ᠰᡠᠮᠠᠨ ᠪᠣᠯᠵᠣᠨ᠈ ᠰᡝᡵᡤᡠᠸᡝᠨ ᠪᡝ ᡳᠰᡳᠪᡠᠮᠪᡳ
| ᡥᠠᠨ ᡳ ᠠᡵᠠᡥᠠ ᠠᠯᡳᠨ ᡳ ᡨᠣᡴᠰᠣ ᡩᡝ ᡥᠠᠯᡥᡡᠨ ᠪᡝ ᠵᠠᡳᠯᠠᡥᠠ ᡧᡳ᠉ ᠰᡠᠮᠠᠨ ᠪᠣᠯᠵᠣᠨ᠈ ᠰᡝᡵᡤᡠᠸᡝᠨ ᠪᡝ ᡳᠰᡳᠪᡠᠮᠪᡳ᠉ ᠴᡳᠩ ᡤᡠᡵᡠᠨ ᡳ ᡧᡝᠩᡯᡠ |
→ ᠯᡳᠩ ᡷᡳ ᡳ ᠵᡠᡤᡡᠨ᠈ ᡨᡠᡤᡳ ᡳ ᡩᠠᠯᠠᠨ᠉ |
| 烟波致爽 |
ᡰᡝ ᡥᠣ ᡳ ᠪᠠ ᡩᡝᠨ ᠰᡠᠯᡶᠠ ᠪᡳᠮᡝ᠈
ᠰᡠᡴᡩᡠᠨ ᡳᠨᡠ ᠪᠣᠯᡤᠣ ᡤᡝᡨᡠᡴᡝᠨ᠈
ᠰᡳᡤᠠᠨ ᡨᠠᠯᠮᠠᠨ ᠪᡠᡵᠠᡴᡳ ᠰᡠ ᠠᡴᡡ᠉
ᠯᡳᠣ ᡯᡠᠩ ᠶᡠᠸᠠᠨ ᡳ ᡤᡳ ᠪᡳᡨᡥᡝᡩᡝ ᡥᡝᠨᡩᡠᡥᡝ ᡠᠮᡝᠰᡳ ᡧᡝᡥᡠᠨ ᠰᡝᡥᡝᠩᡤᡝ ᡴᠠᡳ᠉
ᡧᡠᡵᡩᡝᡥᡝᠩᡤᡝ ᡩᡠᡳᠨ ᡝᡵᡤᡳ ᡩᡝ ᠰᠠᡳᡴᠠᠨ ᡩᠠᠪᠠᡤᠠᠨ᠈
ᠵᡠᠸᠠᠨ ᠪᠠ ᡳ ᠪᠣᠯᡤᠣ ᠪᡳᠯᡨᡝᠨ ᠪᡳᠰᡳᡵᡝ ᠵᠠᡴᠠᡩᡝ᠈
ᠰᡝᡵᡤᡠᠸᡝᠨ ᠰᡠᡴᡩᡠᠨ ᡳᠰᡳᠨᠵᡳᠮᠪᡳ᠉
ᡨᡠᡤᡳ ᠠᠯᡳᠨ ᡳ ᠸᡝᠰᡳᡥᡠᠨ ᠪᠠ ᡳ ᠵᡠᠯᡝᡵᡳ᠈
ᠨᠠᡩᠠᠨ ᡤᡳᠶᠠᠨ ᡳ ᠪᠣᠣ ᠠᠯᠠᡶᡳ᠈
ᡠᡨᡥᠠᡳ ᠰᡠᠮᠠᠨ ᠪᠣᠯᠵᠣᠨ ᠰᡝᡵᡤᡠᠸᡝᠨ ᠪᡝ ᡳᠰᡳᠪᡠᠮᠪᡳ ᠰᡝᡵᡝ ᠪᡳᠶᠠᠨ ᠠᡵᠠᡶᡳ ᠯᠠᡴᡳᠶᠠᡥᠠ᠉
ᠠᠯᡳᠨ ᡳ ᡨᠣᡴᠰᠣ ᡩᡝ ᡴᡝᠮᡠᠨᡳ ᡥᠠᠯᡥᡡᠨ ᠪᡝ ᠵᠠᡳᠯᠠᠴᡳ᠈ ᠴᡳᠪ ᠰᡝᠮᡝ ᡝᡴᡳᠰᠠᡴᠠ ᠣᡶᡳ ᠠᠰᡠᡴᡳ ᠵᡳᠯᡤᠠᠨ ᡴᠣᠮᠰᠣ᠉
