ჯოხოს ვეგგოდვა

From Wikisource
Jump to navigation Jump to search
please do not remove empty parameters (see the template documentation).
ჯოხოს ვეგგოდვა
by ზაალ ჯალაღონია

გასიმაფალო ვამოკოდი, გასინათალო,
ჸვერე უკმელა ნოთეშე რე თაქ გიშნაულა.
დუდ დიტყობინე, ქუმოძირი უკულ ტატალო,
ჸათე თოლეფქჷ დღასჷ ვაძირას სქანი წაულა...

გვაბანჲ მუნაფა დღაშე-დღაშა მუჭო ირდუდუ,
გჷთაციმალი მუ უღუდუ, სი მუ მერჩუკო?
მიკორტყაპუდი დო ცაშჷ იშო მიკმოდინუდი,
თე დიხაუჩა სქანი უმშო მუჭო გერდუკო?!

გონიარაფა ქუდოუჭყაფ ჭვემას ამსერი,
მუთ წიკვილი რდუნ ირფელ ოკო გოტანტალუას.
სი ჩქიმდე გოკო, ხოლო ართშა ლერსიშჲ ლეცერი,
დო უკულ ართო, ჩქი ქიდიბჭყანთ ცაშე ფალუას.

სანცხვარებელცჷ ქიმეირჩქინეს ართი აბანი,
ჯოხოს ვეგგოდვა, თეში ქორდა მიკოფულირი.
ეკანჩურალი მიჯინენა ტობა-ლაბანი,
დიო ჩქინ ბორჯი ხოლო ვარე თაქჷ მულირი.

კირდეს მუკვობუქ, ჸათე გარამცჷ ინნაშულედი,
ხეს ქომკინდუანც ჩხორია დო კინე გეშულუ,
ონოფულე რე, თაქ ირფელი, გვალო წკულეტი,
ჸეთი დღას ფხვამა სქან ჸოროფაქ მუჟამც მესურუ.

გოცვათელიე ბინეხეფი მუკოჭყვინგილი,
მიჯინენა დო ორაგადეს ღვინო წირუნა.
მა სქანჲ ჸოროფაქ დომინწკირუ ჸათე ჸვინგინი,
თაქ ვეძირუდა, ცაში იშო ხომ ირფელც ძირუნა.

ჸვას მუნოფაფრთხჷ ასე თე დღა ნარღით შვაპილი
ლურგოტახილი თოლეფც ცასჷ ელუზიმუა.
უშქურჲ მომიღუ თელარაში, მუთუნქ ვაპილუ,
ჭარაქ მუმარზუ შხანიშჲ ეფშა გვერიშჲ ციმუა.

ქუმკონჯირელე ზორბაქჲ ნირსი, აკოფირსილი,
მუჭო თირანა ართიანცჷ ხუმლა, ლადირი.
არძა წყარმალუს ქოკათაფუ ჩქიმი ზისხირი,
კინე მოურცჷ, ის ვაჯოხო მეშულადირი.

გოლაწკარელი შარა მებუ ცაშა ჟინორი,
იჭყაფ კარუა, ოწონდეშე ხოლო ირდუქუ.
მურიცხეფიშე იჸუაფუ თუდო ციმორი,
ცაშჲ ატატასჷ ულას შურო ქინკობწირდუქუ.