ ᠣᠮᠪᡳᠣ᠉

ᠰᡳ ᡠᡨᡥᠠᡳ ᠠᠴᠠᡵᠠ ᠪᡝ ᡨᡠᠸᠠᠮᡝ ᠶᠠᠪᡠ᠈ ᠵᠠᡳ ᡠᠮᡝ ᡩᠠᠴᡳᠯᠠᡵᠠ᠈ ᡝᡵᡝ ᡠᠮᡝᠰᡳ ᡳᠯᡝᡨᡠ ᠪᠠᡳᡨᠠ ᠪᡝ ᡩᠠᡥᠠᠮᡝ᠈ ᠠᡳᠨᠠᡥᠠ ᠰᡝᠮᡝ ᠰᡳᡵᡴᡝᡩᡝᠮᡝ ᡤᠣᡳᡩᠠᠪᡠᡵᡝ ᡩᡝ ᡳᠰᡳᠨᠠᡵᠠᡴᡡ᠈ ᠠᡳᡴᠠ ᡤᡳᠶᠠᠯᡠ ᠵᠠᡴᠠ  ᡳ ᠪᠠ ᠪᡳᠴᡳ᠈ ᠨᡳᠶᠠᠯᠮᠠᡳ ᡶᡳᡴᡨᡠ ᠪᠠᡳᡵᡝᡩᡝ ᡤᡝᠯᡝᠮᠪᡳᡩᡝᡵᡝ᠈ ᡝᡵᡝ ᡤᡝᠰᡝ ᡥᠠᠴᡳᠨ ᡩᡝᠮᡠᠨ ᡠᠮᠠᡳ ᠠᡴᡡ ᠪᠠᡩᡝ᠈ ᡥᠣᠣ ᡥᡳᠣ ᠰᡝᠮᡝ ᠵᠠᠪᡠᠴᡳ ᡠᡨᡥᠠᡳ ᠸᠠᠵᡳᡥᠠ᠈ ᡝᡩᡝ ᡤᡝᠯᡳ ᠠᡳ ᡨᠠᡨᡥᡡᠨᠵᠠᡵᠠ ᠪᠠᠪᡳ᠈ ᡩᠠᠮᡠ ᠪᠠᡳᡨᠠ ᡩᡝ ᡨᡝᡳᠰᡠᠯᡝᡥᡝ ᠮᠠᠩᡤᡳ᠈ ᡶᠣᡳᡥᠣᡵᡳ ᡨᡠᠸᠠᡵᠠᡴᡡ᠈ ᠨᡝᠨᡝᠮᡝ ᡝᠮᡠ ᠵᡝᡵᡤᡳ ᠨᠠᡵᡥᡡᡧᠠᠮᡝ ᡤᡡᠨᡳᠨᠵᠠᡶᡳ᠈ ᠵᠠᡳ ᠶᠠᠪᡠᠮᡝ ᠣᡥᠣᡩᡝ᠈ ᡠᡵᡠᡳ ᠵᠠᠪᡧᠠᡴᡳ ᠪᡳᠰᡳᡵᡝ ᡩᠠᠪᠠᠯᠠ᠈ ᠠᡳᠨᠠᡥᠠᡳ ᡠᡶᠠᡵᠠᡴᡳ ᠪᡳᠨᡳ᠉

ᡝᡵᡝ ᠵᡝᡵᡤᡳ ᡤᡳᠰᡠᠨ᠈ ᡤᡝᠮᡠ ᠰᡳᠨᡳ ᡤᡡᠨᡳᠨ ᠴᡳ ᡨᡠᠴᡳᠨᠵᡳᡥᡝᠩᡤᡝᠣ᠈ ᡝᡳᠴᡳ ᠪᠠᡳ ᠪᡠᡥᡳᠶᡝᠮᡝ ᡤᡳᠰᡠᡵᡝᡥᡝᠩᡤᡝᠣ᠈ ᠰᡳᠨᡳ ᡝᡵᡝ ᡤᡳᠰᡠᠨ ᡧᠠᠨ ᠪᡝ ᡤᡳᡩᠠᡶᡳ ᡥᠣᠩᡤᠣᠨ ᠪᡝ ᡥᡡᠯᡥᠠᡵᠠ ᠪᠠᡳᡨᠠ ᠪᡝ ᠶᠠᠶᠠ ᠪᠠᡩᡝ ᡳᠰᡳᠨᠠᡶᡳ ᡳᠨᡠ ᠶᠠᠪᡠᠮᡝ ᠪᠠᠨᠵᡳᠨᠠᡵᠠᡴᡡ᠈ ᠰᡳ ᠰᡳᠮᠪᡝ ᠠᠯᡳᠮᡝ ᠮᡠᡨᡝᡵᠠᡴᡡ ᠰᡝᠴᡳ᠈ ᡳ ᠰᡳᠨᠴᡳ ᡤᡝᠯᡳ ᠠᠯᡳᠮᡝ ᠮᡠᡨᡝᡵᠠᡴᡡ ᡴᠠᡳ᠈ ᠴᠠᠨᠠᠩᡤᡳ ᠵᡳᠣ ᠨᠠᡴᡡ ᡠᡨᡥᠠᡳ ᠠᠩᡤᠠ ᡠᠪᠠᠯᡳᠶᠠᡴᠠᠩᡤᡝ᠈ ᡝᡵᡝᠪᡝ ᠨᡳᠶᠠᠯᠮᠠᡳ ᠸᠠᡴᠠ ᠰᡝᠮᡝᠣ᠈ ᠪᡝᠶᡝᡳ ᠸᠠᡴᠠ ᠰᡝᠮᡝᠣ᠈ ᠠᡳ ᠣᠴᡳᠪᡝ ᠪᡝᠶᡝ ᠠᠯᡳᡶᡳ ᠶᠠᠪᡠᡵᡝᠩᡤᡝ ᠸᡝᠰᡳᡥᡠᠨ᠈ ᡝᡵᡝ ᡩᡠᡵᡠᠨ  ᡳ ᠨᡳᠶᠠᠯᠮᠠ ᡩᡝ ᡨᡝᠨ ᡤᠠᡳᡵᡝᠩᡤᡝ ᡥᡳᡥᠠᠨᠠᡴᡡ ᠪᠠᡳ᠉

ᠠᠰᡳᡥᠠᡨᠠ ᠮᠠᠵᡳᡤᡝ ᡶᡝᡩᡝ᠈ ᡝᡵᡝ ᡤᡝᠰᡝ  ᡳ ᠰᠠᡳᠨ ᠨᠠᠰᡥᡡᠨ ᠪᡝ ᡠᡶᠠᡵᠠᠪᡠᡥᠠ ᠮᠠᠩᡤᡳ᠈ ᠵᠠᡳ ᡝᡵᡝ ᡠᠴᠠᡵᠠᠨ ᠪᡝ ᡤᡡᠨᡳᠴᡳ ᡤᡝᠯᡳ ᠪᠠᡥᠠᠮᠪᡳᠣ᠈ ᡝᡵᡳᠨ ᡶᠣᡵᡤᠣᠨ ᠣᠶᠣᠩᡤᠣ ᠰᡝᠴᡳ᠈ ᡶᠠᡧᡧᠠᡵᠠᠩᡤᠠ ᡳᠨᡠ ᠣᠶᠣᠩᡤᠣ᠈ ᠪᡳ ᠰᡳᠮᠪᡝ ᡨᡠᠸᠠᠴᡳ᠈ ᡝᠮᡝᠮᡠ ᡶᠣᠨᡩᡝ ᡥᠣᠨ ᡥᠠᡥᡳ᠈ ᡝᠮᡝᠮᡠ ᡶᠣᠨᡩᡝ ᡝᠯᡝᡥᡠᠨ ᡩᠠᠪᠠᡥᠠᠪᡳ᠈ ᠰᡳᠨᡳ ᡥᡝᠨᡩᡠᡥᡝ ᡝᡵᡝ ᠵᡝᡵᡤᡳ ᡤᡳᠰᡠᠨ ᡳᠨᡠ ᠪᡳᠴᡳᠪᡝ᠈ ᠰᡳ ᡩᠠᠮᡠ ᡝᠮᡴᡝᠨ ᠪᡝ ᠰᠠᡥᠠ ᡤᠣᠵᡳᠮᡝ ᠵᡠᠸᡝ ᠪᡝ ᠰᠠᡵᠠ ᡠᠨᡩᡝ᠈ ᠶᠠᠶᠠ ᠪᠠᡳᡨᠠ ᡳᠨᡳ ᠴᡳᠰᡠᡳ ᡝᠮᡠ ᠪᠠᠨᠵᡳᠨᠠᡵᠠ ᡩᠣᡵᠣ ᠪᡳ᠈ ᠪᠠᡥᠠᡵᠠ ᡤᡳᠶᠠᠨ ᠣᠴᡳ ᡤᡡᠨᡳᠨ ᠠᡴᡡ ᠪᠠᡩᡝ ᡴᡝᠮᡠᠨᡳ ᡠᠴᠠᡵᠠᠪᡠᠮᠪᡳ᠈ ᠪᠠᡥᠠᡵᠠ ᡤᡳᠶᠠᠨ ᠸᠠᡴᠠ ᠣᠴᡳ ᡠᡩᡠ ᡥᡡᠰᡠᠨ ᠮᠣᡥᠣᡨᠣᠯᠣ ᡶᠠᡧᡧᠠᡥᠠ ᠰᡝᠮᡝ ᡳᠨᡠ ᠪᠠᡳᡨᠠᡴᡡ ᡴᠠᡳ᠉

ᠠᡤᡝ ᠪᡝ ᠪᠠᡳᠪᡳ ᡨᠠᡴᠠᡵᠠ ᠠᡩᠠᠯᡳ᠈ ᠶᠠᡴᠠ ᠪᠠᡩᡝ ᠠᠴᠠᡥᠠ ᡤᡝᠰᡝ᠈ ᠠᠪᠰᡳ ᠴᡳᡵᠠ ᠪᡝ ᡨᠠᡴᠠᠮᠪᡳ᠉ ᡝᠨᡝᠩᡤᡳ ᠵᠠᠪᡧᠠᠨ ᡩᡝ ᡤᡝᠯᡳ ᠠᡤᡝ ᠪᡝ ᠠᠴᠠᡥᠠ᠈ ᠠᡩᠠᡵᠠᠮᡝ ᠪᠠᡥᠠᡶᡳ ᠰᡳᠨᡳ ᡝᠮᡤᡳ ᡝᠮᡠ ᠪᠠᡩᡝ ᠪᡳᡶᡳ᠈ ᡩᠠᡵᡠᡥᠠᡳ ᠠᡤᡝᡳ ᡨᠠᠴᡳᠪᡠᡵᡝ ᠪᡝ ᡩᠣᠨᠵᡳᠴᡳ᠈ ᡨᡝᡵᡝ ᠶᠠᠯᠠ ᠮᡳᠨᡳ ᡴᡝᠰᡳ ᠰᡝᠴᡳᠨᠠ᠈ ᡨᡠᡵᡤᡠᠨ ᠠᡩᠠᡵᠠᠮᡝ ᠰᡝᠴᡳ᠈ ᠰᠠᡳᠨ ᡠᡵᠰᡝ ᡩᡝ ᠠᡩᠠᠨᠠᠴᡳ᠈ ᡠᠯᡥᡳᠶᡝᠨ ᡠᠯᡥᡳᠶᡝᠨ  ᡳ ᠰᠠᡳᠨ ᡩᡝ ᡳᠪᡝᠨᡝᠮᠪᡳ᠈ ᡝᡥᡝ ᡠᡵᠰᡝ ᡩᡝ ᡩᠠᠶᠠᠨᠠᠴᡳ ᠪᡳᡥᡝ ᠪᡳᡥᡝᡳ ᡝᡥᡝ ᡩᡝ ᡠᡧᠠᠪᡠᠮᠪᡳ ᠰᡝᡵᡝᠩᡤᡝ᠈ ᡨᠣᡴᡨᠣᡥᠣ ᠯᡝᠣᠯᡝᠨ ᡴᠠᡳ᠈ ᠨᡳᠶᠠᠯᠮᠠᡳ ᠰᠠᡳᠨ ᡝᡥᡝ ᠪᡝ ᡠᡵᡠᠨᠠᡴᡡ ᡳᠨᡝᠩᡤᡳ ᡤᠣᡳᡩᠠᡥᠠ ᠮᠠᠩᡤᡳ ᡨᡝᠨᡳ ᡨᠠᡴᠠᠮᠪᡳ ᠰᡝᠮᡝᠣ᠈ ᡩᠠᡵᡨᠠᡳ ᠠᠨᡩᠠᠨᡩᡝ ᡳᠨᡠ ᡨᠠᡴᠠᠪᡠᠮᠪᡳᡴᠠᡳ᠉

ᡝᠮᡤᡝᡵᡳ ᡩᡠᠯᡝᡴᡝ ᠪᠠᡳᡨᠠ ᠪᡝ ᡤᡝᠯᡳ ᠵᠣᠨᠣᡶᡳ ᠠᡳᠨᠠᠮᠪᡳ᠈ ᠵᠣᠩᡴᠣ ᡩᠠᡵᡳ᠈ ᠪᡳ ᠶᡝᡵᡨᡝᡧᡝᠮᠪᡳᠮᡝ ᡴᠣᡵᠰᠣᠮᠪᡳ᠈ ᡥᠠᡥᠠ ᠨᡳᠶᠠᠯᠮᠠ ᠪᠠᡳᡨᠠ ᠪᡳᠴᡳ᠈ ᡨᡝᠩ ᡨᠠᠩ ᠰᡝᠮᡝ ᠶᠠᠪᡠᡵᡝ᠈ ᡥᠣᠣ ᡥᡳᠣ ᠰᡝᠮᡝ ᠠᡵᠪᡠᡧᠠᡵᠠ ᠣᠴᡳ᠈ ᡨᡝᠨᡳ ᡳᠨᡠ ᡩᠠᠪᠠᠯᠠ᠈ ᠨᡳᠶᠠᠯᠮᠠᡳ ᠠᡶᠠᠪᡠᡥᠠ ᠪᡝ ᠠᠯᡳᠮᡝ ᡤᠠᡳᠰᡠ ᠮᠠᠩᡤᡳ᠈ ᡤᡝᠯᡳ ᠨᡳᠶᠠᠯᠮᠠᡳ ᠪᠠᡳᡨᠠ ᠪᡝ ᡩᡠᡥᡝᠮᠪᡠᡵᠠᡴᡡ ᠪᡳᠮᡝ᠈ ᡝᠯᡝᠮᠠᠩᡤᠠ ᠵᡠᠸᡝ ᠰᡳᡩᡝᠨᡩᡝᡵᡳ ᠰᠠᡳᠨ ᠨᡳᠶᠠᠯᠮᠠ ᠠᡵᠠᠮᡝ᠈ ᡩᠠᠮᡠ ᠪᡝᠶᡝᡳ ᠸᠠᡴᠠ ᠪᡝ ᠨᡳᠶᠠᠯᠮᠠ ᡩᡝ ᡤᡠᡵᡳᠪᡠᡴᡳ ᠰᡝᠮᠪᡳ᠈ ᡨᡠᡨᡨᡠ ᠪᡳᠮᡝ ᡝᠩᡤᡳᠴᡳ ᠪᠠᡩᡝ ᠪᠠᠯᠠᡳ ᠪᠠᡵᡩᠠᠩᡤᡳᠯᠠᠮᡝ ᡤᡝᡵᡝᠨ  ᡳ ᠵᡠᠯᡝᡵᡳ ᠪᠠᡳᡨᠠ ᠪᡝ ᡤᡝᠯᡳ ᠯᠠᠰᡥᠠᠯᠠᠮᡝ ᠮᡠᡨᡝᡵᠠᡴᡡ᠈ ᡝᡵᡝᠪᡝ ᡤᡝᠯᡳ ᠪᡝᠩᠰᡝᠨ ᠪᡳᠰᡳᡵᡝ ᠨᡳᠶᠠᠯᠮᠠ ᠰᡝᠴᡳ ᠣᠮᠪᡳᠣ᠉

ᠴᠣᡥᠣᠮᡝ ᠠᡤᡝ  ᡳ ᡝᠯᡥᡝ ᠪᡝ ᡶᠣᠨᠵᡳᠮᡝ᠈ ᡩᡝᠣ ᠪᡳ ᡤᡳᠩᡤᡠᠯᡝᠮᡝ ᠵᠠᠰᡳᡥᠠ᠈ ᠠᡤᡝ  ᡳ ᠸᡝᠰᡳᡥᡠᠨ ᠪᡝᠶᡝ ᠰᠠᡳᠶᡡᠨ᠈ ᠪᠣᠣᡳ ᡤᡠᠪᠴᡳ ᡤᡝᠮᡠ ᠰᠠᡳᠶᡡᠨ᠈ ᠠᡤᡝ ᠴᡳ ᡶᠠᡴᠴᠠᡥᠠ ᠴᡳ ᡝᠪᠰᡳ᠈ ᡝᠯᡥᡝ ᠪᡝ ᡶᠣᠨᠵᡳᠮᡝ ᠵᠠᠰᡳᡴᡳ ᠰᡝᠴᡳ᠈ ᡳᠯᡩᡠᠨ  ᡳ ᠨᡳᠶᠠᠯᠮᠠ ᠪᡝ ᠪᠠᡥᠠᡵᠠᡴᡡ ᠣᡶᡳ᠈ ᡨᡠᡨᡨᡠ ᠪᠠᡥᠠᡶᡳ ᠵᠠᠰᡳᡥᠠᡴᡡ ᠪᡳᡥᡝ᠈ ᡩᡝᠣ ᠪᡳ ᠵᡳᠩ ᡴᡳᡩᡠᠮᡝ ᡤᡡᠨᡳᠮᡝ ᠪᡳᠰᡳᡵᡝᡩᡝ ᡥᠣᠯᡴᠣᠨᡩᡝ ᠠᡤᡝ  ᡳ ᠵᠠᠰᡳᡤᠠᠨ ᡳᠰᡳᠨᠵᡳᡥᠠ᠈ ᠪᡳ ᠶᠠᠯᠠ ᠠᠯᡳᠮᠪᠠᡥᠠᡵᠠᡴᡡ ᡠᡵᡤᡠᠨᠵᡝᠮᠪᡳᠮᡝ ᠶᡝᡵᡨᡝᡧᡝᠮᠪᡳ᠈ ᡨᡠᡨᡨᡠ ᠰᡝᠮᡝ ᠮᡠᠰᡝ ᠠᡥᡡᠨ ᡩᡝᠣ  ᡳ ᠪᡝᠶᡝ ᡠᡩᡠ ᠵᡠᠸᡝ ᠪᠠᡩᡝ ᡤᡳᠶᠠᠯᠠᠪᡠᡥᠠ ᠪᡳᠴᡳᠪᡝ᠈ ᡤᡡᠨᡳᠨ ᠮᡠᠵᡳᠯᡝᠨ ᠪᡝ ᡠᠮᠠᡳ ᡤᡳᠶᠠᠯᠠᠪᡠᡥᠠ ᠪᠠ ᠠᡴᡡ᠈ ᡠᡨᡨᡠ ᠪᡝ ᡩᠠᡥᠠᠮᡝ ᡝᡵᡝᠴᡳ ᠵᡠᠯᡝᠰᡳ ᠶᠠᠶᠠ ᡳᠯᡩᡠᠨ ᡩᡝ ᠠᡤᡝ  ᡳ ᠪᡝᠶᡝ ᡝᠯᡥᡝ ᠪᠠᠪᡝ ᡴᡝᠮᡠᠨᡳ ᠵᠠᠰᡳᡵᡝᠣ᠈ ᡩᡝᠣ ᠪᡳ ᠰᡝᠯᠠᠮᡝ ᡩᠣᠨᠵᡳᡴᡳ᠈ ᠵᠠᡳ ᠮᡝᠨᡳ ᠪᡝᠶᡝ ᠠᡤᡝ  ᡳ ᡴᡝᠰᡳ ᡩᡝ ᠶᠣᠣᠨᡳ ᠰᠠᡳᠨ᠈ ᡝᡵᡝᡳ ᠵᠠᠯᡳᠨ ᡤᡳᠩᡤᡠᠯᡝᠮᡝ ᠵᠠᠰᡳᡥᠠ᠉