ᠠᠮᠠᠰᡳ ᡴᠠᡵᠠᠴᡳ ᡤᠣᡵᠣᡴᡳ ᡥᠣᠯᡩᠣᠨ ᠠᡴᡡ᠉ ᠵᡠᠯᡝᠰᡳ ᡝᠩᡤᡝᠯᡝᠴᡳ ᡥᠠᠨᠴᡳᡴᡳ ᡥᠣᠯᠣ ᠪᡠᠶᡝᠴᡠᡴᡝ᠉
ᠨᡳᠶᡝᠩᠨᡳᠶᡝᡵᡳ ᠪᡝᡩᡝᡵᡝᠮᡝ ᠨᡳᠮᠠᡥᠠ ᠪᠣᠯᠵᠣᠨ ᠴᡳ ᡨᡠᠴᡳᠮᡝ᠈ ᠪᠣᠯᠣᡵᡳ ᠪᠠᡵᡤᡳᠶᠠᠮᡝ ᠨᡳᠶᠣᠩᠨᡳᠶᠠᡥᠠ ᠶᠣᠩᡤᠠᠨ ᠪᡝ ᡥᡝᡨᡠᠮᠪᡳ᠉
ᠶᠠᠰᠠ ᡩᡝ ᡨᡠᠩᡤᠠᠯᠠᡵᠠᠩᡤᡝ᠈ ᡤᡝᠮᡠ ᡝᠨᡩᡠᡵᡳ ᠣᡵᡥᠣ᠈ ᡶᠠ ᡳ ᡳᠰᡥᡠᠨ ᠰᠠᠪᡠᡵᡝᠩᡤᡝ᠈ ᠪᡳᡵᡝᡨᡝᡳ ᠣᡴᡨᠣ ᡳᠯᡥᠠ᠉
ᡶᡳᠶᠠᡴᡳᠶᠠᡵᠠ ᡝᡩᡠᠨ ᡳ ᡠᠴᡠᡵᡳ ᡳᠨᡝᠩᡤᡳ ᠰᡝᡵᡤᡠᠸᡝᠨ ᡳᠰᡳᠨᠵᡳᠮᠪᡳ᠈ ᠰᡳᡵᡴᡝ ᠠᡤᠠ ᡳ ᡠᠴᡠᡵᡳ ᡩᠣᠪᠣᡵᡳ ᠣᠮᡝ ᡨᡝᠨᡳ ᠰᡳᡵᠠᠨᡩᡠᠮᠪᡳ᠉
ᠨᠠ ᡥᡠᠸᡝᡴᡳ ᡳ ᠵᠠᠯᡳᠨ ᠵᡠᡵᡠ ᠰᡠᡳᡥᡝ ᠪᠠᠨᠵᡳᠮᠪᡳ᠉ ᡧᡝᡵᡳ ᡳ ᠵᠠᠨᠴᡠᡥᡡᠨ ᡳ ᠵᠠᠯᡳᠨ ᡴᠠᡶᡠᡵ ᠰᡝᡵᡝ ᡥᡝᠩᡴᡝ ᠪᡝ ᠵᡝᠮᠪᡳ᠉
ᠵᡠᠯᡤᡝᡳ ᠨᡳᠶᠠᠯᠮᠠ ᡩᠠᡳᠨ ᠪᡝ ᠪᡝᠯᡥᡝᠮᡝ ᠠᠨ᠋ᡶᡠᠯᠠᠮᠪᡳᡥᡝ᠈ ᡨᡝ ᡳ ᠴᠣᠣᡥᠠ ᠪᡠᡵᡝᠨ ᠪᡠᡵᡩᡝᡵᡝᠩᡤᡝ ᠨᠠᡴᠠᡥᠠ᠉
ᠪᠠᠨᠵᡳᡵᡝ ᡩᠣᡵᠣ ᠰᡝᠴᡳ᠈ ᡠᠰᡳᠨ ᡥᡡᡩᠠ ᡳ ᠪᠠᡳᡨᠠ᠈ ᡳᡵᡤᡝᠨ ᠴᡳᠰᡠᡳ ᡳᠰᠠᠨᠵᡳᡥᠠᠩᡤᡝ ᡨᡠᠮᡝᠨ ᠪᠣᠣ ᡩᡝ ᡳᠰᡳᠨᠠᡥᠠ᠉