ჭეჭეთობა

From Wikisource
Jump to navigation Jump to search
please do not remove empty parameters (see the template documentation).
ჭეჭეთობა
by გური ოტობაია
ჰოუნანა, პოეზია, ერთტომეული, თბილისი, 2008 წ.


ჭიჭიკელა, მერეკელა, ინტელა,
თე რინა რე მინჷ ღურა დო მინჷ _ თელა,
გერნელჷ ვორეთ ოდინაფალჷ შარას დო
ნტერიშჷ ჯინშე, არქა, ვედიჸვინთელა!
ჭიჭიკელა, მერეკელა, ინტელა.

ტატაჩია, ტატურელი, ტატალი,
ყებურს ღუმუს ქუდუჭყაფუ ჭყვარტალი,
დიდაშჷ ხელეფს უჯინენა მარდუეფჷ,
ბონჷ შარაშა ბრელჷ რე გიშაჭვართალი.
ტატაჩია, ტატურელი, ტატალი.

ოფოფორე, ფოფორია, ფაფარუ,
კინოხონიშჷ ნერჩი მოთაქ გაფარუ,
სოთინჷ მუთუნჷ ვეძირებე ოხორსუ,
აბრაგიშჷ დო გერიშჷ გიონთხაფარუ.
ოფოფორე, ფოფორია, ფაფარუ.

კიკორია, კიკოდემი, კოკორო,
ქიდოიტესო მაღაზეფი ხოკორო?
გინორთექო მათუნთიაშჷ მანგურო?
გინორთექო ჸუჯეფო დო ნოჸორო?
კიკორია, კიკოდემი, კოკორო.

შიბა რენი, იშიმბორი, იშიმბე,
ჯგირჷ დო სქვამით ჩილი გეგმოხიშიმბე,
მუჟამს იჸინჷ ქეკატახა კვინჭიხეს,
მუჟამს იჸინჷ ეგებ ძალამს დიშიმბე,
შიბა რენი, იშიმბორი, იშიმბე.