ჯამუ დო კოკეეხეში ლერსი
| ჯამუ დო კოკეეხეში ლერსი by |
| მაკარ ხუბუა. მეგრული ტექსტები. ტფილისი 1937. |
ღორონქ თიშენ დჷმაბადუ,
ვალდებულება ვათუე.
მართალ კათა ვა დამიჯერს,
მა სიმართე ვა ქოფთქუე.
საზოგადოს მო გიცხადენთ,
ჯარი გაკომიკათუე.
ათე შაყარუაშ დროს
თენა ქაშაიკათუე.
თაქ ასე მა მუგოშინანთ
ჯამუქ ჭოფუ ართი ჩხუნი,
მაჟირა დღას კოკეეხექ
ქემერთჷ, შეხვეწუ დო თხუნი:
"ჯამუ, პატონ, სი ჭოფიო
ოთიფურეს ჩქიმი ჩხოუ?
მუმეხვარი, ქომჭყოლოფი,
გვერდ თუთა რე გინი ხოუ.
დიარუა გინს ვა უჩქუ,
გინქ დიდა მიითხუუ,
მიდგა ორდე გურს მერჭუნს,
უძუძურო მიირყუუ.
ჯამუ
წორეთ ჩხოუ მა ოპჭოფი,
მიკომკირუ ბაწარით.
უსუდეთ ვე მიმაჩე
თქვა თიზუმა მაწვალით.
გიჩქუდას ვითი დღა ორე
პის სადილი მანწარით.
ზარალი ოკო გეპწყენი
ათე ჩხოუ მაჭვალით.
კოკეეხე
ჯამუ, პატონ, ჩხუ ქომუჩი,
ნუ მოძირა თე ცოდას!
გინი შქირენს დომიღურუ,
დიდას ძუძუქ მეჭყორდას.
ნაზარალუ ხეს მიირთვი,
ფარა, მუსხი გოკოდას.
ვარა თაში განწირენქო,
კოჩქ მუთუნი შერცოდას?
ჯამუ
აბა, უჯინი, თე ოსურს,
მუს რე თაქ გერდგაბალანს?
ჩქიმი ჸვანას ვაარწყენო,
თეშ მაფართა, მაგანასჷ!
ჩქიმ ზარალი ვეჲაჭკირე
ხუთი კოჩი მაგანამსჷ
ვარა მინი გეუჯირდჷ
ხუთი თე-ცალი მაგვანამს!
კოკეეხე
ჯამუ, პატონ, ქაარწყექო,
კონი თქვანდა დიიფრთინი,
მუმოჯინი ოსურობას,
კოჩური ქუდი გიითვინი.
ჩქიმი ჩხუში ნაზარალი
ართი ჟირო მიირთვითი,
უზურს ზომა გედვალირი,
ხესჷ ფარა მიირთვითი.
ჯამუ
ოსური რექ, მუ გიწუა!
კოჩი რდენი, ხოლო შხვა რე.
მუთ გიწინი, ათენა რე,
ჩქიმი გურსუ ჸოროფა რე.
ქიქუნქუდა -- ჩხოუს მერჩა,
ბაწარი უღუნ, ჩხორო-ფა რე.
ვარ-და, ეში ვე მჷმაჩე,
ჩქიმი გურს გოლოფა რე.
კოკეეხე
ფუი, ჯვარი აქორობას!
მათურქიში ონთირალი!
ჯამუ, მა თაშ ქუვორდიო
სქან ოსურიშ ოთირალი?
სქან ოსური ზისუნახე,
სი ლეკურიშ ოჭკირალი.
მიშქიდანქ-და, შორს ვა გაფუქ
ცხენსჷთ ვა̄კო ოთხი ნალი.
ჯამუ
ასე ჩხოუს მეუკინი,
რადგანს მენდი ქომუჩინი.
ეცალ ჩხოუს ეჩის მერჩა,
ოღონ კოჩო ქომიჩინი.
ჭუმე თექი მეურქო დო
ცხად ჸოროფა გომირჩქინი.
კოკეეხეს მუში ჩხოუ
მეჸუნსჷ დო მეჩქარენს,
სიკოიაქ ქეშეხვადუ,
ურაგადუ მეშარეს.
თითო-თითოთ ქოუწუ
დო პიჯალა დოჭარეს.
სიკოია
თო, ძღაბი, ქუმორთუ-და,
გეკუბაკუნქ ოფარეს!
