ჯიმალეფი ხურცილეფი!
| ჯიმალეფი ხურცილეფი! by [[Author:ვახტანგ ქობალია|]] |
„ოდეს მტერსა მოერიო,ნუღარ მოკლავ,დაიყოვნე; გინდეს სრული მამაცობა, ესე სიტყვა დაიხოვნე!“– შოთა!
1.–ალიოშა.
ალიოშა ხორციში მაღაზიას ხანდენდ,სოდეთ ლიმუაში გერგეზი მელტონი ქანთარია დირექტრენდუ!
ალიოშაშა მუაჩქიმი მა მოჩქვანდ ხორციშა, მუჟამსუთ მუთუნი სუფრა ინწყუაფუდუნ მინშა თეში ხოლო, ოჯახიში საჭიროებაშო.
თი ჟამს,მუჯა წულაიაში ჭყოლოფუათ,სოხუმარეფი გიმორძღელი ვორდით საქონელიში ხორცით დო სელეგინით!
მუშო ოკო თეს რაგადი დო თენა იფრელი თი პლენუმშახ რდუ, ნამუქუთ საქორთუოში ემაჭყვიდირალი,ჩე თომაჩირქალი მიონ გვალო უნჩაშონ!
თიში გახენწიფებაში უკული იფრელქ გეძვირ!
ქრთამქ ხოლო!
მედინ ჟირმანათიანი სელეგინქ!
ონარტებელქ იუ ჟირმანათი დო ჟირი შაურიანი ხორციქ ხოლო!
ართშახ,თი უსახელოში მოულაშახ, მუმაჩქიმქ ხორციშა მიდმოჩქვუ ალიოშაშა:
–ხორციშა მუმოშკვეს...
–აბა აქ შხვა მუთუნი ვძუნ სი ხოლო ქოიჩქ! ასე ხელათ.–ქოთქუ დო საწყობშა მინილ.
მა ვეველუდინ თიში მამალას, ქარღათის მეკირილი ხორცი ქუდმოკუნუ ხეს.
მა მადლობა მუვოშინი დო ეჩდოხუთი მანათიანი ქიგლუდვი დახლიშა დო მალას გიმებლი მაღაზიაშე.
უდეს მუაჩქიმქ ეონ:
–თენა რენო წიე ვითი კილო? მუშენი ეწოუღი ზედმეტი?თეშმადიდა გირინი ოკო ვაგინაფულენდენიო ვითი დო ეჩი კილოს?
გებწონით დო მართალო ეჩი კილოქ იუ!
–ონჯღორე ვაიჩქუნო,ქიხვამილე ეჩი კილო ხორცი დო მალარულათენ? არძოში უკლაში ვითოშკვითი მანათი დარკი!
სი ვაიჩქუ მუ გაჭირებულოიანი გითნარდი რენა ალიოშა დო მუში ჯიმალეფი?
დიდაქ ადრე დოუღურეს დო ობოლობაში დო შხვა ირფელი უბედურობა აფუნა გინნაღელი! ა სი ეჩი მანათი დო აუცილებელო დოურთინე ფარა დო უწი ვეჭოფდა–უკოხოლე დოირთინუანშო ხორცის!
მა მაღაზიაში კილუას ჟირი წუნით მევოჭიშე.
–ვარლამიში ბოში,ხოლო გოკონო ხორცი?
–ვარ! მუმაჩქიმქ გეგნმოოთ უშურეთ! ხორცი გეწონ დო განსხვავება მოიჯღონ,ა,ეჩი მანათი!
გიშნაგორა ხორცის მარძენა დო ფარა დუვარკათიაო?
–სასწაული კოჩიე მართალო მუმასკანი! ცოდა რე თეჯგუა კოჩი კოლმეურნეობაში თავმჯდომარეთ ორენ! თიში ადგილს მაღილიტარი დო ჯიბგირი კოჩიე საჭირო! მალას ეჩი წანა იი უდექ ვამგათებინესუნ!