ᡝᡵᡝ ᡠᠴᡠᡵᡳ ᠰᡠᠸᡝᠨᡳ ᠰᡝᡶᡠ ᡴᡝᠮᡠᠨᡳ ᠵᡳᠮᠪᡳᠣ ᠠᡴᡡᠨ᠉ ᠵᡳᠮᠪᡳ᠉ ᡝᠮᡠ ᡳᠨᡝᠩᡤᡳ ᡩᡝ ᡠᡵᡠᠨᠠᡴᡡ ᡝᠮᡠ ᠮᡠᡩᠠᠨ ᠵᡳᠮᠪᡳ᠈ ᡨᡠᡨᡨᡠ ᠣᠴᡳ᠈ ᡳᠨᡝᠩᡤᡳᡩᠠᡵᡳ ᠵᡳᡶᡳ ᡤᡝᠮᡠ ᠰᡠᠸᡝᠨᡩᡝ ᠠᡳ ᠵᡝᡵᡤᡳ ᡤᡳᠰᡠᠨ ᡨᠠᠴᡳᠪᡠᠮᠪᡳ᠈ ᠮᡝᠨᡳ ᡝᡵᡝ ᠰᡝᡶᡠ  ᡳ ᡨᠠᠴᡳᠪᡠᡥᠠᠩᡤᡝ ᡤᡝᠮᡠ ᠶᠠᠰᠠᡳ ᠵᡠᠯᡝᡵᡳ ᡤᡳᠰᡠᡵᡝᡵᡝ ᠠᠨ  ᡳ ᡤᡳᠰᡠᠨ᠈ ᠵᠠᡳ ᡶᠣᠨᠵᡳᡵᡝ ᠵᠠᠪᡠᡵᡝ ᠮᡠᠸᠠ ᡤᡳᠰᡠᠨ ᡠᠮᠠᡳ ᡝᠨᠴᡠ ᡥᠠᠴᡳᠨ  ᡳ ᠮᠠᠩᡤᠠ ᡤᡳᠰᡠᠨ ᠠᡴᡡ᠈ ᠠᡤᡝ ᠰᡠᠸᡝᠨᡳ ᡝᡵᡝ ᡨᠠᠴᡳᡥᠠᠩᡤᡝ ᡠᠮᡝᠰᡳ ᡩᠣᡵᠣ ᠸᠠᡴᠠ ᠣᡥᠣ᠈ ᠠᡳᠨᡠ ᡨᡝᡵᡝᠪᡝ ᡩᡠᡳᠨ ᠪᡳᡨᡥᡝ ᠪᡝ ᡤᡳᠶᠠᠩᠨᠠᠪᡠᡵᠠᡴᡡ᠈ ᡠᠪᠠᠯᡳᠶᠠᠮᠪᡠᡵᡝ ᠪᡝ ᡨᠠᠴᡳᡵᠠᡴᡡ᠈ ᠠᠨᡳᠶᠠ ᡥᡡᠰᡳᠮᡝ ᡝᡵᡝ ᠵᡝᡵᡤᡳ ᠮᡠᠸᠠ ᡤᡳᠰᡠᠨ ᠪᡝ ᡨᠠᠴᡳᡶᡳ ᠠᡳᠨᠠᠮᠪᡳ᠉ ᠠᡤᡝ  ᡳ ᡥᡝᠨᡩᡠᡥᡝᠩᡤᡝ ᡠᠮᡝᠰᡳ ᡳᠨᡠ᠈ ᡨᠠᠴᡳᠪᡠᡥᠠᠩᡤᡝ ᡠᠮᡝᠰᡳ ᡤᡳᠶᠠᠩᡤᠠ᠈ ᡠᡩᡠ ᡨᡠᡨᡨᡠ ᠰᡝᡥᡝ ᠰᡝᠮᡝ᠈ ᠠᡤᡝ ᡩᠠᠮᡠ ᠠᡤᡝ ᠰᡳᠨᡳ ᠪᡝᠶᡝᠪᡝ ᠰᠠᡵᠠ ᡩᠠᠪᠠᠯᠠ᠈ ᠮᡝᠨᡳ ᠪᡝᠶᡝᠪᡝ ᠰᠠᡵᡴᡡ ᡴᠠᡳ᠉ ᠪᡝ ᠠᡳᡴᠠᠪᠠᡩᡝ ᡤᡝᠮᡠ ᠠᡤᡝ  ᡳ ᠠᡩᠠᠯᡳ ᡝᡵᡝ ᡤᡝᠰᡝ ᠰᡠᡵᡝ ᠰᡝᡴᡨᡠ ᠪᡳᡥᡝ ᠪᡳᠴᡳ᠈ ᡩᡠᡳᠨ ᠪᡳᡨᡥᡝ ᡨᠠᠴᡳᡴᡳ ᠰᡝᡵᡝ ᠠᠩᡤᠠᠯᠠ ᡠᡨᡥᠠᡳ ᠰᡠᠨᠵᠠ ᠨᠣᠮᡠᠨ ᡤᡝᡵᡝᠨ ᡯᡳ  ᡳ ᠪᡳᡨᡥᡝ ᠰᡝᠮᡝ ᡳᠨᡠ ᡤᡝᠮᡠ ᡥᡡᠯᠠᠴᡳ ᠠᠴᠠᠮᠪᡳ᠈ ᠮᡝᠨᡳ ᠪᡝᠶᡝᠪᡝ ᠵᠠᡶᠠᡶᡳ ᠠᡤᡝ ᡩᡝ ᡩᡠᡳᠪᡠᠯᡝᠴᡳ ᡤᡝᠯᡳ ᠣᠮᠪᡳᠣ᠈ ᠮᡝᠨᡳ ᡨᠠᠴᡳᡥᠠᠩᡤᡝ ᡳᠨᡝᠩᡤᡳ ᠴᡳᠩᡤᡳᠶᠠ ᠪᡳᠮᡝ ᠪᠠᡥᠠᠨᠠᡥᠠᠩᡤᡝ ᡤᡝᠯᡳ ᡝᡩᡝᠨ᠈ ᡠᡨᡨᡠ ᠪᡳᠮᡝ ᠠᠩᡤᠠ ᠮᠣᡩᠣ ᡝᠮᡠ ᠰᡳᡵᠠᠨ  ᡳ ᠰᡠᠨᠵᠠ ᠨᡳᠩᡤᡠᠨ ᡤᡳᠰᡠᠨ ᠪᡳᠴᡳ᠈ ᡠᡨᡥᠠᡳ ᡤᡳᠰᡠᡵᡝᠮᡝ ᠮᡠᡨᡝᡵᠠᡴᡡ᠈ ᠠᡳᡴᠠᠪᠠᡩᡝ ᡤᡳᠰᡠᡵᡝᠮᡝ ᠣᡥᠣᡩᡝ ᡠᡵᡠᡳ ᡨᠠᠨᠵᠠᠮᠪᡳ ᡥᡝᠨᡩᡠᡵᡝ ᠪᠠᠯᠠᠮᠠ᠈ ᡥᠣᠨᠣ ᠮᡳᠴᡠᠮᡝ ᠪᠠᡥᠠᠨᠠᡥᠠᡴᡡ ᠪᠠᡩᡝ᠈ ᡠᡨᡥᠠᡳ ᡶᡝᠯᡳᠶᡝᡵᡝ ᠪᡝ ᡨᠠᠴᡳᠴᡳ ᠣᠮᠪᡳᠣ᠉

ᠴᠠᠨᠠᠩᡤᡳ ᡩᠣᠪᠣᡵᡳ ᠮᠠᠵᡳᡤᡝ ᡧᠠᡥᡡᡵᠠᡵᠠ ᠵᠠᡴᠠᡩᡝ᠈ ᡝᡵᡝ ᠵᡠᠸᡝ ᡳᠨᡝᠩᡤᡳ ᠪᡝᠶᡝ ᡠᠮᡝᠰᡳ ᠴᡳᡥᠠᡴᡡ᠈ ᠵᡝᡴᡝ ᠵᠠᡴᠠ ᠰᡳᠩᡤᡝᡵᠠᡴᡡ ᠪᡳᠮᡝ᠈ ᡨᡝᠴᡳᠪᡝ ᡳᠯᡳᠴᡳᠪᡝ ᡝᠯᡥᡝ ᠠᡴᡡ᠈ ᠪᡝᠶᡝᡳ ᡤᡠᠪᠴᡳ ᡥᡡᠰᡠᠨ ᠠᡴᡡ᠈ ᡩᠠᠮᡠ ᡤᡡᠸᠠᡳᡩᠠᠮᡝ ᡩᡝᡩᡠᡴᡳ ᠰᡝᠮᠪᡳ᠈ ᠰᡳᡴᠰᡝ ᠶᠠᠮᠵᡳ ᡝᠰᡥᡠᠨ ᡤᡳᠶᠠᠩ ᠨᡳ ᠮᡠᡴᡝ ᠪᡝ ᡶᡝᡳᡶᡠᡶᡳ ᠨᡝᡳ ᡤᠠᡳᠮᡝ ᠮᠠᠵᡳᡤᡝ ᠣᠮᡳᡵᡝ ᠵᠠᡴᠠᡩᡝ ᡝᠨᡝᠩᡤᡳ ᠪᡝᠶᡝ ᡨᡝᡳᡴᡝ ᠰᡠᠯᠠᡴᠠᠨ ᠣᡥᠣ᠈ ᡝᠴᡳ ᠠᡳ᠈ ᡝᡵᡝ ᡠᠴᡠᡵᡳ ᠶᠣᠣᠨᡳ ᡠᡨᡨᡠ ᠵᡳᠶᡝ᠈ ᡠᡨᡥᠠᡳ ᠮᡳᠨᡳ ᠪᡝᠶᡝ ᡝᡵᡝ ᡠᡩᡠ ᡳᠨᡝᠩᡤᡳ ᡩᠣᠯᠣ ᡳᠨᡠ ᠠᠰᡠᡵᡠ ᠯᠠ ᠯᡳ ᠠᡴᡡ᠈ ᡩᠣᠯᠣ ᠴᡝᡥᡠᠨ ᠪᡳᠮᡝ ᡴᡠᡧᡠᠨ ᠵᡝᠴᡳ ᠣᠮᡳᠴᡳ ᠠᠮᡨᠠᠨ ᠪᠠᡥᠠᡵᠠᡴᡡ᠈ ᠪᡝᠶᡝ ᠪᡳᠣ ᠰᡝᠮᡝ ᠪᡝᡨᡥᡝᡳ ᡶᡝᠵᡳᠯᡝ ᡴᡠᠪᡠᠨ  ᡳ ᡶᠠᡵᠰᡳ ᠪᡝ ᡶᡝᡥᡠᡥᡝ ᠠᡩᠠᠯᡳ᠈ ᡝᠯᡝᡴᡝᡳ ᠮᠠᡴᡨᠠᠪᡠᡥᠠᡴᡡ ᠪᡳᡥᡝ᠈ ᠠᡵᡤᠠ ᠠᡴᡡ ᡴᠠᡨᡠᠨᠵᠠᡥᠠᡳ ᠠᡵᡴᠠᠨ ᠰᡝᠮᡝ ᡩᡠᠯᡝᠮᠪᡠᡥᡝ᠈ ᡤᡡᠨᡳᠴᡳ ᡤᡝᠮᡠ ᡝᡵᡝ ᠠᠨᡳᠶᠠᡳ ᡝᡵᡳᠨ ᡶᠣᡵᡤᠣᠨ  ᡳ ᡤᡝᡵᡳ ᠰᡠᡴᡩᡠᠨ  ᡳ ᡥᠠᡵᠠᠨ ᡩᡝᡵᡝ᠈ ᠪᡳ ᡨᡝ ᡠᠮᡝᠰᡳ ᠪᠠᠨᠵᡳᡵᡝ ᡩᡝ ᠮᠠᠩᡤᠠ ᠣᡥᠣᠪᡳ᠈ ᠪᠣᠣᡳ ᠠᠩᡤᠠᠯᠠ ᡤᡝᡵᡝᠨ ᠪᡳᠮᡝ ᡤᡝᠯᡳ ᠨᡳᠶᠠᠯᠮᠠ ᡩᡝ ᡝᡩᡝᠯᡝᡥᡝ ᠪᡝᡴᡩᡠᠨ ᠪᡳ᠈ ᡨᡠᠴᡳᠪᡠᡵᡝ ᠪᠠ ᠯᠠᠪᡩᡠ ᡩᠣᠰᡳᠮᠪᡠᡵᡝ ᠪᠠ ᡴᠣᠮᠰᠣ᠈ ᡤᡝᠯᡳ ᡥᡡᡩᠠ ᠮᠠᡳᠮᠠᠨ ᠠᡴᡡ᠈ ᠨᡳᠶᠠᠯᠮᠠ ᡩᡝ ᠠᠯᠠᡥᠠ ᠰᡝᠮᡝ ᡳᠨᡠ ᡤᡝᠮᡠ ᠠᡴᡩᠠᡵᠠᡴᡡ᠈ ᠴᡝ ᡝᠯᡝᠮᠠᠩᡤᠠ ᠮᡳᠮᠪᡝ ᠵᠣᡵᡨᠠᡳ ᡨᡠᡨᡨᡠ ᠠᡵᠠᡥᠠᠩᡤᡝ ᠰᡝᠮᠪᡳ᠉

ᠠᡤᡝ ᠰᡳ ᠰᡳᠮᠪᡝ ᠪᠠᠨᠵᡳᡵᡝᡩᡝ ᠮᠠᠩᡤᠠ ᠰᡝᠴᡳ᠈ ᠮᡳᠨᡳ ᡝᡵᡝ ᠪᡝᠶᡝᡵᡝ ᠣᠮᡳᡥᠣᠯᠣᡵᠣ ᡤᠣᠰᡳᡥᠣᠨ  ᡳ ᠪᠠᠪᡝ ᠸᡝᡩᡝ ᠠᠯᠠᠨᠠᡵᠠ᠈ ᡨᡝᡳ ᡶᠣᡵᡤᠣᠨ ᠵᡠᠸᠠᠨ ᠪᠣᠣᡳ ᡩᠣᡵᡤᡳ ᡠᠶᡠᠨ ᠪᠣᠣᡩᡝ ᡤᡝᠮᡠ ᡥᡝᠰᡳᡥᡝᡨᡝᠮᡝ ᡳᠨᡝᠩᡤᡳ ᠪᡝ ᡥᡝᡨᡠᠮᠪᡠᡵᡝ ᡩᠠᠪᠠᠯᠠ᠈ ᠶᠠ ᡝᠮᡠ ᠪᠣᠣᡩᡝ ᡨᡠᡨᡨᡠ ᡝᠯᡤᡳᠶᡝᠨ ᡨᡠᠮᡳᠨ ᠪᠠᠨᠵᡳᠮᠪᡳ ᠨᡳ᠈ ᠨᡳᠶᠠᠯᠮᠠ ᡥᡝᠨᡩᡠᡵᡝ ᠪᠠᠯᠠᠮᠠ ᠪᠣᠣ ᡨᠣᠮᡝ ᡤᡠᠸᠠᠨ ᡧᡳ ᡳᠨ ᠰᡝᠴᡳ᠈ ᠪᠠᠪᠠᡩᡝ ᠣ ᠮᡳ ᡨᠣ ᡶᠣ ᠰᡝᠮᠪᡳᡴᠠᡳ᠉

ᠠᡤᡝ ᠰᡳ ᡴᡝᠮᡠᠨᡳ ᡶᠠᡴᠰᡳᡩᠠᡶᡳ ᠠᡳᠨᠠᠮᠪᡳ᠈ ᡠᡵᡠᠨᠠᡴᡡ ᠠᠩᡤᠠ ᠠᠴᠠᠪᡠᡴᡳ ᠰᡝᠮᠪᡳᠣ᠈ ᡝᡳᠴᡳᠪᡝ ᠰᡳᠨᡩᡝ ᠮᠠᠵᡳᡤᡝ ᠮᡠᡵᡠ ᠪᡳᡶᡳ᠈ ᠨᡳᠶᠠᠯᠮᠠ ᡨᡝᠨᡳ ᡨᡠᡨᡨᡠ ᡤᡳᠰᡠᡵᡝᡵᡝ ᡩᠠᠪᠠᠯᠠ᠈ ᡨᡝᠰᡝ ᠠᡳᠨᡠ ᠮᡳᠨᡳ ᠪᡝᠶᡝᠪᡝ ᠯᠠᡳᡩᠠᡵᠠᡴᡡ ᠨᡳ᠈ ᠶᠠᠶᠠ ᠪᠠᡳᡨᠠ ᠶᠠᠪᡠᡵᡝᠩᡤᡝ ᡩᠠᠮᡠ ᠨᡳᠶᠠᠯᠮᠠ ᠪᡝ ᡩᠠᠯᡩᠠᠴᡳ ᠣᠵᠣᡵᠣ ᡩᠠᠪᠠᠯᠠ᠈ ᡩᡝᡵᡤᡳ ᠠᠪᡴᠠ ᠪᡝ ᡤᡳᡩᠠᠴᡳ ᠣᠵᠣᡵᠠᡴᡡ ᡴᠠᡳ᠈ ᡩᡝᡴᡩᡝᠨᡳ ᡥᡝᠨᡩᡠᡥᡝᠩᡤᡝ ᠵᡠᡤᡡᠨ ᡩᡝ ᡤᡳᠰᡠᡵᡝᠴᡳ ᠣᡵᡥᠣ  ᡳ ᡩᠣᠯᠣ ᡩᠣᠨᠵᡳᡵᡝ ᠨᡳᠶᠠᠯᠮᠠ ᠪᡳ ᠰᡝᡥᡝᠪᡳ᠈ ᡝᡩᡠᠨ ᡩᠠᡵᠠᡴᡡ ᠣᠴᡳ᠈ ᠮᠣᠣᡳ ᠠᠪᡩᠠᡥᠠ ᡤᡝᠯᡳ ᠠᡧᡧᠠᠮᠪᡳᠣ᠉

ᠠᡤᡝ ᡤᡝᠯᡳ ᠸᡝᠪᡝ ᠠᠨᠠᡥᡡᠨᠵᠠᡵᠠ᠈ ᡠᡨᡥᠠᡳ ᡨᠠᡶᠠᡶᡳ ᡩᡠᠯᡳᠮᠪᠠᡩᡝ ᡨᡝᡴᡳ᠈ ᠴᡝᠮᠪᡝ ᡳᠨᡠ ᠮᡝᠨᡩᡝ ᠮᠠᠵᡳᡤᡝ ᠪᠠ ᠠᠨᠠᠪᡠ᠈ ᠪᡝ ᡳᠨᡠ ᠮᠠᠵᡳᡤᡝ ᡨᡝᠮᠪᡳ ᡩᡝᡵᡝ᠈ ᡝᡵᡝ ᠠᡤᡝ  ᡳ ᡤᡳᠰᡠᠨ ᡳᠨᡠ᠈ ᠠᡤᡝ ᠰᡳ ᡠᡨᡥᠠᡳ ᠴᡳᠨ  ᡳ ᡨᡝ᠈ ᡝᡵᡝ ᠠᡤᡝ ᠪᡝ ᠠᡩᠠᠮᡝ ᡨᡝᡴᡳᠨᡳ᠈ ᠠᡤᡝ ᠰᡳ ᡳᠨᡠ ᡠᠮᡝ ᠮᠠᡵᠠᡵᠠ᠈ ᡠᡨᡥᠠᡳ ᡝᡵᡝ ᠠᡤᡝ  ᡳ ᠰᡳᡵᠠᠮᡝ ᡨᡝ᠈ ᠪᡳ ᡠᡨᡥᠠᡳ ᡠᡨᡨᡠ ᠪᠠᡴᠴᡳᠯᠠᠮᡝ ᡨᡝᡴᡳ᠈ ᠶᠠᠶᠠ ᡩᡝᠮᡠᠨ  ᡳ ᡨᡝᠴᡝᠨᡩᡠᡶᡳ ᠵᡝᡴᡳ ᠪᠠᡳ᠈ ᡝᡵᡝ ᡩᠣᡵᠣ ᠪᡝ ᠠᡳᠨᠠᠮᠪᡳ᠈ ᠶᡝᠩᠰᡳ ᠰᠠᡵᡳᠨ ᡤᡝᠯᡳ ᠸᠠᡴᠠ᠈ ᠠᡳᠪᡝ ᡩᡝᠯᡝ ᠸᠠᠯᠠ ᠰᡝᠮᠪᡳ᠉

ᠠᡤᡝ ᠰᡳ ᡥᡝᡨᡠ ᠨᡳᠶᠠᠯᠮᠠᡳ ᡤᡳᠰᡠᠨ ᠪᡝ ᡠᠮᡝ ᡩᠣᠨᠵᡳᡵᡝ᠈ ᡳ ᠮᡳᠮᠪᡝ ᡤᡳᠰᡠᡵᡝᡥᡝ ᠰᡝᠴᡳ᠈ ᡠᡨᡥᠠᡳ ᡤᡳᠰᡠᡵᡝᡥᡝ ᠣᡴᡳᠨᡳ᠈ ᡝᡳᠴᡳ ᠸᡝᡳ ᠵᡠᠯᡝᡵᡳ ᡤᡳᠰᡠᡵᡝᡥᡝ ᠪᡳᡥᡝ᠈ ᡳᠨᡠ ᡝᠮᡠ ᠰᡳᡩᡝᠨ ᠪᠠᡴᠴᡳᠨ ᠪᡳᡩᡝᡵᡝ᠈ ᡨᡝᡵᡝ ᠠᡳᡴᠠ ᠮᡳᠮᠪᡝ ᠨᡳᠶᠠᠯᠮᠠ ᠪᡝ ᠸᠠᡥᠠ ᠰᡝᠴᡳ᠈ ᡠᡨᡥᠠᡳ ᠮᡳᠮᠪᡝ ᠨᡳᠶᠠᠯᠮᠠ ᠪᡝ ᠸᠠᡥᠠ ᠰᡝᠮᠪᡳᠣ᠈ ᠠᡤᡝ ᡥᠣᠨ ᡠᠮᡝ ᠨᡳᠶᠠᠯᠮᠠ ᠪᡝ ᠰᡠᡳ ᠠᡴᡡ ᠠᡩᡠᠩᡤᡳᠶᠠᡵᠠ᠈ ᡠᠵᡠᡳ ᠨᡳᠩᡤᡠᡩᡝ ᡤᡝᠩᡤᡳᠶᡝᠨ ᠠᠪᡴᠠ ᠪᡳᡴᠠᡳ᠈ ᠰᠠᡴᡩᠠᠰᠠᡳ ᡤᡳᠰᡠᠨ ᡥᡝᠨᡩᡠᡵᡝ ᠪᠠᠯᠠᠮᠠ᠈ ᠶᠠᠰᠠᡳ ᠰᠠᠪᡠᡥᠠᠩᡤᡝ ᠪᡝ ᠶᠠᡵᡤᡳᠶᠠᠨ ᠰᡝᠮᠪᡳ᠈ ᡧᠠᠨ  ᡳ ᡩᠣᠨᠵᡳᡥᠠᠩᡤᡝ ᠪᡝ ᡨᠠᡧᠠᠨ ᠰᡝᠮᠪᡳᡴᠠᡳ᠉

