ჯოდორიდო
დუდით დო თოლით
თინა გჷდ ზევსის,
ვალი - გურგინიშ
ემაჸათამალს,
ასა - გასათჷ არესის დო
კიდირითჷ პოსეიდონსჷ, -
ზღუეფიშ მაფასჷ...
ჰომეროსი
პროლოგი
მითაჟამშე ომურიცხე
ირიათო ირსიოლ,
ბჟა, თუთა დო მურიცხეფი
მიკიონტ დო მიქიონ...
მურიცხეფიშ და დო ჯიმა,
ნარდი ბჟა დო თუთაში,
თე ცაშ თუდო, მითინ რენო
ხანო კოლხიშ უნჩაში...
რშჷდას ირო, მუთი რდჷნი,
ამდღა ხოლო თინა რე,
"მუთი რენი, თინა იჸი,
მუთ იჸინი, თინა რე"...
თუთა დიხას მუკი გართუ,
მეხენია, მიქ მიგონ,
თავრე შურო ვარჩქჷ მუჭო
მირულე დო მითირხონ...
ომურიცხეშ ჭურჭული რდჷ
ჩქინ პლანეტა ირონი,
მილიარდი წანეფი
-მუმულიშ ართ ჸიონი...
გასორებულ ვორდით, დიხას,
ადამიშ სქი გართუდუნ,
ველუდითო, თინა კინე
აშო დიხას დართუდჷნ...
საარიკოქ ქუმოხვად,
ბრელი ბორჯის ვამკურთუმ:
ადამიშ სქიქ ჩქინ თუთაშა
რაკეტათი გოქურუნ...
მალას შხვათ გიაჸუნუ
არმსტრონგიში ნოქურის...
ასე ირკოს შეულებუ
რაკეტაშა მითულა,
მუშ პიანით კოსმოსიში
ოძირაფშა გილულა...
დიხაქ დირცხუნ ეთევრეშე
კოლხეფ ირო თაქ ორე,
თინეფიში ყვისქილეფი
სი რექჷ დო მა ვორექ...
კოლხეფიში აშინება
შჷდეს ტუტანჰამონეფს,
ეგვიპტეში ფარაონეფს,
რომიშ იმპერატორეფს...
უღორებუ ისტორია
ამდღა მითინს ვაღორენს...
შუმერ, კართაგენურემქ,
ფინიკურემქ, ეტრუსკემქ
ქიმკოდინეს, მედინეს,
თაქ ნოქურო ქიდიტეს...
იროიან დორულაფათ,
თოლ დოწკურე, დირულეს,
ბორჯი კინე, ჯვეშობურო
მიჭუმინ დო მირულე...
ბორჯშა მითინს ვეწარინე,
ბორჯშა სინთეს ვაწორე,
კოლხი ღორონთქ გინატუ,
ღორონთიშით, თაქ ქორე...
თე დიხაშ ჟი, ჩქინ მახანა
კოჩ მითინი ვამნორე,
შხვეფიშ მონძე ვეპალუ,
ჩქი, იშენით თაქ ვორეთ...
ჩქინ ვეეფიშ, გვალეფიშ,
ზღუაეფიშ მინჯე ვავორეთ,
მარა იშენ თაქ ვორეთ,
ნტერიშ ჯინშენ, თაქ ვორეთ!..
რინი ჩქინი მურენდა
-წყარ ტკიბირით ცირილი...
ელსამეთის ქიმკუხაკე
-გოინჯეს და მინილი...
სქან შურ დიხას ვენტირედა
სი ჟი ცაშა ფურინი,
ღორონთიში მორდებათ,
ღორონთიში შქურინით...
სოვრე მოფრთით, სო მეურთ,
ბჭუნა შურიშ გოლოფა,
თე გოლოფას გინმოტენა
დიხაშ ჩქინიშ ჸოროფა...
გურ ვეტახა, რთხინქ, მაკინე
ქუმარჩქილე მა სი- ნი
-ჯგირობუათ დჷგართუ
ჯგირობუა თასინი...
მიშ ხესჷ რე კოლხიშ ჸუდე
ორთვალ გინოწკანტილი,
ჸვანა- მიკოწკანტილი დო
ოზე - კინოწკანტილი...
მინალ ხიბა, ბირკულეფი,
თოლოჰამათ ღაფილი,
ომანდარნე დო ოთხირე
სქვამას გითოცალირი...
მარგალს ასე თინა ოკო
მუშ დოხორე რდასჷნი,
ოხანდილეს ჩქიჩქუეფი
ოხიოლეთ რდასჷნი...
მუშ გამნარყიქ კოჩანაში
ყორშის გჷმადირთანი...
ნტერ - მოჯგირე უჩქუდანი,
ქჲანას გჷმადირთანი...
ცაშ ქაქაბშე ირჩქილე
ტურტურუეშ ხონარი,
ბრელი ჸუნსჷ ჯოლორიდოს
ელმარინჯი, მოხვარე...