მუასკანი პაპათ ოკო ორდას! (მუ დრორდუ –პაპაში პატიოსანობა საეჭვო ვარდუ). თაქ თიჯგუა კათა მოურს, ჯგირი გომორძგუაში ღირსი ვარენან დო არძოს უფასოთ ოკონა ხორცი.
მუმასკანშე, ჩქი ჯიმალეფს, ბრელი ჯგირობუა ფშუნა! ჩქინი გურშენი ბრელშა შეწუხებე დო უფარეთ არშა ხოლო ვოუღალ ხორცი!
თში უკული, მა დო ალიოშას,თეჯგუა გაუგებრობა ვამობრთუმუნა...
მიკილ გვარიანი ხანქ დო ჩილი დო ქომონჯი, მუნეფიში ოზეს ქინავილეს...
ბაღანაქ სასწაულო გინასკიდუ!
2.–დურუ.
–„თი სახენწიფო,ნამუსუთ ვაგმარინე თიჯგუა ბოშეფიში ნიჭი დო სამართლიანობაში გრძნობან–გაწირულიე!.“–თქუ მუმაჩქიმქ,მუჟამს „საბჭოთა აფხაზეთის“ წეკითხ ცნობა, დურუში რხუალაშენ...
თე ამბე ჩქინი ოჯახიქ,განსაკუთრებულო მუმაჩქიმქ,კვირდიში დინაფაცალო შიწამუ!
დურუშე წიგნიქ გიშართ დო კინოქ იუ გინოღალირქ!
მა ვართ მიკითხირ დო ვართ მიჯინუ,მარა თაქ მუსუთ ბთქუანქუნ თენა ვეცილებ–ვართ წიგნის დო ვართ კინოს!
იპუაფუდი მაჟია–მასმა კლასის!
მუმაჩქიმი საბჭოში თავჯდომარეთ რდუ!
უდეშა ონჯუას,სამსახურიში უკული,მაკითხანდ მუაჩქიმს ფრიმულამი კოჩი დო მუში სკუალეფიში საყალოს ეჩიებუდ:
სკუალეფი ვამიჯერა, დიდაონერი გოფურაფილი ფეჩქის ქიგიოხუნუეს,მეძობელს სულუგუნი მიოხირეს, კოლხოზიში ახალდორგუაფილი მანდარინიში ნერგეფი მიხირეს დო შხვა მუთუნს!
–სკანი ბრალიე იასონი,სკანი ბრალი! სი უდეს ვენორექ, ბაღანეფს ვაკონტროლენქ,ვაგოინტერეს სკოლას მუს ორთუნან,ოხირშა ხოლო სი გიოწურუანქ დო ათოუსისინუანქ,მუჭოთ სკანი ბოშეფქ მიწისუნ! პედაგოგეფი რაგადანა დურუს სარკო ნიჭიორი რნია...
ასე მირაგადუქ სკოლა ინტერნატიშა მუმონწყუაფევან! მი მიკაჯინე სკანი სკუალეთს სკანი უჯგუშო ვარდა მის ოკო ოკოდას სკანი სკუალეფი სკანი უმოსო?
...ათეჯგუა უგუთებ რაგადშა ბრელი მირჩქილუ მა ხოლო!
მიკილ გვარიანი ჟამქ...
ლენინიში საიუბილეო, უბედინერესი წანა მიბურსანდ!
მუაჩქიმი ასე კომეურნეობაში დუდი კოჩი რდუ დო ფრევალს ანგარიში დო გინოგორუაში კრება უღუდუ!
ვითი წუნიში დოჭყაფილი ვარდუ კრებან თეში,მინილ დურუქ! პრეზიდუმს დუდიში დოქინცაფათ სალამი ქოუწუ! შაყარელი ყაზაყეფს მარძგვანით!
თაქი კარიში ჩარჩოს, ცალხუჯი ქიმკაპონ დო კრებაში გათებაშა კუჩხისგერნელო ურჩქილ!
ჩქინი სომეხი ჯიმალეფი, ნამუთ უმეტაში რდესუნ,მუშობურა რიხით ვეშურთუმნა ზიტყვაშა დო ტრადიციულო ვაჩიულენდეს–ჩქი სომეხეფი ბხანდენთ, ქორთუეფი ზარმაცენა დო შხვა პრეტენზიეფი...