ᡝᡵᡳᠨ ᡶᠣᡵᡤᠣᠨ ᠠᠪᠰᡳ ᡥᡡᡩᡠᠨ᠈ ᡥᡝᡵᠴᡠᠨ ᠠᡴᡡ ᡩᡝ ᡤᡝᠯᡳ ᡝᠮᡠ ᠠᠨᡳᠶᠠ ᠣᡶᡳ᠈ ᠠᠨᡳᠶᠠ ᠪᡳᠶᠠᡩᡝ ᡳᠰᡳᠨᠵᡳᡥᠠ᠈ ᠠᠪᡴᠠᡳ ᡴᡝᠰᡳ ᡩᡝ ᡤᡝᠯᡳ ᡝᠮᡠ ᠰᡝ ᠨᠣᠩᡤᡳᡥᠠ᠈ ᠶᠠᠯᠠ ᡧᡠᠨ ᠪᡳᠶᠠ ᡥᠣᠮᠰᠣ ᠮᠠᡴᡨᠠᡵᠠ ᠠᡩᠠᠯᡳ ᠨᡳᠶᠠᠯᠮᠠ ᠪᡝ ᠰᠠᡴᡩᠠᠪᡠᠮᡝ ᡧᠣᡵᡤᡳᠮᠪᡳ ᠰᡝᠴᡳᠨᠠ᠈ ᠪᡳ ᠠᠰᡳᡤᠠᠨ  ᡳ ᡶᠣᠨᡩᡝ᠈ ᡳᠨᡠ ᠠᠨᡳᠶᠠ ᡥᠠᠴᡳᠨ  ᡳ ᡠᠴᡠᡵᡳ ᠪᡝ ᠪᡠᠶᡝᠮᡝ ᠣᠮᠪᡳᡥᡝ᠈ ᡨᡝ ᠰᡝ ᡩᡝ ᠣᡶᡳ᠈ ᡝᡵᡝ ᡤᡝᠰᡝ ᡝᡵᡝᡥᡠᠨᠵᡝᡵᡝ ᠮᡠᠵᡳᠯᡝᠨ ᠶᠣᠣᠨᡳ ᠠᡴᡡ ᠰᡝᡵᡝ ᠠᠩᡤᠠᠯᠠ᠈ ᡩᠠᠮᡠ ᡥᠠᠴᡳᠨ ᡳᠨᡝᠩᡤᡳ ᠰᡝᡵᡝ ᡤᡳᠰᡠᠨ ᠪᡝ ᡩᠣᠨᠵᡳᡥᠠ ᡩᡝ᠈ ᡠᠵᡠ ᡤᡝᠮᡠ ᡶᡳᠨᡨᠠᠮᠪᡳᡴᠠᡳ᠉

ᠮᡳᠨᡩᡝ ᡝᠮᡠ ᠪᠠᡳᡨᠠ ᠪᡳᡶᡳ᠈ ᠴᠣᡥᠣᠮᡝ ᠠᡤᡝ ᡩᡝ ᠶᠠᠨᡩᡠᠮᡝ ᠪᠠᡳᠮᡝ ᠵᡳᡥᡝ᠈ ᠮᡠᠰᡝᡳ ᡶᡝ ᡤᡠᠴᡠᠯᡝᡥᡝ ᠪᡝ ᡤᡡᠨᡳᠴᡳ᠈ ᠮᡳᠨᡳ ᡝᡵᡝ ᠪᠠᡳᡨᠠ ᠪᡝ᠈ ᡠᡵᡠᠨᠠᡴᡡ ᡨᡝᡵᡝ ᠯᠣᠣᠶᡝ ᡩᡝ ᡠᠯᠠᠮᡝ ᡤᡳᠰᡠᡵᡝᡵᡝᠣ᠈ ᠵᡝ ᡤᡝᠨᡝᡶᡳ ᠮᡠᡨᡝᡵᡝᡳ ᡨᡝᡳᠯᡝ ᡤᡳᠰᡠᡵᡝᠮᡝ ᡨᡠᠸᠠᡴᡳ᠈ ᡳ ᡩᠠᡥᠠᠴᡳ ᠰᡳ ᡳᠨᡠ ᡠᠮᡝ ᡠᡵᡤᡠᠨᠵᡝᡵᡝ᠈ ᡳ ᡩᠠᡥᠠᡵᠠᡴᡡ ᠣᠴᡳ ᠠᡤᡝ ᡳᠨᡠ ᡠᠮᡝ ᡤᠠᠰᠠᡵᠠ᠈ ᠪᡳ ᡨᡝᡵᡝᡳ ᠪᠠᡵᡠ ᠪᠠᡳ ᠠᠨ  ᡳ ᡤᡠᠴᡠᠯᡝᠮᠪᡳ᠈ ᠠᠰᡠᡵᡠ ᡤᡡᠯᡳᡴᠠ ᠪᠠ ᠠᡴᡡ᠈ ᡝᡵᡝ ᠪᠠᡳᡨᠠ ᠪᡝ ᠮᡠᡨᡝᠪᡠᡵᡝ ᠮᡠᡨᡝᠪᡠᡵᠠᡴᡡ ᠪᡝ᠈ ᠪᡳ ᡳᠨᡠ ᠠᡴᡩᡠᠯᠠᠮᡝ ᠮᡠᡨᡝᡵᠠᡴᡡ ᡴᠠᡳ᠉

ᠮᡝᠨᡨᡠᡥᡠᠨ ᠠᡥᡡᠨ  ᡳ ᡤᡳᠩᡤᡠᠯᡝᠮᡝ ᡠᠩᡤᡳᡥᡝ ᠪᡳᡨᡥᡝ᠈ ᡝᡵᡝ ᡠᠴᡠᡵᡳ ᠰᡳᠮᠪᡝ ᡠᠮᠠᡳ ᠪᠠᡥᠠᡶᡳ ᠰᠠᠪᡠᡥᠠᡴᡡ᠈ ᡝᡵᡳᠨ ᡥᡡᡩᡠᠨ ᡤᡝᡵᡳ ᡶᠠᡵᡳ ᠣᡶᡳ᠈ ᡠᡨᡥᠠᡳ ᡠᡩᡠᡩᡠ ᠠᠨᡳᠶᠠ ᠣᡥᠣ ᠠᡩᠠᠯᡳ᠈ ᠪᡝᠶᡝ ᠰᡳᠨᡳ ᠸᡝᠰᡳᡥᡠᠨ ᠪᠣᠣᡩᡝ ᡨᡠᠸᠠᠨᠠᡴᡳ ᠰᡝᠴᡳ᠈ ᡤᡝᠯᡳ ᠪᠠᡥᠠᡶᡳ ᠠᠴᠠᡵᠠᡴᡡ ᠠᠶᠣᠣ ᠰᡝᠮᡝ ᡤᡡᠨᡳᠮᠪᡳ᠈ ᠮᡝᡵᡤᡝᠨ ᡩᡝᠣ ᠰᠠᡳᠨ ᠨᡳᠶᠠᠯᠮᠠ ᠪᡝ ᡩᠠᡥᠠᠮᡝ᠈ ᡠᡵᡠᠨᠠᡴᡡ ᠰᠠᡳᠨ ᠣᠵᠣᡵᠣ ᠪᡝ ᠠᡳ ᡤᡳᠰᡠᡵᡝᠪᡠᡵᡝ ᠪᠠᠪᡳ᠈ ᠴᠠᠨᠠᠩᡤᡳ ᠰᡳ ᡤᠣᠰᡳᠮᡝ᠈ ᠰᡳᠨᡳ ᠪᠠᡵᡠ ᡤᠠᡳᡵᡝ ᠵᠠᡴᠠ ᠪᡝ ᠮᡳᠨᡩᡝ ᠪᡠᡵᡝ ᠰᡝᡥᡝ ᡴᠠᡳ᠈ ᡝᡵᡨᡝᠯᡝ ᠠᡳᠨᡠ ᠪᡝᠨᠵᡳᠪᡠᡥᡝᡴᡡ᠈ ᠠᡳᠨᠴᡳ ᠸᡝᠰᡳᡥᡠᠨ ᠪᠣᠣᡳ ᠨᡳᠶᠠᠯᠮᠠ ᠵᠠᠪᡩᡠᡵᠠᡴᡡ ᠠᡳᠰᡝ᠈ ᠰᡳᠮᠪᡝ ᡤᡝᠯᡳ ᠵᠣᠪᠣᠪᡠᠮᡝ ᠪᡝᠨᠵᡳᠪᡠᡵᡝ ᠠᠩᡤᠠᠯᠠ᠈ ᠪᡳ ᠴᠣᡥᠣᠮᡝ ᠮᡝᠨᡳ ᠠᠵᡳᡤᡝ ᡥᠠᡥᠠ ᠵᡠᡳ ᠪᡝ ᡤᠠᠨᠠᠪᡠᡥᠠ᠈ ᠮᡝᡵᡤᡝᠨ ᡩᡝᠣ ᡥᠠᡥᡳᠯᠠᠮᡝ ᠪᡠᡶᡳ ᡠᠩᡤᡳᡵᡝ ᠪᡝ᠈ ᠨᡝ ᠪᡳ ᡩᡠᡴᠠᡳ ᠪᡝᡵᡝᠨ ᡩᡝ ᠨᡳᡴᡝᡶᡳ ᡝᡵᡝᠮᡝ ᡨᡠᠸᠠᠮᡝ ᠠᠯᡳᠶᠠᡥᠠᠪᡳ᠈ ᠪᡠᡵᡝ ᠪᡠᡵᠠᡴᡡ ᠪᡝ ᡠᡵᡠᠨᠠᡴᡡ ᡝᠮᡠ ᠪᡳᡨᡥᡝ ᠠᡵᠠᡶᡳ ᠠᠮᠠᠰᡳ ᡠᠩᡤᡳᡵᡝᠣ᠉

ᠠᡤᡝ ᠰᡳ ᠶᠠ ᡤᡡᠰᠠᠩᡤᡝ᠈ ᠪᡳ ᡤᡠᠯᡠ ᠰᡠᠸᠠᠶᠠᠨ ᠨᡳᠩᡤᡝ᠈ ᡥᠣᠨᡨᠣᡥᠣᠩᡤᠣ ᠨᡳᡵᡠᠩᡤᡝᠣ᠈ ᠨᡳᡵᡠᠩᡤᡝ᠈ ᠸᡝᡳ ᠨᡳᡵᡠ ᡨᡝᠮᠪᡳ᠈ ᠴᠠᠩᡧᡝᠣ ᠨᡳᡵᡠ ᡨᡝᠮᠪᡳ᠈ ᡥᠠᠯᠠ ᠠᡳ᠈ ᡥᠠᠯᠠ ᠵᡝᠣ᠈ ᡤᡝᠪᡠ ᠠᡳ᠈ ᡤᡝᠪᡠ ᡶᡝᠩᡧᡝᠩᡤᡝ᠈ ᠸᡝᡳ ᠵᡠᡳ᠈ ᡠᠵᡠ ᠵᡝᡵᡤᡳ ᡥᡳᠶᠠ ᡥᡳᠩᡤᡠᠵᡳ  ᡳ ᠵᡠᡳ᠈ ᡠᡩᡠ ᠰᡝ ᠣᡥᠣ᠈ ᠵᡠᠸᠠᠨ ᡠᠶᡠᠨ ᠰᡝ ᠣᡥᠣ᠈ ᠠᡳ ᠠᠨᡳᠶᠠ᠈ ᠮᡠᡩᡠᡵᡳ ᠠᠨᡳᠶᠠ᠈ ᠮᡠᡴᡡᠨ ᠪᡳᠣ ᠠᡴᡡᠨ᠈ ᠮᡠᡴᡡᠨ ᠪᡳ᠈ ᠸᡝᡳ ᠮᡠᡴᡡᠨ᠈ ᠵᠠᠯᠠᠨ  ᡳ ᠵᠠᠩᡤᡳᠨ ᠪᠠᠶᠠᠨᡨᡠ  ᡳ ᠮᡠᡴᡡᠨ᠈ ᠠᡥᡡᠨ ᡩᡝᠣᡨᡝ ᡤᡝᠮᡠ ᠪᡳᠣ᠈ ᡤᡝᠮᡠ ᠪᡳ᠈ ᠰᡳᠨᡳ ᠠᡥᡡᠨ ᠠᡳ ᠪᠠᡳᡨᠠ ᡩᡝ ᠪᡳ᠈ ᠮᡳᠨᡳ ᠠᡤᡝ ᠨᡝ ᠯᠠᠮᡠᠨ ᡶᡠᠩᡤᠠᠯᠠ᠈ ᠰᡳᠨᡳ ᡩᡝᠣ  ᡳ ᠰᡝ ᠠᡩᠠᡵᠠᠮᡝ᠈ ᡨᡝᠨᡳ ᠨᡳᠩᡤᡠᠨ ᠰᡝ ᠣᡥᠣᠪᡳ᠈ ᡴᡝᠮᡠᠨᡳ ᠠᠵᡳᡤᡝᠨ᠈ ᠪᠠᠨᠵᡳᡥᠠ ᡳᠨᡝᠩᡤᡳ ᠠᡨᠠᠩᡤᡳ᠈ ᠠᠨᡳᠶᠠ ᠪᡳᠶᠠᡳ ᠣᡵᡳᠨ ᠰᡠᠨᠵᠠ ᡩᡝ ᡳᠨᡠ᠈ ᠰᡳᠨᡳ ᠪᠣᠣ ᠠᡳᠪᡳᡩᡝ ᡨᡝᡥᡝᠪᡳ᠈ ᡤᡠ ᠯᡝᠣ  ᡳ ᠵᡠᠯᡝᡵᡳ ᡧᡠᠨ ᡩᡝᡴᡩᡝᡵᡝ ᡝᡵᡤᡳ ᡩᡝ ᡨᡝᡥᡝᠪᡳ᠈ ᠴᠣᠣᡥᠠᡳ ᠵᡠᡵᡤᠠᠨ  ᡳ ᠠᡳᠰᡳᠯᠠᡴᡡ ᡥᠠᡶᠠᠨ ᡥᡡᡵᡳ ᠠᠮᠠ ᠰᡳᠨᡩᡝ ᠠᡳ ᠣᠮᠪᡳ᠈ ᠮᡳᠨᡩᡝ ᠠᡥᡡᠨ ᠣᠮᠪᡳ᠈ ᡳᠨᡳ ᠠᠮᠠ ᠰᡳᠨᡩᡝ ᠠᡳ ᠣᠮᠪᡳ᠈ ᠮᡳᠨᡩᡝ ᡝᠰᡥᡝᠨ ᠣᠮᠪᡳ᠈ ᠪᠠᠨᠵᡳᡥᠠ ᡝᠰᡥᡝᠩ᠈ ᡳᠨᡠ ᠪᠠᠨᠵᡳᡥᠠ ᡝᠰᡥᡝᠨ᠈ ᠰᡳ ᡤᠠᠪᡨᠠᠮᡝ ᠨᡳᠶᠠᠮᠨᡳᠶᠠᠮᡝ ᡤᡝᠮᡠ ᠪᠠᡥᠠᠨᠠᠮᠪᡳᠣ᠈ ᡤᠠᠪᡨᠠᠮᡝ ᠪᠠᡥᠠᠨᠠᠮᠪᡳ᠈ ᠨᡳᠶᠠᠮᠨᡳᠶᠠᠮᡝ ᠪᠠᡥᠠᠨᠠᡵᠠᡴᡡ᠈ ᠰᡳ ᠠᡳᠨᡠ ᠨᡳᠶᠠᠮᠨᡳᠶᠠᡵᠠ ᠪᡝ ᡨᠠᠴᡳᡵᠠᡴᡡ᠈ ᠮᠣᡵᡳᠨ ᠠᡴᡡ ᠣᡶᡳ ᡨᠠᠴᡳᡥᠠᡴᡡ᠈ ᠰᡳ ᠪᡝᡵᡳ ᡨᠠᡨᠠᠮᡝ ᡨᡠᠸᠠ᠈ ᠵᡝ᠈ ᠠᡵᠠ᠈ ᡝᡵᡝ ᠪᡝᡵᡳ  ᡳ ᡨᡝᠪᡴᡝ ᠪᡝ ᠪᡳ ᡳᠨᡠ ᠨᡝᡳᠮᡝ ᠮᡠᡨᡝᡵᠠᡴᡡ᠈ ᠠᠪᠰᡳ ᠮᠠᠩᡤᠠ ᠨᠠ᠈ ᡨᡠᡨᡨᡠ ᠣᠴᡳ᠈ ᠰᡳ ᠪᡝᡵᡳ ᠪᡝ ᠰᡳᠨᡩᠠ᠈ ᡩᠠᠩᠰᡝ ᠪᡝ ᡥᡡᠯᠠᠮᡝ ᡨᡠᠸᠠᡴᡳ᠈ ᠵᡝ ᠰᡳ ᡠᡩᡠ ᠠᠨᡳᠶᠠ ᠪᡳᡨᡥᡝ ᡥᡡᠯᠠᡥᠠ᠈ ᡳᠯᠠᠨ ᠠᠨᡳᠶᠠ ᡥᡡᠯᠠᡥᠠ᠈ ᠪᡳᡨᡥᡝ ᡤᡳᠶᠠᠩᠨᠠᡥᠠᠣ ᠠᡴᡡᠨ᠈ ᡤᡳᠶᠠᠩᠨᠠᡥᠠ᠈ ᠶᠠᠶᠠ ᠪᡳᡨᡥᡝ ᠪᡝ ᠰᡳ ᡤᡝᠮᡠ ᡤᡳᠶᠠᠩᠨᠠᠮᡝ ᠮᡠᡨᡝᠮᠪᡳᠣ᠉ ᠮᡠᡨᡝᡵᡝ ᠪᠠ ᡳᠨᡠ ᠪᡳ᠈ ᠮᡠᡨᡝᡵᠠᡴᡡ ᠪᠠ ᡳᠨᡠ ᠪᡳ᠈ ᠠᡳᡴᠠᠪᠠᡩᡝ ᠨᠠᡵᡥᡡᠨ ᠰᠣᠮᡳᠰᡥᡡᠨ ᠪᠠ ᠣᠴᡳ᠈ ᠪᡳ ᡠᡨᡥᠠᡳ ᠮᡠᡨᡝᡵᠠᡴᡡ᠈ ᠰᡳ ᠶᠠ ᠰᡝᡶᡠ  ᡳ ᡨᠠᠴᡳᡴᡡ ᡩᡝ ᠪᡳᡨᡥᡝ ᡥᡡᠯᠠᠮᠪᡳ᠈ ᠵᠣᠣ ᠰᡝᡶᡠ  ᡳ ᡨᠠᠴᡳᡴᡡ ᡩᡝ ᡥᡡᠯᠠᠮᠪᡳ᠈ ᡝᡵᡝ ᠵᠣᠣ ᠰᡝᡶᡠ ᠠᡳᠪᡳᡩᡝ ᡨᡝᡥᡝᠪᡳ᠈ ᠮᡳᠨᡳ ᡨᡝᡥᡝ ᠪᠣᠣ ᡩᡠᡴᠠᡳ ᠪᠠᡴᠴᡳᠨ ᡩᡝ ᠪᡳᠰᡳᡵᡝ ᡨᡝᡵᡝ ᠠᠮᠪᠠ ᠪᠣᠣ᠈ ᡠᡨᡥᠠᡳ ᡳᠨᡳ ᠪᠣᠣ ᡴᠠᡳ᠈ ᠵᠣᠣ ᠰᡝᡶᡠ  ᡳ ᠴᠣᠯᠣ ᠪᡝ ᠠᡳ ᠠᠮᠠ ᠰᡝᠮᠪᡳ᠈ ᠵᠣᠣᠯᡳ ᠠᠮᠠ ᠰᡝᠮᠪᡳ᠈ ᠨᡝ ᠠᡳᡩᡝ ᠪᡳ᠈ ᡩᠠᠴᡳ ᠪᡳᡨᡥᡝᡳ ᠶᠠᠮᡠᠨ  ᡳ ᠠᠰᡥᠠᠨ  ᡳ ᠪᡳᡨᡥᡝᡳ ᡩᠠ ᡩᡝ ᠪᡳᡥᡝ᠈ ᠪᡝᠶᡝ ᠵᠠᡩᠠᡥᠠᠯᠠᡥᠠ ᡨᡠᡵᡤᡠᠨᡩᡝ᠈ ᠠᠰᡥᠠᠨ  ᡳ ᠪᡳᡨᡥᡝᡳ ᡩᠠ ᠴᡳ ᠨᠠᡴᠠᡥᠠ᠈ ᠪᡳᡨᡥᡝ ᡩᡝ ᠠᠨᡨᠠᡴᠠ᠈ ᠰᠠᡳᠨ᠈ ᠪᠠᡴᠴᡳᠨ ᠠᡴᡡ  ᡳ ᠮᠠᠩᡤᠠ᠈ ᠪᡳᡨᡥᡝ ᡠᠪᠠᠯᡳᠶᠠᠮᠪᡠᡵᡝ ᡤᡳᠶᠠᠩᠨᠠᡵᠠ ᡥᡝᡵᡤᡝᠨ ᠠᡵᠠᡵᠠ ᡤᠠᠪᡨᠠᡵᠠ ᠨᡳᠶᠠᠮᠨᡳᠶᠠᡵᠠ ᠪᡝ ᠪᠠᡥᠠᠨᠠᡵᠠᡴᡡᠩᡤᡝ ᠠᡴᡡ᠈ ᡧᠠᠪᡳᠰᠠ ᠪᡝ ᡴᠠᡩᠠᠯᠠᡵᠠᠩᡤᡝ ᡳᠨᡠ ᠴᡳᡵᠠᠣ᠈ ᠠᡤᡝ ᡝᡵᡝ ᠪᠠᠪᡝ ᡠᠮᡝ ᠵᠣᠨᡩᠣᡵᠣ᠈ ᠠᠵᡳᡤᡝ ᠵᡠᠰᡝ ᡩᠠᠮᡠ ᡳᠨᡳ ᠵᡳᠯᡤᠠᠨ ᠪᡝ ᡩᠣᠨᠵᡳᡥᠠᡩᡝ ᡶᠠᠶᠠᠩᡤᠠ ᡤᡝᠮᡠ ᡨᡠᡥᡝᠮᠪᡳ ᠰᡝᠴᡳᠨᠠ᠈ ᠰᡳ ᡳᠨᡠ ᡨᡝᡩᡝ ᡤᡝᠯᡝᠮᠪᡳᠣ᠈ ᠠᡵᠠ ᡝᡵᡝ ᠠᡳ ᡤᡳᠰᡠᠨ᠈ ᠰᡝᡶᡠ ᠰᡝᡵᡝᠩᡤᡝ ᡠᡨᡥᠠᡳ ᠠᠮᠠ  ᡳ ᠠᡩᠠᠯᡳ ᡴᠠᡳ᠈ ᠰᡝᡶᡠ ᡩᡝ ᡤᡝᠯᡝᡵᠠᡴᡡ ᠣᠴᡳ᠈ ᡤᡝᠯᡳ ᠸᡝ ᡩᡝ ᡤᡝᠯᡝᠮᠪᡳᠨᡳ᠈ ᡨᡝᡵᡝᡳ ᠪᠣᠣᡳ ᠪᠠᠨᠵᡳᡵᡝᠩᡤᡝ ᠠᠨᡨᠠᡴᠠ᠈ ᡳᠨᡠ ᡩᠠᠮᡠ ᡶᡝ ᠪᡳᡥᡝ ᡥᡝᡨᡥᡝ ᠪᡝ ᡨᡠᠸᠠᡴᡳᠶᠠᠮᡝ ᠪᠠᠨᠵᡳᡵᡝ ᡩᠠᠪᠠᠯᠠ᠈ ᡝᡵᡝᠴᡳ ᡨᡠᠯᡤᡳᠶᡝᠨ  ᡳ ᡝᠨᠴᡠ ᡤᠣᠯᠣ ᠪᠠᡥᠠᡵᠠ ᠪᠠ ᠪᡳᠰᡳᡵᡝ ᠪᡝ ᠪᡳ ᠰᠠᡵᡴᡡ᠈ ᠨᡝ ᡳᠨᡳ ᠵᠠᡴᠠᡩᡝ ᠪᡳᡨᡥᡝ ᡥᡡᠯᠠᡵᠠ ᡧᠠᠪᡳᠰᠠ ᡠᡩᡠ ᠪᡳ᠈ ᠨᡝ ᠪᡳᠰᡳᡵᡝᠩᡤᡝ ᠠᡳᠨᠴᡳ ᡨᠠᠩᡤᡡ ᡳᠰᡳᠮᡝ ᠪᡳ᠈ ᠰᡳ ᡩᡠᠯᡝᡴᡝ ᠠᠨᡳᠶᠠ ᡩᡝ ᡳᠨᡠ ᠰᡳᠮᠨᡝᠮᠪᡳ ᠠᡴᡡᠨ᠈ ᠰᡳᠮᠨᡝᡥᡝ ᠪᡳᡥᡝ᠈ ᡥᡡᠯᠠᡵᠠᠩᡤᡝ ᠠᡵᠠᡵᠠᠩᡤᡝ ᡤᡝᠮᡠ ᡝᡩᡝᠨ ᠣᠵᠣᡵᠣ ᠵᠠᡴᠠᡩᡝ ᡤᡝᠪᡠ ᡤᠠᡳᡥᠠᡴᡡ ᠪᡳᡥᡝ ᡴᠠᡳ᠈ ᡩᡠᠯᡝ ᡨᡠᡵᡤᡠᠨ ᡠᡨᡨᡠ ᠪᡳᡥᡝᠨᡳ᠈ ᠪᡳ ᡨᡝᡳᡴᡝ ᠰᡳᠨᡩᡝ ᡠᡨᠠᠯᠠ ᡤᡳᠰᡠᠨ ᡶᠣᠨᠵᡳᡥᠠᠩᡤᡝ᠈ ᡤᡝᠮᡠ ᠰᡳᠨᡳ ᠪᡝᠩᠰᡝ ᠪᡝ ᠴᡝᠨᡩᡝᡥᡝᠩᡤᡝ᠈ ᡨᡠᠸᠠᠴᡳ ᠰᡳᠨᡳ ᡨᠠᠴᡳᡥᠠᠩᡤᡝ ᡴᡝᠮᡠᠨᡳ ᠣᠮᠪᡳ᠈ ᠪᡳ ᠴᡳᠮᠠᡵᡳ ᠠᠮᠪᠠᠰᠠ ᠠᠯᠠᡶᡳ ᡠᡵᡠᠨᠠᡴᡡ ᠰᡳᠨᡳ ᡤᡝᠪᡠ ᠪᡝ ᡳᠰᡳᠪᡠᡴᡳ᠈ ᡝᡳᠴᡳ ᡩᠠᠰᠠᠮᡝ ᠰᡳᠮᠨᡝᠪᡠᡵᡝ᠈ ᡝᡳᠴᡳ ᡠᡨᡥᠠᡳ ᠪᠠᡳᡨᠠᠯᠠᡵᠠ ᠪᡝ᠈ ᡤᡝᠮᡠ ᠪᠣᠯᠵᠣᠴᡳ ᠣᠵᠣᡵᠠᡴᡡ᠈ ᡝᡵᡝ ᡠᡩᡠ ᡳᠨᡝᠩᡤᡳ  ᡳ ᡩᠣᠯᠣ ᠰᡳᠨᡳ ᡤᠠᠪᡨᠠᡵᠠ ᠨᡳᠶᠠᠮᠨᡳᠶᠠᡵᠠ ᠪᠠᠪᡝ ᡴᡝᠮᡠᠨᡳ ᠠᠨ  ᡳ ᡠᡵᡝᠪᡠ᠈ ᡥᡡᠯᠠᡵᠠ ᠠᡵᠠᡵᠠ ᠪᠠᠪᡝ ᡳᠨᡠ ᠠᠨ  ᡳ ᡨᠠᠴᡳ᠈ ᠪᠣᠣᡩᡝ ᠪᡳᠰᡠ᠈ ᡤᡡᠸᠠ ᠪᠠᡩᡝ ᡠᠮᡝ ᡤᡝᠨᡝᡵᡝ᠈ ᠰᡝᠯᡤᡳᠶᡝᡵᡝ ᠪᡝ ᡨᡠᠸᠠᠮᡝ ᡩᡝᠶᡝᡵᡝ ᡤᡝᠰᡝ ᡶᡝᡴᠰᡳᡥᡝᡳ ᠵᡳᠣ᠈ ᡠᠮᡝ ᡨᠣᠣᡴᠠᠪᡠᡵᡝ᠈ ᠵᡝ᠈ ᠰᠠᡥᠠ᠉

