ჸოროფას მერიებუნი
ჸოროფას მერიებუნი -- დიხას ფერი მუთუნ ვარე!
ჸოროფა რე შანქარ-ჰამო, ჸოროფა რე შხამი ნწარე.
თიში ნძალი საშიში რე, მუჭოთ ბერდენაში ტყვია,
თისჷ ოკო მოთხილება, სალაჸაფო ვა რე ძია!
თიში მიშალაფას უჯგუ, ფურე ტყვიას მეურდენი!
თიში ეკოჸუნას უჯგუ, ტერენს ტყვეთი მეჸუნდენი.
ვა გოკონი თის ქორღოლანს, შეგარცხვინენს ხიოლით:
ჭლექიშა გემშაგიჸონანს გურიშ ჭუა-რსიოლით.
დიდას, მუმას შეგიწუხენს, მოჯგირეს გოგიჯოგუანს,
ბოლოს მიშოთ შირცხვინინი თით სქანი ძვირსჷ ქოთქუანს!
ბოში
ცირა, ღორონთ ვა გიჩქჷნო, სქან ჸოროფათ იბჭუქჷნი?
სქანი შორიშე მეჯინათ, ჩილამურით იბრძღუქუნი!
ჸოროფაშ გემო ვა მოძირი, დოპჭვი, მუჭოთ გოკოდუნი!
უკულ ვიშო მიკირთი დო ვორწყექ გური მიჸორდუნი.
ცირა
ბაღანურო მუქ იჸუნი, ვართი ღირუ იშ გოშინა.
ანწ იცალი ჸოროფაშის სრულ ვარიას მუგოშინა.
ბაღანური ბუძღოლია, კუკლა-მოჭყუდობაია!
კერიცია, ჸორიცია, ვორერაშა, დუმბაია!
ენა ჩქინი ონჯღორე რე, სქანო ქორდა, ჯიმაია!