ხუმაში მეჩამაქ ხოლო „ედინოგლასნო“ იუ!
გამგეობაში წევრეფი ვათირელე მითინი,
„...მუაჩქიმქ შკა ოზეს,„მუში ბოშეფწკმა“ გერნელი დურუშა მიაკინ. დურუქ ხოლო აშო ქაწაზადუ:
–მუჭო რექ დურუ,მუთუნი ხომ ვაიჭირს?
–მა მუთუნი ვამიჭირს! ბოშეფქ მიწის ართგანი სომეხობა „პერევაროტის“ ონწყუნსია დო თიშენი მობრთი! ქიგმაშინ სკანი ზუკოლქ .მუმაჩქიმშე ვაფშუ თიზმა!
ქიგმაშინუ,ბაღანობას მანდარინიში ნერგეფი იბხირი დო მაიორი ძველაიაქ დო თქვა მორთით უდეშა. მა შიშით ლოგინიში თუდო იბტყობინ...
ძველაიაში მორქიებული ჩექმამი კუჩხის,მუჭო ტექნიკურო სკანი კუჩხი აწოუხვამილენ! მა ლოგინიში თუდოშე ირფელს ვორწყედი.
მა გირინი ხომ ვავორექ,თეჯგუეფი გიბჭყოლიდუენი?
ათეჯგუა კოჩიშენი, მა ჟირი საათი მივოდინუენ „გრეხო“ ხომ ვამათვალუ?
გაჯუდეს ართიანს დო დურუქ მუში შარაშა მიდართ დო მუაჩქიმქ „მომაგრებული“ სუმარეფიში ხოლო უმოსი მოსმანგარებელო გაბზადებულ–გახაზირებული სუფრაშა ქიმიპატიჟუ!
დურუში მაჟირა ეპიზოდი.
ზარხულიე!
გევორექ ბარათასკუაწკუმა,ავტობუსიში გიოცადებელს!
დურუ ხოლო ქუჩაში მელე გერე!
შორშე გომორძგუა ქუწით ართიანს!
თაქ ჩქიმი მეძობელი ვალოდია კილასონია ტაქსიში ჭოფუას ოცადუ მარა, მითინქ ვაგაჩენდ!
სოხუმს ხუთოში ტაქსი გილერულედ მარა,შოფერს ვაკოდუდა,ჟირმაგი ფასიშა ხოლო ვაიონანდუ!
ვეგიოდირთ ვალოდიაში გასაჭირს საშველქ...
თეს უჯინე დურუ,მა დო ბრელი შხვა!
თე დროს ნოღაში ცენტრიშა უჭოფუდ პიჯინ ფერი ტაქსიქ გაჩენდ!
ვალოდიაქ სუმმაგი ფასი მიარზუ...
შოფერქ ვარია უგამუ!
დურუქ ტაქსის წოხოლეშე აწოულუ დო შოფერშა ქიმერთ. ტაქსისტიქ იფირქ–მარაგადაფშა მურსია მარა,კონწარო მეჩირთ:
–სუმმაგის გარზენს კოჩი დო მუშენ უწი ვარი?
–მოკონდა იპონანქ მოკონდა ვეპონანქ!–ჯიქურო თქუ ვოიჭარექ.
დურუქ ოალიში ქოუხვამილუ დო აშო გეთოზინდუ. ხოლო ჯგირი სინჩხეშენი კარიში სარკე ბოლოშა რდუ გონჯამილი ვარა უჩათ მიდეშ თიში საქმე... წელშახ გეთოზინდუნ თიმწკმა ღვარუ ვოიჭარექ:
–ლადნო ატვიზუ...
შოფერქ სოიშახ უკახალე გამთოზინდ მუში ტანინ, იზმა ხანს, დურუქ წოხოლენი ადგილს ქიდოზოჯუ დო დომძახეს ვალოდიას დო მა:
–ვოურთო თავისუფლებაშა? ტაქსისტ ვაას პროსიტ ოჩენ!