ᠠᡤᡝ ᠰᡳ ᠠᠪᠰᡳ ᡤᡝᠨᡝᠮᠪᡳ᠈ ᡤᡡᠸᠠ ᠪᠠᡩᡝ ᠮᠠᠵᡳᡤᡝ ᠪᠠᡳᡨᠠ ᠪᡳᡶᡳ ᡤᡝᠨᡝᠮᠪᡳ᠈ ᠠᡤᡝ ᠶᠠᠪᡠ᠈ ᡨᠠᡴᠠ ᠮᡝᠨᡳ ᠪᠣᠣᡩᡝ ᡩᠠᡵᡳ᠈ ᠵᠣᠣ ᠪᠠᡳ᠈ ᠪᡳ ᡝᠨᡝᠩᡤᡳ ᡝᠮᡠ ᡝᡴᡧᡝᡵᡝ ᠪᠠᡳᡨᠠ ᠪᡳᡶᡳ ᡧᠣᠯᠣ ᠪᠠᡥᠠᡵᠠᡴᡡ᠈ ᡝᠨᠴᡠ ᡳᠨᡝᠩᡤᡳ ᠵᠠᡳ ᡩᠠᡵᡳᡴᡳ ᠪᠠᡳ᠈ ᠠᡤᡝ ᠰᡳ ᠨᡝᠨᡝᡥᡝᠴᡳ ᠮᡠᠵᡳᠯᡝᠨ ᠠᠮᠪᡠᠯᠠ ᡤᡡᠸᠠᠯᡳᠶᠠᡴᠠᠪᡳ᠈ ᠮᡠᠰᡝ ᡩᠠᠴᡳ ᡳᠰᡥᡠᠨᡩᡝ ᡨᠠᡵᡤᠠᠴᡠᠨ ᠠᡴᡡ ᡤᡳᠰᡠᡵᡝᠮᡝ᠈ ᡨᠣᠨ ᠠᡴᡡ ᠶᠠᠪᡠᠮᠪᡳᡥᡝᠩᡤᡝ ᡴᠠᡳ᠈ ᠰᡳ ᡠᡨᠠᠯᠠ ᡳᠨᡝᠩᡤᡳ ᠮᡳᠨᡳ ᡩᡠᡴᠠ ᡩᡝ ᡠᠮᠠᡳ ᡝᠩᡤᡝᠯᡝᠨᠵᡳᡵᠠᡴᡡ ᠪᡳᠮᡝ᠈ ᠠᠴᠠᡶᡳ ᡤᡝᠯᡳ ᡠᡨᡨᡠ ᠠᠨᡩᡠᡥᡡᡵᡳ ᡩᡠᠶᡝᠨ ᠣᡥᠣᠩᡤᡝ᠈ ᠸᡝ ᠰᡳᠮᠪᡝ ᠠᡳᠨᠠᡥᠠ ᠨᡳᠣ᠈ ᠰᡳ ᠰᠠᡵᡴᡡ᠈ ᠪᡳ ᠵᡳᡩᡝᡵᠠᡴᡡᠩᡤᡝ ᠸᠠᡴᠠ᠈ ᡩᠠᠮᡠ ᠪᠣᠣᡳ ᠵᠣᠪᠣᠰᡥᡡᠨ  ᡳ ᡨᡠᡵᡤᡠᠨᡩᡝ᠈ ᡳᠨᡝᠩᡤᡳᡩᠠᡵᡳ ᡝᡴᡧᡝᠮᡝ᠈ ᡠᠮᠠᡳ ᡧᠣᠯᠣ ᠪᠠᡥᠠᡵᠠᡴᡡ ᠪᡳᠮᡝ᠈ ᠮᡳᠮᠪᡝ ᠰᡝᠮᡝ ᠠᡳᠨᠠᡵᠠ᠈ ᠠᡤᡝ ᠰᡳ ᠪᠣᠣᡳ ᠵᠣᠪᠣᠰᡥᡡᠨ  ᡳ ᠵᠠᠯᡳᠨ ᠸᠠᡴᠠ᠈ ᠠᡳᠨᠴᡳ ᠠᡳᠰᡳ ᠪᡝ ᡠᠵᡝᠯᡝᠮᡝ ᠰᠠᡳᠨ ᡤᡠᠴᡠ ᠪᡝ ᠠᠯᡩᠠᠩᡤᠠ ᠣᠪᡠᠮᡝ ᠮᡳᠮᠪᡝ ᡨᡠᠯᡤᡳᠶᡝᠨ ᡤᡡᠨᡳᠮᠪᡳ ᡩᡝᡵᡝ᠈ ᠠᡤᡝ ᠰᡳᠨᡳ ᡝᡵᡝ ᠠᡳ ᡤᡳᠰᡠᠨ ᠰᡝᡵᡝᠩᡤᡝ᠈ ᠮᡠᠰᡝᡳ ᡤᡠᠴᡠᠯᡝᡥᡝᠩᡤᡝ᠈ ᡤᡡᠸᠠ ᡩᡝ ᡩᡠᡳᠪᡠᠯᡝᠴᡳ ᠣᠮᠪᡳᠣ᠈ ᠰᡳ ᠠᡳᠨᡠ ᡝᡵᡝ ᡤᡝᠰᡝ ᡤᡳᠰᡠᠨ ᡨᡠᠴᡳᠮᠪᡳ᠈ ᠵᡝ ᠵᡝ ᠸᠠᠵᡳᡥᠠ᠈ ᡝᠨᡝᠩᡤᡳ ᠮᡳᠨᡳ ᠪᠠᡳᡨᠠ ᠪᡝ ᡠᡨᡥᠠᡳ ᡨᠣᠣᡴᠠᠪᡠᠴᡳ ᡨᠣᠣᡴᠠᠪᡠᡴᡳᠨᡳ᠈ ᠪᡳ ᡤᡝᠨᡝᡵᡝ ᠪᡝ ᠨᠠᡴᠠᡶᡳ ᠠᡤᡝᡳ ᠪᠣᠣᡩᡝ ᡩᠠᡵᡳᠨᠠᡴᡳ᠈ ᠪᡳ ᡝᡳᠴᡳ ᡤᡝᠨᡝᡵᠠᡴᡡ ᠣᡥᠣᡩᡝ ᠰᡳ ᡤᡝᠯᡳ ᠮᡳᠮᠪᡝ ᠸᠠᡴᠠᠯᠠᠮᠪᡳᠣ᠉ ᠠᡤᡝ ᡠᡨᡨᡠ ᠣᠴᡳ᠈ ᡨᡝᠨᡳ ᡤᡠᠴᡠ  ᡳ ᡩᠣᡵᠣ᠈ ᡩᠠᡧᠣᠰᡝ ᠠᠪᠠ᠈ ᠮᠣᡵᡳᠨ ᡤᠠᡳᠰᡠ᠈ ᠵᡝ᠈ ᡝᡵᡝ ᠮᠣᡵᡳᠨ ᠪᡝ ᠠᠮᠠᡵᡤᡳ ᡥᡡᠸᠠ ᡩᡝ ᡥᡡᠸᠠᡳᡨᠠ᠈ ᡩᡠᡴᠠᡳ ᠵᠠᡴᠠᡩᡝ ᡠᠮᡝ ᡥᡡᠸᠠᡳᡨᠠᡵᠠ᠈ ᡝᡥᡝ ᡠᡵᠰᡝ ᡩᡝ ᡤᡠᠸᡝᠯᡴᡝ᠈ ᠵᡠᠯᡥᡡ ᠪᡝ ᠪᡠᡵᡤᡳᠶᡝᠨ ᡩᡝ ᠯᠠᡴᡳᠶᠠ᠈ ᡨᠣᡥᠣᠮᠠ ᠪᡝ ᡳᠨᡠ ᡥᡝᡨᡝ᠈ ᠵᡝ᠈ ᠠᡤᡝ ᠶᠠᠪᡠ᠈ ᡩᠣᠰᡳᡴᡳ᠈ ᠠᡤᡝ ᠨᠠᡥᠠᠨ ᡩᡝ ᡨᠠᡶᠠ᠈ ᠪᡳ ᡨᠠᡶᠠᡴᡳ᠈ ᠠᡤᡝ ᡝᡵᡤᡳ ᡩᡝ ᠰᠠᡳᠨ᠈ ᡠᠪᠠᡩᡝ ᡳᠨᡠ ᠰᠠᡳᠨ᠈ ᠵᠠᡳ ᠮᠠᠵᡳᡤᡝ ᠸᡝᠰᡳ᠈ ᡠᡨᡥᠠᡳ ᡠᡨᡨᡠ ᠣᡥᠣᡩᡝ᠈ ᡠᠮᡝᠰᡳ ᡳᠴᠠᠩᡤᠠ᠈ ᡩᠠᡧᠣᠰᡝ ᠠᠪᠠ᠈ ᠰᡳ ᡨᡠᠯᡝ ᠠᡳᠨᠠᠮᠪᡳ᠈ ᠪᡳ ᡠᠪᠠᡩᡝ᠈ ᠮᠣᡵᡳᠨ ᡥᡡᠸᠠᡳᡨᠠᠮᡝ ᠪᡳ᠈ ᡝᡵᡝ ᠸᠠᠪᡠᡵᡠ ᠮᠣᡵᡳᠨ ᠪᡝ ᡥᡡᠸᠠᡳᡨᠠᡶᡳ ᠵᡳᠴᡳ ᠸᠠᠵᡳᡥᠠ᠈ ᡝᠮᡩᡠᠪᡝᡳ ᡥᡡᠸᠠᡳᡨᠠᠮᠪᡳᠣ᠈ ᠪᡠᠴᡝᡥᡝ ᠠᡥᠠ ᡤᡝᠯᡳ ᠪᡳᠨᡳ᠈ ᡥᡡᡩᡠᠨ ᡩᠠᠮᠪᠠᡤᡠ ᡨᡝᠪᡠᡶᡳ ᠪᡝᠨᠵᡠ᠈ ᠰᡳ ᠵᠠᡳ ᡩᠣᠰᡳᡶᡳ ᡥᡝᠨᡩᡠ᠈ ᠴᠠᡳ ᠪᡝ ᡥᠠᠯᡥᡡᡴᠠᠨ ᠸᡝᠨᠴᡝᡶᡳ ᠪᡝᠨᠵᡠ ᠰᡝ᠈ ᠰᡠᠨ ᠪᡝ ᠯᠠᠪᡩᡠᡴᠠᠨ  ᡳ ᠰᡳᠨᡩᠠ᠈ ᡨᡠᠮᡳᡴᠠᠨ ᠣᠰᠣ᠈ ᡠᠮᡝ ᡤᡝᠩᡤᡳᠶᡝᠨ ᠣᠵᠣᡵᠣ᠈ ᠵᡝ᠈ ᡨᠠᡳᡨᠠᡳ ᠪᡝᠶᡝ ᠰᠠᡳᠶᡡᠨ᠈ ᠰᠠᡳᠨ᠈ ᠠᡧᠠ ᠰᠠᡳᠶᡡᠨ᠈ ᠰᠠᡳᠨ᠈ ᠵᡠᠰᡝ ᡤᡝᠮᡠ ᠰᠠᡳᠶᡡᠨ᠈ ᠰᠠᡳᠨ᠈ ᠠᡵᠠ ᡩᠠᡧᠣᠰᡝ ᠠᠪᠠ᠈ ᠴᠠᡳ ᠠᡳᠨᡠ ᠪᡝᠨᠵᡳᡵᠠᡴᡡ᠈ ᡤᠠᠵᡳᡥᠠ᠈ ᠠᡤᡝ ᡠᡨᡥᠠᡳ ᡤᠠᡳᠰᡠ᠈ ᠠᡤᡝ ᠰᡳ ᡳᠨᡠ ᡤᠠᡳᠰᡠ᠈ ᠠᡳ ᡤᡝᠯᡳ ᠠᡤᡝ ᠰᡳ ᠨᡝᠨᡝ᠈ ᠪᡳ ᡠᡨᡥᠠᡳ ᠨᡝᠨᡝᠮᡝ ᡤᠠᡳᡴᡳ᠈ ᠠᡤᡝ ᠪᡳ ᡥᡝᠩᡴᡳᠯᡝᡵᠠᡴᡡ ᡴᠠᡳ᠈ ᠠᡳ ᡤᡝᠯᡳ ᡝᠮᡠ ᠮᠣᡵᠣ ᡠᠨᡨᡠᡥᡠᠨ ᠴᠠᡳ ᡩᡝ ᡤᡝᠯᡳ ᡥᡝᠩᡴᡳᠯᡝᠮᠪᡳ ᠰᡝᡵᡝᠩᡤᡝ ᠠᡳ ᡤᡳᠰᡠᠨ᠈ ᠠᡤᡝ ᠪᡳ ᡤᡝᠯᡳ ᡩᠣᠨᠵᡳᠴᡳ᠈ ᠰᡳ ᡨᠠᠴᡳᡴᡡ ᡩᡝ ᡩᠣᠰᡳᡶᡳ ᠪᡳᡨᡥᡝ ᡥᡡᠯᠠᠮᠪᡳ ᠰᡝᡵᡝ ᠶᠠᡵᡤᡳᠶᡡᠨ᠈ ᡳᠨᡠ ᠶᠠ᠈ ᠮᡝᠨᡳ ᠨᡳᡵᡠᡳ ᠵᠠᠩᡤᡳᠨ ᠮᡳᠮᠪᡝ ᠠᠴᠠᡥᠠ ᡩᠠᡵᡳ᠈ ᡠᡨᡥᠠᡳ ᠪᠠᡳᡨᠠ ᡩᡝ ᠶᠠᠪᡠ ᠶᠠᠪᡠ ᠰᡝᠮᡝ ᡥᡝᠨᡩᡠᠮᠪᡳ᠈ ᠪᡳ ᡤᡡᠨᡳᠴᡳ ᠮᠠᠨᠵᡠ ᠪᡳᡨᡥᡝ ᠪᡝ ᡝᠮᡠ ᡠᡩᡠ ᡥᡝᡵᡤᡝᠨ ᡨᠠᡴᠠᡵᠠ ᡤᠣᠵᡳᠮᡝ᠈ ᡤᡳᠰᡠᠨ ᠰᡝᠴᡳ ᠣᡵᠣᠨ ᠰᠠᡵᡴᡡ᠈ ᠵᠠᡳ ᡝᠮᡠ ᡠᡩᡠ ᠪᡳᠶᠠᡳ ᠪᡳᡨᡥᡝ ᡥᡡᠯᠠᡶᡳ ᠪᠠᡳᡨᠠ ᡩᡝ ᡩᠣᠰᡳᠴᡳ᠈ ᡳᠨᡠ ᡤᠣᡳᡩᠠᠪᡠᠮᠪᡳ ᠰᡝᡵᡝ ᠪᠠ ᠠᡴᡡ᠈ ᡨᡠᡨᡨᡠ ᠣᡶᡳ ᡩᡠᠯᡝᡴᡝ ᠪᡳᠶᠠᡳ ᠵᡠᠸᠠᠨ ᡳᠯᠠᠨ ᡩᡝ ᡤᡝᠯᡳ ᡨᠠᠴᡳᡴᡡ ᡩᡝ ᡩᠣᠰᡳᡴᠠ ᠰᡝᠴᡳᠨᠠ᠈ ᠰᡳ ᠠᡩᠠᡵᠠᠮᡝ ᠪᠠᡥᠠᡶᡳ ᡩᠣᠨᠵᡳᡥᠠ᠈ ᠴᠠᠨᠠᠩᡤᡳ ᠵᠣᠣᠯᡳ ᠠᠮᠠ ᠠᡤᡝ ᠮᡳᠨᡳ ᠪᠣᠣᡩᡝ ᠵᡳᡶᡳ᠈ ᠪᡳ ᡨᡝᡩᡝ ᠰᡳᠮᠪᡝ ᡶᠣᠨᠵᡳᡥᠠ ᠪᡳᡥᡝ᠈ ᡳ ᠮᡳᠨᡩᡝ ᠠᠯᠠᡵᠠ ᠵᠠᡴᠠᡩᡝ ᠪᡳ ᡨᡝᠨᡳ ᠰᠠᡥᠠ᠈ ᠠᡤᡝ ᠠᡳᡴᠠ ᠮᠠᠨᠵᡠ ᠪᡳᡨᡥᡝ ᠪᡳᠴᡳ᠈ ᡝᠮᡠ ᡠᡩᡠ ᡩᡝᠪᡨᡝᠯᡳᠨ ᠵᡠᠸᡝᠨ ᠪᡠᡵᡝᠣ᠈ ᠪᡳ ᡩᠣᠣᠯᠠᡶᡳ ᡥᡡᠯᠠᡴᡳ᠈ ᠸᠠᠵᡳᡥᠠ ᠮᠠᠩᡤᡳ ᡠᡨᡥᠠᡳ ᠰᡳᠨᡩᡝ ᠠᠮᠠᠰᡳ ᠪᡝᠨᠵᡳᡵᡝ᠈ ᠮᡳᠨᡩᡝ ᠪᡳᡨᡥᡝ ᠠᡴᡡ᠈ ᠪᡳ ᡤᡠᠴᡠᠰᡝ ᡩᡝ ᠪᠠᡳᠮᡝ ᡨᡠᠸᠠᡴᡳ᠈ ᠪᠠᡥᠠᠴᡳ ᠨᡳᠶᠠᠯᠮᠠ ᠪᡝ ᡨᠠᡴᡡᡵᠠᡶᡳ ᠰᡳᠨᡳ ᠵᠠᡴᠠᡩᡝ ᠪᡝᠨᡝᠪᡠᡵᡝ᠈ ᡝᡵᡝ ᡠᡨᡥᠠᡳ ᠠᡤᡝ ᠮᡳᠮᠪᡝ ᡤᠣᠰᡳᡥᠠ ᡴᠠᡳ᠈ ᠠᡳ ᡤᡳᠰᡠᠨ ᠰᡝᡵᡝᠩᡤᡝ᠈ ᠠᡤᡝ ᠰᡳ ᡠᡨᡥᠠᡳ ᠰᡳᡨᡥᡡᠮᡝ ᠪᡳᡨᡥᡝ ᡥᡡᠯᠠᡴᡳ ᠰᡝᠮᠪᡳᠮᡝ᠈ ᠪᡳ ᡝᠮᡠ ᡠᡩᡠ ᡩᡝᠪᡨᡝᠯᡳᠨ ᠪᡳᡨᡥᡝ ᠪᡝ ᠪᠠᡳᡶᡳ ᠰᡳᠨᡩᡝ ᡩᠣᠣᠯᠠᠪᡠᡵᠠᡴᡡ ᠰᡝᡵᡝ ᡩᠣᡵᠣ ᠪᡳᠣ᠈ ᠵᡝ ᠵᡝ ᠸᠠᠵᡳᡥᠠ᠈ ᠪᡳ ᡳᠨᡠ ᡤᡡᠸᠠ ᡩᡝ ᠪᠠᡳᡵᠠᡴᡡ ᡴᠠᡳ᠈ ᠠᡤᡝ ᡤᡡᠸᠠ ᡩᡝ ᡠᠮᡝ ᠪᠠᡳᡵᡝ᠈ ᠪᡳ ᠪᠠᡳᡶᡳ ᠰᡳᠨᡩᡝ ᠪᡝᠨᡝᠪᡠᡵᡝ ᠰᡝᡥᡝ ᡴᠠᡳ᠈ ᡳᠨᡠ᠈ ᠠᡤᡝ ᠪᡳ ᡤᡝᠨᡝᡴᡳ᠈ ᠪᡠᡩᠠ ᠵᡝᡶᡳ ᡤᡝᠨᡝ᠈ ᠰᡳ ᠠᡳ ᡠᡨᡨᡠ ᡝᡴᡧᡝᠮᠪᡳ᠈ ᠪᡠᡩᠠ ᡩᠠᡤᡳᠯᠠᠪᡠᠮᡝ ᡠᡨᡥᠠᡳ ᠪᠠᡥᠠᠮᠪᡳ ᡴᠠᡳ᠈ ᠵᠣᠣ ᠪᠠᡳ᠈ ᠮᡳᠨᡩᡝ ᠶᠠᡵᡤᡳᠶᠠᠨ  ᡳ ᡝᡴᡧᡝᡵᡝ ᠪᠠᡳᡨᠠ ᠪᡳ᠈ ᡝᠮᡠ ᡤᡠᠴᡠ ᠮᡳᠮᠪᡝ ᠪᠠᡳᡨᠠ ᡥᡝᠪᡩᡝᠮᠪᡳ ᠰᡝᠮᡝ᠈ ᡳ ᠪᠣᠣᡩᡝ ᠠᠯᡳᠶᠠᡥᠠᠪᡳ᠈ ᠪᡳ ᡤᡝᠨᡝᡵᠠᡴᡡ ᠣᡥᠣᡩᡝ ᡨᡝᡵᡝ ᠮᡳᠮᠪᡝ ᠵᠠᠪᠴᠠᡵᠠᡴᡡᠨ᠈ ᠮᡠᠵᠠᠩᡤᠠᠣ᠈ ᠠᡳ ᡤᡝᠯᡳ᠈ ᡝᡩᡝ ᡤᡝᠯᡳ ᠠᡳ ᡥᠣᠯᡨᠣᡵᠣ ᠪᠠᠪᡳ᠈ ᡠᠨᡝᠩᡤᡳ ᡠᡨᡨᡠ ᠣᠴᡳ ᠪᡳ ᠰᡳᠮᠪᡝ ᠪᡳᠪᡠᡵᠠᡴᡡ᠈ ᡩᠠᠮᡠ ᠠᡤᡝ ᠵᡳᡶᡳ ᡠᠨᡨᡠᡥᡠᠨ ᡨᡝᡥᡝ ᡴᠠᡳ᠈ ᠵᠠᡳ ᠵᡳᠣ᠈ ᠠᡤᡝ ᠰᡳ ᡳᠨᡠ ᡩᠣᠰᡳᡴᡳ ᠪᠠᡳ᠈ ᡝᠮᡠ ᠵᡠᠸᡝ ᡳᠨᡝᠩᡤᡳ ᠣᡥᠣ ᠮᠠᠩᡤᡳ᠈ ᠪᡳ ᡤᡝᠯᡳ ᠠᡤᡝ ᠪᡝ ᡨᡠᠸᠠᠨᠵᡳᡴᡳ᠉

