ხომ მაღელვებს მე ასე
Jump to navigation
Jump to search
| ხომ მაღელვებს მე ასე ავტორი: ტერენტი გრანელი |
ხომ მაღელვებს მე ასე
თეთრი ფიქრის თარეში.
სხვა პოეტი ვერ დასწერს
ლექს ოთახის გარეშე.
და ზეციდან - ეს ღმერთი,
და გულიდან - ეგ სისხლი.
და ვარ თითქმის ყოველთვის
განწყობილი ლექსისთვის.
მიწა, ცა უმაღლესი, -
ხომ პოეტის გულია.
და მგონია მე ლექსი
ყველგან გაბნეულია.
გული შენთვის გავწირე,
ირგვლივ ვხედავ რაღაცებს.
წუხელ ლექსი დავწერე,
დღეს გადამაქვს ქაღალდზე.