წერილი მამანტის
| წერილი მამანტის by |
| მამანტი კვირტია. "კვიმატი" 2001 წ.ხ 46-47. |
გამარჯობა ჯვეში ბოში, მუგახვამი წანა ოში,
ქარწყექ ჩხუპის გემობრძგვით, კათა ვორეთ ასე შნოში,
გერმანია ქობჯღერკით, მუჭოთი მამედაში ქოში
დო ზეიმენც ჩქინ ქიანა დიდი გომორძგუაშ დროში.
წერილქ დემეგვიანუ დო გური გაჸი ალაჭვილი,
ჩქიმი მამანტი ქორექჷ-და, მემიტე ათე კილი,
თესჷ თაში ქობღოლანქ-და, დიფუჩეე აბა ჩილი,
ვარ დო გურცუ მიჸონანქ-და, ალაქვაშა ქომინტყილი!
გოღა თაქი ქოჸოფექი ქომიწიის, ქჷგებგონი,
კისერიშა გეგინჩურუ სორდიეფიში ფართო ფონი,
ზუგიც აშნორისინუექ, მუჭოთ ტყასჷ რჩინი ჭყონი,
ვამიძირენი ეთიშენი დადი ჩქიმიში ქიმეიჯღონი!
წიე გვალო წართჷმექი, ჭკუა მუქუ გეგიფაჩ,
ნაჭყებიაში დიარას იასონ გულუა დოიგანჩ
სტოლიში თუდო ჯოღორეფი წაკინდებენი დოიქანჩ
ალბათ მოგინდომებუ ვარა, ჯუა ჯოღორქ მუშე გაჩ.
ირო გასაკვირი საქმე სქანი დუდიშა მუშე მურცუ!
ჯგირი დღას ვაგაღოლე, ირო შერხვადჷქ ფურცუ,
ართი დიხას ვეცადჷქ, ქარა მიგოგჷნო ქურცუ,
მუთუ თაქი გეკინწყანი, არძო ართო სქანი შურცუ.
სკოლაში დირექტორი ჸოფექ ართინერო მახიოლ
მიქ დარნიშნჷ ცოდაში ჭვილქ, მის რე დუცუ მარსიოლ,
ჩხოროწყუსუ კოჩი გოჭყვადე, თექ ჸოფენო ეშე თუნი?
სქანი მოწაფე მი იჸიი დუცუ ტვინი ვაიღუნი!
უპაპური ქიანას მელი გილაპარპალანც,
ალბეთ თექი, სქანი ჸუდეს, მუმული გილაკარკალანც,
ღეჯი გეგმას ადგინენც, გირინი სიმინც კაკალანც,
თოლისერი ორჩქილარი იჸი, მამანტ სკოლას კვარკვალანც!
ანწ მუ გიჭირც, გეზარხულუ, ვაგაიჭირდ შურო რინა,
ონჯღორეში მუთა გიჩქ, ჸვასჷ აწგოფინჷ რკინა,
ხვალე დუგოსქილიდუანც მოწიკვილი სქანი ნინა
მინაკაში მონწალირც, ქაშუსუნი იშო თინა!
ხობწყარიპიც ალარექჷ ფირქე საქმე გიღუ ჯგირო,
ღორჯოსჷ დო ციტუენცჷ გინართუქუ ანწი ჭირო.
თოლი განჯინი თიში უკული თექ ალერიკა ირო
მეტი ვაგაბედა ვარა გაკორქჷნქ იშო ქვირო.
მარა იშენი ვაბჯოგჷქ, ნინა გიღუ ჭიჭე ფლიდი,
ჩხორო მესის დემეპეჯი, ქიიხვარე სერიში ბინდი,
თეატრის ქჷთმობწყჷნთ, ზეიმი იჸუაფუ დიდი,
ქჷმორთი, ქჷმარისინე, სქანი კაღუჯგუა ჩხვინდი.
თუ ღვინიკიეს დოგიჸვილ, წაქათ მიღუ სქანო ჯგირი,
სქანი საპატიცემოთ, ნაწყარიშათ გაკობზირი,
ოჭუმარეში მოსავალით ხაზირი რე არძა წჷრი,
იმენდი რე ქჷმოზოჯჷნთ, სი დო სორდიაში ვირი.
ეი ვალალა!
1946წ.