ᠠᡤᡝ ᠰᠠᡳᠶᡡᠨ᠈ ᠰᠠᡳᠨ᠈ ᠠᡤᡝ ᠰᡳᠨᡳ ᠪᡝᠶᡝ ᡳᠨᡠ ᠰᠠᡳᠶᡡᠨ᠈ ᠰᠠᡳᠨ᠈ ᡝᡵᡝ ᡠᠴᡠᡵᡳ ᠰᡳ ᠠᡳᠪᡳᡩᡝ ᠪᡳᡥᡝ᠈ ᡠᠮᠠᡳ ᠰᡳᠮᠪᡝ ᠰᠠᠪᡠᡥᠠᡴᡡ᠈ ᠪᡳ ᠵᡳᠩ ᠠᡤᡝ ᡨᡠᠸᠠᠨᠵᡳᡴᡳ ᠰᡝᠮᠪᡳᡥᡝ᠈ ᡤᠠᡳᡨᠠᡳ ᡝᠮᡠ ᠠᠵᡳᡤᡝ ᠪᠠᡳᡨᠠ ᡩᡝ ᡠᠰᠠᠪᡠᡵᡝ ᠵᠠᡴᠠᡩᡝ ᡨᡠᡨᡨᡠ ᠪᠠᡥᠠᡶᡳ ᠵᡳᡥᡝᡴᡡ᠈ ᠴᠠᠨᠠᠩᡤᡳ ᠠᡵᡴᠠᠨ ᠰᡝᠮᡝ ᠪᠠᡳᡨᠠ ᡨᡝᠨᡳ ᠸᠠᠵᡳᡥᠠ᠈ ᠰᡳᡴᠰᡝ ᡧᠣᠯᠣ ᠪᠠᡥᠠᡶᡳ ᠵᡳᡴᡳ ᠰᡝᡥᡝ ᠪᡳᠴᡳ᠈ ᡤᡝᠯᡳ ᠠᡤᠠᠮᡝ ᡩᡝᡵᡳᠪᡠᡥᡝ᠈ ᠠᡤᡝ ᠰᡳᠨᡳ ᠰᠠᡵᠠᠩᡤᡝ ᠮᡳᠨᡩᡝ ᡳᠣᡩᠠᠨ ᠵᠠᠩᠴᡳ ᡤᡝᠮᡠ ᠠᡴᡡ᠈ ᠮᠣᡵᡳᠨ ᡳᠨᡠ ᠠᡴᡡ᠈ ᠵᡠᡤᡡᠨ ᡤᡝᠯᡳ ᠯᡳᡶᠠᡤᠠᠨ᠈ ᡨᡠᡨᡨᡠ ᠣᡶᡳ ᠪᡳ ᡤᡝᠯᡳ ᠪᠠᡥᠠᡶᡳ ᠵᡳᡥᡝᡴᡡ᠈ ᡝᠨᡝᠩᡤᡳ ᡤᠠᠯᠠᡴᠠ ᠣᠵᠣᡵᠣ ᠵᠠᡴᠠᡩᡝ᠈ ᠪᡳ ᠶᠠᡶᠠᡥᠠᠯᠠᠮᡝ ᠴᠣᡥᠣᠮᡝ ᠠᡤᡝ ᠪᡝ ᡨᡠᠸᠠᠨᠵᡳᠮᡝ ᠵᡳᡥᡝ᠈ ᠠᡵᠠ᠈ ᡠᡨᡨᡠ ᡤᠣᡵᠣ ᡩᡝ ᠮᡳᠨᡳ ᠵᠠᠯᡳᠨ ᠠᡤᡝᡳ ᠪᡝᠶᡝᠪᡝ ᠰᡠᡳᠯᠠᠪᡠᡥᠠᠩᡤᡝ᠈ ᠪᡳ ᠠᡩᠠᡵᠠᠮᡝ ᠠᠯᡳᠮᡝ ᠮᡠᡨᡝᠮᠪᡳ᠈ ᠶᠠᠯᠠ ᠪᡳ ᡥᡠᡴᡧᡝᡥᡝ ᠰᡝᠮᡝ ᠸᠠᠵᡳᡵᠠᡴᡡ᠈ ᠠᡳ ᡤᡝᠯᡳ᠈ ᠠᡤᡝ ᠪᡳ ᠪᠣᠣᡩᡝ ᡝᠮᡥᡠᠨ ᡨᡝᡥᡝᡩᡝ ᠵᡳᠩ ᡠᠮᡝᠰᡳ ᠠᠯᡳᡧᠠᠮᠪᡳᡥᡝ᠈ ᠰᡳᠨᡳ ᠪᡝᠶᡝ ᠵᡳᡥᡝᠩᡤᡝ ᡨᠣᠪ ᠰᡝᠮᡝ ᠮᡳᠨᡳ ᡤᡡᠨᡳᠨᡩᡝ ᠠᠴᠠᠨᠠᡥᠠ᠈ ᡨᡠᡨᡨᡠ ᠪᡳᠮᡝ ᠠᡤᡝ ᠪᡝ ᡴᡳᡩᡠᡥᠠ ᡤᡡᠨᡳᠨ ᠪᡝ ᡳᠨᡠ ᠪᠠᡥᠠᡶᡳ ᠰᡝᠯᠠᠪᡠᡥᠠ᠈ ᠮᡠᠰᡝ ᠠᡥᡡᠨ ᡩᡝᠣ ᡝᠨᡝᠩᡤᡳ ᡩᡝᡵᡝ ᠠᠴᠠᡥᠠᠪᡝ ᡩᠠᡥᠠᠮᡝ ᡠᠨᡨᡠᡥᡠᠰᠠᡴᠠ ᠰᡳᠮᠪᡝ ᡠᠩᡤᡳᡵᡝ ᡴᠣᠣᠯᡳ ᠠᡴᡡ᠈ ᡝᠮᡠ ᡥᡡᠨᡨᠠᡥᠠᠨ  ᡳ ᠨᡳᡨᠠᠨ ᠨᡠᡵᡝ ᠪᡝ ᡩᠠᡤᡳᠯᠠᡶᡳ᠈ ᠮᡠᠰᡝ ᠵᡠᠸᡝ ᠣᡶᡳ ᠪᠠᡴᠴᡳᠯᠠᠮᡝ ᠣᠮᡳᠴᠠᠮᡝ᠈ ᠮᠠᠵᡳᡤᡝ ᠯᡝᠣᠯᡝᠮᡝ ᡨᡝᠴᡝᡴᡳ᠈ ᠠᡤᡝ ᠰᡳ ᠮᡳᠮᠪᡝ ᡠᡨᡨᡠ ᡤᠣᠰᡳᡴᡳ ᠰᡝᡵᡝ ᠪᡝ ᡩᠠᡥᠠᠮᡝ ᠪᡳ ᠮᠠᡵᠠᠮᠪᡳ ᠰᡝᡵᡝ ᠪᠠ ᡳᠨᡠ ᠠᡴᡡ᠈ ᡠᡵᡠᠨᠠᡴᡡ ᠠᡤᡝᡳ ᡤᡡᠨᡳᠨ ᡩᡝ ᠠᠴᠠᠪᡠᡴᡳ᠈ ᡩᠠᠮᡠ ᡨᡠᡵᡤᡠᠨ ᠠᡴᡡ ᡩᡝ ᠵᠣᠪᠣᠪᡠᡥᠠᠩᡤᡝ᠈ ᡤᡳᠶᠠᠨ ᡩᡝ ᠠᠴᠠᡵᠠᡴᡡ᠈ ᠠᡳ ᡤᡝᠯᡳ ᡴᡝᠰᡳᡨᡠ ᠠᠪᠠ᠈ ᠨᡠᡵᡝ ᠠᠨᠵᡠ ᡩᠠᡤᡳᠯᠠᠪᡠᡶᡳ ᠪᡝᠨᠵᡠ ᠰᡝ᠈ ᠵᡝ᠈ ᡴᡝᠰᡳᡨᡠ ᠰᡳ ᡝᡵᡝ ᡶᠠᠯᠠᠨ ᠪᡝ ᠠᡳᠨᡠ ᡝᡵᡳᡵᠠᡴᡡ᠈ ᡩᡝᡵᡝ ᠪᡝ ᡳᠨᡠ ᡩᠠᠰᡳᡥᡳᠶᠠᡵᠠᡴᡡ᠈ ᠰᡳ ᠪᠠᡳᠪᡳ ᠪᠣᠣᡩᡝ ᠪᡳᡶᡳ ᠠᡳᠨᠠᠮᠪᡳᡥᡝ ᠵᡳᠶᡝ᠈ ᠪᡳ ᠠᡳᡶᡳᠨᡳ ᡝᡵᡳᡥᡝ ᠪᡳᡥᡝ᠈ ᡝᡩᡠᠨ ᡩᠠᡥᠠᡳ ᡠᠮᠠᡳ ᠨᠠᡴᠠᡵᠠᡴᡡ᠈ ᠵᠠᡳ ᡠᠴᡝ ᡩᡝ ᡤᡝᠯᡳ ᡥᡳᡩᠠ ᠯᠠᡴᡳᠶᠠᡥᠠᡴᡡ ᠪᠠᡩᡝ᠈ ᠠᡳᠨᡠ ᡠᡨᡨᡠ ᠨᠠᠨᡨᡠᡥᡡᠨ ᠠᡴᡡ ᠨᡳ᠈ ᡝᡵᡝ ᡩᠣᡵᠣ ᠰᠠᡵᡴᡡ ᠸᠠᠪᡠᡵᡠ ᠠᡥᠠ ᡤᡝᠯᡳ ᠪᡳᠨᡳ᠈ ᡴᡝᠮᡠᠨᡳ ᡨᠠᠪᠰᡳᡨᠠᡴᡳ ᠰᡝᠮᠪᡳᠣ᠈ ᡥᠠᠰᠠ ᠨᡠᡵᡝ ᠪᡝ ᡨᡠᠸᠠᠨᠠ᠈ ᠵᡝ᠈ ᠠᡤᡝ ᠮᡠᠰᡝ ᡝᡵᡝ ᡧᠣᠯᠣ ᡩᡝ ᠨᡝᠨᡝᠮᡝ ᡩᡝᡵᡝ ᠪᡝ ᡥᡡᠸᠠ ᡩᡝ ᡤᡠᡵᡳᠪᡠᡶᡳ ᡨᡝᡴᡳ ᠪᠠᡳ᠈ ᡝᡵᡝ ᠪᠣᠣᡳ ᡩᠣᠯᠣ ᡠᠮᡝᠰᡳ ᡥᠠᠯᡥᡡᠨ ᡴᠠᡳ᠈ ᡠᠮᡝᠰᡳ ᡳᠨᡠ᠈ ᠮᡠᠰᡝ ᡩᡠᠯᡝ ᡤᡠᡵᡳᠪᡠᠴᡳ᠈ ᡨᡝᡵᡝ ᡥᠣᡥᠣᠩᡤᠣ ᠮᠣᠣ  ᡳ ᡶᡝᠵᡳᠯᡝ ᠰᠠᡳᠨ᠈ ᡨᡠᠪᠠᡩᡝ ᠰᡝᠪᡩᡝᡵᡳᠯᡝᠮᡝ ᡨᡝᠴᡳ ᡳᠴᠠᠩᡤᠠ ᡨᡠᠪᠠ ᡝᡥᡝ᠈ ᠮᠣᠣ ᡩᡝ ᠪᡳᠰᡳᡵᡝ ᡠᠮᡳᠶᠠᡥᠠ ᠯᠠᠪᡩᡠ ᡝᠮᡩᡠᠪᡝᡳ ᡨᡠᡥᡝᠮᠪᡳ᠈ ᠠᠮᠠᡵᡤᡳ ᡥᡡᠸᠠᡳ ᠰᡳᡥᡳᠨ  ᡳ ᡶᡝᠵᡳᠯᡝ ᠰᠠᡳᠨ ᡩᡝ ᡳᠰᡳᡵᠠᡴᡡ᠈ ᡨᡠᡨᡨᡠ ᠣᠴᡳ ᡠᡨᡥᠠᡳ ᠠᠮᠠᡵᡤᡳ ᡥᡡᠸᠠ ᡩᡝ ᠣᡴᡳᠨᡳ᠈ ᡝᡳᡨᡝᡵᡝᠴᡳᠪᡝ ᡥᡡᠸᠠ  ᡳ ᡩᠣᠯᠣ ᠪᠣᠣᡳ ᡩᠣᡵᡤᡳᠴᡳ ᠰᡝᡵᡤᡠᠸᡝᠨ᠈ ᡝᠰᡳ᠈ ᡨᡝᡵᡝ ᠠᠩᡤᠠᠯᠠ ᠪᠣᠣ ᡥᠠᡶᡳᡵᠠᡥᡡᠨ᠈ ᠨᡳᠶᠠᠯᠮᠠ ᡤᡝᠯᡳ ᡤᡝᡵᡝᠨ ᠣᠴᡳ᠈ ᡨᡝᡥᡝᡳ ᡠᠵᡠ ᠯᡳᠶᡝᠯᡳᠶᡝᡧᡝᠮᡝ ᠮᡠᠵᡳᠯᡝᠨ ᡶᠠᡵᡶᠠᠪᡠᠮᠪᡳ ᠰᡝᠴᡳᠨᠠ᠈ ᠪᡳ ᠪᠠᠨᡳᡨᠠᡳ ᡥᠠᠯᡥᡡᠨ ᡩᡝ ᡳᠨᡠ ᡥᠠᠮᡳᡵᠠᡴᡡ᠈ ᠠᡤᡝ ᡨᡝ ᠨᡳᠶᡝᠩᠨᡳᠶᡝᡵᡳ ᡩᡠᠪᡝᡳ ᡶᠣᡵᡤᠣᠨ ᡩᡝ ᡨᡠᠮᡝᠨ ᠵᠠᡴᠠ ᡤᡝᠮᡠ ᡶᡠᠯᡥᡠᡵᡝᡶᡳ᠈ ᠵᡳᠩ ᠠᠯᡳᠨ ᡩᡝ ᠰᠠᡵᡤᠠᡧᠠᡵᠠ ᠮᡠᡴᡝ ᠪᡝ ᡨᡠᠸᠠᡵᠠ ᠰᠠᡳᠨ ᡝᡵᡳᠨ᠈ ᠮᡳᠨᡳ ᡝᡵᡝ ᠠᠵᡳᡤᡝ ᠪᡳᡨᡥᡝᡳ ᠪᠣᠣᡳ ᡥᡡᠸᠠ᠈ ᡠᡩᡠ ᡤᡝᠪᡠᠩᡤᡝ ᠶᠠᡶᠠᠨ ᡶᡝᡵᡤᡠᠸᡝᠴᡠᡴᡝ ᠪᠠ ᠸᠠᡴᠠ ᠪᡳᠴᡳᠪᡝ᠈ ᡳᠨᡠ ᠠᠯᡳᠨ ᠸᡝᠵᡳ ᠴᡳ ᡝᠨᠴᡠ ᠠᡴᡡ᠈ ᡨᠣᠪ ᠰᡝᠮᡝ ᠮᡠᠰᡝᡳ ᠵᡝᡵᡤᡳ ᡠᡵᠰᡝᡳ ᠰᠣᠮᡳᠮᡝ ᡨᡝᡵᡝ ᠪᠠ ᡴᠠᡳ᠈ ᡝᠴᡳ ᠠᡳ᠈ ᠠᡵᠠ ᡝᠮᡩᡠᠪᡝᡳ ᠰᡠᠯᠠ ᡤᡳᠰᡠᠨ ᠯᡝᠣᠯᡝᡵᡝᡩᡝ ᠨᡠᡵᡝ ᡩᠠᡵᠠᠪᡠᡵᡝᠪᡝ ᡤᡝᠮᡠ ᠣᠩᡤᠣᡥᠣ᠈ ᡩᠠᡧᠣᠰᡝ ᠨᡠᡵᡝ ᡨᡝᠪᡠ᠈ ᠠᡤᡝ ᠰᡠ ᡝᠮᡠ ᡥᡡᠨᡨᠠᡥᠠᠨ ᠣᠮᡳ᠈ ᠪᡳ ᠣᠮᡳᡥᠠ᠈ ᡝᡵᡝ ᠨᡠᡵᡝ ᡠᠮᡝᠰᡳ ᡥᠠᡨᠠᠨ ᠨᡳᠮᡝᠴᡠᡴᡝ᠈ ᠪᡳ ᡩᠠᠮᡠ ᡝᠮᡠ ᡥᡡᠨᡨᠠᡥᠠᠨ ᠣᠮᡳᡵᡝ ᠵᠠᡴᠠᡩᡝ ᡠᡨᡥᠠᡳ ᠰᠣᡴᡨᠣᠮᠪᡳᡴᠠᡳ᠈ ᠠᠪᠰᡳ ᠰᡝᡵᡝᠩᡤᡝ᠈ ᡨᡝᠨᡳ ᡥᡡᠨᡨᠠᡥᠠᠨ ᠪᡝ ᡨᡠᡴᡳᠶᡝᠮᡝ ᡥᠣᠨᠣ ᠠᠩᡤᠠ ᡩᡝ ᡤᠠᠮᠠᡵᠠ ᡠᠨᡩᡝ ᡩᡝ᠈ ᡠᡨᡥᠠᡳ ᠰᠣᡴᡨᠣᡥᠣ ᠰᡝᡵᡝ ᡩᠣᡵᠣ ᡤᡝᠯᡳ ᠪᡳᠣ᠈ ᠰᡳ ᠵᠠᠴᡳ ᡥᠣᠯᡨᠣᡵᠣᠩᡤᡝ ᠮᠠᠩᡤᠠ᠈ ᠮᡳᠨᡳ ᡥᠣᠯᡨᠣᡵᠣᠩᡤᡝ ᠸᠠᡴᠠ᠈ ᠪᡳ ᡩᠠᠴᡳ ᠣᠮᡳᠮᡝ ᠪᠠᡥᠠᠨᠠᡵᠠᡴᡡ ᠪᡳᡥᡝ᠈ ᠠᡤᡝ ᡝᡵᡝ ᡩᡠᡵᡠᠮ  ᡳ ᠮᡳᠮᠪᡝ ᡤᠣᠰᡳᠮᡝ ᠣᡶᡳ᠈ ᡨᡝᠨᡳ ᡝᠮᡠ ᡥᡡᠨᡨᠠᡥᠠᠨ ᠣᠮᡳᡵᡝ ᡩᠠᠪᠠᠯᠠ᠈ ᡤᡡᠸᠠ ᠪᠠᡩᡝ ᠪᡳᠴᡳ᠈ ᠠᡳᠨᠠᡥᠠ ᠰᡝᠮᡝ ᠣᠮᡳᡵᠠᡴᡡ᠈ ᠠᡤᡝ ᠠᡳᡴᠠ ᠠᡴᡩᠠᡵᠠᡴᡡ ᠣᠴᡳ ᠪᠣᠣᡳ ᡠᡵᠰᡝ ᡩᡝ ᡶᠣᠨᠵᡳᠴᡳ ᡝᠨᡩᡝᡵᡝᠣ᠈ ᠰᡳᠨᡳ ᡤᡳᠰᡠᠨ ᠪᡝ ᠪᡳ ᡤᡝᠮᡠ ᠠᡴᡩᠠᡵᠠᡴᡡ᠈ ᠣᠮᡳᠮᡝ ᠪᠠᡥᠠᠨᠠᡵᠠ ᠪᠠᡥᠠᠨᠠᡵᠠᡴᡡ ᠪᡝ ᠪᡳ ᡳᠨᡠ ᡩᠠᡵᠠᡴᡡ᠈ ᠰᡳ ᡩᠠᠮᡠ ᠮᡳᠨᡳ ᡳᠯᠠᠨ ᡥᡡᠨᡨᠠᡥᠠᠨ ᠨᡠᡵᡝ ᠪᡝ ᠣᠮᡳᠮᡝ ᠸᠠᠵᡳᡥᠠ ᠮᠠᠩᡤᡳ᠈ ᠪᡳ ᠰᡳᠮᠪᡝ ᡤᡠᠸᡝᠪᡠᡵᡝ᠈ ᠨᡠᡵᡝ ᠰᡝᠴᡳ ᡥᠣᡵᠣᠨ  ᡳ ᠣᡴᡨᠣ ᡤᡝᠯᡳ ᠸᠠᡴᠠ᠈ ᠣᡴᡨᠣᠯᠣᠮᡝ ᠸᠠᡵᠠ ᡩᡝ ᡤᡝᠯᡝᠮᠪᡳ ᠰᡝᠮᡝᠣ᠈ ᠵᡝ ᠵᡝ ᠸᠠᠵᡳᡥᠠ᠈ ᡝᡩᡝ ᠠᡳᠪᡳ᠈ ᡝᡵᡝ ᡳᠯᠠᠨ ᡥᡡᠨᡨᠠᡥᠠᠨ ᠨᡠᡵᡝ ᡨᡝ ᡠᡨᡥᠠᡳ ᠰᠣᡴᡨᠣᠮᡝ ᠪᡠᠴᡝᠴᡳ ᡳᠨᡠ ᠣᡴᡳᠨᡳ᠈ ᠪᡳ ᠣᠮᡳᡴᡳ᠈ ᠠᡤᡝ ᠰᡳ ᡨᡠᠸᠠ᠈ ᡤᡝᠮᡠ ᠣᠮᡳᠮᡝ ᠸᠠᠴᡳᡥᡳᠶᠠᡥᠠ᠈ ᡩᡠᠯᡝ ᡳᠨᡠ ᠶᠠᠮᠵᡳᡥᠠ᠈ ᠪᡳ ᡤᡝᠨᡝᡴᡳ ᠪᠠᡳ᠈ ᠠᡤᡝ ᡠᠪᠠᡩᡝ ᡝᠮᡠ ᡩᠣᠪᠣᡵᡳ ᡩᡝᡩᡠᡶᡳ᠈ ᠴᡳᠮᠠᡵᡳ ᠵᠠᡳ ᡤᡝᠨᡝᠴᡳᠨᠠ᠈ ᠵᠣᠣ ᠪᠠᡳ᠈ ᠴᡳᠮᠠᡵᡳ ᠪᠣᠣᡩᡝ ᠪᠠᡳᡨᠠ ᠪᡳ᠈ ᡤᡝᠨᡝᡵᠠᡴᡡ ᠣᠴᡳ ᠣᠵᠣᡵᠠᡴᡡ᠈ ᡠᡨᡨᡠ ᠸᠠᡴᠠ ᠪᡳᡥᡝ ᠪᡳᠴᡳ᠈ ᡠᡨᡥᠠᡳ ᠰᡳᠨᡳ ᠪᠣᠣᡩᡝ ᡝᠮᡠ ᡩᠣᠪᠣᡵᡳ ᡳᠨᡩᡝᠮᠪᡳᡥᡝ᠈ ᠠᡤᡝ ᠰᡳ ᠠᡳᡴᠠ ᡧᠣᠯᠣ ᠪᠠᡥᠠᡶᡳ᠈ ᡳᠨᡠ ᠮᡝᠨᡳ ᠪᠣᠣᡩᡝ ᡝᠮᡠ ᠮᠠᡵᡳ ᡤᡝᠨᡝᠴᡳᠨᠠ᠈ ᡠᡵᡠᠨᠠᡴᡡ ᡤᡝᠨᡝᠮᠪᡳ᠈ ᠵᡝ ᠪᠠᠨᡳᡥᠠ ᡴᠠᡳ᠈ ᠠᡳ ᡤᡝᠯᡳ᠈ ᠠᡳ ᠵᡝᡴᡝᠨᡳ᠈ ᠪᠠᠨᡳᡥᠠ ᠪᡠᠮᠪᡳ ᠵᡝ᠈ ᠠᡤᡝ ᡠᠨᡨᡠᡥᡠᠨ ᡤᡝᠨᡝᡥᡝ᠉

