ცაშფერი სიშორე
| ბორიობას გჷნაშინა by [[Author:ტერენტი გრანელი|]] |
| ორიგინალური ნინა - ცისფერი სიშორე ქორთული. გინმათანგალი რამინ შელია |
დღა ითებუ უფერო რუმე სერი მოურცუ,
რუმე სერი მოურცუ უჩათ გინოღაფილი.
ფერდიას მიკოთხოზჷ გოშინა დო ნარღინი,
შურიში ეშმაღალარი თენეფიში ფაფინი.
თე მუსიკა მისხუნუ, მოკო ირო ურჩქილე,
გოსურდული ვორექჷ, მანგარინე მალასჷ.
მარე მიბურჯუანცჷ უძირაფუ ბორია,
სერით ვამაცალენცჷ თოლიშ მიკოდვალასჷ.
ირო თაში ვორექჷ მუ ფქიმინე ვამიჩქჷ
შარას გინომჭკჷრჷნა ყორანი დო ყვარია...
ზარხულიში დღალეფი, პეულეფი მესიში
მიჸორცჷ დო მონატრჷ მუჭო ფთქუა ვარია.
თუდო საფულეფი რე, უჩა ფიქრი მორეთჷ
( ცასჷ ათოხანტილი გენიოსი ვორექჷ! )
ჩქიმ დაია ზოზია - გიჩინანქჷ ათესჷ
ონთხორესჷ იბგორჷ ქართიში არე - მარესჷ.
ჩქიმ ხოლოსჷ გილულა შურიში ქექე ლანდეფი,
უკოროცხჷ რიცხვიში ჭვიმა შემაწუხენცჷ
თაში ნობღვე მა ბედი ირო გილამგარენი
თოლისერი მუგელჷ სი ტერენტი გრანელი!
დარდეფქ ქჷმოფურინჷ ფარფალიაში ფსუათჷ,
იბწვალინი თიშ მეტი თე რინა მუ რენია.
მითინ ვარე ჩქიმნერო ჭვილი დო მონტებული
საქორთუო ქიჩინი გრანელიში გენია.
ანწი ირო ვამოკო ვორდე ომორგუალე,
ჩქიმი ბრელცჷ ონჯარჷ, მოღალატე ბრელირე,
ჭარკჷნდი ბორიაცალო რინა ჩქიმი ირთანცჷ
შულადირი ვორექჷ შური ონდეთ იქანც.
დღა ითებუ უფერო, რუმე სერი მოურცუ,
რუმე სერი მოურცუ უჩათ გინოღაფილი,
ფერდიას მიკოთხოზჷ გოშინა დო ნარღინი
შურიში ეშმაღალარი თენეფიში ფაფინი...