სი მანგარო დაასქიდი,
დოურკიე მოხვარეს.
ჩქი თექინე იპიით
ტყობინელი ოსქალეს.
მაჟია დღაქ გოთანდუნი,
ჯამუქ გახოლეს თაქ.
გოღანერი პიჯალაშე
ფიქრენს, ვა ძირას შხვაქ.
მარა ტერს თი ცალი რინა,
ჯამუს გიოდირთჷ დღაქ!
მოჯგირეში საწყინქი დო
ტერიშ გაძიცინაფალქ.
მუჭო წესრიგი ორდუნი,
ხე ქემეთხუ მოჯგირეს.
კოკეეხექ მიოძახუ:
მუმეხვარით, მორჯგინეს!
ყარაულენქ გეურჩქინდჷნ,
ჯამუ ძირეს ოჭინეს.
რტინა მიინდომუ, მარა,
ოჭოფეს დო დონჯგვილეს.
კოკეეხე
ამუდღა სი მუმაკათი,
ვარდი ჩქიმი ნაჭანეფი!
ოჭკომალო მინორჩქუე
ჩქიმი ცალი საწყალეფი.
სუდშა მიდგოჩაკალუა,
გეგონენა ვაჭარეფი,
სქანი ოკირალო მოკო
მაკარიაშ ბაწარეფი.
ჯამუ
სი ურჯულო, მუშენ ბღოლი
თე საქმეში ეწუალა!
სუმარს თაში ოკოდუო,
სი ოხერი, მოწუალა!
ნებით იღი მუთ გოკონი,
ონჯღორე რე თე რჩუალა!
კოკეეხე
სიფარშივე გემტკიცებუ,
დირაკილი ნინას თქუა.
დუსუ ლაფიქ გინგოწიუ,
მუჭო თოლენს უფაფუა!
გისოფუა გიხართუა,
სუდშა მიდგოჩაკალუა.
შქაშ-მალუ
იმენდი რე მიღენთინი,
პატიოსანი ნათხუას!
დო პიჯალა მუჭო რდუნი,
ჯამუ ტყურას ვა თქუანს.
თეს ხანი რე ურჩქილექ
თქვან თეზუმა ლანძღუას.
მირიგით, ნუ ინებენთ
საქმეშ აკოხანძღუას!
კოკეეხე (ჯამუს)
ბრელი სიტყვას ნუმ რაგადა,
ნუ იჩიებუქ ბოდიშის!
სასახელოთ დუგობაღუ,
ოსური რჸუნს ოდიშის.
ქუმურსუნი, დოგილენს,
ქორღალანს ობისქის.
დო კეტიში ნაბეზას
ქოჲძირუნა ოჭიშის:
-- თოლი, მუჭო რე გაღოლუნი,
თელო დიხაშ ოთხორალი!
ორჩინელშე მუქ გაღოლუ,
სი დაჩხირიშ გაარზამუ.
მუ კოჩი გუგობუძოლუნ დო
მინი ღობერს გინოჯანუ.
შქაშ-მალუ
გიოშაკანალი რენო
კოჩიშ მომავალი ბედი?
გეშაკანს ვა უჯგუნო,
ჟირი ზიტყვათ დიიხენდი.
ნაჩალნიკიშა ნუ მერჸუნა,
ჭა-ხანს აშო დიფრთათ.
პატიოსანი კათა რეთ,
გულია ჩაჩაშა მიფშვად.
გულია ჩაჩა
მირიგით, ბაბა სქუა,
დაჩხირი ვა რე უშქირატ.
ხორციელი ჸოფუ, ვარი
ქრისტე ვა რე უჩილათ,
მუჭო რიგი დო წესინი,
სახარებას ურჩქილათ,
დანაშური მეუტუათ,
ჯგირი საქმეს უძინათ.
მოციქულენქ გილართეს,
შესწორებას ქიმეჩეს.
ოში მანათი ხეს ფარა
კოკეიხეს მიართვეს.
ჯამულეთის მოწონებუ
კოკეიხე ჯგირი-ცალო.
სიფარშივეთ გილჷნოვე,
მინოჩქუე ჩილი-ცალო.
ბოლოს ჯამუს მეურთუმუ,
უგუმორსე ვირი ცალო.
ჯამულეთი ქორქია რე,
ჯვეში დროში ვაჭარი რე.
კოკოხეში რკიალი დო
სიკოიაშ ღაჭალი რე.
ვალიკო ხარბედია. 1921