ᡨᡠᠯᡝ ᡝᠮᡠ ᠨᡳᠶᠠᠯᠮᠠ ᡩᡠᡴᠠ ᡥᡡᠯᠠᠮᠪᡳ᠈ ᠸᡝᠴᡳ᠈ ᠪᡳ ᡨᠠᡴᠠᡵᠠᡴᡡ᠈ ᡝᠯᠵᡳᡨᡠ ᠰᡳ ᡨᡠᠴᡳᡶᡳ ᡨᡠᠸᠠᠨᠠ᠈ ᠵᡝ᠈ ᡨᡠᠯᡝ ᡝᠮᡠ ᠨᡳᠶᠠᠯᠮᠠ ᠮᠣᡵᡳᠨ ᡩᡝ ᠶᠠᠯᡠᡶᡳ᠈ ᠠᡤᡝ ᠪᡝ ᠪᠠᡳᠮᡝ ᠠᡳᡴᠠ ᡤᡳᠰᡠᠨ ᠠᠯᠠᠨᠵᡳᡥᠠ ᠰᡝᠮᠪᡳ᠈ ᠠᡳ ᠠᠯᠠᡵᠠ ᠪᡝ ᠰᡳ ᡶᠣᠨᠵᡳᡥᠠᡴᡡᠨ᠈ ᠪᡳ ᡶᠣᠨᠵᡳᡥᠠ ᠪᡳᡥᡝ᠈ ᡳ ᠠᡤᡝ ᠪᡝ ᠠᠴᠠᡥᠠ ᠮᠠᠩᡤᡳ᠈ ᡨᡝᠨᡳ ᠠᠯᠠᠮᠪᡳ ᠰᡝᡥᡝ᠈ ᡨᡠᡨᡨᡠ ᠣᠴᡳ ᠮᡳᠨᡳ ᠪᡝᠶᡝ ᡤᡝᠨᡝᡶᡳ ᡨᡠᠸᠠᠨᠠᡴᡳ᠈ ᠠᡵᠠ᠈ ᠠᡤᡝ ᠰᡳ ᠵᡳᡥᡝᠣ᠈ ᠠᡳᠪᡳᠴᡳ ᠵᡳᡥᡝ ᠪᡳᡥᡝ᠈ ᠪᡝᠶᡝᡳ ᡤᡠᠪᠴᡳ ᡤᡝᠮᡠ ᠪᡠᡵᠠᡴᡳ ᠴᠠᠩᡤᡳ ᠈ ᠠᡤᡝ ᠪᠣᠣᡩᡝ ᡩᠣᠰᡳᡴᡳ᠈ ᠵᠣᠣ ᠪᠠᡳ᠈ ᠪᡳ ᡩᠣᠰᡳᡵᠠᡴᡡ᠈ ᠰᡳᠨᡩᡝ ᡤᡳᠰᡠᠨ ᠠᠯᠠᡶᡳ ᡠᡨᡥᠠᡳ ᠶᠣᠮᠪᡳ᠈ ᠠᡳᠨᡠ ᡠᡨᡨᡠ ᡝᡴᡧᡝᠮᠪᡳ᠈ ᡤᡡᠸᠠ ᠪᠠᡩᡝ ᡝᠮᡠ ᡤᡠᠴᡠ ᠪᡳᡶᡳ ᠮᡳᠮᠪᡝ ᠠᠯᡳᠶᠠᡥᠠᠪᡳ᠈ ᡧᠣᠯᠣ ᠵᠠᠪᡩᡠᡵᠠᡴᡡ᠈ ᠠᡳ ᡤᡝᠯᡳ᠈ ᡠᡨᡥᠠᡳ ᡤᡡᠸᠠ ᠪᠠᡩᡝ ᡤᡠᠴᡠ ᠪᡳᡥᡝ ᠰᡝᠮᡝ᠈ ᡨᠠᡴᠠ ᠮᡳᠨᡳ ᠪᠣᠣᡩᡝ ᡩᠠᡵᡨᠠᡳ ᡩᠣᠰᡳᡶᡳ ᡝᠮᡠ ᡥᡡᠨᡨᠠᡥᠠᠨ ᡤᡝᠩᡤᡳᠶᡝᠨ ᠴᠠᡳ ᠣᠮᡳᡶᡳ ᠵᠠᡳ ᡤᡝᠨᡝᡴᡳᠨᡳ᠈ ᠰᡳᠨᡳ ᡩᠣᠯᠣ ᠠᡩᠠᡵᠠᠮᡝ᠈ ᠪᡳ ᡩᠣᠰᡳᡴᡳ ᠰᡝᠴᡳ ᠠᡳᡶᡳᠨᡳ ᡠᡨᡥᠠᡳ ᡩᠣᠰᡳᠮᠪᡳᡴᠠᡳ᠈ ᡤᡝᠯᡳ ᠰᡳᠨᡳ ᠠᠨᠠᡥᡡᠨᠵᠠᡵᠠ ᠪᡝ ᠠᠯᡳᠶᠠᠮᠪᡳᠣ᠈ ᡨᡝᡵᡝ ᠠᠩᡤᠠᠯᠠ ᠠᡤᡝ ᡝᡵᡝ ᡩᡠᡵᡠᠨ  ᡳ ᠮᡳᠮᠪᡝ ᡴᡠᠨᡩᡠᠯᡝᠴᡳ᠈ ᠪᡳ ᡝᠮᡠ ᡩᠣᡵᠣ ᡤᡳᠶᠠᠨ ᠪᡝ ᡳᠨᡠ ᠰᠠᡵᡴᡡ ᠮᡠᠵᠠᠩᡤᠠᠣ᠈ ᠵᠠᠪᡩᡠᡵᠠᡴᡡᠩᡤᡝ ᠶᠠᡵᡤᡳᠶᠠᠨ᠈ ᠠᡤᡝ ᠰᡳ ᡝᠨᡝᠩᡤᡳ ᠠᡳᡴᠠᠪᠠᡩᡝ ᠮᡳᠨᡳ ᠪᠣᠣᡩᡝ ᡩᠣᠰᡳᡵᠠᡴᡡ ᠣᠴᡳ ᠪᡳ ᠶᠠᡵᡤᡳᠶᠠᠨ  ᡳ ᠰᡳᠮᠪᡝ ᡠᠰᠠᡥᠠᠪᡳ᠈ ᠪᡳ ᡨᠠᡴᠠ ᠰᡳᠨᡩᡝ ᡶᠣᠨᠵᡳᠮᠪᡳ᠈ ᠰᡳ ᡠᡵᡠᠨᠠᡴᡡ ᠮᡳᠮᠪᡝ ᡩᠣᠰᡳᠮᠪᡠᡶᡳ ᠮᡳᠨᡩᡝ ᠠᡳ ᠵᠠᡴᠠ ᡠᠯᡝᠪᡠᡴᡳ ᠰᡝᠮᠪᡳ᠈ ᠶᠠᡩᠠᡵᠠ ᠪᠣᠣ ᡴᠠᡳ᠈ ᠠᡳ ᠰᠠᡳᠨ ᠵᠠᡴᠠ ᠪᡳ᠈ ᡝᠮᡠ ᠮᠣᡵᠣ ᡠᠨᡨᡠᡥᡠᠨ ᠪᡠᡩᠠ ᡩᠠᡤᡳᠯᠠᡶᡳ᠈ ᠰᡳᠨᡩᡝ ᡠᠯᡝᠪᡠᡵᡝ ᡩᠠᠪᠠᠯᠠ᠈ ᡝᡵᡝᠴᡳ ᡨᡠᠯᡤᡳᠶᡝᠨ ᡤᡡᠸᠠ ᠵᠠᡴᠠ ᠠᡴᡡ ᡴᠠᡳ᠈ ᠰᡳᠨᡳ ᠪᠣᠣᡩᡝ ᠠᡳᡴᠠ ᠮᡳᡤᠠᠨ ᠶᠠᠯᡳ ᠨᡳᠣᠩᠨᡳᠶᠠᡥᠠ ᠶᠠᠯᡳ ᠪᡳᠴᡳ᠈ ᠪᡳ ᡩᠣᠰᡳᡶᡳ ᠵᡝᡴᡳ᠈ ᠠᡴᡡ ᠣᠴᡳ᠈ ᠪᡳ ᡩᠣᠰᡳᡵᠠᡴᡡ᠈ ᠪᡳ ᠠᠵᡳᡤᠠᠨ ᠴᡳ ᡠᠨᡨᡠᡥᡠᠨ ᠪᡠᡩᠠ ᠪᡝ ᠵᡝᠮᡝ ᡨᠠᠴᡳᡥᠠᡴᡡ᠈ ᠠᡤᡝ ᠰᡳ ᡩᠠᠮᡠ ᡩᠣᠰᡳᠴᡳᠨᠠ᠈ ᡠᠨᡨᡠᡥᡠᠨ ᠪᡠᡩᠠ  ᡳ ᡨᡝᡳᠯᡝ ᠰᡳᠨᡩᡝ ᡠᠯᡝᠪᡠᡵᡝ ᡴᠣᠣᠯᡳ ᡤᡝᠯᡳ ᠪᡳᠣ᠈ ᡠᡨᡥᠠᡳ ᠮᡳᡤᠠᠨ ᠶᠠᠯᡳ ᠨᡳᠣᠩᠨᡳᠶᠠᡥᠠ ᠶᠠᠯᡳ ᠵᡝᡴᡳ ᠰᡝᠴᡳ᠈ ᡳᠨᡠ ᡠᠮᡝᠰᡳ ᠵᠠ᠈ ᠠᠰᡠᡵᡠ ᠮᠠᠩᡤᠠ ᠪᠠ ᠠᡴᡡ ᡴᠠᡳ᠈ ᠪᠣᠣᡩᡝ ᠪᡝᠯᡝᠨᡳ ᠪᡳᠰᡳᡵᡝᠩᡤᡝ ᡨᡠᡨᡨᡠ ᠣᠴᡳ᠈ ᠰᡳ ᠨᡝᠨᡝᠮᡝ ᡩᠣᠰᡳ᠈ ᠠᡳ ᡤᡝᠯᡳ ᠮᡳᠨᡳ ᠪᠣᠣ ᡴᠠᡳ᠈ ᠪᡳ ᠨᡝᠨᡩᡝᠴᡳ ᠣᠮᠪᡳᠣ᠈ ᡝᠯᠵᡳᡨᡠ ᠠᠪᠠ᠈ ᠨᠠᡥᠠᠨ ᡩᡝ ᠰᡝᡴᡨᡝᡶᡠᠨ ᠰᡝᡴᡨᡝ᠈ ᡶᡳᠯᡝᡴᡠ ᡩᡝ ᠶᠠᡥᠠ ᠨᠣᠩᡤᡳ᠈ ᠰᡠᠨ ᠴᠠᡳ ᠠᠴᠠᠪᡠ᠈ ᡩᠠᠮᠪᠠᡤᡠ ᡨᡝᠪᡠᡶᡳ ᠪᡝᠨᠵᡠ᠈ ᠵᡝ᠈ ᠰᠠᡴᡩᠠ ᠮᠠᡶᠠ ᠪᠣᠣᡩᡝ ᠪᡳᠣ᠈ ᠪᠣᠣᡩᡝ ᠠᡴᡡ᠈ ᠠᠪᠰᡳ ᡤᡝᠨᡝᡥᡝ᠈ ᡝᠮᡠ ᡤᡠᠴᡠ  ᡳ ᠪᠣᠣᡩᡝ ᡝᠨᡝᠩᡤᡳ ᠮᡝᡨᡝᠮᠪᡳ ᠰᡝᠮᡝ ᠶᠠᠯᡳ ᠵᡝᠮᡝ ᡤᡝᠨᡝᡥᡝ᠈ ᡠᡨᡨᡠ ᠪᡝ ᡩᠠᡥᠠᠮᡝ᠈ ᠮᠠᡶᠠ ᠵᡳᡥᡝ ᠮᠠᠩᡤᡳ᠈ ᠰᡳ ᠮᡳᠨᡳ ᡶᡠᠨᡩᡝ ᠰᠠᡳᠨ ᠰᡝᠮᡝ ᡶᠣᠨᠵᡳ᠈ ᡳᠨᡠ᠈ ᠠᡤᡝ ᠮᡠᠰᡝ ᡨᠠᡴᠠ ᠰᡠᠯᠠ ᡤᡳᠰᡠᠨ ᠪᡝ ᠪᠠᡵᡤᡳᠶᠠ᠈ ᠰᡳ ᠠᡵᡴᡳ ᠣᠮᡳᠮᠪᡳᠣ᠈ ᠨᡠᡵᡝ ᠣᠮᠪᡳᠣ᠈ ᠶᠠᠶᠠ ᠣᡴᡳᠨᡳ᠈ ᡤᡝᠮᡠ ᠰᠠᡳᠨ ᡴᠠᡳ᠈ ᠪᡠᡩᠠ ᠪᠣᠣᡥᠠ ᠪᡝ ᡳᠨᡠ ᡥᠣᡥᡳᠯᠠᠮᡝ ᡩᠠᡤᡳᠯᠠᠪᡠ᠈ ᠪᡳ ᡴᡝᠮᡠᠨᡳ ᠠᠯᡳᠶᠠᡥᠠᡳ ᠵᡝᡴᡳ ᠰᡝᠮᠪᡳᡴᠠᡳ᠈ ᠨᡠᡵᡝ ᠠᠨᠵᡠ ᠪᡝ ᠨᡝᠨᡝᠮᡝ ᠪᡝᠨᠵᡠ᠈ ᡥᠠᡥᡳᠯᠠ ᠰᡝ᠈ ᠠᡤᡝ ᠰᡳ ᠸᡝᠰᡳᡥᡠᠨ ᡨᡝ᠈ ᡠᠪᠠᡩᡝ ᠰᠠᡳᠨ᠈ ᡨᡠᠪᠠᡳ ᠨᠠᡥᠠᠨ ᠨᡳᠣᠮᡝ ᡧᠠᡥᡡᡵᡠᠨ᠈ ᡨᡝᠴᡳ ᠣᠵᠣᡵᠠᡴᡡ᠈ ᠴᠠᠰᡳ ᠮᠠᠵᡳᡤᡝ ᡤᡠᡵᡳ᠈ ᠴᡝᠨᡳ ᠴᡳᡥᠠᡳ ᡨᡝᠴᡝᡴᡳᠨᡳ ᡠᠮᡝ ᡩᠠᡵᠠ᠈ ᠠᡤᡝ ᠰᡳ ᡩᠣᠰᡳᡶᡳ᠈ ᠪᠣᠣᡥᠠ ᠪᡝ ᠮᠠᠵᡳᡤᡝ ᡥᠠᠴᡳᡥᡳᠶᠠᠴᡳᠨᠠ᠈ ᡝᡳᠴᡳ ᠪᡠᠵᡠᡥᠠᠩᡤᡝ ᠴᠣᠯᠠᡥᠠᠩᡤᡝ ᠪᡝ ᠶᠠ ᠪᡝᠯᡝᠨᡳ ᠣᠴᡳ ᡥᡡᡩᡠᠨ ᡤᠠᠵᡳᡶᡳ ᠮᡝᠨᡩᡝ ᡠᠯᡝᠪᡠᠮᠪᡳ ᡩᡝᡵᡝ᠉ ᠠᠰᠠᡵᠠᡶᡳ ᠰᡠᠸᡝᠨᡳ ᠪᠣᠣᡩᡝ ᡝᠯᡥᡝᡴᡝᠨ  ᡳ ᠪᡝᠶᡝᡳ ᠵᡝᡴᡳ ᠰᡝᠮᡝᠣ᠈ ᠠᡤᡝ ᡝᡴᡳᠰᠠᡴᠠ ᡨᡝ᠈ ᠪᠠᠯᠠᡳ ᡠᠮᡝ ᡤᡳᠰᡠᡵᡝᡵᡝ᠈ ᡠᡨᡨᡠ ᠣᡳᠯᠣᡥᠣᠨ ᠪᠠᠯᠠᠮᠠ ᠣᡥᠣᡩᡝ᠈ ᡤᡡᠸᠠ ᡩᡝ ᠪᠠᠰᡠᠪᡠᡵᠠᡥᡡ᠈ ᡝᠯᠵᡳᡨᡠ ᠨᡠᡵᡝ ᡨᡝᠪᡠ᠈ ᡝᡵᡝ ᡝᠮᡠ ᡥᡡᠨᡨᠠᡥᠠᠨ ᠨᡠᡵᡝ᠈ ᠪᡳ ᠰᡳᠮᠪᡝ ᡴᡠᠨᡩᡠᠯᡝᡵᡝᠩᡤᡝ᠈ ᠰᡳ ᡠᡵᡠᠨᠠᡴᡡ ᠸᠠᠴᡳᡥᡳᠶᠠᠮᡝ ᠣᠮᡳ᠈ ᠠᡳ ᡤᡝᠯᡳ ᠰᡳ ᡩᠠᠮᡠ ᠮᡳᠮᠪᡝ ᡨᠠᡴᠠᠮᠪᡳᠣ᠈ ᡳᠨᡠ ᡤᡡᠸᠠ ᠠᡤᡝᠰᡝ ᡩᡝ ᡴᡠᠨᡩᡠᠯᡝᠴᡳᠨᠠ᠈ ᠮᡳᠮᠪᡝ ᡠᠮᡝ ᡥᠠᠴᡳᡥᡳᠶᠠᡵᠠ᠈ ᠪᡳ ᠰᡝᡵᡝᠩᡤᡝ ᠣᠮᡳᡥᠠᡳ ᠰᠣᡴᡨᠣᡵᠣ ᡩᡝ ᡳᠰᡳᠨᠠᡵᠠᡴᡡ ᠣᠴᡳ ᡳᠨᡠ ᠨᠠᡴᠠᡵᠠᡴᡡ ᠨᡳᠶᠠᠯᠮᠠ ᡴᠠᡳ᠈ ᡤᡝᡵᡝᠨ ᠠᡤᡝᠰᡝ ᠰᡠᠸᡝ ᡳᠨᡠ ᡠᡩᡠ ᡥᡡᠨᡨᠠᡥᠠᠨ ᠣᠮᡳᠴᡳᠨᠠ᠈ ᠠᡳᠨᡠ ᡤᡝᠮᡠ ᡠᡨᡨᡠ ᠠᠨᡨᠠᡥᠠᡧᠠᡵᠠ ᠮᠠᠩᡤᠠ ᠨᡳ᠈ ᠰᡳ ᠰᡝᡵᡝᠩᡤᡝ ᠪᠣᡳᡥᠣᠵᡳ ᠨᡳᠶᠠᠯᠮᠠ ᡴᠠᡳ᠈ ᠰᡳ ᠵᡝᡨᡝᡵᠠᡴᡡ ᠣᠴᡳ᠈ ᠠᠨᡨᠠᡥᠠ ᡳᠨᡠ ᠣᠮᡳᡵᠠᡴᡡ ᠰᡝᠴᡳᠨᠠ᠈ ᠪᡳ ᠠᡳᠨᡠ ᠵᡝᡨᡝᡵᠠᡴᡡ᠈ ᡝᠰᡳ ᠵᡝᠴᡳ᠈ ᠰᡠᠸᡝ ᡝᠮᡤᡝᡵᡳ ᠵᡳᡥᡝ ᠪᡝ ᡩᠠᡥᠠᠮᡝ᠈ ᡤᡳᠶᠠᠨ  ᡳ ᠵᡝᡨᡝᡵᡝ ᠪᠠᡩᡝ ᠣᠴᡳ᠈ ᡠᡨᡥᠠᡳ ᡝᠪᡳᡨᡝᠯᡝ ᠵᡝᡶᡠ᠈ ᠣᠮᡳᠴᡳ ᠠᠴᠠᡵᠠ ᠪᠠᡩᡝ ᠣᠴᡳ᠈ ᡠᡨᡥᠠᡳ ᠰᠣᡴᡨᠣᡨᠣᠯᠣ ᠣᠮᡳ᠈ ᡨᡝᠨᡳ ᡳᠨᡠ ᡩᠠᠪᠠᠯᠠ᠈ ᡝᡵᡝ ᡤᡝᠰᡝ ᡤᠣᠴᡳᠰᡥᡡᡩᠠᠮᡝ ᠪᠠᡳ ᡨᡝᡶᡳ᠈ ᡩᠠᡵᠠᠪᡠᡥᠠ ᡠᠮᠠᡳ ᠣᠮᡳᡵᠠᡴᡡ᠈ ᡳᠨᡠ ᠰᠠᠪᡴᠠᠯᠠᡵᠠᡴᡡᠩᡤᡝ᠈ ᠠᡳᠨᠴᡳ ᠮᡳᠨᡳ ᠨᡠᡵᡝ ᡥᠠᡨᠠᠨ ᠠᡴᡡᠨ᠈ ᠰᠣᡤᡳ ᠪᠣᠣᡥᠠ ᠠᠮᡨᠠᠩᡤᠠ ᠠᡴᡡᠨ ᠠᡳᠰᡝ᠈ ᠪᡝ ᠠᡤᡝ ᠰᡳᠨᡳ ᡩᠠᡵᠠᠪᡠᡵᡝ ᠪᡝ ᠪᠠᡳᠪᡠᡵᠠᡴᡡ᠈ ᡤᡝᠮᡠ ᡠᠪᠠᡩᡝ ᠵᡝᠮᠪᡳ ᠣᠮᡳᠮᠪᡳ ᡴᠠᡳ᠈ ᡝᠯᠵᡳᡨᡠ ᠠᠪᠠ᠈ ᠮᠣᡵᡳᠨ ᡩᠠᡥᠠᠯᠠᡵᠠ ᡠᡵᠰᡝ ᡩᡝ ᠨᡠᡵᡝ ᠣᠮᡳᠪᡠ ᠪᡠᡩᠠ ᡠᠯᡝᠪᡠ᠈ ᠠᠵᠠᠵᠠ᠈ ᠮᡝᠨᡳ ᠪᠣᠣᡳ ᠨᡳᠶᠠᠯᠮᠠ ᡩᡝ ᡠᠮᡝ ᠨᡠᡵᡝ ᠣᠮᡳᠪᡠᡵᡝ᠈ ᠴᡝ ᡤᡝᠮᡠ ᠣᠮᡳᠮᡝ ᠪᠠᡥᠠᠨᠠᡵᠠᡴᡡ᠈ ᡨᡠᠮᡝᠨ ᡩᡝ ᡝᠮᡤᡝᡵᡳ ᠰᠣᡴᡨᠣᡥᠣ ᠰᡝᡥᡝᡩᡝ ᠠᡩᠠᡵᠠᠮᡝ ᠮᡝᠮᠪᡝ ᡩᠠᡥᠠᠯᠠᠪᡠᠮᠪᡳ᠈ ᠰᡠᠸᡝ ᠮᡠᠵᡳᠯᡝᠨ ᠰᡳᠨᡩᠠ᠈ ᡥᡡᠸᠠᠩᡤᡳᠶᠠᡵᠠᡴᡡ᠈ ᠪᡳ ᡩᠠᠮᡠ ᠴᡝᠮᠪᡝ ᠯᠠᠪᡩᡠ ᠣᠮᡳᠪᡠᡵᠠᡴᡡ ᠣᠴᡳ᠈ ᡠᡨᡥᠠᡳ ᠸᠠᠵᡳᡥᠠ᠈ ᠠᡤᡝ ᠰᡳ ᠰᡝᡳᠪᡝᠨᡳ ᡩᠠᠴᡳ ᠨᡠᡵᡝ ᠣᠮᡳᡵᡝ ᠮᠠᠩᡤᠠ ᠨᡳᠶᠠᠯᠮᠠ ᠪᡳᡥᡝ ᡴᠠᡳ᠈ ᡝᠨᡝᠩᡤᡳ ᠠᡳᠨᠠᡥᠠ ᠨᡳ᠈ ᡠᠮᠠᡳ ᠣᠮᡳᡵᠠᡴᡡ᠈ ᠰᡳ ᠰᠠᡵᡴᡡ᠈ ᠪᡳ ᠨᡝᠨᡝᠮᡝ ᠮᠠᠵᡳᡤᡝ ᠣᠮᡳᡥᠠᠪᡳ ᠠᡴᡡ ᠪᡳᡥᡝ ᠪᡳᠴᡳ ᡠᡨᡥᠠᡳ ᠮᡳᠮᠪᡝ ᡝᠮᡠ ᡳᠨᡝᠩᡤᡳ ᡧᡠᠨ ᡨᡠᡥᡝᡨᡝᠯᡝ ᠣᠮᡳᠪᡠᡥᠠ ᠰᡝᠮᡝ᠈ ᠪᡳ ᡳᠨᡠ ᡝᡳᠮᡝᡩᡝᡵᠠᡴᡡ᠈ ᠪᡠᡩᠠ ᠵᡝᠮᠪᡳ ᠰᡝᠴᡳ ᠪᡳ ᠶᠠᡵᡤᡳᠶᠠᠨ  ᡳ ᠰᡳᠨᡩᡝ ᡳᠰᡳᡵᠠᡴᡡ᠈ ᠨᡠᡵᡝ ᠣᠮᡳᡴᡳ ᠰᡝᠴᡳ ᠰᡳ ᠮᡳᠨᠴᡳ ᠴᡳᠩᡴᠠᡳ ᡝᠪᡝᡵᡳ᠈ ᡨᡠᡨᡨᡠ ᠰᡝᡥᡝ ᠰᡝᠮᡝ ᠰᡳ ᡨᡝᡵᡝ ᡩᡠᡵᡠᠨ  ᡳ ᠣᠮᡳᠴᡳ ᠪᡠᡩᠠ ᠵᡝᡨᡝᡵᡝ ᠪᡝ ᡨᠣᠣᡴᠠᠮᠪᡳ ᠰᡝᡵᡝ ᠠᠩᡤᠠᠯᠠ ᠠᠮᠠᡤᠠ ᡳᠨᡝᠩᡤᡳ ᠰᡝ ᡩᡝ ᠣᡥᠣ ᠮᠠᠩᡤᡳ ᡠᡵᡠᠨᠠᡴᡡ ᡨᡝᡩᡝ ᡴᠣᡴᡳᡵᠠᠪᡠᠮᠪᡳ᠈ ᠪᡳ ᠰᡳᠮᠪᡝ ᡨᠠᡶᡠᠯᠠᡥᠠᠩᡤᡝ ᡤᡝᠮᡠ ᠰᠠᡳᠨ ᡤᡳᠰᡠᠨ ᠠᡴᡩᠠᠮᠪᡳᠣ ᠠᡴᡩᠠᡵᠠᡴᡡ ᠪᡝ ᠰᡳᠨᡳ ᠴᡳᡥᠠ ᠣᡴᡳᠨᡳ᠈ ᡝᡵᡝ ᡤᡝᠮᡠ ᠠᡤᡝ ᠮᡳᠮᠪᡝ ᡤᠠᠰᡳᡵᡝᠩᡤᡝ ᡨᡝᠨᡳ ᡠᡨᡨᡠ ᠵᠣᠮᠪᡠᡵᡝ ᡩᠠᠪᠠᠯᠠ᠈ ᡤᠣᠰᡳᡵᠠᡴᡡ ᠪᡳᠴᡳ ᠠᡳᠨᠠᡥᠠ ᠰᡝᠮᡝ ᡝᡵᡝ ᡤᡝᠰᡝ ᡤᠣᠰᡳᡥᠣᠨ ᡤᡳᠰᡠᠨ  ᡳ ᡨᠠᡶᡠᠯᠠᡵᠠᡴᡡ᠈ ᡩᠠᠮᡠ ᠪᡳ ᠰᡝᡳᠪᡝᠨᡳ ᠣᠮᡳᠮᡝ ᡨᠠᠴᡳᡥᠠ᠈ ᡝᠮᡠ ᡝᡵᡳᠨ ᡩᡝ ᡨᠠᡵᡤᠠᠮᡝ ᠮᡠᡨᡝᡵᠠᡴᡡ ᠣᠵᠣᡵᠠᡥᡡ᠈ ᡨᡠᡨᡨᡠ ᠸᠠᡴᠠ᠈ ᠰᡳ ᡩᠠᠪᠠᠮᡝ ᠣᠮᡳᡵᠠᡴᡡ ᠣᠴᡳ ᡠᡨᡥᠠᡳ ᠰᠠᡳᠨ᠈ ᡥᠣᠨ ᡨᠠᡵᡤᠠᡥᠠ ᡩᡝ ᠨᡝᠮᡝᠮᡝ ᡝᡥᡝ ᠣᠮᠪᡳ᠈ ᠪᡳ ᡤᡝᠯᡳ ᠰᡳᠨᡩᡝ ᡶᠣᠨᠵᡳᡴᡳ᠈ ᠰ ᡳᠨᡠᡵᡝ ᠣᠮᡳᡥᠠ ᠵᠠᡳ ᡳᠨᡝᠩᡤᡳ᠈ ᡝᡵᡩᡝ ᡳᠯᡳᡥᠠ ᠮᠠᠩᡤᡳ ᡶᡠᠶᠠᡴᡳᠶᠠᠮᠪᡳᠣ ᠠᡴᡡᠨ᠈ ᡶᡠᠶᠠᡴᡳᠶᠠᡥᠠᠩᡤᡝ ᡨᡠᠸᠠᡵᠠ ᠪᠠ ᠠᡴᡡ᠈ ᡨᡠᡨᡨᡠ ᠣᠴᡳ᠈ ᡝᡵᡝ ᡠᡨᡥᠠᡳ ᠨᡠᡵᡝ  ᡳ ᡥᠠᡵᠠᠨ ᠠᡤᡝ ᠰᡳ ᡝᡵᡝ ᠪᠠᡳᠯᡳ ᠴᠠᠰᡥᡡᠯᠠᡥᠠ ᠨᡳᠶᠠᠯᠮᠠ ᠪᡝ ᠵᠣᠨᠣᡵᠠᡴᡡ ᠣᠴᡳ ᠪᡳ ᡳᠨᡠ ᡶᠠᠨᠴᠠᡵᠠᡴᡡ ᠪᡳᡥᡝ᠈ ᠰᡳ ᡝᠮᡤᡝᡵᡳ ᠵᠣᠨᠣᡥᠣᡩᡝ᠈ ᠮᡳᠨᡳ ᡴᡳ ᡠᡨᡥᠠᡳ ᠸᡝᠰᡳᡥᡠᠨ ᠵᠣᠯᡥᠣᡶᡳ ᠪᡳᠯᡤᠠ ᠰᡳᠪᡠᡥᠠᠪᡳ᠈ ᡨᡝᡵᡝ ᡠᡩᡠ ᠠᠨᡳᠶᠠ ᡩᡝ ᡳ ᠮᡝᠨᡳ ᠪᠣᠣᡳ ᡩᡠᡴᠠᡳ ᠪᠣᡴᠰᠣᠨ ᠪᡝ ᡤᡝᠮᡠ ᡶᡝᠰᡥᡝᠯᡝᠪᡠᠮᡝ ᠮᠠᠨᠠᠪᡠᡥᠠ ᠪᡳᡥᡝ᠈ ᡝᡨᡠᡵᡝᠩᡤᡝ ᠠᡴᡡ ᠣᠴᡳ ᠮᡳᠨᡳ ᠪᡝᠶᡝ ᠴᡳ ᠰᡠᡶᡳ ᡳᠨᡩᡝ ᡝᡨᡠᠪᡠᠮᠪᡳ᠈ ᠪᠠᡳᡨᠠᠯᠠᡵᠠᠩᡤᡝ ᠠᡴᡡ ᠣᠴᡳ᠈ ᠮᡳᠨᡳ ᠮᡝᠩᡤᡠᠨ ᠵᡳᡥᠠ ᠪᡝ ᡤᠠᠮᠠᡶᡳ ᠪᠠᡳᡨᠠᠯᠠᠮᠪᡳ᠈ ᠵᡝᡨᡝᡵᡝᠩᡤᡝ ᠠᡴᡡ ᠣᠴᡳ ᠠᠮᠪᠠ ᡶᡠᠯᡥᡡ ᡩᡝ ᠪᡝᠯᡝ ᡨᡝᠪᡠᡶᡳ ᠮᡝᡳᡥᡝᡵᡝᡶᡳ ᡤᠠᠮᠠᠮᠪᡳ᠈ ᠠᡳᡴᠠ ᡝᠮᡠ ᠮᠣᡥᠣᡥᠣ ᠪᠠᡳᡨᠠ ᡨᡠᠴᡳᡴᡝᡩᡝ ᡠᡨᡥᠠᡳ ᠮᡳᠨᡳ ᠵᠠᡴᠠᡩᡝ ᠵᡳᡶᡳ ᡤᡳᠣᡥᠣᡧᠣᠮᡝ ᠪᠠᡳᠮᠪᡳ᠈ ᠠᡤᡝ ᠰᡳ ᠮᡳᠮᠪᡝ ᡠᠮᡝᠰᡳ ᠰᠠᡵᠠᠩᡤᡝ ᡴᠠᡳ᠈ ᡳᠨᡳ ᡨᡝᡵᡝ ᠪᠠᡳᡵᡝ ᡩᡝ ᠮᡳᠨᡳ ᠮᡠᠵᡳᠯᡝᠨ ᡤᡝᠯᡳ ᠨᡳᡨᠠᡵᠠᡶᡳ᠈ ᡠᡩᡠ ᠠᡴᡡ ᠪᡳᠴᡳᠪᡝ ᡳᠨᡠ ᡤᡠᠴᡠᠰᡝ ᡩᡝ ᠵᡠᠸᡝᠨ ᡤᠠᡳᡶᡳ ᡳᠨᡩᡝ ᠠᠴᠠᠪᡠᠮᡝ ᠪᡠᠮᠪᡳ᠈ ᠶᠠᠯᠠ ᠮᡳᠨᡳ ᠠᡳ ᠵᠠᡴᠠ ᠪᡝ ᡳ ᠵᡝᡴᡝᡴᡡ᠈ ᠠᡳ ᠵᠠᡴᠠ ᠪᡝ ᡳ ᡤᠠᠮᠠᡥᠠᡴᡡ᠈ ᡩᠠᠮᡠ ᠮᡳᠨᡳ ᡩᠣᡴᠣ ᠶᠠᠯᡳ ᠪᡝ ᡶᠠᡳᡨᠠᡶᡳ ᡳᠨᡩᡝ ᡠᠯᡝᠪᡠᡥᡝᡴᡡ ᠪᡳᡥᡝ ᠰᡝᡵᡝ ᡩᠠᠪᠠᠯᠠ᠉

