ჭყორი დო სკვინჩა
| კატუშ ოკობურიწუა by |
| http://www.kolkhoba.org/margtksk.htm |
ართშახ ჭყორქ დო სკვინჩაქ თქუეს: ”დებჯიმალათ დო ართო იფცხოვრათია”. ჭყორიქ უწუუ სკვინჩას: “მორთი, გვიმარონას ვიშენათ ყუდე, ბლომათ თიფი ქიგვორღვათ; ტიბუთი მაყუაფუნა დო მითინსით თოლის ვაარაგუუნია. თიშ უჯგუში არდგილ სოთინ ვამაძირენანია”.
სკვინჩაქ: “ვარ თექ გვერეფი ოპჭკომუნა; გვერეფქ ვაპჭკომესდა, კოჩეფი დაჩხირის ქიმემჩანა. მა თექ ვამაცხოვრენია”.
-ჯიმაია, ვაგაშქურინედას! თექიანი გვერეფი დო კოჩეფითი მიჩინენა, მითის ჩქინდა ფურიშ ქიმინუა ვემეენდომებუნია, -თქუ ჭყორიქ.
-სი მუს იჩიებუქ, ჯიმა ჩქიმი, კოჩის დო გვერის ფურიშ მეტი მუთა შეულებუნა, მა თინეფიშე ჯგირობუას ვეველუქი. მორთი, თაში ფქიმინათ: ბუდე ზღაპიჯს გეეპკეთათ! ზღაპიჯს ართი ჯგირი ჭყონიშ ჯა ქომიჩქუ. ეთი თეში მანგარი დო თეში ძალიერი რე, მითის ჩქინდა მუთა აღოლენ. ათე ჯას ვიშენათ ყუდე დო იფცხოვრათ ოდო შემილებუნა!
ჭყორის ვემეეწონუ სკვინჩაში ნაქთუელეფქ დო უწუუ: “ვარ, ჯიმაია, ბორიაქ ზღვა გეოიდიდორუკონი დო ჯა მიდაღალაფუკონი, ჩქი მუს ფქიმინუნთი, სო ვურთი? მორთი დო მა ფთქვინ ეში ფქიმინათ!”
-ჯიმა ჩქიმი, სი თიჯგუა შქურინჯა რდინი, ვამიჩქუდუ. მა მითიშა ვამოშქურუ, გოკონდა, ზღვასთი გოფჩოლანქია. მა ფთქვინ თეში ფქიმინათ, თუთულა ვარდავა! უწუუ სკვინჩაქ.
დიდხანს იდეეს ჭყორიქ დო სკვინჩაქ. ართი “თაში ფქიმინათია!” მაჟირა -“ვარ, ათაშია!” მუდგარენქ ითქუ, ქითქუ, მუდგარენქ იყუუ ქიყუუ. დობახეს გაკოჭკომეს ართიანი დო იდეს მიდგას სოდგა ოკორდუ თიმ არდგილიშა.
ჭყორქ იდუ დო გვიმარონას მიშილუ, გეეკეთუ ბუდე, უკული დიჩილუ, ბაღანეფი გაამრავლუ. მუში ცხოვრებას მუთა ორკუდუ. მარა ართ დღას კოჩეფქ ჯოღორეფით მორთეს დო ონტინეს საწყალი ჭყორი. მარა ნტინას გეგაფილი ქორექდა, განტინე. გვიმარონას ცხოვრენდუნ, ჭყორის ფურინუა გაჭყონდუ დო: ევფურინავა ფიქრენდუნი, ოყოთეს დო დოყვილეს. თიშ გურშენი ლაზეფს ათეჯგუა ნათქუელ უღუნა:
თელ ზღვა მიკიბლი, ხინჯი ვა რე; ჭყორი დოყვილი, ჩიტი ვა რე!
აწი შხვა სკვინჩაში დომისქიდეს. სკვინჩაქთი იდუ დო უჩქუდუნ თიმ ჯას ბუდე ქიგედგუ დო ცხოვრენდუ ჯგირობუათი დო გახარებით. ჭყორიში ამბე გეეგუნი, დახე ძიცათი დოღურუ, თეში ახიოლუ ჭყორი ყვილესნი, თეში მეეწონუ მუში დუდინ, დუდიშ ცქვაფა დო ხვამა ქიდიჭყუ: “მა ჩქიმი ჭკუათი დო ნძალათი მაფათ ვაგოფრთიდა ვე იყიი!” მუში სიტყვეფი ღორონთიქ გეეგონუ დო ქუდუძახუ ჭვინა დო ბორიას. ბორიაქ ზღვა გეიოდიდორუ, კირცხი დო ჭვიმა სკვინჩაშ ბუდეს ქიგიოტახუ, ცა გურგინუნდუ. სკვინჩაქთი, “მუდგარენი ვორექია”, გამნირთუ დო ეუკინუ კუჩხეფს ეშე. მუშ ოსურქ: “ე კოჩი, შურო გეხანგიავო ათეჯგუა ტაროზის!” სკვინჩაქ: “ოსურ ძღაბი, გვალო უჭკუო რექ!” ვაარწყექო, ცა ეკირთუუ დო მა მიკეებუნია!” მარა სკვინჩას ცაქ ვადააკინუ. ზღვაქ ეკართინუ ათე ჯა დო მიდეეღუ. სკვინჩაქ ონტინალი შარა გორუ. ოკორდუ ეფურინუკონი, მარა ვეიაფურინუ, გვალო შუ რდუ. ჭიჭე სკვინჩაქ დიდი ზღვას აკათუ.
სკვინჩაქ ნტინა ოკორდუ, ვააფურინუ, შუ რდუ. გური დიდი უღუდუ, ჭიჭე რდუნი, ვაშუდუ.
თაში ითეებუ ჭყორიშ დო სკვინჩაშ ცხოვრება. ჭყორიქ გვიმარონას, სკვინჩაქ წყარის ძირუ მუში ღურა.