ებყარით...
–ამდღა სოვრე მა გიწინქუნ,თევრე მიდამიონანქ! ამდღარი ღეჯობას ძვირო დოიხუნუანქ! დიო თენეფი გეკიონი თავისუფლებაშა დო უკული მა გიწინქ სო იბდათუნ!
სკანდა სახენწიფოს ვაუჩუქებ ტაქსი!
კათას ოკო მემსახურენ თიშენი მიკოხექ რულს!
კოჩი სუმმაგის გარძენდ!
ართი სახენწიფოს დო ჟირი სი!
ვაიბაღუდუო?
ჩქიმი ჭიშკარწკმა გაჩერებაფუ.
–გითილი დო კარი გოუნჯი!–უწუ ტაქსისტის.
თენა რდუ პირველი დო უკანასკნელი მომენტი მუჟამსუთ მა ტაქსისტიქ კარი გომინჯუნ.
დურუს მა მადლობა ქოუწი დო ჯგირობუა ქუდოუჩინი.
ტაქსიქ ვალოდია უდეშა მიდეუნ!
3.– მიტუშა.
ონჯუაში სკოლაშა, სოდეთ მა თიჟამს ბხანდენდინ,ქუმორთ სკვამი მეჯინელი დო თაში სკვამას მიკოქუნელი კვანწილი კოჩიქქ!
–მა მიტუშა ვორექ,ხურცილავა. ალიოშა დო დურუში ჯიმა!– ხე გეიწუღით ართიანს დო გათავისუფალება ქიმუვახვამი.
–ჯიმაკათაქ „ჟიგული“ მაჩუქეს! მარა, მა „პრავა“ ვამიღუ. ავტოსკოლას, ბრუო კლასიში მოწმობა ვარა ოკო გიღუდასია! მუჭოთ ფშუნ,მა მაბრუო კლასიშახ ვართ ოკო ვორდე მეჭირინაფილი...ოკო ქიმმეხვარე მუდგათ იინ...
დიდი ფირქიში უკული „საშველქ“ დიგორ...
გამოცდილი საქმეში მმართველქ,ნამუქუთ მიფირქ „საშველინ“–საბუთი დოცაცურუ!
მიტუშაქ საბუთის ქიგაჯინ დო უკოხოლე დომირთინუ:
–მუ იღირუაფ თე საბუთი დო თქვანი რისკი?
–რისკიში ფასი, სკანი ჯგირკოჩანა რე დო თე საბუთი, სკანი მომავალი ბედინერი რინაში „პუტიოვკა“ ქოოფედას!–ვუგამი მა.
–მა ჟირი წუნშა დიბრთუქ!–ქოთქუ დო საბუთი დომირთინუ.
მართალო ჟირი წუნს ხოლო ვამკურთუმ დო მიტუშაქ დო ჟირ ბოშიქ მინილეს.ჟირხოლოს ჟი–ჟირი ცელოფანიში ეფშა პაკეტეფი უკებუდეს ხეს... –სო გოფაფჩათ სუფრა?
–მიტუშა პატონი,ხომ ქორთხი,მუთუნი ვარე საჭირო,მაქი?
–შხვანერო მა თი საბუთის ხეს ვემებთხუნქ! მა მუმასკანიში სკუაშა ფარა ვემმარზიებე დო თაში ვარა ქომუჩი ნება,სკანი პატიცემა გინიბგენ!
თაში ემოკინაფუ ჟირხოლო ხე მიტუშა ხურცილაქ!
სუფრაქ, დასურო ხვეიანქ იუ, სუმი ბოთილი,სუმი მურიცხიანი კონიაკიქ გვალო ტატალქ იუ!
ირო შკირენული პედაგოგეფს, გოუხვიჩონდეს თოლეფქ!
თეში უკული მა მიტუშას ვეშაფხვალამუქ...
თავრობაქ ირფელ ქიმინ მიტუშაში განადგურებელო...
ვახტანგი ქობალია „ნოსტალგიით შობილი“–შე ნათანგა 26 პირელი 2019 წანა.