ᡝᡵᡝ ᡠᠴᡠᡵᡳ ᠠᠪᠰᡳ ᡴᡠᠮᡠᠩᡤᡝ᠈ ᡥᠠᠩᠰᡳ ᡳᠨᡝᠩᡤᡳ ᠣᠵᠣᡵᠣ ᠵᠠᡴᠠᡩᡝ ᡥᠣᡨᠣᠨ ᠴᡳ ᠸᠠᠯᡳᠶᠠᡵᠠ ᠨᡳᠶᠠᠯᠮᠠ ᡨᠣᠨ ᠠᡴᡡᠩᡤᡝ ᡨᡠᠴᡳᡴᡝ᠈ ᡨᡠᠸᠠᠴᡳ ᠰᡝᠵᡝᠨ ᡴᡳᠶᠣᠣ ᠮᠣᡵᡳᠨ ᠯᠣᡵᡳᠨ ᡠᠮᠠᡳ ᠯᠠᡴᠴᠠᡵᠠᡴᡡ ᠶᠠᠪᡠᠮᠪᡳ᠈ ᠪᡠᡩᠠ ᡩᠣᠪᠣᡵᠣ᠈ ᠨᡠᡵᡝ ᡥᡳᠰᠠᠯᠠᡵᠠᠩᡤᡝ ᡳᠨᡠ ᠪᡳ᠈ ᠪᠣᡳᡥᠣᠨ ᠨᠣᠩᡤᡳᡵᡝ ᡥᠣᠣᡧᠠᠨ ᠵᡳᡥᠠ ᡩᡝᡳᠵᡳᡵᡝᠩᡤᡝ ᡳᠨᡠ ᠪᡳ᠈ ᡝᡳᡶᡠ  ᡳ ᠣᠶᠣ ᠪᡝ ᡨᡝᠪᡝᠯᡳᠶᡝᡶᡳ ᠰᠣᠩᡤᠣᡵᠣᠩᡤᡝ ᠰᠣᠩᡤᠣᠴᠣᠮᠪᡳ᠈ ᠮᠣᠣᡳ ᡶᡝᠵᡳᠯᡝ ᠪᠣᡵᡥᠣᠮᡝ ᡨᡝᠴᡝᡶᡳ ᠣᠮᡳᡵᡝᠩᡤᡝ ᠣᠮᡳᠴᠠᠮᠪᡳ᠈ ᠶᠠᠯᠠ ᡤᠠᠰᠠᡵᠠ ᠨᡳᠶᠠᠯᠮᠠ ᠪᡝ ᠰᠠᠪᡠᠴᡳ ᠮᡠᠵᡳᠯᡝᠨ ᡝᡶᡠᠵᡝᠮᠪᡳ᠈ ᠰᡝᠪᠵᡝᠯᡝᡵᡝ ᠨᡳᠶᠠᠯᠮᠠ ᠪᡝ ᠰᠠᠪᡠᡶᡳ ᡳᠨᠵᡝᡴᡠ ᠪᠠᠨᠵᡳᠮᠪᡳ ᠰᡝᠴᡳᠨᠠ᠈ ᡝᡵᡝᠪᡝ ᡨᡠᠸᠠᠮᡝ ᠣᡥᠣᡩᡝ ᠵᠠᠯᠠᠨ  ᡳ ᡠᡵᠰᡝᡳ ᠵᡠᠰᡝ ᠣᠮᠣᠰᡳ ᠪᡝ ᡠᠵᡳᡥᠠᠩᡤᡝ᠈ ᡤᡝᠮᡠ ᡨᠠᠩᡤᡡ ᠠᠨᡳᠶᠠᡳ ᠠᠮᠠᡤᠠ ᠪᠠᡳᡨᠠᡳ ᠵᠠᠯᡳᠨ ᡴᠠᡳ᠉

