ჭყონი (გიორგი ხულორდავა)
Jump to navigation
Jump to search
მის უჯინექ, თე ბორჯიში მენდული,
სქან ნერჩიქჷ, ნიტე, მუშენ ვაფალუ?
ხვათახვალე სო რექ მიკოტებული?
ჩილამური ჸალეფც გჷგავარკალუ.
წირეფიო წიფორ-წიფორ ფუცქინჷ,
მაქადარი მასქურჲ გირქენც გოთანას,
ჭეჭეთობას ამსერჲ ღურუქ უჯინუ,
ვარ-და, ორდოს ვათანძარაშჲ გორაფას.
ბრელჲ ჭუა რე, მინჲ ბონი დო ირიბი,
კოლხაშჲ თანჯი დიხას ქიმთაჭაბარეს,
მუჭო ართ შვანც სქან ორქოში კირიბი,
ასე თია პიჯშე გეგოტყაბარეს.
სო რექ, ჭყონი, ოდაბადეშ ოხვამე?
მუშო გოკო ცოდა-მარდიშ კითხირი,
ფარანჲ ჭვილი, ოჸვილარჲ დო ოხამე,
ტანც მიშებორჯ სქან ცოტნეში ზისხირი.
მის უჯინექ, თე ბორჯიში მენდული,
სქან ნერჩიქჷ, ნიტე, მუშენ ვაფალუ?
ხვათახვალე სო რექ მიკოტებული?
ჩილამური ჸალეფც გჷგავარკალუ.
2014 წანა, ღურთუთა.