ᠠᡤᡝ ᠰᡳ ᠠᠪᠰᡳ ᡨᠣᡴᡨᠣᡥᠣᠨ ᠠᡴᡡ᠈ ᠴᠠᠨᠠᠩᡤᡳ ᠵᡳᠮᠪᡳ ᠰᡝᠮᡝ ᠠᡳᠨᡠ ᠵᡳᡥᡝᡴᡡ᠈ ᠴᠠᠨᠠᠩᡤᡳ ᡩᡝ ᠵᠠᠪᡩᡠᡥᠠᡴᡡ ᠣᡴᡳᠨᡳ᠈ ᠰᡳᡴᠰᡝ ᡤᡝᠯᡳ ᠠᡳᠨᠠᡥᠠ᠈ ᡤᡳᠶᠠᠨ  ᡳ ᠵᡳᠴᡳ ᠠᠴᠠᡵᠠᠩᡤᡝ ᡴᠠᡳ᠈ ᠠᡳᠨᡠ ᡤᡝᠯᡳ ᠵᡳᡩᡝᡵᠠᡴᡡ ᠨᡳ᠈ ᡝᠨᡝᠩᡤᡳ ᠣᠴᡳ ᠴᡳᠮᠠᡵᡳ ᠰᡝᠮᠪᡳ᠈ ᠴᡳᠮᠠᡵᡳ ᠣᡥᠣᡩᡝ ᠴᠣᡵᠣ ᠪᡝ ᠠᠨᠠᡨᠠᠮᠪᡳ᠈ ᡝᠨᡝᠩᡤᡳ ᠴᡳᠮᠠᡵᡳ ᠰᡝᡥᡝᡳ ᡳᠨᡝᠩᡤᡳᡩᠠᡵᡳ ᠨᡳᠶᠠᠯᠮᠠ ᠪᡝ ᡝᡳᡨᡝᡵᡝᠮᠪᡳᠣ᠈ ᠠᡤᡝ ᠰᡳ ᠣᠵᠣᡵᠠᡴᡡ ᡴᠠᡳ᠈ ᡝᡵᡝᠴᡳ ᠠᠮᠠᠰᡳ ᠵᠠᡳ ᡠᡨᡨᡠ ᡠᠮᡝ᠈ ᡥᠣᠯᡨᠣᠴᡳ ᡳᠨᡠ ᡩᠠᠮᡠ ᡝᠮᡤᡝᡵᡳ ᠵᡠᠸᡝᠩᡤᡝᡵᡳ ᠣᠴᡳ ᠣᠵᠣᡵᠣ ᡩᠠᠪᠠᠯᠠ᠈ ᡩᠠᡵᡠᡥᠠᡳ ᡥᠣᠯᡨᠣᠴᡳ᠈ ᠵᠠᡳ ᡤᡝᠯᡳ ᠰᡳᠨᡳ ᡤᡳᠰᡠᠨ ᠪᡝ ᠠᡴᡩᠠᡵᠠ ᠨᡳᠶᠠᠯᠮᠠ ᠪᡳᠣ᠉

ᠰᡠᠸᡝ ᡨᡝᡵᡝ ᠨᡳᠶᠠᠯᠮᠠ ᠪᡝ ᠠᠮᠪᠠᡴᡳ ᠰᡝᠴᡳ ᠶᠠᡵᡤᡳᠶᠠᠨ  ᡳ ᡨᡝᡵᡝᠪᡝ ᠮᡠᡵᡳᠪᡠᡥᠠᠪᡳ᠈ ᡠᠮᡝᠰᡳ ᡝᠮᡠ ᡠᠵᡠᡳ ᡠᠵᡠ ᠵᡝᡵᡤᡳ ᠨᠣᠮᡥᠣᠨ ᠨᡳᠶᠠᠯᠮᠠ ᡠᡨᡥᠠᡳ ᠨᡳᠶᠠᠯᠮᠠᡳ ᠵᡠᠯᡝᡵᡳ ᠰᡝᠮᡝ ᡳᠨᡠ ᠸᡝᡳᡥᡠᡴᡝᠨ ᡤᡳᠰᡠᡵᡝᡵᠠᡴᡡ᠈ ᡝᠮᡠ ᡤᡳᠰᡠᠨ ᠪᡳᠴᡳ ᡨᡝᠨᡳ ᡝᠮᡠ ᡤᡳᠰᡠᠨ ᠪᡝ ᡤᡳᠰᡠᡵᡝᠮᠪᡳ᠈ ᡳᠨᡳ ᠪᠠᠨᡳᠨ ᡠᡨᡥᠠᡳ ᡠᡨᡨᡠ ᡳᠮᠪᡝ ᠰᠠᡵᡴᡡ ᡠᡵᠰᡝ ᠣᠴᡳ ᡨᡝᡵᡝᠪᡝ ᡩᡠᡵᡠᠨ ᠠᡵᠠᠮᠪᡳ ᠰᡝᠮᠪᡳ᠈ ᠰᡠᠸᡝ ᡨᡝᡵᡝᡳ ᡝᠮᡤᡳ ᡝᠮᡠ ᠪᠠᡩᡝ ᠪᡳᡥᡝᡴᡡ ᠣᡶᡳ᠈ ᡨᡝᡵᡝᡳ ᠶᠠᠪᡠᠨ ᡶᠠᡧᡧᠠᠨ ᠪᡝ ᠰᠠᡵᡴᡡ ᡩᠠᠪᠠᠯᠠ᠈ ᠪᡳ ᡳᠨᡳ ᠪᠠᡵᡠ ᡶᡝᠯᡳᠶᡝᠮᡝ ᠶᠠᠪᡠᡥᠠ ᠪᡳᡥᡝ ᡩᠠᠪᠠᠯᠠ᠈ ᡳᠨᡳ ᠪᠠᠨᡳᠨ ᠪᡝ ᠰᠠᠮᠪᡳ ᠰᡝᡵᡝ ᠠᠩᡤᠠᠯᠠ᠈ ᠪᠠᠨᠵᡳᡵᡝ ᠸᡝᡵᡝ ᠪᠠᠪᡝ ᠰᡠᠸᠠᠯᡳᠶᠠᠮᡝ ᠶᠣᠣᠨᡳ ᡤᡝᠮᡠ ᡨᡝᠩᡴᡳᠮᡝ ᠰᠠᠮᠪᡳᡴᠠᡳ᠉

ᠠᡤᡝ ᠰᡳ ᡳᠨᡠ ᠯᠠᡵᡤᡳᠨ ᠪᠠᡳ᠈ ᡝᡵᡝᠪᡝ ᠪᡠᠴᡳ᠈ ᠰᡳ ᡳᠨᡠ ᡤᠠᡳᡵᠠᡴᡡ᠈ ᡨᡝᡵᡝᠪᡝ ᠪᡠᠴᡳ ᠰᡳ ᡳᠨᡠ ᡝᡥᡝ ᠰᡝᠮᠪᡳ᠈ ᠠᠮᠪᠠᡴᠠᠨ ᠨᡳᠩᡤᡝ ᠪᡝ ᠪᡝᠨᡝᠴᡳ ᠰᡳ ᡤᡝᠯᡳ ᠠᠮᠪᠠ ᠣᡥᠣ ᠰᡝᠮᠪᡳ᠈ ᠠᠵᡳᡤᡝᠰᡳ ᠨᡳᠩᡤᡝ ᠪᡝ ᠪᡝᠨᠵᡳᠴᡳ ᠰᡳ ᡤᡝᠯᡳ ᠵᠠᠴᡳ ᠠᠵᡳᡤᡝᠨ ᠣᡥᠣ ᠰᡝᠮᠪᡳ᠈ ᡠᡨᡨᡠ ᡩᡝ ᡳᠨᡠ ᠸᠠᡴᠠ᠈ ᡨᡠᡨᡨᡠ ᡩᡝ ᡳᠨᡠ ᠸᠠᡴᠠ᠈ ᠮᠠᡴᠠ ᠠᡳ ᡤᡝᠰᡝᠩᡤᡝ ᠪᡝ ᡨᡝᠨᡳ ᠠᡤᡝ  ᡳ ᡤᡡᠨᡳᠨᡩᡝ ᠠᠴᠠᠪᡠᠮᠪᡳ᠈ ᠰᡳ ᡠᡵᡠᠨᠠᡴᡡ ᡨᡝᡵᡝ ᡝᠮᡠ ᠠᡩᠠᠯᡳᠩᡤᡝ ᠪᡝ ᡤᠠᡳᡴᡳ ᠰᡝᠴᡳ᠈ ᠨᡳᠶᠠᠯᠮᠠ ᠪᡝ ᠠᡳᠪᡳᡩᡝ ᠪᠠᡳᡥᠠᠨᠠᠪᡠᡵᡝ᠈ ᠠᡤᡝ ᠰᡳ ᠠᠪᠰᡳ ᠮᡝᠨᡨᡠᡥᡠᠨ ᠵᡳᠶᡝ᠈ ᠰᡳᠨᡩᡝ ᠵᡳᡥᠠ ᠪᡳᠴᡳ ᠵᡳᡥᠠ ᠵᠠᡶᠠᡶᡳ ᠨᡳᠶᠠᠯᠮᠠ ᠪᡝ ᡩᠠᠩᠨᠠᠮᠪᡳ᠈ ᠵᡳᡥᠠ ᠠᡴᡡ ᠣᠴᡳ᠈ ᠰᠠᡳᠨ ᡤᡳᠰᡠᠨ  ᡳ ᠨᡝᠴᡳᡥᡳᠶᡝᠮᡝ ᠪᠠᡳᠮᡝ ᡤᡳᠰᡠᡵᡝᠮᠪᡳ᠈ ᡠᡨᡨᡠ ᠣᠴᡳ ᡨᡝᠨᡳ ᡳᠨᡠ ᡩᠠᠪᠠᠯᠠ᠈ ᠨᡳᠶᠠᠯᠮᠠᡳ ᡩᡝᡵ ᠰᡝᡵᡝ ᡧᡝᠶᡝᠨ ᠮᡝᠩᡤᡠᠨ ᠪᡝ ᠵᡠᠸᡝᠨ ᡤᠠᠵᡳᡶᡳ ᠪᡝᠶᡝ ᠮᠠᡩᠠᡤᠠᠨ ᠪᡝ ᠶᠣᠣᠨᡳ ᡨᠣᠣᡩᠠᠮᡝ ᠪᡠᡵᠠᡴᡡ ᠪᡳᠮᡝ᠈ ᡝᠯᡝᠮᠠᠩᡤᠠ ᠸᡝᡵᡳ ᡧᠣᡵᡤᡳᠮᡝ ᡤᠠᡳᡵᡝ ᠪᡝ ᠸᠠᡴᠠᠯᠠᠴᡳ᠈ ᡝᡵᡝ ᡤᡝᠯᡳ ᠣᠮᠪᡳᠣ᠈ ᡝᡵᡝ ᡠᡨᡥᠠᡳ ᡤᡡᠨᡳᠨ ᡨᡝᠪᡠᡥᡝᡳ ᠵᡠᠸᡝᠨ ᡤᠠᠮᠠᡶᡳ ᡨᠣᠣᡩᠠᠮᡝ ᠪᡠᡵᠠᡴᡡ ᠣᡴᡳ ᠰᡝᡵᡝ ᠨᡳᠶᠠᠯᠮᠠ ᡴᠠᡳ᠈ ᠠᡳᡴᠠᠪᠠᡩᡝ ᡤᡝᠮᡠ ᡠᡨᡨᡠ ᡝᡨᡠᡥᡠᡧᡝᡵᡝ ᡤᡠᠸᠠᠩᡤᡠᡧᠠᡵᠠ ᠣᠴᡳ᠈ ᠵᠠᡳ ᠸᡝ ᡤᡝᠯᡳ ᡤᡝᠯᡥᡠᠨ ᠠᡴᡡ ᠪᡝᡴᡩᡠᠨ ᠰᡳᠨᡩᠠᡵᠠ᠈ ᠰᡠᠸᡝ ᡝᠮᡠ ᡝᡵᡤᡳ ᡩᡝ ᠣᠴᡳ᠈ ᠮᡝᠩᡤᡠᠨ ᠪᡝ ᠪᠠᡳᡨᠠᠯᠠᡴᡳ ᠰᡝᡵᡝ ᠵᠠᠯᡳᠨ᠈ ᡝᠮᡠ ᡝᡵᡤᡳᡩᡝ ᠣᠴᡳ ᠮᠠᡩᠠᡤᠠᠨ ᠪᡝ ᠪᠠᡥᠠᡴᡳ ᠰᡝᡵᡝ ᡨᡠᡵᡤᡠᠨ᠈ ᠰᡠᡳ ᠠᡴᡡ ᠮᡝᠨᡳ ᠠᡴᡩᡠᠯᠠᡵᠠ ᠨᡳᠶᠠᠯᠮᠠ ᠪᡝ ᡠᡧᠠᠪᡠᡶᡳ ᠠᡳᠨᠠᠮᠪᡳ᠈ ᡝᡵᡝ ᡝᠮᡴᡝᠨ ᡳᠨᡠ ᠮᡳᠮᠪᡝ ᡥᡡᠯᠠᠮᠪᡳ᠈ ᡨᡝᡵᡝ ᡝᠮᡴᡝᠨ ᡳᠨᡠ ᠮᡳᠮᠪᡝ ᠪᠠᡳᠮᠪᡳ᠈ ᡩᠠᠴᡳ ᠰᡠᠸᡝᠮᠪᡝ ᠠᡴᡩᡠᠯᠠᡥᠠᠩᡤᡝ᠈ ᠰᠠᡳᠨ ᠮᡠᠵᡳᠯᡝᠨ ᠪᡳᡥᡝ ᡩᠠᠪᠠᠯᠠ᠈ ᠸᡝ ᠠᡳᡴᠠ ᠰᡠᠸᡝᠨᡳ ᠵᡝᡨᡝᡵᡝ ᠣᠮᡳᡵᡝ ᠪᡝ ᠠᠯᡳᠮᡝ ᡤᠠᡳᡥᠠᠪᡳᠣ᠉

ᠠᡤᡝ ᠰᡳ ᠠᡳ ᡠᡨᡨᡠ ᡤᡳᠰᡠᠨ ᡶᡠᠯᡠ᠈ ᠵᡳᡥᡝᡩᠠᡵᡳ ᠠᠩᡤᠠᡳ ᡩᠣᠯᠣᡵᡳ ᠪᡳᠶᠠᡨᠠᡵ ᠰᡝᠮᡝ ᠪᠠᠯᠠᡳ ᡳᠴᡳ ᡤᡳᠰᡠᡵᡝᠮᠪᡳ᠈ ᠰᡳ ᡳᠨᡠ ᠮᠠᠵᡳᡤᡝ ᡝᡳᠮᡝᡩᡝᡵᠠᡴᡡᠨ᠈ ᠠᠩᡤᠠ ᡳᠨᡠ ᡧᠠᡩᠠᡵᠠᡴᡡᠨ᠈ ᡤᡳᠰᡠᡵᡝᡥᡝᠩᡤᡝ ᡴᡝᠮᡠᠨᡳ ᡨᡝᡵᡝ ᡠᡩᡠ ᡶᡝ ᡤᡳᠰᡠᠨ  ᡳ ᡨᡝᡳᠯᡝ ᠪᡳᠮᡝ᠈ ᡝᠮᡩᡠᠪᡝᡳ ᠠᠯᠠᠮᡝ ᠸᡝᡩᡝ ᡩᠣᠨᠵᡳᠪᡠᠮᠪᡳ᠈ ᠰᠠᡴᡩᠠ ᠠᡥᡡᠨ ᠰᡳ ᠮᡳᠨᡳ ᡤᡳᠰᡠᠨ ᠪᡝ ᠰᡳᠵᡳᡵᡥᡡᠨ ᠰᡝᠮᡝ ᡠᠮᡝ ᠸᠠᡴᠠᠯᠠᡵᠠ᠈ ᠰᡳᠨᡳ ᠪᡝᠶᡝ ᠰᡝᡵᡝᠪᡠᡵᠠᡴᡡ ᡩᠠᠪᠠᠯᠠ᠈ ᡥᡝᡨᡠ ᠨᡳᠶᠠᠯᠮᠠᡳ ᡩᠣᠨᠵᡳᡵᡝᡩᡝ ᡤᡳᠰᡠᠨ ᠮᠠᠵᡳᡤᡝ ᠶᡝᠶᡝ  ᡳ ᡤᡝᠰᡝ᠈ ᠰᡳ ᡝᡵᡝ ᠰᡝᡩᡝ ᡠᡨᡥᠠᡳ ᡠᡨᡨᡠ ᠣᡳᠪᠣᡴᠣ ᠣᠴᡳ᠈ ᠰᡝ ᠪᠠᡵᡠ ᠣᡥᠣ ᠮᠠᠩᡤᡳ ᠠᡩᠠᡵᠠᡴᡡ ᠪᠣᠣ ᠪᠣᡳᡤᠣᠨ ᠪᡝ ᠵᠠᡶᠠᠮᡝ ᠪᠠᡳᡨᠠ ᠪᡝ ᡳᠴᡳᡥᡳᠶᠠᠴᡳ ᠣᠮᠪᡳ᠉